Ngar er a 22 el bliongel er a Genesis, e a Biblia a mesaod el kmo a Dios a dilu er a Abraham me lorael el mo er a beluu el cheroid er a blil el mo oldars a tenget. Ngmesaod el kmo: A “Abraham a ngila idungel el kirel a tenget el msa Isak me ng olab, e ngii a uleba kol el kirel a ngau, e uleba oles. Me tir el terung a dilak el merael.”​—Genesis 22:6.

A Biblia a diak losaod er sel rolel e a rechad er a irechar a mengumel a ngau. Me a leuaisei, a Abraham me a Isak, te chilemlii a ngau e uleba el lomais a beluu? A ta el chad el mesuub er a Biblia a melekoi el kmo, nglocha dimlak el sebechel el di melemolem el kmard ngii el ngau er “tia el kemanget el omerael.” A Abraham me a ngelekel el sechal a locha ulab a rokui el klekedall el sebechir el ousbech el mo chumlii a ngau.

Engdi a rebebil a melekoi el kmo, ngdimlak el beot a dongumel er a ngau er seikid el taem. Me sel bo el sebechir, e a rechad a mengumel a ngau el lokiu sel lenguu a mekeald el bas er a ngau, e locha ngiluu er a tonari er tir. Te betok el mellomes a rengrir el chad a oumera el kmo, a Abraham a ngilai a bas er a ngau er uchei er a lorael el mo omais a beluu. Ngmle sebechel el ngmai el smuk er a blil a klalo, el locha bekai el ngar er ngii a okul e telecherakl me bo el sebechel el obang el merael a beluu. (Isaia 30:14) E mle sebechel el lousbech aika el kmard el bas el mengumel a idungel sel lebo lekirel el mengumel er a ngau.