A kltui a mesisiich el uldasu el rullii a chad el kmal mo chetil a chad me a lechub e ngcheldebechel er a rechad. Ngdelalem er a rengul me ngblechoel el di melatk a mekngit el kirir.

Ngbetok a uchul me a rechad a mo ouketui er a rebebil. Ngdiak louketui er tir le ngngar ngii a loruul er ngii e ngbai te ouketui er a lechad er ngii. Tirke el muketui a lomes er tir a rechad el kmo ngmekngit a blekerdelir, sorir el meruul a mekngit, me a lechub e ngdiak el sebechir el mengodech el mo ungil. Te omes er tir el diak lengerang, sebechir el mo uchul a tellemall, me a lechub e te uchul a mondai. A rechad el louketui a locha mla mo chuarm er a mekngit me a lechub e ngdiak el melemalt el omeruul me a lechub e ngkuk tang el luchul me ngmla medalem a kltui er a rengrir.

Ngsebeched el di diak bo dodengelii a chad e mo ouketui er ngii. El ua tiang, a uldesuir a rechad el longull e betik a rengul er tir a ngar ngii a lerellii er a uldesuel a chad el kirir a rebebil. Me ngbeot er a kltui er a ta el chad a oberk e mo uldesuir a rokui lodengelterir.

Sel bo dodengelii a uchul me ngkmal beot er a kltui a oberk e kede mo mtebengii a uchul me a rechad a kauketui. Me nguaisei engdi a deterebengii a lemelemel a kltui e ngkired el mo medengelii a risel a kltui. A Biblia ouchais er kid.

A UCHELEL A KLTUI A DIMLAK LOMUCHEL ER A RECHAD. A kltui ulemuchel er sel taem el ta er a anghel er a Dios el mlo okedongall el Satan el Diabelong a mlo omtok er ngii. ‘Ngii a ulemekoad rar chad ra uchelel’ a ultekengel. Ngika el ‘bulak e demal a blulak’ ngkaikid er a lomekdubech a kltui me a omerellel a kltui. (Johanes 8:44, BT; 1 Johanes 3:11, 12) A Biblia mesaod er ngii el kmo ngchedelekelek a rengul, e kesib a rengul, e mekngit omerellel.​—Job 2:7; Ocholt 12:9, 12, 17.

A RECHAD A DIAK EL MECHERRUNGEL ME NGBEOT ER TIR EL MO OUKETUI. Ngike el kot el chad el Adam a mlo otirakl er a Satan e mlora klengit. Sei a uchul me a rokui el chad a uldiukes er a klengit e diak el mecherrungel. (Rom 5:12) Kltui a uchul me a ketengel a Adam el sechal er a Kain a milekodir ochellel er a Abel. (1 Johanes 3:12) Nguaisei el betok el chad olecholt a bltikerreng me a klechubechub. Me nguaisei engdi rechad el uldiukes er a klengit a uchul me te blechoel el mo melatk er a di tir, e mo mechechei, e kedidai a rengrir. Aika el blekeradel osiul a kltui.​—2 Timothy 3:1-5.

KLTUI A MUKEROUL SEL LAK EL SEBECHED LOUTEKANGEL ER A RECHAD. A beluulechad el dekiei er ngii a melisiich er a kltui loeak a blekeradel me a uldasu el ngii a diak lolecholt er a klechubechub e bai di melemall er a rebebil. Te betok a diak el sebechir loutekangel er a rechad, e mengetukel, e melekoi omelemall el cheldecheduch, omecheracheb, e melemall a klalo e le “beluulchad el rokir a ngar eungel Ngikel Mekngit.”​—1 Johanes 5:19.

Me nguaisei a Biblia diak di louchais a risel a kltui ngdirrek louchais a mo semecheklel.