1. Te milekera remesiungel a Dios er a irechar e mlo mesisiich?

 A TEKINGEL A DIOS a mesaod er a reblak a rengrir el chad el kmo ngmesisiich a klaumerang er tir. Engdi mo lmuut er a rekot el mesisiich er tir me te mlo feel el kmo te diak el mesisiich. El ua tiang, ngngar ngii aike el taem el King David a mle feel er ngii el ua “mesisiich el rois,” engdi ngar ngii a taem el le “kmal mlo medakt.” (Psa. 30:​7, NW) A Samson a kmal mle mesisiich engdi ngmiltebengii el kmo a lak loeak a klisiich lomsa Dios e ng “mechitechut el di ua ngii di le chad.” (Men. 14:​5, 6; 16:17) Tirka el blak a rengrir el chad a mle mesisiich e le Jehovah ulemesterir a klisiich.

2. Ngera uchul me a apostol Paulus a dilu el kmo ngmle mechitechut engdi ngmesisiich? (2 Korinth 12:​9, 10)

² Apostol Paulus a dilu el kmo ngii me ngdirrek lousbech er a klisichel a Jehovah. (Monguiu er a 2 Korinth 12:​9, 10.) Ngdi uaikid el mlo er ngii a secherel a bedengel. (Gal. 4:​13, 14) Ngdirrek el mla er ngii aike el taem el bo lemeringel er ngii a meruul a llemalt. (Rom 7:​18, 19) E a lebebil er a taem e ngmlo suebek a rengul e bekikl er a mo duubech el mo er ngii. (2 Ko. 1:​8, 9) Me nguaisei, engdi sera lemechitechut a Paulus, e ngmle mesisiich. Ngmekera uaisei? Jehovah milsa klisiich el luluusbech er ngii. Ngsilsichii a Paulus.

3. Ngera el ker a bo donger er tia el suobel?

³ Jehovah tibir el kmo ngdirrek el mo smisichid. (1 Pe. 5:10) Engdi ngdiak el sebeched el di diak dokerang e nguu tia el klisiich. Ngsebeched lomekesiu er ngii er a mesil er a mlai el rullii a mlai el mo merael. Me nguaisei engdi a chad a kirel roderdii a mlai me ngmo merael. Ngdi osisiu a Jehovah kltmokl el lomeskid a klisiich el dousbech er ngii, engdi ngngar ngii a kired el meruul el mo nguu. Ngera ngmla meskid a Jehovah el mo melisiich er kid? E ngera kired el meruul me denguu ngii el klisiich? Kede suub a nger er aika el ker loeak sel dorriter a rolel e a Jehovah ngilsuterir a retedei el chad er a Biblia, el tir a  profet Jona, Maria el delal a Jesus, me a apostol Paulus. Kede dirrek el mo mesaod er a rolel e a Jehovah melemolem el melisiich er a remesiungel loeak a osisiu el rolel er chelecha el taem.

4. Ngmekera denguu a klisiich er a Jehovah?

⁴ A ta er a rolel e ngsebeched el nguu a klisiich er a Jehovah oeak sel doluluuch el mo er ngii. A Jehovah mo onger er a nglunguched loeak sel lebeskid a “klou el klisiich.” (2 Ko. 4:7) Ngdirrek el sebeched el nguu a klisiich loeak sel donguiu er a Tekingel e dolatk aike el donguiu. (Psa. 86:11) A klemechel a Jehovah el mei er kid el ngar er a Biblia a “ngarngii a klisichel.” (Heb. 4:​12, BT) Sel moluluuch el mora Jehovah e monguiu er a Tekingel, e ke mo nguu a klisiich el mousbech er ngii el mo outekangel, mo melemolem loba deurreng, me a lechub e ngmo kutmeklii a kmal meringel el assignment. Molatk er a rolel e a Jehovah silsichii a profet Jona.

5. Ngera uchul me a profet Jona uluusbech omelisiich?

⁵ A profet Jona uluusbech omelisiich. Ngika chiliis er a meringel el assignment el Jehovah milsang. Tia mle uchul e ngii me a rechad el mlara diall lobengkel a kilo te mad er a mesisiich el eolt. Sera lechitii er a daob, e a klou el ngikel a mirrekeklii. Ngika mlara milkolk el chelsel a delel a klou el ngikel. Omomdasu e ngmlo uangerang a uldesuel a Jona? Ngika ngulemdasu el kmo ngmo mad er tiang? Ngulemdasu el kmo a Jehovah mla choitii? A Jona ulterekokl el kmal mle ouedikel a rengul.

6. Ngua lolekoi a Jona 2:​1, 2, 7, ngera silsichii a Jona er a lengar er a delel a klou el ngikel?

⁶ Ngera ngmirruul er ngii a Jona el mo nguu a klisiich er a le di el ngii el tang el ngar er a delel a ngikel? Ngmilluluuch el mora Jehovah. (Monguiu er a Jona 2:​1, 2, 7.) Alta Jona mlo diak lolengesenges er a Jehovah, engdi ngmle ulterekokl a rengul el kmo a Jehovah mo rongesii a lobult. A Jona dirrek el mle dmolech el melatk a Bades. Ngera uchul me ngsebeched el melekoi el uaisei? A nglunguchel el debetik er ngii er a 2 el bliongel er a Jona a ousbech a betok el tekoi el debetik er a Psalm. (El ua tiang, momekesiu er a Jona 2:​2, 5 er a Psalm 69:1; 86:7.) Me ngbleketakl el kmo a Jona mle ungil medengei aika el bades. A dmolech el omelebedebekel er ngii er tia el meringel taem a ulelterekokl er a rengul el kmo a Jehovah mo ngosuir. Uriul e a Jona liluut el mora beluu, e mlo kltmokl el kongei e kutmeklii a next el assignment er ngii.—Jon. 2:10–3:4.

7-8. Ngmekera ta el odam er a Taiwan el chelebangel a ringel e ngmla ngmai omelisiich?

⁷ A kerebil a Jona a sebechel ngosukid sel dechelebangel a kakerous el omelsemai. El ua tiang, a Zhiming b el odam er a Taiwan a ngar ngii a meringel el secherel a bedengel. Ngdirrek el klaumerang er ngii a uchul me ngoutekangel a ultok er a telungalek er ngii. Ngika nguu a klisiich er a Jehovah loeak a nglunguuch me a omesuub. Ngmelekoi el kmo: “A lebebil e sel ledubech a mondai e ngkmal mo suebek a renguk el diak el sebechel mo chelellakl me ngdiak el sebechek el meruul er a omesubek el di ngak el tang.” Engdi a Zhiming a diak le give up. Ngkmo: “A kot ak meluluuch el mora Jehovah. Ongingil e a kutuu a earphone er ngak e orrenges a Kingdom songs. Ngar ngii aike el taem el kungitakl el kekerei a ngerek el dimerekmo bo le chelellakl a renguk. E seikid e a kumuchel er a omesubek.”

⁸ A omesubel a Zhiming el di ngii el tang a  dirrek el kmal mla ngosuir. El ua tiang, uriul er a lenguu a klou el botk a nurse a dilu er ngii el kmo ngkmal ngariou a count er a red blood cell er ngii me ngousbech a oidel a rasech. Me nguaisei engdi sel kesus er uchei er tia el botk e a Zhiming a chiliuii a experience er a odos el ngiluu a osisiu el botk el bo lolai er ngii. A count er a red blood cell er ngii a rirebet e lmuut el ngariou er ngii. Engdi ngdimlak el kengei a oidel a rasech e mlo mesisiich. Tiang a silsichii a rengul a Zhiming el mo melemolem loba blakerreng.

9. A lsekum a ringel el omchelebangel er ngii a chitechetur a rengum, e ngera sebechem el meruul er ngii? (Dirrek el momes a siasing.)

⁹ Kau sel omchebangel a ringel, e ngkmal mo suebek a rengum me ngmeringel er kau a meluluuch? Me a lechub e ngkmal mo mesaul a bedengem me ngdiak el sebechem el mesuub? Bo modengei el kmo a Jehovah kmal ungil medengelii omchelebangel er ngii. Me a omdelii a kekerei el nglunguuch, e ngsebechel mo ulterekokl a rengum el kmo ngmo meskau sel mousbech er ngii. (Efe. 3:20) A lsekum a ringelel a rengum me a lechub e ngringelel a bedengem a rullii el mo meringel er kau a menguiu e mesuub, e morrenges a audio recording er a Biblia me aika el babilenged el mengai er a Biblia. Ngdirrek el sebechel ngosukau sel morrenges er a ta er aike el chelitekled me a lechub e momes er a video el ngar er a jw.org. Sel moluluuch el mora Jehovah e mosiik a nger er ngii er a Biblia me aike el loltobed el kired, e kochotii er ngii el kmo ngsoam a lerellau el mo mesisiich.

10. Te mekera rudam me a rudos el Kristiano e melisiich er kid?

¹⁰ A Jehovah sebechel lousbech er a rudam me a rudos er kid el Kristiano el melisiich er kid. Ngsebechir el mo ‘ongoloded’ sel dechelebangel er a omelsemai me a lechub e ngmeringel er kid a kutmeklii a meringel el assignment. (Kol. 4:​10, 11, BT) Kede tokubets el kmal ousbech a friends er a “taem er a ringel.” (Osi. 17:​17, NW) Sel bo demechitechut e a rekldemed er a klemerang a sebechir el ngosukid er aike el dousbech er a bedenged, rengud,  uldesued, me a dirrek el rolel a klereng. Molatk er a rolel e a Maria el delal a Jesus a ngilai omelisiich er a rebebil.

11. Ngera uchul me a Maria uluusbech omelisiich?

¹¹ A Maria uluusbech omelisiich. Ngika ulterekokl el mlo omelechesiu er a klou el berraod er a lebsang oberaod el assignment a anghel el Gabriel. Ngika dimlak el bechiil engdi ngmo dioll. Ngdirkak a ta el lomekeroul er a rengalek, engdi ngmo omekeroul er a ngalek el ta er a klebesei e ngmo Mesias. Ngdirrek el dirkak a ta el bo lobengkel a sechal, me ngmekera bo lesodii er a Josef el ngike el mo bechil?—Lk. 1:​26-33.

12. A doltirakl er a Lukas 1:​39-45, e ngmilekera Maria e nguu a omelisiich el luluusbech er ngii?

¹² Ngmilekera Maria e nguu a klisiich el mo meruul er tia el kmal ileakl e oberaod el assignment? Ngullengit a ngeso er a rebebil. El ua tiang, ngullengit er a Gabriel me louchais a lmuut el betok el kirel tia el assignment. (Lk. 1:34) Kedeb el taem er uriul e ngkiltmeklii e mlora “tal kekerel beluu el ngar a beluu er a bukl” er a Judea el mo omes er a chedal er a Elisabeth. Tia kmal mle ungil el trip. A Elisabeth a chilat er a Maria e mlukreng er a Jehovah el mo ouchais er a Maria ulaoch el kirel a ngelekel el kmal melisiich. (Monguiu er a Lukas 1:​39-45.) A Maria dilu el kmo a Jehovah “[oba] chimal el olecholt ra klisiich.” (Lk. 1:​46-51, BT) Me a Jehovah uluusbech er a Gabriel me a Elisabeth el melisiich er a Maria.

13. Ngmilekera odos er a Bolivia e mukngeltengat er a lolengit a ngeso er a rekldemel er a klemerang?

¹³ Ngdi ua Maria, kau me ngsebechem el ngmai omelisiich er a rekldemem er a klemerang. A Dasuri el odos er a Bolivia uluusbech omelisiich. A demal er a bo lsecher er a rakt el mo uchul a kodellel e bo le niuing, e a Dasuri kilengei el mo omekerreu er ngii. (1 Ti. 5:4) Tia dimlak el beot. Ngkmo, “Ngmla er ngii aike el taem el bok feel el kmo ngdiak el sebechek el melemolem.” Ngika ngullengit a ngeso? A uchelel e ngdimlak. Ngmelekoi el kmo, “Ngdimlak el soak el mengesang er a rudam. Ak millatk el kmo, ‘Ng Jehovah mo meskak a ngeso el kuusbech er ngii.’ Engdi ak mlo mtebengii el kmo ngak el meleakl er ngak er a rechad, a belkul a kmo ngak a di ngak el melasem el meruul er ngii.” (Osi. 18:​1, NW) A Dasuri milluches el mora rebebil er a resechelil e ouchais er tir er a tekoi el lechelebangel er ngii. Ngkmo: “Ngkmal diak a tekoi el sebechel smodii omelisiich el kngilai er a rudam me a rudos er ngak. Te ullab a kall el mei er a osbitar e mle share a bades el milengelaod er ngak. Ngkmal ileakl el tekoi sel bo dolechesuar el kmo ngkmal diak di lekid el tang. Kede chedal a klou el telungalek er a Jehovah, el ngii a kmal kongei el olengeseu, e lmangel lobengkem, e melisiich er kau el melemolem el mesiou er a Jehovah lobengterir.”

14. Ngera uchul me ngungil a dekengei a ngelsurir a remechuodel?

¹⁴ A ta er a rolel e a Jehovah melisiich er kid a oeak a remechuodel. Tirka sengk el Jehovah ousbech er tir el melisiich e mengebekakl er kau. (Isa. 32:​1, 2) Me sel lebo er ngii a suebek a rengum er ngii e mouchais er a remechuodel. E sel lomeskau a ngeso, e mkengei a ngelsurir. Jehovah sebechel lousbech er tir el smisichau.

15. Ngera el omelatk a longreos er ngii a rokui el Kristiano?

¹⁵ A omeltked el ngar er a Biblia meskid a klou el klisiich. (Rom 4:​3, 18-20) Kid el Kristiano oba omelatk el mo kiei el mo cherechar er a baradis er tia el chutem me a lechub e  ngklengar er a Renged er a eanged. Omeltked a ngosukid el outekangel a ringel, omerk er a ungil chais, e meruul a assignment er kid er a ongdibel. (1 Th. 1:3) Tia el osisiu el omelatk a silsichii a apostol Paulus.

16. Ngera uchul me a apostol Paulus uluusbech omelisiich?

¹⁶ A Paulus uluusbech omelisiich. Ngar er a babilengel el mora rechad er a Korinth e ngdi mle ngii lomekesiu er ngii el mora bekai el di beot el metemall. Ngika ‘mlosarech ra . . . ringel,’ e ‘mlo diak lodengei el kmo ngmekerang,’ e ‘mlodechelakl,’ e “obengkangk.” E mla er ngii aike el taem el mle sebechel loridii a klengar er ngii. (2 Ko. 4:​8-10, BT) A Paulus a liluches aika el tekingel er a ongedei el taem el lorael el meruul er a urerel el missionari. Ngika locha dimlak lodengei er tiakid el taem el kmo ngmo chobangel a lmuut el meringel el blekeradel. Ngika mo er ngii a seked el mo odelecheklii, me a remo arrest er ngii, e mo ngar er a diall e ngmeteruud er a daob, e mo kelebus.

17. A doltirakl er a 2 Korinth 4:​16-18, e ngera silsichii a Paulus loutekangel a ringel?

¹⁷ A Paulus a mle sebechel mo mesisiich e outekangel e le ngmle focus er a omeltkel. (Monguiu er a 2 Korinth 4:​16-18.) Ngdilu er a rechad er a Korinth el kmo alta bedengel a “di merael el mo mechitechut” engdi ngdiak bo lebecherei tiang me lechoitechetur. A Paulus a mle focus er a ngar medal. A omeltkel el mo kiei er a eanged el mo cherechar a “kmal klou el klebkall” me ngkilengei el mo chuarm a ngii di el ringel el kirel. A Paulus el millebedebek er tia el omelatk a uchul me ngmle feel el kmo ng “di merael el mo mesisiich er a bek el sils.”

18. Ngmekera omelatk er a ngar medad e mla smisichii a Tihomir me a telungalek er ngii?

¹⁸ A Tihomir el odam er a Bulgaria metik omelisiich er a omeltkel el kirel a ngar medad. A sesei el rak er a mla me mong, e a ochellel er a Zdravko a mlad er a accident. Tia mlo uchul a klou el kngtil a rengul. Ngii me a telungalek er ngii outekangel loeak sel lolatk er a  okiis. Ngmelekoi el kmo: “El ua tiang aki mesaod el kmo aki mo meet er a Zdravko er ker, ngera el kall aki bo moruul el kirel, techa ki bom invite er tir el mo er sel kot el gathering el mo er ngii sel lebekiis, me a ngera ki bo mouchais er ngii el kirel a uriul sils.” Tihomir a kmo sel focus er a omeltkir e ngsmisichii a telungalek er tir el mo melemolem loutekangel e mengiil er a temel a Jehovah el mo olekiis er a ochellel.

19. Ngmekera sebechem el smisichii a omeltkem? (Dirrek el momes er a siasing.)

¹⁹ Ngmekera sebechem el smisichii a omeltkem? A lsekum e ngomeltkem el mo kiei el mo cherechar er tia el chutem, e monguiu er a omesodel a Biblia er a Baradis e molebedebek el kirel. (Isa. 25:8; 32:​16-18) Molatk er a mo blekerdelel a klengar er a beches el blekeradel. Imagine er kau el ngar sei. Ngtecha omesang? Ngera korrenges? E ua ngera feeling er kau? Momes a siasing el bla lotobed er a babilenged el olecholt er a Baradis me a lechub e momes a music video el ua The New World to Come, Just Around the Corner, me a lechub e ng Imagine the Time. Sel deblechoel el mengoit a taem el melatk er omelatk er a beches el blekeradel e a mondai er kid a mo “tedeb [e] kebekakl.” (2 Ko. 4:​17, BT) A Jehovah mo smisichau loeak a omelatk el bla lebeskau.

20. Mo lmuut me a bo demechitechut, e ngmekera sebeched el nguu a klisiich?

²⁰ Mo lmuut me a bo mechitechut, “ngoeak a Dios e kede nguu a klisiich.” (Psa. 108:13, NW) A Jehovah mla meskau aike el mousbech el mo nguu a klisichel. Me sel bo mousbech a ngeso el kutmeklii a assignment er kau, outekangel a ringel, me a lechub e ngmo melemolem loba deurreng, e moluluuch el mora Jehovah e mosiik a ulekrael er ngii loeak omesubem el di kau el tang. Mkengei omelisiich er a rudam me a rudos er kau el Kristiano. A omeltkem lolemolem el mesisiich. E seikid e ke mo ‘misisiich loeak a bek el klisiich lekor kau loltirakl ra klisichel a klebkellel a Dios; me ldeu a rengum loutekangel a bek el tekoi el klou a rengum.’—Kol. 1:​11, BT.