Ungil me a Mekngit: Omelilt el Kirem el Meruul er Ngii
A rolel omelilt er a ungil me a mekngit el doruul a ngar ngii a bo lerellii er a klengar er kid. Tiang a lodengelii a Jehovah. Sei a uchul me ngsoal a dekiei el loltirakl a llechul.
A Jehovah soal a lebo er ngii a budech me a deurreng er a klengar er kid.
“Ngak a RUBAK el Dios el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiu ngii. Ulekum me kom [orrenges] a tekingek! Seikid e a budech er kemiu a omaoch el ua omoachel ma llemeltiu a ua chedesaoch er a daob.”—Isaia 48:17, 18.
A Dios el Ulemeob er kid a medengelii sel kot lungil rolel a klengar. Ngmengemedaol er kid el mo oltirakl a ulekrael er ngii e le ngmedengei el kmo ngmo orelled. Sel doltirakl a llechul e ngkmal diak bo doumededenger el kmo omelilt er kid ngmo ungil me a lechub e ngdiak. Kede mo blechoel el ungil melilt, el ngii a mo mekrolid el mora budech me a deurreng.
A Jehovah diak longerechir er kid el mo meruul er a tekoi el diak el sebeched el rullii.
“A llach el kumeskemiu er chelechal sils a diak le sal meringel ma lechub e le cheroid er kemiu.”—Duteronomi 30:11.
Sel dekiei el loltirakl a llechul a Dios el kirel a ungil me a mekngit e nglocha mo kired el melodech a uldesued me a omerelled. Me nguaisei engdi Jehovah diak longerechir a betok er kid. Ngii el Ulemeob er kid me ngmedengei aike el sebeched el meruul. E sel dolemolem el menglou er a klemedengei er kid er a Jehovah e kede mo metik el kmo, a “llechul a diak le meringel.”—1 Johanes 5:3, BT.
A Jehovah tibir el kmo ngmo olengeseu er tirke el melilt el kiei loltirakl a llechul.
“Ngak a RUBAK el Dios er kau; ak melisiich er kau e dmu er kau el kmo, ‘Lak medakt, e ak mo ngosukau.’”—Isaia 41:13.
Ngkmal sebeched el kiei el loltirakl a llechul a Dios el kirel a ungil me a mekngit e le ngii el mo olengeseu er kid. Ngsebechel ngosukid loeak a Tekingel el Biblia, el ngii a melisiich er kid e meskid omelatk.
Rebetok el miliol el chad el meliuekl er a beluulechad el rokir a mla metik el kmo, tir el kiei el loltirakl a llach er a Biblia el kirel a ungil me a mekngit a uchul me ngmla lmuut el mo ungil a klengar er tir. Kau, ngsoam el lmuut el mo medengei a betok el kirel aike el ungil ulekrael el ngar er a Biblia? Ngsebechem lomuchel loeak a omorriter er a di tada el brochure el mengai er a Biblia el Mkiei el Mo Cherechar! el sebechem el metik er ngii er a jw.org/pau. Ngngar ngii aika el edei el suobel er ngii:
-
Ngmekera Sebechel a Biblia el Rullii a Klengar er Kau el Lmuut el Mo Ungil?
-
A Biblia Meskid Omelatk
-
Ngsebechem el Oumerang er a Biblia?
Sel bo morriter er a Biblia el Tekingel a Dios e ke mo metik el kmo, ngdiak el dikea usbechel e ngbai “kmal sebeched el ultuil, er chelechang el mo cherechar.” (Psalm 111:8, NW) A kot lungil rolel a klengar a sel doltirakl a llach er a Biblia el kirel a ungil me a mekngit. Me nguaisei, engdi Dios a diak bo lorrimel er kid el mo oltirakl. (Duteronomi 30:19, 20; Josua 24:15) Ngomelilt el derta er kid a kired el meruul er ngii.
