A LENGAR ngii a betik er a rengum el mla mo smecher e ke locha dirrek el mlo omelechesiu a betok el kakerous el tekoi. Nglocha kmal mlo mekngit a rengum, sabisi, e diak mo medengei el kmo ke mo mekerang. Nglocha dirrek el kmal mlo kesib a rengum, ouuchel a rengum, e medakt. Ke locha mlo melatk el kmo ngngar ngii a ultutelel a kulemolem el chad.

A klengiterreng a diak el belkul a kmo ngmechitechut a rengum. E ngbai ochotii el kmo ngkmal betik a rengum er ngii. Me nguaisei, engdi ngngar ngii a sebechel mo chemolodau?

Alta ke omelechesiu el kmo ngdiak a mo ulebengelel a kngtil a rengum engdi nglocha sebechem el metik ongelaod omoruul aikang:

LAK MONGEMEKL A KNGTIL A RENGUM

A rechad a kakerous a klemengetel a taem me a dirrek el rolel a lengar er a klengiterreng. Engdi ngsebechel mo ungil a rengum sel omlangel. A Vanessa el dulsaod er ngii er a uchei a kmo: “Ak kmal di mo lmangel me bo lsebechek lotobed a kngtil a renguk.” A Sofía el kmal mle mereched a kodellel a merrengel a kmo: “Ngkmal meringel er ngak a melatk a tekoi el dilubech, el di ua ringelel sel le open e le clean er a telemellel a bedenged el mla mo infected. Me alta ngkmal meringel me nguaisei engdi tia omkar er a telemellel a renguk.”

MOSAOD AIKE EL NGAR ER A ULDESUEM ME A RENGUM

Nguaisei el lebebil e nglocha soam el di kau el tang. Engdi a klengiterreng a kmal klou el berraod  el diak lungil a di lekau el mengol er ngii. A 17 a rekil buik el Jared el mla mo smecher a demal a kmo: “A kuluuchais er a rebebil aike el mlara renguk me a uldesuek. Alta nglocha dimlak el make sense a bebil tekoi el kullekoi engdi ngmlo ungil a renguk er a kuuchais.” A Janice el dulsaod er ngii er a uchelel a ouchais er a ta er a klungiolel. Ngkmo: “Ngkmal milengelaod er ngak er a kungedecheduch er a rebebil. Ak mlo feel el kmo te medengelii ak chelebangel er ngii me ngak a kmal diak di lengak el tang.”

MKENGEI A NGESO

A ta el toktang a kmo: “A rechad el ngar er a klengiterreng sel lomechei er a resechelirir me a telungalek er tir me lolengeseu er tir sel lemad a betik er a rengrir, e ngmo beot er tir outekangel e mo mesisiich a rengrir.” Mouchais er a resechelim aike el sebechir el meruul lolengeseu er kau. Te locha kmal sorir lolengeseu engdi ngdiak lodengei el kmo ngngera ungil loruul er ngii.​—Osisechakl 17:17.

MOLEKEED ER KAU ER A DIOS

A Tina kmo: “Sera lemad a bechik er a kasinoma e ngmlo diak a chad el sebechek el mengedecheduch er ngii. Me ak milengedecheduch er a Dios el kirel a rokui el tekoi! A kumuchel er a sils er ngak er a bek el sils lolengit er ngii me lengesukak el rokir a ta el sils. Ngngilsukak er a betok el rolel el diak el sebechek el mchais el rokui.” A Tarsha el mlad a delal er a le 22 a rekil a kmo: “Omengiuek er a Biblia er a bek el sils a milengelaod er ngak. Ngmilskak a ungil tekoi el sebechek el melatk.”

MOLEBEDEBEK ER SEL TAEM EL LEBEKIIS A BETIK ER A RENGUM

A Tina melemolem el melekoi el kmo: “A uchelel e a okiis a dimlak longelaod er ngak e le ngak me a retedei el ngelekam el sechal a kmal uluusbech er a bechik. Engdi eua el rak er uriul, e tia el omelatk a mengelaod er ngak e melisiich er ngak el melemolem. Sel kullatk er ngii el mla mekiis e ngmeskak a budech me a klou el deurreng!”

Nglocha mo meketeket el taem el di lemekngit a rengum. Me nguaisei a experience er a Vanessa sebechel melisiich er kau. Ngmelekoi el kmo: “Ke locha mo omdasu el kmo ngkmal diak el sebechel mo ungil a rengum, engdi cherengel a taem e ngmo diak el sal meringel.”

Me alta ke mo miss er a betik er a rengum me nguaisei engdi ngdirk ngar ngii a klungiolel omolemolem el ngar. Ngoeak a ngelsuil a Dios e ngsebechem loldeu er a rengum er a klengar lobengterir a resechelim e ngar ngii a moktek er a klengar er kau. E kmal di kmedung e a Dios a mo olekiis er a rulekoad. Ngkmal soal omluut el mo mechulii a betik er a rengum. E seikid e a ringelel a kodellir a mo diak el mo cherechar!