A cheldebechel a mirruul a bebil omelodech el olengeseu el melisiich er a kltarreng er omengull er a delongelir a Remesuub er a Biblia. A The Watch Tower a mlo oltobed a babier el mesaod er a bades el bo losaod er ngii er a Miting el Meluluuch e Oldanges er a Jehovah. Me a lmuut kung a Remesuub er a Biblia uleltobed a kalender el ngar ngii a bades el kirel a derta el sandei me a chelitakl el sebechir el mengitakl er ngii er a temel omesubir el di tir tang me a temel omengull el telungalek.

Ngar er aika el miting er tir e a Remesuub er a Biblia sebechir louchais a experience er tir er a odingel, sebechir el melekoi omereng el saul er tir el mora Jehovah, me a lechub e te meluluuch. A Eva Barney el miltecholb er a 1923 er a le 15 a rekil a kmo: “A lsekum e ngsoam el mengedecheduch, e ke mo dechor e omuchel el melekoi el kmo, ‘Ngsoak el mereng a sulel a Rubak el kirel a rokui el lungil el bla rruul el mei er ngak.’” Te ngar ngii a rebebil er a rudam el kmal mle sorir el mengedecheduch. A Sister Barney a melemolem el melekoi el kmo: “A chudelang el odam el Brother Godwin a kmal mle betok a soal mereng a sulel a Rubak el kirel. A bechil sel lutebengii el kmo ngike el odam loungerachel a kora sobeka rengul e ngkursii a bilel me ngstob e mo dengchokl.”

Tang er a ta el buil e a derta el ongdibel a uleltobed er tia el Miting el Meluluuch e Oldanges er a Jehovah. A The Watch Tower er a April 1, 1923 a mesaod er tia el miting el kmo: “A tedobech er tia el miting a kirel mesaod a experience er a ureor er odingel e dirrek el melisiich er a rechad el meruul er a ureor . . . Aki oumerang el kmo aika el miting a mo oldak er a rechedal ongdibel.”

A 19 a rekil el Charles Martin el publisher er a Vancouver, Canada a kmal ngilai a klungiolel er aika el miting. Ngmillekoi er a uriul el kmo: “Ak silubii er aika el miting el mo medengei a bo kulekoi sel kuldingel obliil. A rechad a blechoel el share a experience er tir sel loldingel obliil. Aikang a milskak a ngeso er a uldasu el mo medengei a sebechek el melekoi me a rolel e a kunger a ultekengir a rechad.”

“Sils er a odingel” a dirrek el millisiich er a kltarreng. A The Watchtower er a April 1, 1923 a dilu el kmo: “A Tuesday, May 1, 1923, a mo telutk el sils er a odingel, . . , me bo de tang el meruul  er a osisiu el ureor. A uriul er tiang e sel kot el Tuesday er a bek el buil a mo sils er a odingel . . . Derta el chedal ongdibel a kirir el mo teloi er a ureor.”

Mo lmuut er a rengeasek me te mle teloi er a ureor. A Hazel Burford, el mle 16 a rekil er tiakid el taem a melekoi el kmo: “A Bulletin a mle llechukl er ngii a tekoi el bo dolekoi sel doldingel (ngdi uai a rolel a domuchel a cheldechedechad) el kired el memorize. a Ak kmal mle semeriar lobengkel a demak el rubak el teloi aika el ureor.” Me nguaisei engdi a Sister Burford a ngilai a ultok er a chad el dimlak lomdasu el kmo ngmo uaisei. Ngkmo: “A chudelang el odam a kmal ulemdasu el kmo ngdiak el kirek el mengedecheduch er a rechad. Tiakid el taem a rebebil a dimlak el lodengei el kmo a Remesuub er a Biblia el rokui, luldimukl er a ‘remekekerel chad ma re ekebil’ a kirir el teloi er a ureor loldanges er a Ulemeob.” (Psa. 148:​12, 13) Engdi a Sister Burford a millemolem lomerk. Ngika mlora ongeru el klas er a Gilead e mlo missionari er a Panama. Cherengel a taem e tirka el odam a mlo melodech a uldesuir el kirir a remekekerei el teloi er a berkel a klumech.

A convention a dirrek el uleldak er a rudam. A betok er aika el convention a mla er ngii a sils er a odingel, el ua sel convention el mla er ngii er a Winnipeg, Canada. El ua tiang a March 31, a mle sils er a odingel me tirke el rokui el mlong a ble invite er tir el mo teloi er a ureor. Aika el sils er a odingel a uchul me te miltik er a rebetok el chad e kmal mle ungil a ureor. A August 5, e ngbekord el 7,000 el chad a mlora lmuut el ta er a convention er a Winnipeg. Tia mle kot el klou a ildisir a rechad er ngii el convention er a Canada er tiakid el taem.

A kmal klou a ultutelel el convention er a rechedal a Jehovah er a 1923 a mla er ngii er a August 18-26, er a Los Angeles, California. Ngar er aike el sandei er uchei er a convention e te mle advertise er a newspaper el kirel tia el convention me a Remesuub er a Biblia a dirrek el rirous a betok er a 500,000 el babier el advertise. Ngdirrek el mla er ngii a banner el telecherakl er a olidiuul er a buai me a dirrek el mlirir a rechad el advertise el kirel.

 A Sebadong el August 25, e a Brother Rutherford ultebedii a cheldecheduch el “Sheep and Goats,” e dilu el kmo a “resib” a tirke el melemalt el mo kiei er a baradis er tia el chutem. Ngdirrek el ultebedii a resolution el “A Warning.” Tia el resolution a millebeakl aika el klechelid e millisiich er a remelemalt a rengrir el chad me lechirrideterir er a “kloul Babilon.” (Och. 18:​2, 4, BT) A Remesuub er a Biblia el meliuekl er a beluulechad el rokir a mlo dmak el merous a betok el miliol el copy er a tract el llechukl er ngii tia el resolution.

Ngar er sel ulebongel el sils er a convention e te betok er a 30,000 el chad a ullerrenges er a cheldecheduch el mora buai lultebedii a Brother Rutherford el dai er ngii a “All Nations Marching to Armageddon, but Millions Now Living Will Never Die.” A Remesuub er a Biblia mle medengei el kmo te locha mo betok a rechad me te mle rent er a Los Angeles Coliseum, el ngii a kmal dirk mlo dechor. A rudam uluusbech a speaker er tia el stadium el ngii a mle beches el technology er tiakid el taem, me bo lsebechir a rokui el chad el remenges. A relmuut el betok a rirengesii a prokuram loeak a razio.

A 1923 e ngmlo klou a ureor lomerk er a Africa, Europe, India, me a South America. Ngar er a India, e a A. J. Joseph ulemekerreu er a bechil me a retelolem el ngelekel e ullengeseu loltobed a babier el tekoi er a Hindi, Tamil, Telugu, me a Urdu.

E ngar er a Sierra Leone e a Remesuub er a Biblia el Alfred Joseph me a Leonard Blackman a milluches el mora world headquarters er a Brooklyn, New York, lolengit a ngeso. Me a April 14, 1923, e ngmlonger a ongterir. A Alfred a kmo: “Ngmle Sebadong er a klebesei e ngouring a dengua.” A chad a mle klou a ngerel loker, “Kau, ngke el chad el lilechesii a babier el mora Watch Tower Society lolengit er a ruumerk er a klumech?” Me a Alfred a dilu el kmo, “Chochoi.” Me ngii el chad a kmo, “Te mla oderchak el lekong.” Ngika el chad a William R. Brown. Ngmlara Caribbean e dirk mlei er tiakid el sils ngii me a bechil er a Antonia me a reteru el ngelekir el redil er a Louise me a Lucy. Me tirka el odam a dimlak longiil el meketeket el mo meseterir tirka el beches el mla mei.

Alfred a melemolem el kmo: “A tutau e ngak me a Leonard a dilak el mesaod er a Biblia el ua ki moruul er ngii er a bek el sandei e ngtmoech a chad er a medal a tuangel. Ngmle Brother Brown. Ngika kmal mle blak rengul el kirel a klemerang e  mle soal el oltobed er a cheldecheduch er a ongingil sils.” Me ngdimlak bo el ta el buil e a Brother Brown a remous a rokui el babier el lengilai er a lolukl el mei. Ngdi mle telkib e ngmai a 5,000 el book e dimlak el mereched e ngliluut el mo ousbech a betok. Engdi a rechad a dimlak lodengelii el kmo ngchad lolterau a book. Klengar er ngii el mle blak a rengul el mesiou er a Jehovah e ngdi uluusbech a bades el ngar er a cheldechedechal me a rechad a mlo oleker er ngii el Bible Brown.

E ngar er a Germany e a branch office el mlara Barmen a kmal mlo kekerei, me tir ulerrenges a chais el kmo a France a di kmedung e ngsoiseb el nguu a beluu. A Remesuub er a Biblia a miltik er a building el ngar er a Magdeburg el mle ungil kirel a print a babier. Me a June 19, e a rudam a mlo merek el pack a klekedall er a printing me a lmuut el bebil e siliseb er a beches el Bethel el ngar er a Magdeburg. Sel sils er uriul er a louchais er a world headquarters el kmo te mla move a rokui el tekoi, e ngtilobed er a newspaper el kmo a France a mla nguu a Barmen. Me a rudam ulemes er tia el move er tir el olechotel a klengeltengat me a ulekerreuil a Jehovah.

E ngar er a Brazil e a George Young a ulemais el omerk er a ungil chais, kiltmeklii a beches el branch, e ulemuchel loltobed er a The Watch Tower el tekoi er a Portuguese. Chelsel a sesei el buil e ngrirous a betok er a 7,000 el babier. Dirrek el ngii el mlora Brazil a milsa Sarah Ferguson a ileakl el techall. Ngika ulemuchel el menguiu er a The Watch Tower er a 1899 e dirkak a techellel lochotii a telbilel a rengul loeak a techolb. Sesei el buil er uriul e a Sister Ferguson me a reteua el ngelekel a mlo sebechir el rullii tia el kmal klou a ultutelel el dauch.

Ngar er a ulebengelel a rak e a The Watch Tower er a December 15, 1923 a milsaod el kirel a kltang er omengull er a Remesuub er a Biblia el kmo: “Ngkmal beot er kid a mesa el kmo a ongdibel . . . a mesisiich a klaumerang er ngii . . . Mada deketmeklid el mo meruul a lmuut el betok el ureor e dolemolem el mesiou er a Dios loba blakerreng me a deurreng er chelecha el merael el mei el rak.”

A ongingil el rak a dirrek el kmal mo ileakl el kirir a Remesuub er a Biblia. A rudam el ngar er a Bethel a kmal mle blak a rengrir el loureor el betok el buil el losiik er a chutem er a Staten Island el ngii a diak el lecheroid er a headquarters el ngar er a Brooklyn. Aike el omekedecheraol lurruul er tia el chutem a mlo merek er a uchelel a 1924. Aika dirrek el ullengeseu el oldak er a rudam e omerk er a ungil chais el ngar er a rolel el dimlak el sebechel er a ngar er a mong.