Uchei e kede milsaod er a Croesus el milecheblad er a prist er a Delphi, luchul e ngmlo mechitechut er a Persia. Me nguaisei engdi a Biblia ouchais a ulaoch el kirel a King er a Persia el komakai omesodel, e tilaut.

Bekord el 200 el rak er uchei er a lemechell ngika el king er a Persia, e a profet el Isaia el chad er a Hebru uluuchais er a ngklel ngika el king el kmo ng Sairus, e dirrek el uluuchais er a rolel e ngmo nguu a mats er a Babilon.

Isaia 44:24, 27, 28: “Ngak a RUBAK . . . Ak mekdertii a daob el oba di tal meirei. Ak melekoi er a Sairus el kmo, ‘Ng kau ngikel mo mengedereder el kirek; ke mo rullii sel soak cho bo moruul er ngii: ke mo otebedii a tekingem ma Jerusalem lluut el meteketek, ma omekedecheraol er a Templo lluut el melechang.’”

A dotirakl a tekingel a chad er a reksi er a re Grik el Herodotus, e a resoldau er a Sairus ultucheklii a ralm er a Omoachel Eufrates me ngmlo diak bo el siseb er a mats er a Babilon me ngmlo meched me a resoldau a mlo sebechir el merael imuul mo soiseb er a mats. Uriul er a lenguu a mats a Sairus e ngilbeteterir a Rechijudea er a blebaol e milechititerir me te lmuut el mora Jerusalem el mo meleketek er ngii, le ngmiltemall er a 70 el rak er uchei.

Isaia 45:1: “A Sairus a king el ngellitel er a RUBAK! Ng mla ngiltii el mo mesisiich a ikel beluu; ng oldurech er ngii el mo mengeroid a klisichir a re king; ng mo mkais a sisebellel a beluu el kirel.”

Tirka el chad er a Persia di mirrael el soiseb er a teblo el meklou el chesmerel a siseball el di mle belkais. A lsekum a rechad er a Babilon a mle medengei el kirel a Sairus e ngmle sebechir el chosimer aike el siseball el mo tuobed el mora omoachel. Me nguaisei a mats a di mle teleu el diak el selebechakl.

Tia el mengasireng el ulaoch a di ta er aike el betok el ulaoch er a Biblia el mla tmaut. a Ngdiak el ua prediction er a redi chad el leko ngmlara chedrir, el diak lemera el chelid. A ulaoch er a Biblia mlara ngike el melekoi el kmo: “Ngar sel kmal uchelel e ak uluuchais er a mo rsel; ak di mla ouchais er a mo duubech.”​—Isaia 46:10.

Ngdi ta el mera el Dios el ngklel a Jehovah sebechel omlaoch. (Psalm 83:18) A belkul tia el ngakl a “Ngike el Uchul e Omekdubech.” Tia omeketakl er ngii el kmo a Jehovah sebechel mo medengei aike el mo duubech er a ngar medad e omekrael a blekeradel el mo otirakl er a soal. Tia olterekokl er a rengud  el kmo ngmera el mo otaut aike el rokui el bla letib.

Ngsoam el mo medengei el kmo a ulaoch er a Biblia ngdmu el kmo ngerang el kirel chelecha el taem er kid? Bekord el 2,000 el rak er a mla me mong e a Biblia ulemlaoch el kmo “ng mo medbedubech a ikel mor ngii a ringel er ngii sel bo lekeed a ulebongel er a beluulchad.” Tia diak losaod er a ulebongel er a rechad me a lechub e tia el chutem el dekiei er ngii. Ngbai mesaod el kirel a ulebongel er a uldikel, odechelakl, me a ringel lechelebangel a rechad el mla mo betok el telael el rak. Ka me dorriter a bebil el ulaoch el mesaod er a taem er a “ulebongel.”

2 Timothy 3:1-5: “Sel bo lekeed a ulebongel er a beluulchad . . . [a] re chad a di mo omdasu er a di tir, e di sorir a udoud, e di oumead er tir e ngarbab a rengrir; te mo mekngit a ngerir el mor a re chad, e diak lorrenges a tekingir a re demerir ma re derrir, e diak loreng a saul, ma diak le sorir el melatk er a chelid. Ng mekngit omerellir el mor a re chad, e diak lousubes a telemellir a re chad; toltuub er a re chad, e mekngit a blekerdelir, e bekeu el sorir el omekcharm er a re chad, e ouketui a ungil tekoi. Te cheblad, e meterkakl el diak lomekerreu, e belkuuk er a kldidairreng, e kuk sorir a tametereng el ngar uchei er a Dios. Te di oubail er a leko te chedal a chelid e diak er omerellir ochotel a klisichel a klemerang el lodengei.”

Ke kongei el kmo aika el blekeradel a kmal mla mo klou er chelecha el taem? Ke mtebengii el kmo kede di iliuekl er a rechad el kmal di tir el chemat er tir, sorir a udoud, e blkuuk er a kldidairreng? Ke mesa el kmo a rechad a kmal demanding e diak el sorir el kongei a uldesuir a rekuk bebil? Ke ulterekokl el mesa el kmo te kmal betok a diak lolengesenges er a rechad er a blirir me a oumesingd el chad a di sorir a tametereng el kuk ngaruchei er a Dios. E kede omes aika el blekeradel el di merael el lmuut el mo mekngit.

Mateus 24:6, 7: “Kom mo remenges a ngerel a mekemad . . . ma chisel a mekemad . . . A meklou el beluu a mo kaumekemad; ma renged a mo kaodechelakl.”

A bebil estimate a kmo, a ildisir a rechad er a 1914 el mei el mla mad el tekoi er a mekemad a uchul, a betok er a 100 el miliol. A ildisir tirka el chad a kuk betok er a ildisir a rechad el kie betok el beluu er chelechang. Molatk er a klungel a klengiterreng, langel, me a ringel el mekemad a uchul. Engdi aika el renged a kmal dirkak el ngai a klubelir er ngii e leterob a mekemad.

Mateus 24:7: “A bosech . . . a mor ngii.”

A World Food Programme a melekoi el kmo: “Ngar tia el beluulechad lomekdubech a kall el enough el mekeleterir a rokui el chad, a 815 el miliol a mo bad el songerenger. Tia chimo el chad er a chelsir a retetiu. Me a lmuut kung, chimo el chad er a chelsir a retedei a smecher le ngngesonges cheio er a bedengir.” Te estimate er ngii el kmo a bek el rak e te bekord el 3 el miliol el ngalek a mad er a klengerenger.

Lukas 21:11: “Mor ngii er ker me ker a kdekudel el desiu.”

Bek el rak e ngduubech a bekord el 50,000 el desiu el sebechir a rechad el feel. Bekord el 100 er ngii a tomall a building. E a bek el rak e ngduubech a kmal klou el desiu. A doltirakl er a ta el estimate, e a desiu a mla mekodeterir a re 471,000 el chad er a delongelel a rak er a 1975 me a 2000.

Mateus 24:14: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.”

A Resioning er a Jehovah el kuk betok er a 8 el miliol a omerk er a klumech er a ungil chais el kirel a Rengedel a Dios er a beluulechad el rokir er a bekord el 240 el beluu. Te omerk er a klumech er a city me aike el beluu el cheroid er a rechad, me a chelsel oreomel me a rois. A ulaoch a melekoi el kmo sel lemeketmokl tia el ureor el mo ungil er osengel a Dios e ngmei a “ulebongel er a beluulchad.” Tiang ngera belkul? Ngbelkul a kmo ngulebongel er a omengederederir a rechad e uchelel a omengederederel a Rengedel a Dios. Ngera el telbiil a mo tmaut sel bo longedereder a Rengedel a Dios? Ka molemolem el menguiu.