“Ng mlar ngii a kingall er a eanged el ngar ngii a dengchokl er ngii. Ngikel dilengchokl a diliich el ua ikel mekreos el bad el jasper ma carnelian, e mlar ngii a orrekim el kor a bedengel a emerald el meliuekl er a kingellel.”​—Ocholt 4:2, 3.

“Ngii el rokir a di mle medidiich er osisiu el kerdel a ngau. Sel llomes a mlar ngii er ngii a ikel bek el bedengel a chiro er orrekim. Tiakid a ua teletelel a klebkellel a RUBAK.”​—Esekiel 1:27, 28.

Aika el ues el ulemes a apostol el Johanes me a profet el Esekiel a meskid a klemedengei er a klebkellel a Kot el Ngarbab el Dios el Jehovah el okiu a tekoi el dodengei, el ua mengeldoech el mekreos el bad, me a orrekim me a klebkall el kingall er a omerredel. E aikang a ngosukid el mo medengei el kmo, a basio el ngar er ngii a Jehovah a kmal klebokel, e uchul a budech me a deurreng.

Me aika el tekoi el mesaod er a Dios a di ua ledilung a milluches er a psalm el kmo: “A RUBAK a chetengakl, ng kmal kirel mo modanges; ng kired el meluu er ngii el kuk ngar uchei er a rokui el chelid. A chelid er a ikel rokui el ngodech el beluu a di bleob, ngdi RUBAK a rirellii a eanged. A klebkall ma klengarbab a meliuekl er ngii, ma Templo er ngii a chetengakl e kebkall.”​—Psalm 96:4-6.

Me alta Jehovah a Kot el Ngarbab el Dios, engdi ngmengemedaol er kid el mo er ngii el okiu a nglunguuch, e oterekeklii el kmo, ngmo orrenges a nglunguched. (Psalm 65:2) A Dios a betik a rengul e omekerreu er kid a uchul me a apostol el Johanes a mle sebechel el dmu el kmo: ‘A Dios a bltikerreng.’​—1 Johanes 4:8.

“[A Kristiano el disaiplo el Stefanus] el teluchel er a Chedaol Reng, a dilangesbab el mor a eanged e milsa klebkellel a Dios, ma Jesus el dechor er a mo bedul a kadekmel a Dios. Me ng dilu el kmo, ‘Mesa sei! Ak umes er a eanged el blok ma Ngelekel a Chad el dechor er a mo bedul a kadekmel a Dios!’”​—Rellir 7:55, 56.

A telkib el taem er a uchei er a lesa tia el ues a Stefanus, e a Jesus a lulekodir el oba kengei er a remengeteklel a klechelid er a Rechijudea el lulengedecheduch er tir a Stefanus. Tia el ues a oterekeklii el kmo, a Jesus a mla mekiis er a kodall e mukebkall. Me ngokiu tia el ues, e a apostol el Paulus a dilu el kmo: “[A Jehovah a ulekisii a Jesus] er a kodall e lokedengcheklii er a kadekmel er a eanged. A Kristus a mengedereder er a eanged el ngar bab er a rokui el mengedereder er a melidiul, ma rulab a klisiich ma re ngar a deruchall, ma omerreder, ma re merreder; e telechull er a dui el kuk ngarbab er a rokui el dui er a klisichel omerreder er tial beluulchad me sel mei.”​—Efesus 1:20, 21.

 Me a losaod er a ngar er bab el deruchellel, e a Bades a ochotii el kmo a Jesus a di ua Jehovah el kmal omekerreu er a rechad. Me ngar er a omesiungel el ngar er tia el chutem, e ngulemekungil er a resmecher, me a rechitechut, e dirrek el ullekiis er a rulekoad. Me ngokiu a olubet el tengetengel, e ngulechotii a dmolech el bltkil a rengul el mo er a Dios me a rechad. (Efesus 2:4, 5) Me chelechang e ngar er a kadekmel a chimal a Dios, e di kmedung e ngmo mengedereder, e mo omekngeltengat er a rokui el bekongesenges el chad.

“E tia er a kumes [ngak el profet el Daniel] e a kingall er omerreder a le lilecha er a ikel kirel el ngar ngii. E ngikel mle ngar er a irechar el mei [el Jehovah] a dilengchokl er a ta er a ikal kingall er omerreder. . . . E mlar ngii a kmo ng telal telael el chad el ngar isei el mesiou er ngii ma kmo ng telal truich el telael a dilechor er medal.”​—Daniel 7:9, 10.

El ngar er tia el ues er a eanged, e a Daniel a milsang a diak el di el chimong, e ngbai betok el telael el anghel. Me tiang a kmal mengasireng el ues el lilsang a Daniel! A rechanghel a chelechad el reng, e mellomes a rengrir e kmal mesisiich. A deruchellir a kakerous el uldimukl er ngii a reserafim me a rekerubim. Me a Biblia a mesaod el kirir a rechanghel el betok er a 250 el taem.

A rechanghel a dimlak lulemuchel el chad el kiliei er a beluulechad. A Dios a ulemeob er tir er a betok el rak er a uchei er a lomeob er a rechad. Me sera lomeob er a beluulechad, e a rechanghel a mla er isei e ulemes e uleldiu er a deurreng.​—Job 38:4-7.

A ta er a rolel e a rechanghel a mesiou er a Dios, a oeak sel leteloi er tia el klou a belkul el ureor el meketmeklang er chelechang, el ngii a berkel a ungil chais er a Rengedel a Dios. (Mateus 24:14) A apostol el Johanes a milsaod er tir el mlo teloi er tia el ureor el ngar er a ues el lilsang el kmo: “Ak dirrek el milsa kuk tar a anghel el silebek er bab er a melidiul, el oba diak a ulebengelel klumech er a Ungil Chais el mo ouchais er ngii el mor tirkel kiei er a beluulchad, el mor a bek el bedengir a re chad, ma kebliil, ma omelekoi, ma beluu.” (Ocholt 14:6) Me alta e a rechanghel a diak longedecheduch er a rechad er chelecha el sils el ua irechar, engdi te olengeseu el omekrael er a berkel a ungil chais el mo er a remelemalt a rengrir el chad.

“E sola e ng mlor ngii a mekemad er a eanged. A Mikael [el Jesus Kristus] ma re anghel er ngii a uluumekemad er a drakon, e ngii el drakon ma re  anghel er ngii a uleldechelakl er tir; ngdi drakon ma re anghel er ngii a mlo mechitechut, me te mlodik el diak el sebechir el lmuut el mor a eanged. Ngikal kmal klou el drakon a mlodik, ngikel bersoech er a rechuodel, el ngklel a Diabelong, ma lechub e ng Satan, el mengeblad er a beluulchad el rokir. Ng mlechoit el mer a beluulchad ngii ma rokui el anghel er ngii.”​—Ocholt 12:7-9.

A eanged a dimlak a budech er a chelsel. Ngar er a uchelel a reksi er a klechad, e ngmla er ngii a ta el anghel el mlo soal a rechad a bo longull er ngii, e bo lomtok er a Jehovah, e ngika Satan el belkul a kmo, “Ngike el Omtok.” A rebebil el anghel a mlo obengkel el omtok, e tirkang a mlo mekngit el anghel. Te omtok er a Jehovah e mla rulleterir a rebetok el chad el mo omtok er a ulekrael er Ngii.

A Satan me a remekngit el anghel er ngii a kmal mekngit a blekerdelir. Tirkang a cherrouel a klechad e uchul a betok el ringel er tia el beluulechad. El ua tiang, a Satan a milekoad a rokui el chermel me a remesiungel a blak a rengul el Job. Ngdirrek el milekodeterir a reteruich el ngelekel el okiu a “meses el eolt” er a lebukelii a blai el lebla er ngii. E a uriul, e ‘ngmilengebuul er a Job me ng di mlo btuu a bedengel el rokir.’​—Job 1:7-19; 2:7.

Ngkmal di kmedung, e a Satan a mo dibus. Sera lemodik el me er a chutem, e ngmle medengei el kmo, “ng di kedeb ku temel.” (Ocholt 12:12) A Satan a mo mokngemed, e tiang a kmal ungil chais!

“Kau [el Jesus] . . . a ulemechar er a re chad er a bek el kebliil, ma omelekoi, ma beluu ma bek el bedengir a re chad el mo chedal a Dios. Ke mla rulleterir el mo chedal a chimol renged er a re prist el mo mesiou er a Dios er kid, me te mo mengedereder el ngar a beluulchad.”​—Ocholt 5:9, 10.

A rebebil a mo ua Jesus el milekiis er a kodall e mo kiei er a eanged. Ngdilu er a reblak a rengrir el apostol er ngii el kmo: ‘Ak mong el mo mengedmokl er cho bor ngii. E a uriul, . . . e ak lmuut el me ngoikemiu el mo obengkek, me kom mo obengkek er sel kngar ngii.’​—Johanes 14:2, 3.

Ngar er ngii a uchul me tirke el mo er a eanged a mong. Tir me a Jesus a mo churrengelii a Renged el mo mengedereder er a rokui el chad el ngar er a chutem e mo omekngeltengat er tir. E tiang a sel Renged el Jesus a dilu er a rultirakl er ngii me loluluuch el kirel el kmo: “Demmam el ngar a eanged: Bo le modanges a chedaol ngklem; a Rengedem le mei; bo le motaut a soam er a beluulchad el ua ingii er a eanged.”​—Mateus 6:9, 10.

“[Ngak el apostol el Johanes a] rirengesii a klou el ngor el mlar a kingall e millekoi el kmo, ‘Chelechang e a blil a Dios a ngar a delongelir a re chad! . . . Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.’”​—Ocholt 21:3, 4.

Tia el ues a melutk el kirel sel taem el Rengedel a Dios el bo longedereder er ngii a Jesus me tirke el mo mekiis er a kodall el ngar er tia el chutem, a mo okngemedii a omengederederel a Satan, e rullii tia el chutem el mo baradis. Ngmo diak aike el uchul a ringel me a langel el mo er a rechad. Ngmo lmuut er a kodall me ngmo diak.

E kuk mekerang el kirir tirke el biliol el mo mekiis er a kodall e diak el bo er a eanged? A ngar medad el taem, e te mo nguu a klengar, e mo er ngii a techellir el mo kiei er a Baradis er tia el chutem el mo cherechar.​—Lukas 23:43.