1, 2. (a) Ngua ngera uldesuir a rebebil el kirel a tekoi el kmo a Dios a ngar er ngii a cheldebechelel? (b) Ngera kede mo mesaod er tia el suobel?

 A DIOS, ngar er ngii a cheldebechelel? A rebebil a kmo: “Ngdiak dousbech er a cheldebechel el omekrael er kid. Ngdi mo er ngii a deleuill er kid me a Dios, e ngungiang.” Me tiang, ngmelemalt el uldasu? Ngerang a klemerang el tekoi?

² Ngar tia el suobel e kede mo mesaod a tekoi el ochotii el kmo a Jehovah el Dios a chelderoder a tekoi el loruul. Kede dirrek el mo mesaod el kmo ngmo uangera uldesued sel lemei a ulekrael el mla er a cheldebechelel a Jehovah. (1 Ko. 14:33, 40) Sel taem er a rekot el Kristiano me chelecha el taem er kid, e a Bades a mla ngosuir tia el meues el cheldebechelel a Jehovah el rullii a kot el klou el ureor er a berkel a klumech er a ungil chais. Me kid el meruul a tekoi el oltirakl er a Biblia e olengesenges a ulekrael el lomeskid a cheldebechelel a uchul, me kede ungil kltmokl, e budech a delongeled, e ngar er a kltarreng el ua ta el ongdibel.

3. Ngera oterekeklii a rengum el kmo a Jehovah a kmal ungil chelderoder a tekoi el loruul?

³ A rokui el blebelel a Dios a meketeklii el kmo Ngii a kot el ungil el  chelderoder a tekoi el loruul. A Biblia a kmo: “A RUBAK a uleak a llemesel a rengul el mebii a beluulchad, e uleak a klemedengei el locha eanged er a le ngar ngii.” (Osi. 3:19) Kede di medengei a “di dertelkib el olechotel a klisichel. Ng di omengelulau er ngii el de rirenges.” (Job 26:14) Me nguaisei, engdi tia el di telkib el klemedengei er kid el kirel a planet, me a btuch me a galaxy a meketeklii el kmo ngkmal mengasireng aika el klekedall e kmal ungil el chelderoder. (Psa. 8:3, 4) A chelsel a ta el galaxy a ngar er ngii a betok el miliol el btuch el dmak el merael el ngar er a blechebechel. Ngmekera e mo uaisei? E le aika el planet el ngar tia el solar system a merael el meliuekl er a sils el di ua lorael el oltirakl a llechul a traffic! Me aika el tekoi a kmal meketeklii el kmo ngkmal mellomes a rengul a Jehovah el ngike el “rirellii a eanged” me a chutem, me ngkmal rredemelel a nguu a odanges me a blakerreng me a omengull er kid.​—Psa. 136:1, 5-9.

4. Ngera me a tekoi er a science a dirkak bo el sebechel el onger a betok el ker?

⁴ A tekoi er a science a mla meketakl a betok el tekoi el kirel tia el melidiul me a chutem el rullii a klengar er tia el chutem el mo beot. Engdi ngmla er ngii a betok el ker el dimlak el sebechel el longer. El ua tiang, tirke el mesuub a btuch a kmal diak el sebechir el smodii sel rolel e ngmlo er ngii a melidiul me a lechub sel uchul me kede kiei er tia el chutem el ngklel a Earth el mui er a betok el klengar. Me a redi chad a dirrek el diak el sebechir el smodii sel uchul me a klechad a dirk oureng el kiei el mo cherechar. (Oli. 3:11) Me ngera me ngkmal betok a ker el diak dodengei a nger er ngii? A ta er a uchul, a rebetok el scientist me a relmuut el bebil a melisiich er a uldasu el kmo ngdiak a dios, e melisiich er a klaumerang el kmo kede mla er a mongkii el mei. Engdi ngar er a Biblia el babilengel a Jehovah, e ngonger a ker el ngii a omekberaod a uldesuir a rebetok el chad.

5. Ngokiu a ngera el rolel e a klengar a ultuil er a tekoi el bla leketmokl a Dios?

⁵ Kid a kiei el klengar er kid a ultuil er a mla meketmokl el llechul a klengar el Jehovah a miluchelii. A rechad er a dengki me a ralm me tirke el engineers, me a rumekall a skoki me a rechad er a botk a rokui el meruul a urerir el oltirakl a mla meketmokl el rolel a loruul aika el tekoi. El ua chad er a botk el meruul er a urerel el oltirakl er a rolel e ngmla meketmokl a bedengel a chad. Me ngungil medengei el kmo ngkirel ker a chaidirengul me ngdiak el mechesang el osiik er ngii. Me kede rokui el oba omengull el kirel a klengar el bla leketmeklii a Dios. Me a lsekum kede melasem el mo meruul a tekoi el lomtok er a llechul a gravity, e ngulterekokl el mo uchul a kodelled!

6. Ngera me a remengull er a Jehovah a kirir el mo chelderoder a tekoi el loruul?

⁶ Tia el melidiul a kmal ungil chelderoder a tekoi er a chelsel. Sei a uchul me kede medengei el kmo a Jehovah a kmal soal a remengull er ngii a bo lungil el chelderoder a tekoi el loruul. Nguaisei, a Jehovah a mla meskid a Biblia el sebechel el lomekrael er kid. Me a lsekum kede kiei el diak deteloi er a cheldebechelel, e doltirakl a llechul, e ngmo diak ledeu a rengud e mo chuarm a klengar er kid.

7. Ngera meketeklii el kmo a Biblia a kmal ungil kltmokl el babier?

⁷ A rebebil a omdasu el kmo a Biblia a di babilengir a rebebil el chad er a Judea me a Rekristiano. Engdi tiang a babilengel a Jehovah, e ngii a millilt er a rechad el mle soal a bo loluches er ngii. Me ngkmal ungil a blechebechel a tekoi er a chelsel el di melisiich er a ta el uldasu el omuchel er a Genesis el mo er a Ocholt. E a moktek er ngii a di melisiich er a llemeltel a Jehovah el mengedereder, e dirrek el mesaod a otutel a moktek er ngii el kirel tia el chutem el okiu a Rengedel, el longedereder er ngii a Kristus el ngike el ‘uldidellel a rasech.’​—Monguiu er a Genesis 3:15; Mateus 6:10; Ocholt 11:15.

8. Ngera me kede medengei el kmo a rechad er a Israel a mle ungil chelderoder a tekoi el loruul?

 ⁸ A rechad er a Israel er a irechar a mle ungil el kerebai e le tir el uleltirakl a llechul a Dios. Me ngar er a cheungel a Llach er a Moses e a ‘redil a milsiou er a tungelel a Tento er a RUBAK.’ (Exo. 38:8) Me ngmla er ngii a ulterekokl el rolel sel bo lolukl er a delengcheklir me a dirrek el tento. E a uriul e a King el David a milengedereder er a rolel a bo loruul a urerir a reprist me a rechad er a Levi er a chelsel a templo. (1 Kr. 23:1-6; 24:1-3) Me sel taem el rechad er a Israel a ullengesenges er a Jehovah, e ngulemekngeltengat er tir me ngmle budech a delongelir e dmak el ngar er a kltarreng.​—Dut. 11:26, 27; 28:1-14.

9. Ngera ochotii el kmo a ongdibel er a rekot el Kristiano a mle ungil chelderoder a tekoi er a chelsel?

⁹ Me a ongdibel er a rekot el Kristiano a dirrek el mlukrael e millai a klungiolir el okiu a ulekrael er a chelechad er a ruungerachel el tir a apostol er a Jesus. (Rel. 6:1-6) E a uriul e te mlo er ngii a relmuut el bebil el mlo chedal a chelechad er a ruungerachel. (Rel. 15:6) Me a ulekrael me a uleklatk a mileketmokl el okiu a babier el lulluches tirka el chad me a lechub e ngtirke el ullengeseu er tir. (1 Ti. 3:1-13; Tit. 1:5-9) Me ngmilekerang a ongdibel e ngmai a klungiolir er a ulekrael el lulemesterir a chelechad er a ruungerachel?

10. Ngera dilubech er sel taem er rechad a ullengesenges a ulekrael el mla er a chelechad er a ruungerachel? (Momes er a siasing er a uchelel a suobel.)

¹⁰ Monguiu er a Rellir 16:4, 5. A rudam el omtechei er a chelechad er a ruungerachel a mirrael el oldingel ‘ngiil beluu e milsterir a ruumerang a ikel llach el meltib er a re apostol ma re mechuodel el ngar a Jerusalem.’ Me a lsekum a ongdibel a oltirakl aika el ulekrael e te lmuut el mo “mesisiich el oumerang e mle bek el sils el lorael el mo betok.” Me ngera kede suubii er tirka el chad el sebechel el ngosukid er chelechang?

11. Te mo mekerang tirke el mla metutk el oungerachel sel lengai a ulekrael er a cheldebechelel a Dios?

¹¹ Te mo mekerang a rechedal a Chelechad el Omekerreu a Obis er a Resioning er a Jehovah, me tirke el odam el oldingel a ongdibel me a remechuodel er a ongdibel, sel lengai a ulekrael er a cheldebechelel a Dios er chelechang? A Biblia el babilengel a Jehovah a meskid a ulekrael el kired el mo olengesenges e oltaut. (Dut. 30:16; Heb. 13:7, 17) Me a chad el di melekoi a mekngit e omtok, a diak a basio er ngii er a chelsel a cheldebechelel a Dios. E le tia el blekeradel a di tomellii a bltikerreng me a budech me a kltarreng er a chelsel a ongdibel. Ngmera el tekoi, a Kristiano el blak a rengul a diak lekengei el mo kedidai a rengul e lomtok el ua omerellel a Diotrefes. (Monguiu er a 3 Johanes 9, 10.) Me ngungil a dolatk el kmo: ‘Ngak, ak melisiich er tirke el blechoel el lobengkek? Ak kongei el oltirakl e melisiich aike el ulekrael el lomeskid a rudam el oungerachel?’

12. Ngera el ulekrael a mla meketmokl el kirir tirke el mengilt el mo mechuodel me a remo mesiou er a ongdibel?

¹² Ka molatk er a tekoi el dirk el tilbir a Chelechad er a Ruungerachel. Ngar sel “Ker el Mla er a Remenguiu” er a Ongkerongel er a November 15, 2014, el tekoi er a Merikel, e ngmesaod er a beches el rolel e te mengilt tirke el mo mesiou el mechuodel me a lechub e te mo mesiou er a ongdibel. Tia el suobel a mesaod er a rolel e a chelechad er a ruungerachel a melutk er a remo meruul aika el ureor er a taem er a rekot el Kristiano. Me ngulemuchel er sera September 1, 2014, e ngike el odam el oldingel a ongdibel a mo melutk er tirke el mo mesiou el mechuodel me a remo mesiou er a ongdibel. Me ngika el odam el oldingel a ongdibel a melasem el mo medengelterir tirka el odam, e dirrek el mo oldingel a obliil el obengterir a lsekum ngmo er ngii a techall. Ngdirrek el kerekikl el omtab a blekerdelir a rechedal  a telungalek er ngika el odam. (1 Ti. 3:4, 5) Me a chelechad er a remechuodel me a odam el oldingel a ongdibel a kerekikl el merriter a Bades me bo el sebechir el ungil el melilt er a remo meruul aika el ngerachel.​—1 Ti. 3:1-10, 12, 13; 1 Pe. 5:1-3.

13. Kede mekerang e ochotii el kmo kede oltirakl a ulekrael lomeskid a remechuodel?

¹³ Ngkmal kired el mo oltirakl a ulekrael el mengai a uchetemel er a Bades el lomeskid a remechuodel. Tirka el blak a rengrir el klekerengel a delebechel er a Dios a mukrael el okiu a “ikel klemerang” el debetik er a Babilengel a Dios. (1 Ti. 6:3) Ka molatk a tekingel a Paulus el kirir tirke el diak loltirakl a ulekrael er a ongdibel. Tirka el chad a “mesaik me te di kiei el diak a ngeral loruul e di mengesengsang.” A remechuodel a ulemeklatk er tir engdi ngdimlak lolengesenges aika el uleklatk. Me ngmle kirel a ongdibel el mekera er tir? A Paulus a dilu el kmo: “Bo modengelii e mongeroid er kemiu er ngii.” Me tiang a mle tabesul el uleklatk e le ngdiak el belkul a kmo ngika el chad a mocha cherroued. (2 Th. 3:11-15) Me a remechuodel er chelechang a locha mo oltobed a cheldecheduch el kirir a rechad el diak lekengei el oltirakl a uleklatk er a ongdibel el ua omeruul, el chad a omak er a deleuill er ngii me a chad el diak losiou er a Jehovah. (1 Ko. 7:39) Ngmo uangera uldesuem a lsekum a rudam a oltobed a chouaika el cheldecheduch? A lsekum ke medengelii a chad el meruul er tia el tekoi, e ke mo mengeroid er kau er ngii? A blakerreng er kau me a melemalt el omerellem a sebechel el rullii me ngmo ngodechii a blekerdelel e lmuut el mei er a Jehovah. ^[1]

14. Kede mekerang e olengeseu el mengikiid er a ongdibel?

¹⁴ Ngsebeched el kaingeseu el rokui me ngmelemolem el klikiid a ongdibel sel doltirakl a ulekrael el mengai er a Tekingel a Dios. Ka molatk er a tekoi el dilubech er a Korinth er a irechar. A Paulus a chiloit a klisichel me a temel el omerk er a klumech er sel beluu e kmal mlo betik a rengul er a rekldemel el “chedaol el chedal a Dios” el mla er isei. (1 Ko. 1:1, 2) Engdi ngkmal mlo mekngit a rengul er a lerenges el kmo a ongdibel a mla mecherei a chad el meruul a deleboes me ngmelemolem el ngar er a ongdibel! Me a Paulus a milengelechel er a remechuodel me bo lodikii ngika el chad el belkul a kmo ngkirir el otebedii me ngmo diak el chedal a ongdibel. E le lsekum e ngsorir a lolemolem el klikiid a ongdibel, e ngkmal kirir a remechuodel el nguu a “omkukel a blauang” el choitii. (1 Ko. 5:1, 5-7, 12) Me kid sel dekengei el olengesenges er a tekoi el bla letibir a remechuodel el kirel a chad el diak lobult er a mekngit el omerellel, e kede dirrek el olengeseu el mengikiid er a ongdibel e dirrek a omerelled a locha sebechel el mo uchul e a chad el mlo mekngit a obult er a kngtil e mo olengit a klausubes er a Jehovah.

15. Kede mekerang e toketekii a budech er a chelsel a ongdibel?

¹⁵ A ta er a mondai el dilubech er a Korinth a mle kirel el soadel. A rebebil el rudam a mlo kaotutakl er a blil a kerrekeriil. Me a Paulus a uleker er tir el kmo: “Ng diak bai lungil a di berekakl a mekngit el ekor kemiu?” (1 Ko. 6:1-8) Me a osisiu el tekoi a mo er ngii er chelecha el taem. A lebebil er a taem e ngmetemall a delongelir a rudam el tekoi er a siobai el mo uchul e te oriid a ududir me a lechub e ngmlo merael a cheleblad el omeruul. Me a rebebil a mla mo oltutakl er a rudam er tir er a kort. Engdi a Babilengel a Dios a ngosukid el mesang el kmo ngbai ungil a doriid a klokled er a bai dotubii a ngklel a Dios me a lechub e detemellii a budech er a chelsel a ongdibel. ^[2] Me a lsekum ngsoad el mesmechokl a oberaod el mondai me a klaititekangel e ngkmal kired el otutii sel uleklatk er a Jesus. (Monguiu er a Mateus 5:23, 24; 18:15-17.) Sel doruul el uaisei, e kede toketekii a kltarreng er a chelsel a telungalek el tir a mengull er a Jehovah.

16. Ngera uchul me a rechedal a Dios a kirir el mo ta rengrir?

 ¹⁶ A Babilengel a Jehovah a meketeklii sel uchul me ngmengerechir er a rechedal el mo ta rengrir. Me a milluches er a psalm a dmu el kmo: “Ng meral ungil, e deurreng sel le dak el kiei a rudam el ta rengrir!” (Psa. 133:1) Me a rechad er a Israel sel lolengesenges er a Jehovah e ngkmal mle ungil el chelderoder a tekoi el loruul e ta rengrir. A Dios a ulemlaoch el kirel a mo blekerdelir a rechedal er a ledu el kmo: “Ak mo oldak er kemiu el ua sib el ngar a chesimer.” (Mik. 2:12) Me a lmuut el tang, a Jehovah a ulemlaoch el okiu a profet el Sefania el kmo: “E sola e ak mo melodech er a re chad er a ngodech el beluu, me ng di mo ngak el tang a bo loluluuch er ngak; ng diak loluluuch a ngodech el chelid. Te rokui el di mo olengesenges er ngak.” (Sef. 3:9) Me kede kmal mereng a saul e le ngar er ngii a techelled el mo mengull er a Jehovah el ngar er a kltarreng!

17. Te mekerang a remechuodel e sumechokl a mondai e diak letemellii a kltarreng er a ongdibel?

¹⁷ A remechuodel a kmal kirir el mo kerekikl me ngmelemalt a omelilt el loruul, e meketmokl el okiu a bltikerreng a lsekum ngsorir a lolemolem el klikiid, e le ngar er a kltarreng a ongdibel. A Paulus a mle medengei el kmo a bltikerreng er a Dios a diak lemeteketek e le kid el chubur a chad e dirrek el dimlak lolechib er a medal er a chad el meruul a mekngit. (Osi. 15:3) Me Paulus a dimlak lemeterob, e ngbai lilechesii a mesisiich el tekingel, engdi ngolechotel a bltikerreng el babilengel el mo er a rudam er ngii er a Korinth. Me a uriul er a sesei el buil e ngmlo sebechir el mesa ngelsecheklel a ureor e le remechuodel a ullengesenges aika el ulekrael. Me a lsekum a Kristiano a mo touchakl el dimlak el durengul, e a remechuodel a kirir el melasem el ngosuir el meklemeltii a uldesuel el oba tekingel a Dios.​—Gal. 6:1.

18. (a) Ngoeak a ngera el rolel e a ulekrael el medung er a Tekingel a Dios a ullengeseu aike el ongdibel er a irechar? (b) Ngera kede mo mesaod er a ongingil el suobel?

¹⁸ Me ngbleketakl el kmo a mlukrael el uleklatk el ngar er a Babilengel a Dios a ngilsuterir a Rekristiano er a Korinth me a lmuut el bebil el beluu me ngmillemolem el klikiid e budech e ngar er a kltarreng a ongdibel er tir. (1 Ko. 1:10; Efe. 4:11-13; 1 Pe. 3:8) Me tia mlo uchul e a rudam me a rudos er sel taem a mlo sebechir el churrengelii a omesiungir. Me a Paulus a dilu el kmo a ungil chais a “mla mosisechakl el mor a re bek el chad er a beluulchad.” (Kol. 1:23) Me chelechang e a klemedengei el kirel aike el klebokel el moktek er a Dios a oberkang er a beluulechad el olechotel a blakerreng er tirke el chedal a ta el telungalek el oba kltarreng e omerk er tia el klumech. Me a ongingil el suobel e kede mo mesa sel olechotel el kmo te kmal dmeu a rengrir el oltirakl er a Biblia, e dirrek el mla tuib a rengrir el mo mengebkall er a Rubak el Dios el Jehovah.​—Psa. 71:15, 16.