Ngua lulemlaoch a Jesus, a ungil chais el kirel a Rengedel a Dios a lomerk er ngii er a beluulechad el rokir. (Mateus 24:14) A Daniel el babier er a Biblia ouchais er kid el kmo tia el Renged a kabelment er a Dios. Ongeru el bliongel er tia el babier a ngar ngii a ulaoch el kirel aike el meklou el kabelment me a lechub e ngrenged er a rechad, el ulemuchel er a renged er a Babilon er a irechar el mei er chelecha el taem. A 44 el kekerei el bades a mesaod el kirel a mo duubech er a ngar medad el kmo:

“A Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.”

Tia el ulaoch me a lmuut el bebil er a ulaoch er a Biblia omlaoch el kmo a Rengedel a Dios a mo mtechei a rokui el omengederederir a rechad e mo rullii tia el beluulechad el mo ultebechel e budech. Ngmo uangera klengar er cheungel tia el Renged? Aika bebil er a telbiil el di kmedung e ngmo tmaut.

• MO DIAK A MEKEMAD

  Psalm 46:9: “[Dios a] merrob a mekemad er a beluulchad el rokir; ng mengam a balech e melemall a biskang, e melul omekreakl er a ngau!”

  Molatk el kmo ngmo uangera beluulechad a lsekum te molab aika el udoud me a llomeserreng el lousbech el meruul a klekedall er a mekemad el lousbech el kirel aike el mo klungiolir a rechad er a bai omekoad er tir! Tia el telbiil a mo meketmokl er cheungel a Rengedel a Dios.

• NGMO DIAK A SECHER

  Isaia 33:24: “Ng mo diak a tal chad el kiei er a beluad el lmuut el mo mengeremrum el kmo ng smecher.”

  Molatk er a beluulechad el diak a chad el ngar ngii a rektel a chaidirengul, kasinoma, malaria, me a lechub e ngngii di el bedengel a rakt. Ngmo diak a usbechel a osbitar me a kar. A rokui el mo kiei er tia el chutem er a ngar medad a mo cherrungel a klisichel a bedengir.

• NGMO DIAK A NGELSENGESEL A KALL

  Psalm 72:16: “Bo le betok a redechel a wheat er a beluu; ma ikel bukl di bo le medekedek er a dellomel el kall.”

  A beluulechad a mo omekdubech a kall el sebechir a rokui el chad el melai. Ngmo diak a klengerenger me a diak a chad el smecher le ngngesonges cheio er ngii.

• NGMO DIAK A RINGEL, KLENGITERRENG, ME A KODALL

  Ocholt 21:4: “[Dios a] mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”

   Tia belkul a kmo kede mo kiei el mo cherechar er a baradis el chutem el cherrungel a klisichel a bedenged! Tiakid a telbilel a Jehovah el Dios el betik a rengul Ulemeob.

Aikang ngmeringel er kau oumerang? Alta ruumesingd el chad a mo kmo ngkmal sorir tia el klengar losaod er ngii e letibir a Biblia, engdi ngbetok a uchul e ngmeringel er tir oumerang el kmo ngsebeched el kiei el mo cherechar. Ngdiak el mechas a rengud e le ngdiak a chad el mla experience er ngii e ouchais er kid el kirel.

A rechad tirkaikid er a lesibil a klengit me a kodall e lemeringel el chuarm er a ringel me a chelebuul, a uchul me a ruumesingd el chad omes er tia el rolel a klengar el kmo ng normal. Ngdi tia el rolel a klengar a kmal cheroid er sel telbilel a Ulemeob el Jehovah el Dios el kirir a rechad.

A Dios a olterekokl er a rengud er aika el rokui el tekingel el kmo: “Ng diak le iit el rullii sel kulemdasu er ngii el kirel; ng mo remuul a bek el kuldurech er ngii el mo meruul.”​—Isaia 55:11.

A Biblia mesaod er a Jehovah el kmo ng “diak lomulak.” (Titus 1:2) Me aika el rokui el telbilel a Dios el kirel a ngar medad a uchul me ngungil dolatk el kmo: Ngmera el sebechir a rechad el kiei el mo cherechar er a Baradis el ngar tia el chutem? Ngera kired el meruul me dengai a klungioled er a telbilel a Dios? Ngar aike el oeak uriul el llel tia el babier e ke mo metik a nger er aika el ker el kmal sebechel ngosukau.