1-3. Nglocha milekerang e mo er ngii a mondai er a delongelel a Euodia me a Sintikei? E mekera doibngid er chouaika el mondai? (Momes er a siasing er a uchelel a suobel.)

 A REMESIUNGEL a Jehovah a omes er a babilengel a Dios el Biblia el kmal mekreos. Me kid el diak demecherrungel a uchul me a lebebil er a taem e kede muklatk. Me ngmo uangera uldesued sel demuklatk? Ka molatk er a Kristiano el Euodia me a Sintikei el mlo er ngii a chetituokel el tekoi er a delongelir. Ngera el tekoi? A Biblia a diak losaod el kirel, engdi ngokiu tia el tekoi e ngsebeched el omekesiu er ngii er tiang.

² A Euodia a locha ulemekedong er a rebebil el rudam me a rudos el mo milil e omengur er a blil. Engdi ngdimlak loleker er a Sintikei, e a uriul e ngmlo medengei el kmo ngkmal mle ungil a omililir. Me nglocha dilu el kmo: ‘Ngkmal mechas a renguk er a Euodia el dimlak loleker er ngak! Ak kmal ulemdasu el kmo ngsechelik.’ Ngkmal mlo mekngit a rengul e mlo diak el sal oumerang er a Euodia. Me a Sintikei a mlo rullii a blengur e omekedong er a osisiu el chad el mei engdi ngdimlak loleker er a Euodia! Me a chetituokel el tekoi el dilubech er a delongelir a mle sebechel el tomellii a budech er a chelsel a ongdibel. Me a Biblia a diak losaod el kmo ngera mlo rsel, engdi tirka el teru el  odos a locha kilengei er a osmechokl er a Paulus e mlo ungil a delongelir.​—Fil. 4:2, 3.

³ Me a lebebil er a taem e a osisiu el blekeradel a dirrek el mo uchul a chetituokel er a chelsel a ongdibel er a rechedal a Jehovah. Me nguaisei, engdi aika sebechel el mesmechokl me a lechub e kede oibngid er ngii a lsekum kede oltirakl a ulekrael el ngar er a Tekingel a Dios el Biblia. A lsekum kede omes er a Babilengel a Jehovah el mekreos, e kede mo kiei el oltirakl a ulekrael er ngii.​—Psa. 27:11.

4, 5. Ngera el ulekrael a ngar er a Tekingel a Dios el kirel a domtebechel er a uldesued?

⁴ Ngmo meringel er kid el mtebechelii a uldesued sel dodengei el kmo ngmlo mekngit a omeruul el bedulkid. Ngmeringel el tekoi sel bo lemekngit a omeruul el bedulkid e le kid el chad er a ngodech el beluu el ngodech a bedenged er a rebebil. E tiang a lmuut el mo klou el mondai a lsekum e ngike el meruul er ngii a kldemed el Kristiano! Me a ker a kmo, a Tekingel a Dios ngsebechel el ngosukid er sel taem el bo dechelebangel a mekngit el omerellel a chad?

⁵ A Jehovah a ungil medengei el kmo ngera sebechel el mo duubech a lsekum a chad a diak lutebechelii a rengul me a uldesuel. A uldesuel a chad sel bo lemekngit e ngsebechel el dmung, e remuul a tekoi el bo louuchel er a rengul er uriul. Me ngkmal rolel a llomeserreng sel doltirakl a ulekrael er a Biblia e bo domtebechel er a ngesechel a rengud e lak dolasem el di mesaod er kid! (Monguiu er a Osisechakl 16:32; Olisechakl 7:9.) Kede rokui el kired el melasem el mo diak di lebeot el tekoi e bo lechetid e bai mo blechoel el ousubes. A Jehovah me a Jesus a omes er a klausubes el kmal klou a ultutelel. (Mt. 6:14, 15) Me kau, ngkirem el melasem el mo blechoel el ousubes me a lechub e ngkirem el oureor el omtebechel er a uldesuem?

6. Ngera me ngkired el kerekikl el omtebechel a uldesued?

⁶ A rechad el diak el sebechir el mtebechel a uldesuir a kmal blechoel el mo mekngit a blekerdelir. E tiang a rulleterir a rebebil el mo chetirir el obengterir. Me a mekngit a blekerdelel el chad el ngar er a chelsel a ongdibel a diak lungil sechelei. Nglocha mo melasem el omart er a mekngit el blekerdelel me a lechub e ngkltui er a rengul engdi ngdi mo chemolt el okiu a “mekngit el omerellel.” (Osi. 26:24-26) Me a remechuodel a locha mo sebechir el ngosuir el mo medengei el kmo a mekngit el blekeradel me a kltui me a ngasecherreng a diak a basio er ngii er a chelsel a cheldebechelel a Dios. E a mekreos el Babilengel a Jehovah a kmal meketeklii tia el tekoi. (Lev. 19:17, 18; Rom 3:11-18) Me kau, ke kongei er tia el tekoi?

7, 8. (a) Ngmekera Jehovah a lomekrael er tia el meues el cheldebechelel? (b) Ngera bebil el ulekrael el debetik er a Babilengel a Dios, e ngera uchul me ngkired el olengesenges er ngii?

⁷ A Jehovah a omekrael e omeka er a rechedal el ngar tia el meues el cheldebechelel el okiu a “blak a rengul e mellomes a rengul el mesiou” el lomekrael er ngii a Kristus el ngii a “bdelul a eklesia.” (Mt. 24:45-47; Efe. 5:23, BT) Me ngika el mesiou a di ua chelechad er a ruungerachel er a taem er a rekot el Kristiano, el kongei er a mlukreng el tekingel me a lechub e ngklemechel a Dios, e omes er ngii el kmal mekreos. (Monguiu er a 1 Thesalonika 2:13.) Me ngera bebil er a ulekrael me a lechub e nguleklatk el ngar er a Biblia el mo uchul a klungioled?

⁸ A Biblia a omeklatk er kid el mo er a miting er a bek el blsechel. (Heb. 10:24, 25) Ngmengelechel er kid el rokui el mo oba ta el klaumerang. (1 Ko. 1:10) Ngdirrek el mengelechel er kid el mo nguu a Renged el mo kot er a klengar er kid. (Mt. 6:33) A Bades a dirrek el melisiich er a klungel a ultutelel a ngerecheled me a techelled el  mo oldingel a obliil me a buai me a dirrek el ngii di el taem me a techall. (Mt. 28:19, 20; Rel. 5:42; 17:17; 20:20) Ngomekrael er a Rekristiano el mechuodel me te melemolem el mengikiid er a cheldebechelel. (1 Ko. 5:1-5, 13; 1 Ti. 5:19-21) E dirrek el omeklatk er kid el mo mengikiid a bedenged me a rengud er aike el tekoi me a omeruul el Jehovah a ouketui.​—2 Ko. 7:1.

9. Ngtecha bla ltetkii a Jesus el mo olengeseu er kid el mo medengei a Tekingel a Dios?

⁹ A rebebil a omdasu el kmo ngsebechir el di tir el mo medengei a belkul a tekoi el losaod a Biblia. Me nguaisei, engdi a Jesus a mla tutkii a ‘blak a rengul el mesiou’ el mo omekrael er kid. Me sera rak er a 1919 el mei, e a Jesus Kristus a oldurech er ngika el mesiou el mo olengeseu er kid el mo medengei a tekoi el medung er a Babilengel a Dios e omekrael er kid. Me sel dolengesenges a ulekrael er a Biblia, e kede mo melisiich er a budech me a kltarreng me a klikiid el omeruul er a chelsel a ongdibel. Me ngkmal ungil el dolatk el kmo, ‘Ngak, ngblak a renguk elolengesenges a ulekrael er ngika el blak a rengul el mesiou el lousbech er ngii a Jesus er chelechang?’

10. Ngua ngera omesodel a babier er a Esekiel el kirel a diak lemeues el cheldebechelel a Jehovah?

¹⁰ A llechukl el Tekingel a Jehovah a osisecheklid el mo medengei a tekoi el meketmeklang er sel diak lemeues el cheldebechelel el ngar er a eanged. A profet el Esekiel a milsa ues el kirel tia el cheldebechelel a Dios el ngar er a eanged el ua kmal bekerurt el mlai el di obebelbult el oltirakl er a soal a Jehovah. (Ese. 1:4-28) Me tia el diak lemeues el cheldebechelel a omekrael er a meues el cheldebechelel el ngar tia el chutem, e dirk melemolem el merael beduluchei! Me ka di molatk a betok el tekoi er tia el cheldebechelel el mla mengodech er a chelsel aika el mereko el teruich el rak, e bo lulterekokl a rengum el kmo a Jehovah a uchul aika el meklou el omelodech. Me ngkmal di kmedung e a Kristus me a rechanghel a mo okngemedii tia el mekngit el beluulechad, e a mlil a Jehovah a di mereched el mo kobkellii a llemeltel el mengedereder e chemedolii tia el chedaol el ngklel!

11, 12. Ngera bebil tekoi el meketmeklang er a chelsel a cheldebechelel a Jehovah?

¹¹ Ka molatk a tekoi el bla leketmokl a cheldebechelel a Jehovah er chelecha el taem er a uriul sils. Okedecherul a Blai. Te ngar er ngii a rebetok el dart el chad el kmal mechesang el meleketek er sel beches el klou el obis er a Resioning er a Jehovah el ngar er a beluu er a Warwick, New York, U.S.A. Me a chelechad er a Worldwide Design/Construction Department a omekrael er a rebetok el telael el mla tonget a temir e kmal meringel el oureor el meleketek a beches el Blil a Ongdibel e menglou a obis er kid. Me kede kmal oba omereng el saul el kirir a rebetok el kongei el melenget a temir el meruul aika el ureor! E lak mobes, a Jehovah a omekngeltengat er a rokui el omerk er a Renged el meliuekl er a beluulechad el tir a blak a rengrir el melenget a ududir el mo olengeseu aika el ureor.​—Lk. 21:1-4.

 ¹² Skuul. Ka kuk molatk a betok el kakerous el skuul el di melisiich er a Tekingel a Dios. (Isa. 2:2, 3) Ngar er ngii a Skuul el Kirir a re Pioneer me a Skuul el Kirir a Rumerk er a Rengedel a Dios me a Skuul er a Gilead me a Bethel Entrants’ School me a Skuul el Kirir a Rudam el Oldingel a Ongdibel me a Rebecherir me a Skuul el Kirir a Remechuodel me a Skuul el Kirel a Berkel a Klumech er a Renged me a Skuul el Kirel a Chelechad el Omekerreu a Obis er a Resioning er a Jehovah me a Rebecherir. A Jehovah a kmal soal el olisechakl er a rechedal! Me a omesubel a Biblia a sebeched el nguu el okiu a website er kid el jw.org, el ngar er ngii a betok el babier el ngar er a betok el dart el bedengel a omelekoi. E tia el website a dirrek el ngar er ngii er ngii a ileakl el suobel el kirir a rengalek me a telungalek me a dirrek el chisel a beluu. Me kau, ke ousbech er tia el jw.org sel moldingel a obliil me a dirrek el temel omengull el telungalek er kau?

13. Ngera el ngerachel a mla moterekokl er kid el chedal a Jehovah?

¹³ Ngkmal ileakl a techall el dobang el mo chedal a cheldebechelel a Jehovah! Kid el mla mo medengei a soal me a llechul a uchul me ngerecheled el mo meruul a llemalt e mesebechakl er a llemeltel el mengedereder. Me a cherengel a taem el lorael tia el beluulechad el mo mekngit, me kid a di kired el mo “ouketui a mekngit” el di ua uldesuel a Jehovah. (Psa. 97:10) Ngdiak dekengei el “melekoi a mekngit el kmo ng ungil e melekoi a ungil el kmo ng mekngit.” (Isa. 5:20) Me kid el soad el odeuir a rengul a Jehovah a uchul, me kede melemolem el klikiid a blekerdeled me a uldesued me a rengud. (1 Ko. 6:9-11) Ngkmal betik a rengud er a Jehovah, e mui el oumerang er ngii a uchul me kede kongei el mo blak a rengud el mo er ngii, e kiei el oltirakl a llechul el bleketakl el medung er a mekreos el Babilengel. Me ngblak a rengud el olengesenges e oltirakl ngii el llechul er a chelsel a blid me a ongdibel, me a urered me a skuul me a ngii di el basio. (Osi. 15:3) Me bo dosaod a lmuut el bebil er a rolel e kede ochotii a blakerreng er kid el mo er a Dios.

14. Te mekerang a ruungalek el Kristiano e ochotii a blakerreng er tir el mo er a Dios?

¹⁴ Okurulir a rengalek. A ruungalek el Kristiano a ochotii a blakerreng er tir el mo er a Jehovah sel lomekeroul er a rengelekir el oltirakl er a Tekingel. Ngkirir el kerekikl me lak lolisiich a uldasu er tia el beluulechad sel lolisechakl er tir, e le tia el uldasu a diak a basio er ngii er a chelsel a telungalek er a Kristiano. (Efe. 2:2) Me a mla metecholb el Kristiano el chedam a diak el kirel el omdasu el kmo, ‘Ngsiukang er a beluak el chedil a kirel el olisechakl er a rengalek.’ A Biblia a kmal bleketakl el kmo: “Kemiul chedam, . . . momekeroul er tir er chomengedung ma chomellach ra Rubak.” (Efe. 6:4, BT) Me a chedam me a chedil el meluu er a Dios a sorir a rengelekir a bo leua Samuel, el Jehovah a ulebengkel er a lorael el mo klou.​—1 Sa. 3:19.

15. Kede mekera e ochotii a blakerreng er kid el mo er a Jehovah sel dolilt a tekoi?

¹⁵ Omelilt el doruul. A uchei er a doruul a meklou el omelilt er a klengar, e ngsoad el ochotii a blakerreng er kid el mo er a Dios el okiu sel dosiik a ulekrael el ngar er a Tekingel me a cheldebechelel. Ngsebeched el mesaod er tiang el okiu a tekoi el rebetok el chedam me a chedil a meruul er ngii. Te betok el chad er a ngodech el beluu a oureor er a ta er a beluu e oldurokl er a rengelekir el mo er a belurir me lomekeroul er tir a rechederir me bo el sebechir el melemolem el mengereker. E tiang a omelilt el loruul er ngii a derta el chad, engdi ngungil a lak dobes el kmo a Dios a omekngerachel er kid er a bek el tekoi el dolilt el mo meruul. (Monguiu er a Rom 14:12.) Me a omomdasu e nguchul a llomeserreng a lsekum kede meruul a omelilt er kid el diak dultuil er a ulekrael er a Biblia? Ngkmal diak! Kid a ousbech a ngeso er a Demad el ngar er a eanged e  le ngkmal diak el sebeched el di kid el mtebechel a blekekled.​—Jer. 10:23.

16. Ngera el omelilt a mle kirel a ta el chedil el meruul er ngii er a lochellii a ngelekel? E ngera ngilsuir el mo ungil melilt a tekoi?

¹⁶ A ta el redil a milechellii a ngalek el sechal er a taem el lekiei er a ngodech el beluu e mlo soal el oldurokl er ngii el mo er a belual me lomekeroul er ngii a demal me a delal ngii el dil. Sel taem er a lemechell e a ta el Sioning er a Jehovah a ulemuchel el mesuub el obengkel ngii el dil. Ngkmal mlo soal a tekoi el lesiluub, e dirrek el silubii el kmo ngar er a osengel a Dios e ngkmal ngerechelel ngii el dil el omekeroul e olisechakl er a ngelekel el mo mengull er a Jehovah. (Psa. 127:3; Osi. 22:6) Me ngmilluluuch el ouchais er a Jehovah a rokui el ngar er a uldesuel e ullengit er Ngii me lengesuir el mo meduch el omekeroul er a ngelekel. (Psa. 62:7, 8) Ngdirrek el uluuchais er ngika el ledak el mesuub e ullengit a ngeso er a rebebil el ngar er a ongdibel. Ngtilbir er a rengul el mo meruul a melemalt el tekoi, alta e a rechad er a blil me a resechelil a ullerrimel er ngii el mo oldurokl er a ngelekel. Me a bechil a kmal mlo mechas a rengul er a omerellir a rudam me a rudos el olengeseu er ngii me a ngelekel, me ngkilengei el mo mesuub a Biblia e ulemuchel el ngar er a miting el obengkel a bechil me a ngelekel. Me a omomdasu, e ngika el chedil ngmlo medengei el kmo a Jehovah a ulenger er a nglunguchel? Ngkmal ulterekokl el mlo medengei!

17. Ngera el ulekrael a bla dengai el kirir a rechad el dosuub a Biblia el obengterir?

¹⁷ Oltirakl a ulekrael. A ta er a rolel e kede ochotii a blakerreng er kid el mo er a Dios, a sel doltirakl a ulekrael el oltobed a cheldebechelel. Ka molatk er a ulekrael el tilobed el kirir tirke el dosuub a Biblia el obengterir. Ngmesaod el kmo ngkmal ungil sel debechelii a omesuub el ousbech er a babier el Ngerang Mera el Lolisechakl a Biblia? E sel bo demerek e dechoit a sesei el taem el mesaod el kirel a cheldebechelel a Dios el mo er tir. Ngsebeched el ousbech er a video el Ngera Meketmokl er a Blil a Ongdibel? Me a babier el Te Rua Techang a Meruul a Soal a Jehovah er Chelechang? Me sel derekir a omesubel a Biblia Olisechakl el babier, e a lsekum ngika el chad a olengeriakl er a omesubel e a ulekrael a kmo, ngsebeched el omuchel el mesuub er a babier el “Keep Yourselves in God’s Love” alta e ngdirkak lemetecholb er seikid el taem. Tia el cheldebechelel a Jehovah a mla meskid a ulekrael el uchul me ngsebechir a rebeches el disaiplo el mo “mesisiich el oumerang.” (Kol. 2:7) Me kau, ke oltirakl aika el ulekrael el oltobed a cheldebechelel a Jehovah?

18, 19. Ngera bebil el uchul me ngkired el di mereng a sulel a Jehovah?

¹⁸ Ngar er ngii a betok el uchul me ngkired el mereng a sulel a Jehovah! Kede blsel el kirel a klengar er kid, e le lak ngii e ngdiak dechad er chelechang. (Rel. 17:27, 28) Ngmla meskid a kmal mekreos el sengk el Babilengel el Biblia. Me kede kmal oba omereng el saul e kongei er a klemechel, el di ua Rekristiano er a Thesalonika er sera lenguu a tekingel a Dios e te kilengei er ngii e uleltirakl er ngii.​—1 Th. 2:13.

¹⁹ Me kid el mla nguu a llechukl el Tekingel a Dios a uchul me kede mla mo kmeed er a Jehovah me ngii a mla mo kmeed er kid. (Jak. 4:8) Ngika el Demad el ngar er a eanged a mla meskid a ileakl el techall el mo chedal a cheldebechelel. Me kede kmal mereng a sulel el kirel aika el klengeltengat! A ta er a milluches er a psalm a lilechesii a klebokel el chelitakl e milengitakl el kmo: “Moreng a sulel a RUBAK ele ng ungil, a bltkil a rengul a diak a ulebengelel.” (Psa. 136:1) Me ngar er a Psalm 136, e kede metik er a tekoi el “bltkil a rengul a diak a ulebengelel” el 26 el taem. Me a lsekum kede ochotii a blakerreng er kid el mo er a Jehovah me a cheldebechelel, e kede mo chormii a klemerang er aika el tekoi e le ngmo sebeched el kiei el mo cherechar!