1, 2. Ngera me a Dios a ultngeklii a Saul? (Momes er a siasing er a uchelel a suobel.)

A JEHOVAH er sera lengiltii a Saul el mo king, e ngkmal mle ngariou a rengul. (1 Samuel 9:1, 2, 21; 10:20-24) Engdi uriul er a bo leking e ngmlo kedidai a rengul. A ta el taem e a resoldau er a Filistia a mlong el mo oldechelakl er a rechad er a Israel. E a profet el Samuel a dilu er ngii el kmo ngmong el mo melenget el mo er a Jehovah. Me nguaisei, engdi uchei er a lebong a Samuel, e a rechad er a Israel a kmal medektang me a rebetok a chiliis e choitii a Saul. Me ngkmal mlo ouedikel a rengul e mlo diak lechilii a Samuel, e bai di mle ngii el mo meruul er a tenget e oldars er ngii. E ngika el Saul a kmal dimlak a llemeltel el meruul er tia el tekoi, me a Jehovah a kmal mlo kesib a rengul er ngii.​—1 Samuel 13:5-9.

² Me sera lemei a Samuel e ngmilellach er a Saul e le ngmlo diak lolengesenges er a Jehovah. Engdi Saul a ulemdasu el kmo ngdimlak a telemellel a omerellel. Me ngdi milsaod er ngii e dirrek el mlo oltelechakl er a rechad el kirel a cheleuid el omerellel. (1 Samuel 13:10-14) Me ngulemuchel er seikid el taem, e ngmla er ngii a lmuut el bebil er  a tekoi el leriruul a Saul el kldidiul a rengul a uchul. Me a Jehovah a ultngeklii me ngmlo diak el king. (1 Samuel 15:22, 23) Me a klengar er a Saul a ulemuchel el kmal mle ungil engdi ulebongel er ngii a kmal mlo mekngit.​—1 Samuel 31:1-6.

3. (a) Ngua ngera uldesuir a rebetok el kirel a klengariourreng? (b) Ngera el ker a bo donger?

³ A rebetok el chad er chelechang a kmal diak el tabesul a uldesuir, e osisiu el taem e ngkmal betok a ududir me a lechub e ngungil a urerir. Me te ousimang e omdasu el kmo te kuk ungil er a rebebil. A ta el merael chisel el actor, e chad er a balatiks a kmo: “A tabesul el uldasu a kmal diak loureor er ngak, e ak melatk el kmo ngdiak a ta el bok kengei er ngii.” Ngera uchul me ngklou a ultutelel el kirel a Kristiano el mo tabesul a uldesuel? Ngerang a klengariourreng, e ngera diak? Ngar tia el suobel e kede mo onger aika el ker. E ngar sel ongingil e kede mo suubii a rolel e ngsebeched el melemolem el oba klengariourreng el mo lmuut er a taem el bo lemeringel er kid el meruul er ngii.

4. Ngerang a kldidairreng?

⁴ A Biblia a meketeklii el kmo a kldidairreng a kuk ngodech er a klengariourreng. (Monguiu er a Osisechakl 11:2.) A David a kmal ullengit er a Jehovah er a ledu el kmo: “Mkekerengak er a bleketakl klengit.” (Psalm 19:13) Me ngerang a kldidairreng? Ngomeruul el chad a diak a llemeltel me a lechub e ngderuchellel e mo meruul er a tekoi e le ngmlo bekikl me a lechub e ngkldidiul a rengul a uchul. E kid el rokui a mla ta el doruul er tia el tekoi e le kid el diak demecherrungel. Engdi kede nguu a klubeled er a omerellel a King el Saul. Engdi a lsekum kede mo smau el meruul uaisei e ngkmal mo diak ledeu a rengul a Jehovah el kired. A Psalm 119:21 a mesaod el kmo, a Jehovah a mo “mengokl er a re mekedidai a rengrir.” Ngera me ngmo meruul uaisei?

5. Ngera me a kldidairreng a di mo uchul a chelebuled?

⁵ A kot el uchul, e a lsekum e ngkldidairreng a uchul e kede rullii a tekoi, e ngolechotel a kmo ngdiak dolecholt a omengull el mo er a Jehovah el Dios er kid, e Merredeled. E a ongerung, e sel doruul a tekoi el diak a llemelted el meruul er ngii e ngulterekokl el mo uchul a klautoketok me a mondai er a delongeled kid me a rebebil. (Osisechakl 13:10) E a ongedei, a rechad a mo omes er kid el ua demekebelung e le ngkldidiul a rengud a uchul. (Lukas 14:8, 9) Me ngkmal bleketakl sel uchul me a Jehovah a soal a bo lengariou a rengud.

6, 7. Ngmekerang a tabesul el uldasu e kmeed el osisiu a belkul er a klengariourreng?

⁶ A tabesul el uldasu a kmeed losisiu a belkul er a klengariourreng. A ngariou a rengul el Kristiano a diak lekedidai a rengul, e ngbai omes er a rebebil el kuk ungil er ngii. (Filipi 2:3) A ngariou a rengul el chad a blechoel el tabesul a uldesuel er a tekoi. Ngungil medengei aike el diak el sebechel, e kongei el mesmechokl a mlo cheleuid el omerellel. Ngdirrek el kongei el remenges a uldesuir a rechad e ngmai a klubelel er ngii. A ngariou a rengul el chad a kot el odeuir a rengul a Jehovah.

⁷ A Biblia a mesaod el kmo, a tabesul a uldesuel el chad a di ngii el medengei aike el diak el sebechel el remuul, me aike el tekoi el diak el kirel meruul. E tiang a ngosuir me ngsebechel el oba omengull  el kirel a uldesuir a rebebil, e mo ungil a omerellel el bedul tir.

8. Ngera el tekoi a kmal diak el kired el mo er ngii, a lsekum ngsoad el melemolem el oba klengariourreng?

⁸ Me nguaisei, engdi ngsebeched el di diak dolechesuar e mocha omuchel el kedidai a rengud. Ngmekera e mo uaisei? Ngsebeched el omuchel el mo omdasu el kmo, ngkuk meklou a ultuteled er a rebebil me a lechub, e ngkid el ungil medengelterir tirke el ngar er ngii a ileakl el ngerechelir er a chelsel a ongdibel. (Rom 12:16) Me a lechub e kede mocha omuchel el di melatk er a di kid. (1 Timothy 2:9, 10) E dirrek el mocha omuchel el mengedereder er a rebebil el kirel aike el sebechir el meruul me aike el diak.​—1 Korinth 4:6.

9. Ngera me a rebebil a mlo mekedidai a rengrir? Msodii a ta er a kerebai el ngar er a Biblia.

⁹ Ngsebechel el omuchel el mo kedidai a rengud, a lsekum ngdiak dekerekikl el mtebechelii a uldesued. Te kmal betok a mla mo mekedidai a rengrir e le ngsorir a chetengakl, e mlo mechechei er a rebebil, me a lechub e ngdiak el sebechir el kilmeklii a ngesechel a rengrir. E aika el tekoi a dilubech el mo er a rebebil el medung a ngklir er a Biblia el ua Absalom me a Usia me a Nebukadnesar. Me a Jehovah a mileketeklii el mo er tir el kmo, ngkmal mle kirir el mo ngariou a rengrir.​—2 Samuel 15:1-6; 18:9-17; 2 Kronika 26:16-21; Daniel 5:18-21.

10. Ngera me ngdiak el kired el oukerrekeriil a omerellir a rechad? Msodii a ta er a kerebai el ngar er a Biblia.

¹⁰ Nglocha ngar er ngii a lmuut el bebil luchul me a rechad a mo ua lak el tabesul a tekoi el loruul a lebebil er a taem. Ka di molatk er a Abimelek me a Petrus. (Genesis 20:2-7; Mateus 26:31-35) Tirkang, ngmle mekedidai a rengrir? Me a lechub e ngdimlak a ungil klemedengei er tir er a tekoi, me a lechub e ngdimlak lungil melatk a tekoi er a uchei er a loruul? Kid a diak el sebeched el menguiu a rengrir a rechad, a uchul me ngkmal diak el kired el oukerrekeriil a omerellir.​—Monguiu er a Jakobus 4:12.

11. Ngera el tekoi a kired el mo medengelii?

¹¹ A ngariou a rengul chad a medengelii a ngerechelel er a chelsel a cheldebechelel a Dios el Jehovah el chelderoder a tekoi el loruul. Me ngmla mesterir a derta el chedal a ongdibel a ngerechelir. Me kid el rokui a ngar er ngii a ultuteled, e a Jehovah a mla meskid a kakerous el sengk me a duch er kid, me a dirrek aike el tekoi el sebeched el remuul. Ngdirrek el mechikid me ngdi kid el melilt a tekoi el bo doruul me a rolel a bo dousbech. Me a lsekum e ngmo ngariou a rengud, e kede mo ungil lousbech aika el sengk el oltirakl er sel rolel el soal a Jehovah. (Rom 12:4-8) Kede ungil medengei el kmo, a Jehovah a mengerechir er kid el mo ousbech aika el duch er kid el oldanges er ngii, e dirrek el mo olengeseu er a rebebil.​—Monguiu er a 1 Petrus 4:10.

12, 13. Ngera el tekoi a diak el kired lobes er ngii a lsekum, ngmo mengodech a rolel a omesiunged el mo er a Jehovah?

¹² A cherengel a taem e aike el doruul er a omesiunged a sebechel el mo mengodech. Ka me dolatk aike el betok el omelodech el blo lechelebangel a Jesus. A kot, engdi mle ngii me a Demal. (Osisechakl 8:22) E mlo omuchel el olengeseu er a Jehovah el omeob er a rechanghel me a eanged me a chutem me a dirrek el rechad. (Kolose 1:16) E a uriul e ngmlodurech el mei er tia el chutem, e mlechell el ngelekel a chad, e mlukeroul el mo klou el chad. (Filipi 2:7) E a uriul e ngmilekiis er a kodall ngii el Jesus e liluut el mo er a eanged, e ngar er a rak er a 1914 e ngmlo King er a Rengedel a Dios. (Hebru 2:9) E a ngar medad el klebesei, er a uriul er a longedereder el ta el telael rak, e ngii el Jesus a lmuut el nguu a Renged el msa Jehovah me nglmuut el mo “olab a klisiich el kirel a rokui el tekoi er a chelsir a re chad.”​—1 Korinth 15:28.

¹³ Kid me kede dirrek el mo chelebangel a betok el omelodech er a klengar er kid. A lebebil e ngmo  mengodech a ngerecheled e le ngtekoi el dolilt a uchul. Kede locha mle mesobil e kuk tibir el mo bechiil. Me a lechub e kede oungalek, e a uriul e kede melilt el mo melodech a bebil tekoi me bo lsebeched el mesiou er a Jehovah el mui el taem. E a lebebil er a taem, e ngmo mengodech a ngerecheled el blekeradel el bo dechelebangel a uchul. Me alta e kede mo remuul a betok me a lechub e ngkesai, me a lechub e kede mekekerei me a lechub e kede mechudelang, e mesisiich a bedenged me a lechub e kede mechitechut. Engdi Jehovah a ungil medengei aike el sebechel a derta er kid el meruul er a omesiunged el mo er ngii. Me ngkmal diak longerechir er kid er a tekoi el lodengei el kmo ngdiak lsebeched. E kmal dmeu a rengul er aike el rokui el sebeched el meruul el mo er ngii.​—Hebru 6:10.

14. Ngmekera tabesul luldesued e rullid el mo dmeu a rengud el meruul a ngii di el ngerachel el moterekokl er kid?

¹⁴ A Jesus a kmal dmeu a rengul er aike el rokui el ngerechelel el lebilsang a Jehovah, me kid me ngdirrek el sebechel el mo dmeu a rengud er aike el lebeskid a Dios. (Osisechakl 8:30, 31) A ngariou a rengul chad a dmeu a rengul er a ngerachel el moterekokl er ngii, me aike el ngerechelel er a chelsel a ongdibel. Ngdiak lemechesang el omdasu el kirel aike el loruul a rebebil, ngbai dmeu a rengul er sel ileakl el ngerechelel er a chelsel a cheldebechelel a Dios. Ngomes er ngii el ngerechelel el ua lebilsang a Jehovah. A ngariou a rengul chad a dirrek loba omengull el bedul a rebebil, e ungil a rengul lolengeseu er tir. Ngdirrek el omes aike el ngerechelir el kmo ngmla er a Jehovah el mo er tir.​—Rom 12:10.

15. Ngera kede suubii er a blekerdelel a Gideon?

¹⁵ A Gideon a kmal ungil kerebai el kirel a klengariourreng. Sel taem el Jehovah a tiltkii el mo olsobel er a rechad er a Israel er a resoldau er a Midian, e ngdilu el kmo: “A kleblillek a kot el mechitechut  er a chelsel a klebliil er a Manase, e ngak a kmal diak a belkuk el chad er a blik.” (Mengeteklel 6:15) Engdi a Gideon a uluumerang er a Jehovah, e kilengei er a ngerachel el moterekekla er ngii. Me ngmlo ungil lomtab a omerellel a Jehovah me bo lsebechel el mo ungil medengei a soal, e milluluuch el mo er Ngii el kirel a ulekrael. (Mengeteklel 6:36-40) Ngikang a kmal mle bekeu e mesisiich el chad, engdi ngdirrek el kmal mle mellomes a rengul e kerekikl sel loruul a tekoi. (Mengeteklel 6:11, 27) E a uriul, e a rechad a mlo sorir el meruul er ngii el mo merredelir, engdi ngdimlak lekengei er tir. Me sera bo lemerek el remuul aike el tekoi el mle soal a Jehovah a loruul, e ngliluut el mo remei er a blil.​—Mengeteklel 8:22, 23, 29.

16, 17. Ngmekera ngariou a rengul chad e olengeriakl er a omesiungel?

¹⁶ A chad el kongei el nguu a beches el ngerechelel, me a lechub e ngsoal el meruul a lmuut el betok er a chelsel ongdibel, a diak lebelkul a kmo ngkedidai a rengul. A Biblia a mesaod el kmo, ngkmal ungil a lsekum a mesiungel a Jehovah a soal el betok a ngerechelel el mesiou er a rudam er ngii, e olengeriakl er a omesiungel. (1 Timothy 4:13-15) Me a lsoad el olengeriakl er a omesiunged, e ngbelkul a kmo ngkirel el mo er ngii a beches el ngerecheled? Ngdiak leuaisei. Kid el rokui a sebeched el melemolem el melisiich a ungil blekerdeled el Kristiano, me aike el duch er kid el bla lebeskid a Jehovah me deluut el mo ungil mesiou er ngii e dolengeseu er a rebebil.

¹⁷ A ngariou a rengul chad a kerekikl el merriter er ngii er a uchei er a lekengei a ngii di el ngerachel. Ngmeluluuch el kirel e kerekikl el melatk el kmo, ngmo sebechel el rullii tia el ngerachel me a lechub e ngdiak. Ngkirel el melatk el kmo, ngmo er ngii a temel me a klisichel el meruul a lmuut el meklou a belkul el tekoi? Me a lsekum e ngdiak, ngsebechel a bebil er a tekoi el loruul er chelechang el kuk bo loruul a rebebil? Me a uriul er a lolebedebek aikang, e a ngariou a rengul chad a locha mo melechesuar el kmo, ngmo diak lsebechel el rullii tia el beches el ngerachel. Me a lsekum ngoba klengariourreng, e ngkmal kirel el kongei el kmo ngdiak el sebechel el meruul er ngii.

18. (a) Ngmo mekera ngariou a rengul chad sel lemoterekokl er ngii a beches el ngerachel? (b) Ngmekera Rom 12:3, e ngosukid el mo ngariou a rengud?

¹⁸ A Jehovah a kmal soal a bo doba ‘ngariourreng e dolengesenges’ er ngii. (Mika 6:8) Me sel denguu a beches el ngerecheled, e ngkired el olengit a ngeso er ngii me lomekrael er kid el ua lurruul er ngii a Gideon. Ngkired el mo dmolech el melebedebek a tekoi el soal a Jehovah louchais er kid el okiu a Biblia me a cheldebechelel. Me lak dobes el kmo, a tekoi el sebeched el remuul el kirel a omesiunged a diak lebelkul a kmo ngduch er kid, ngbai klengariourreng er a Jehovah a uchul me ngkongei el olengeseu er kid. (Psalm 18:35) Me a ngariou a rengul chad a kmal diak el kirel mo omdasu el kmo, ngkuk ngarbab er a rebebil me ngmo meruul a tekoi el engelakl er sel kirel meruul er ngii.​—Monguiu er a Rom 12:3.

19. Ngera me ngkirel mo ngariou a rengud?

¹⁹ A ngariou a rengul chad a medengei el kmo a Jehovah a ngike el rredemelel a rokui el klebkall, e le ngii ngike el Ulemeob e dirrek el Kot el Ngarbab el Merreder er a eanged me a chutem. (Ocholt 4:11) Me a lsekum e ngmo ngariou a rengud, e ngmo dmeu a rengud er a ngii di el ngerecheled er a omesiunged el mo er a Jehovah. Kede mo olecholt a omengull el kirel a uldesuir, me a moktek er a rudam me a rudos er kid, e tiang a mo uchul e ngmo ta rengud el rokui. A ngariou a rengul chad a kerekikl el melatk er a uchei er a loruul a ngii di el ngerang, e tiang a ngosuir me ngdiak bo leruul a meklou el cheleuid el tekoi. A Jehovah a kmal dmeu a rengul er tirke el ngariou a rengrir. Aikaikid a uchul me a klengariourreng a kmal klou a ultutelel er a uldesuir a rechedal a Dios. Me ngar er a ongingil el suobel, e kede mo mesaod er a rolel e ngsebeched el melemolem el ngariou a rengud el mo lmuut er a taem el bo lemeringel er kid.