Uldesuir a Rechad el Kirel a Nglunguuch
“Sel kululuuch e a kumelechesiu er a Dios el ngar bita er ngak el orreked er a chimak e omekrael er ngak sel bo lak kudengei el kmo ak mo mekerang.”—MARÍA.
“A bechik a mle smecher el kasinoma el 13 el rak e mlad. Ak dirk melatk er ngak el milluluuch el mora Dios er a bek el sils e omelechesiu er ngii el orrenges a ringelek. Seikid e ngmlo budech a renguk.”—RAÚL.
“A nglunguuch a ileakl el sengk el mlara Dios el mora rechad.”—ARNE.
A María, Raúl, Arne me a relmuut el bebil a omes er a nglunguuch el ileakl el sengk. Ngokiu a nglunguuch e ngsebechir el mengedecheduch er a Dios, mereng a sulel, e olengit a ngelsuil. Ngulterekokl a rengrir er a Tekingel a Dios el kirel a doluluuch el mo er ngii el kmo: “Ng ngar ngii a blekenged el mor medal a Dios, ele kede ulterekokl el medengei el kmo ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.”—1 Johanes 5:14.
Me nguaisei, engdi te betok el chad a meringel er tir a kongei er a omesodel a Biblia el kirel a nglunguuch. A Steve a mesaod er a mle uldesuel el kirel a nglunguuch. Ngmelekoi el kmo: “Sera le 17 a rekik e a retedei er a sechelik a mlad er a kakerous el tellemall. A ta er tir a mle accident er a mlai el mad e a reteru er tir a riros el mad.” Me ngmilekerang? Ngkmo: “Ak milluluuch el mora Dios el mo medengelii a uchul me aika el tekoi a dilubech, e dimlak lemonger a nglunguchek. Me ak mlo melatk el kmo, ‘Ngera belkul a kululuuch?’” Me a rechad omdasu el kmo a nglunguchir a diak lemonger me a uchul me te kmo, ngera klungiolel a dolemolem el meluluuch.
Ngdirrek el ngar ngii a bebil el uchul me a rechad a diak lesa klungiolel a doluluuch el mora Dios. A rebebil a melekoi el kmo a Dios a medengei a rokui el tekoi me ngmedengei aike el dousbech me a lechub e ngmondai er kid, me ngdiak a ultutelel a douchais er ngii.
A rekuk bebil a oumerang el kmo a Dios a diak lorrenges a nglunguchir e le te mirruul a mekngit el tekoi er a ngar er a mong. A Jenny a melekoi el kmo: “Sel rullak el mo diak kululuuch a uldesuek el kmo ngkmal diak a belkuk. Ak mla remuul a tekoi el kuuchel er a renguk el kirel, me ngdiak rredemelel a morenges er a Dios.”
E kau a uangera uldesuem el kirel a nglunguuch? A lsekum ke dirrek el oumededenger el kirel a nglunguuch, e ngsebechel mo mechelaod a rengum sel bo modengei el kmo a Biblia a sebechel ngosukid. Ngsebeched el oumerang a omesodel a Biblia el kirel a nglunguuch, * ngngosukid el mo medengei a nger er aika el ker:
-
A Dios ngmera el orrenges a nglunguched?
-
Ngera uchul me a bebil nglunguuch a diak lemonger?
-
Ngmekera omoluluuch e lemorenges a nglunguchem?
-
A nglunguuch ngngera ngsebechel rullii er kau?
^ par. 9 A Biblia a ngar ngii a nglunguchir a rebetok el mesiungel a Dios, el uldimukl a nglunguchel a Jesus Kristus. Aike el Bades el tekoi er a Hebru, el blechoel lokedongall el Chuodel el Testament, a ngar ngii a kuk betok er a 150 el nglunguuch er a chelsel.
