Taem el Kltui a Mo Diak el Mo Cherechar!
Mo lmuut me a bo lak douketui er a rechad engdi ngdirk diak el sebeched el stob a omerellir me a blekerdelir a rechad. A rediak a telemellir el chad a dirk chuarm er a kltui. Me ngngera mo sumecheklii a kltui me ngmo diak el mo cherechar?
Ngdi ta el Jehovah el Dios a sebechel lokngemedii a kltui me ngmo diak el mo cherechar. A Biblia tibir el kmo tiakid a bo loruul er ngii a Jehovah.—Osisechakl 20:22.
A DIOS A MO OKNGEMED A RISEL A KLTUI
-
1. SATAN EL DIABELONG. Satan el mlo omtok a uchul me ngngar ngii a kltui er a beluulechad. A Dios a mo okngemedii a Satan me tirke el rokui el cheltikaik er ngii.—Psalm 37:38; Rom 16:20.
-
2. MEKNGIT EL BELUULECHAD ER A SATAN. A Dios a mo okngemed aike el uchul a kltui, luldimukl er a rechad er a balatiks me a remengeteklel a klechelid el tir a melisiich a kltui. Ngdirrek el mo okngemedeterir a rechad er a siobai el tir a merechorech a rengrir e diak el melemalt omerellir.—2 Petrus 3:13.
-
3. BLEKERADEL EL OLECHOTEL A DIAK EL CHELERRUNGEL. A Biblia ouchais el kmo a rokui el chad a uldiukes er a klengit me ngngar ngii a blekerdelir el blechoel el mo omdasu, omelechesiu, e meruul a mekngit. (Rom 5:12) E a ta er ngii el mekngit a ouketui e meruul omerellel a kltui. A Dios a mo ngosuterir a rechad el mo mesisiich er aikakid el rokui el omerellel a klengit me bo lak a kltui el mo cherechar.—Isaia 54:13.
A BIBLIA TIBIR A BELUULECHAD EL DIAK A KLTUI ER NGII
-
1. NGMO DIAK A CHELEBIRUKEL EL OMERUUL. A Rengedel a Dios el ngii a melemalt el kabelment er ngii el ngar er a eanged, a mo mengedereder er a beluulechad el mo cherechar. (Daniel 2:44) Ngmo diak omengetukel me a rediak lungil omerellir el chad. A Dios a mo sumechokl aike el rokui el chelebirukel lechebangel a rechad er chelecha el taem.—Lukas 18:7.
-
2. ROKUI EL CHAD A MO MELECHESUAR ER A BUDECH. Ngdiak a chad el mo chuarm er a mekemad me a omelemall er a rechad. (Psalm 46:9) A rokui el kiei a mo sorir a budech me a beluulechad a mo selebechakl.—Psalm 72:7.
-
3. ROKUI EL CHAD A MO UNGIL A KLENGAR ER TIR. A rokui el chad a mo kaiuecholt a mera el bltikerreng. (Mateus 22:39) Ngmo diak a chad el chuarm mo lmuut er aike el mekngit el uldesuir er a ngar mong me a mekngit el tekoi el dilubech el mo er tir me ngdiak bo lomekcharm er tir. (Isaia 65:17) Tiakid el taem e ngmla mokngemed a kltui me a rechad a “ungilbesrir el kiei el ngar a beluu el ungil a rengrir er a cherrungel budech.”—Psalm 37:11.
Kau koureng el mo kiei er a chouaitia el beluulechad? Mo lmuut er chelecha el taem e a rebetok a mla suubii el mo diak louketui loeak sel loltaut omellach er a Biblia. (Psalm 37:8) Tia uaisei el kirir a rebetok el miliol el Sioning er a Jehovah el meliuekl er a beluulechad el rokir. Alta ngkakerous a ulekurulir me a siukang er tir engdi te ngar er a kltarreng e kaubltikerreng.—Isaia 2:2-4.
A Resioning er a Jehovah a kmal dmeu a rengrir el mo ouchais er kau aike el bla lesuub el mla ngosuterir el mo outekangel a chelebirukel me a omengetukel. Aike el bo msuub a mo ngosukau el mtechir a kltui loba bltikerreng. Ngsebechem el suubii el mo oubltikerreng el mora rokui el chad el mo lmuut er tirke el diak loba omereng el saul me a lechub e te ouketui er kau. Seikid e ke mo metik er a deurreng me a deleuill er kau me a rebebil a mo lmuut el ungil. E a ngaruchei er ngii e ke mo suubii a rolel e ngsebechem el kiei el mo cherechar er a beluulechad el diak a kltui er ngii el ngar cheungel omengederederel a Rengedel a Dios.—Psalm 37:29.
Nglocha Dirrek el Mo Soam
A ONGKERONGEL
Ngera Ngmo Mengetmokl a Rengedel a Dios?
A Jesus a mle medengei el kmo a Rengedel a Dios a di ta el kabelment el sebechel sumechokl a mondai er tia el chutem. Ngera bla longetmokl a Renged el melisiich er a klaumerang er kid?
