Ngdi kmedung e a kabelment er a Dios el ngar er a eanged a mo mengedereder er tia el chutem. Seikid el taem e a rechad a mo kiei el ta rengrir e mo dmeu a rengrir er a ureor loruul. A Dios a mla tutkii a Jesus Kristus el mo mengedereder. Ngika diak el uai tirke el mengedereder er chelechang el diak lomekerreu er a rechad. A Jesus a mo blechoel el meruul a ungil el kirir a rechad. Ngmo mengedereder el oba bltikerreng, klechubechub, me a llemalt, e kmal mo ungil omerellel.​—Isaia 11:4.

Ngdiak el lebo er ngii a klekakeakl er a rechad loltirakl a beluu el ble lechad er ngii. Te di mo tang el rokui. (Ocholt 7:9, 10) Rokui el chad el mo kiei er tia el chutem a mo betik a rengrir er a Dios me a rengar bita er tir e mo dmak el loureor el ngar er a kltarreng el mo kutmeklii sel dimla moktek er a Dios el kirir. Te mo mengetmokl er tia el chutem el delengcheklir.​—Psalm 115:16.

Sel bo longedereder a Rengedel a Dios er tia el chutem e ngike el Ulemeob a mo omtebechel er a blekerdelel a eanged me ngmo diak bo lolemall er a chutem me a rokui el ngar er a chelsel. (Psalm 24:1, 2) A Jesus er a lengar tia el chutem e ngulechotii a klisichel a Dios er a le chelleklii a eolt. (Markus 4:39, 41) Ngar cheungel omengederederel a Kristus e ngmo diak demedakt er a kmo ngmo duubech a tellemall er a beluu. A Rengedel a Dios sel bo longedereder e a rechad me a charm a mo kiei el ngar er a budech e mo diak a remelemall er tia el chutem.​—Hosea 2:18.

A rokui el chad a mo mecherrungel. Ngdiak a chad el mo smecher, mo chuodel, me a lechub e ngmo mad. (Isaia 35:5, 6) A rechad a mo dmeu a rengrir el kiei er a klebokel e ungil kltmokl el chutem el uai sel lekiliei er ngii tirke el kot lobekel er a sers er a Eden. Ngar tia el beches el blekeradel e a chutem a mo omekdubech a betok el kall el ua sers er a Eden me ngkmal mo betok a kelir a rechad. (Genesis 2:9) Rokui el mo kiei er a Baradis a mo “mengang el medinges” el di ua rechedal a Dios er a irechar el renged er a Israel.​—Levitikus 26:4, 5.

Sel bo longedereder er a beluulechad el rokir a kabelment er a Dios e a rechad el rokui a mo dmeu a rengrir er a budech e mo ungil e melemalt a omerellir el mora rechad. Ngmo diak a mekemad, e diak a mekngit lusbechel a dereder, e diak a chad el mo meringel loureor losiik aike el lousbech. A Biblia tibir el kmo: “A re bek el chad a mo kiei el ngar a budech er bita er a dellemelir el bilong ma kerrekar er tir el fig, el diak a mo omekdakt er tir.”​—Mika 4:3, 4.

A rokui el telungalek a mo er ngii a blirir e diak bo lebekikl el kmo ngngar er ngii a mo ngmai er tir me a rokui el ureor el bo doruul a mo meskid a deurreng. El ua lolekoi a Biblia, “a ureor el bo loruul a di mo ungil.”​—Isaia 65:21-23.

A Biblia tibir el kmo: “A beluu a mo mui er a klemedengei er a RUBAK.” (Isaia 11:9) Tirke el mo kiei er tia el chutem a mo melai a klubelir er a llomeserreng er a Ulemeob el Jehovah me a dirrek el blebelel. Ngdiak bo lousbech er a klemedengei er tir el meruul a klekedall er a mekemad me a lechub e lolemall er a rebebil. (Isaia 2:4) Te bai mo mesuub el mo kiei el ngar er a budech e mengetmokl er tia el beluulechad.​—Psalm 37:11.

A Dios a kmal kiltmeklii tia el beluulechad me bo lsebeched el oldeu a rengud er a klengar er kid er a bek el sils. Ngmle moktek er ngii el rechad a kiei er tia el chutem el mo cherechar. (Psalm 37:29; Isaia 45:18) A Dios a “mo okngemedii a kodall me ng mo diak el mo cherechar” e otutii tia el di mla moktek er ngii. (Isaia 25:8) A Biblia tibir el kmo, “Ng dikea lluut el mor ngii a kodall, e mo diak a klengiterreng, ma langel, ma ringel.” (Ocholt 21:4) A Dios a mo mesterir tirke el mo suobel er a okngemedel tia el mekngit el blekeradel er a beluulechad me tirke el diak el mochur a ildisir el chad el mo mekiis a techellir el mo kiei el mo cherechar.​—Johanes 5:28, 29; Rellir 24:15.

 Rebetok el miliol er chelecha el taem a mengetmokl er tir el mo kiei er cheungel a omengederederel a Rengedel a Dios el ngii a di kmedung e ngmei. Alta te diak lemecherrungel engdi te melasem el mo rechad el Dios a soal a bo lekiei er a beches el beluulechad er ngii. Te mekera meruul el uaisei? Loeak sel losuub el kirel a Jehovah el Dios me ngike el lulderchii el mei el Jesus Kristus.​—Johanes 17:3.

Mosuub a lmuut el betok el kirel a rolel e ngsebechem el mo suobel er a ulebongel er a beluulechad e mo kiei er a beches el blekeradel er tia el chutem el ngii a di kmedung e ngmei. Mosuub er a Biblia el di rolel a cheldecheduch el obengkel a ta er a Sioning er a Jehovah el diak el ocheraol el ousbech er a babier el Mkiei el Mo Cherechar!