Ngera Uchul Me Kede Ousbech er a Rengedel a Dios?
Sera kot lomuchel a klechad, e ngika el Ulemeob, el ngklel a Jehovah, a di mle chimo el Merreder. E milengedereder loba bltikerreng. Ngrirellii a klebokel el sers er a Eden el mo delengcheklir a rechad. E dirrek el milsterir a betok el kelir me a ungil lurerir. (Genesis 1:28, 29; 2:8, 15) Me a rechad a mle sebechir el kiei el ngar a budech oleko te millemolem el chederedall er a omengederederel ngika el betik a rengul el Dios.
Tirke el kot el chad a ultngeklii a Dios el Merredelir
A Biblia ouchais el kirel a ulemtok el anghel, el mlo okedongall el Satan el Diabelong, el dilu el kmo a Dios a diak a llemeltel el mengedereder. Ngmillisiich er a uldasu el kmo a rechad a mo dmeu a rengrir a lak loltirakl a ulekrael er a Dios me a omengederederel. Me ngklengiterreng, e le kot el demad me a delad el Adam me a Eva a mlo oltirakl a tekingel, e mlo omtok er a Dios.—Genesis 3:1-6; Ocholt 12:9.
Me a Adam me a Eva er a lotngeklii a Dios el Merredelir, e te urridii a delengcheklir el Baradis me a omeltkir el kiei el mo cherechar el cherrungel a klisichel a bedengir. (Genesis 3:17-19) Tia dirrek el mlo uchul a chelebulir a rengelekir. A Biblia a kmo a Adam a mlora klengit el uchul me a “klengit a siliseb er a beluulchad . . . ma kodall a ulekiu a klengit el mei.” (Rom 5:12) A klengit a dirrek el mlo uchul a ta er a klou el chelebuul: “A re bebil er a re chad er tial beluulchad a ngar ngii a klisichir, e a re bebil a mo chuarm er tir.” (Olisechakl 8:9) Me a lsekum a rechad a di tir el mengedereder er tir, e ngblechoel el mo uchul a mondai.
A OMENGEDEREDERIR A RECHAD A OMUCHEL
A Nimrod a ulemtok er a Jehovah
A Biblia a ouchais er a kot el chad el mlo merreder el Nimrod. Ngikang a ulemtok er a omengederederel a Jehovah. Me ngar seikid el taem el mei, e a rulab a derreder a uluusbech a klisichir el omekcharm er a rechad. E ngar a bekord el 3,000 el rak er a mla me mong, e a King Salomon a milluches el kmo: “A re mucheracheb a lmangel, e diak a tal chad el mo mengelaod er tir, ele tirkel omcheracheb er tir ia olab a klisiich.”—Olisechakl 4:1.
E diak a klekakerous er sel taem me chelechang. Sera 2009, e a babier el tilobed er a United Nations a mesaod el kmo, a mekngit lomerreder a lomes er ngii el “ta er a kot el klou luchul aika el mekngit el tekoi el dubechang er a beluulechad.”
NGMLA MO TEMEL EL MESMECHOKL!
A beluulechad a ousbech er a rungil merreder me a ungil kabelment. E tiang a telbiil el ledillii Ngike el Ulemeob!
Ngmo lmuut er a kot lungil kabelment me ngdirkak bo lsebechel sumechokl a meklou el mondai er a klechad
A Dios a mla toketekii a Rengedel, me a lechub a kabelment, el mo mtechei a rokui el kabelment er a rechad, “e sola e ngii a mo medechel el mo cherechar.” (Daniel 2:44) Tiaikid ngii el Renged el loluluuch el olengit er ngii a rebetok el miliol. (Mateus 6:9, 10) Engdi Dios a diak bo lorreder er tia el kabelment. Ngbai mla ngiltii a mo Merrederel, el ngii a mla ta lekiei el ua chad. Ngikang ngtechang?
