1, 2. Ngua ngera uldesuir a rebetok el kirel a urerir?

A REBETOK el chad a omdasu el kmo nglmuut el meklou a ultutelir, me a lechub e ngdiak a ultutelir el oltirakl a ureor el loruul. E a siukang er a bebil beluu, e a lsekum e ngsoad el mo medengelii a chad, e kede oker er ngii el kmo: “Ngera urerem?”

² A lebebil er a taem e a Biblia a mesaod er a rechad lokiu a ureor el lurruul. El ua omesodel el kmo: “Mateus, el chad er omelai el tax,” me a “Simon el chad el omkar a budel a charm,” me a “Lukas el toktang.” (Mateus 10:3; Rellir 10:6; Kolose 4:14) A lebebil er a taem e a Biblia a mesaod aike el ngerachel el moterekokl er a rechad el kirel a omesiungir. Ka molatk er a King el David, me a profet el Elias me a dirrek el apostol el Paulus. Tirkang a kmal ulemes aika el ngerachel el Jehovah a ulterekokl er tir el kmal mekreos. Me kid me ngdirrek el kired el mo omes a ngii di el ngerachel er a omesiou el moterekokl er kid el kmal mekreos.

3. Ngera me a remechudelang a kirir el olisechakl er a remekekerei? (Momes er a siasing er a uchelel a suobel.)

³ Ngkmal soad el mesiou er a Jehovah, e dirrek lomes er a omesiunged el kmal mekreos. A ruumesingd er kid a kmal dmeu a rengrir  el meruul a urerir, e melatk el kmo kede melemolem el meruul er ngii el mo lmuut er a bo lak el sebeched. Engdi ngklengiterreng e le rechad a mo chuodel, me ngmo diak lsebechir el remuul aike el lurruul er sera dirk lemekekerei el chad. (Olisechakl 1:4) Tiaikid el blekeradel a uchul a omelsemai el kirir a rechedal a Jehovah. Chelechang e a ureor er a berkel a klumech a di meleketek, me a cheldebechelel a Jehovah a ousbech a beches el klekedall me bo el sebechel el merkii a klumech er a ungil chais el mo er a rokui el chad. Engdi lebebil e ngmo meringel er a remechudelang er a delongeled el mesuub aika el beches el tekoi. (Lukas 5:39) Kede dirrek lungil medengei el kmo, a remechudelang a mo mechitechut a bedengir me ngmo diak leua klisichel a bedengir er a uchei. (Osisechakl 20:29) Me ngrolel a bltikerreng a lsekum a remechudelang a olisechakl er a remekekerei el mo meruul a lmuut el bebil er a ngerachel er a chelsel a cheldebechelel a Jehovah.​—Monguiu er a Psalm 71:18.

4. Ngera me ngmeringel er a rebebil el olab a ngerachel el oterekokl a urerir el mo er a rebebil? (Momes er a baks el “ A Uchul me Ngmeringel er Kid el Melilt er a Remo Omtechei er Kid.”)

⁴ Ngar er a osengir tirke lolab a ngerachel, e ngdiak lebeot el tekoi el lolterekokl a urerir el mo er a remekekerei el chad. Ngsebechel rulleterir el mo mekngit a rengrir sel lolatk el kmo, ngmo diak loruul er tia el kmal sorir lureor. Ngkmal mo mekngit a rengrir sel lolatk el kmo, ngdikea loruul er tia el ileakl el urerir. Me a lechub e te bekikl el kmo a bo lak lomekrael er tia el ureor, e ngmo diak lungil meketmokl. Te locha dirrek lomdasu el kmo ngdiak a temir el olisechakl er a rebebil. E a osisiu el taem, e a remekekerei el chad a kirir el mo oba kllourreng a lsekum ngdirkak lebo er ngii a ngerechelir.

5. Ngera el ker a bo dosaod er tia el suobel?

⁵ Ngera me ngklou a ultutelel el kirir a remechudelang lolengeseu er a remekekerei el mo meruul a lmuut el bebil er a ngerachel? Te mekera loruul er tiang? (2 Timothy 2:2) E ngera me a remekekerei a kirir mo tabesul a uldesuir sel loureor lobengterir a remechudelang, e klou a klemedengei er tir el odam, e losuub a betok er tir? Me domuchel el mesaod er sel rolel e a King el David a kiltmeklii a ngelekel el sechal el kirel a kmal klou a ultutelel lureor.

6. A David, ngmle soal mekerang? E ngera ngdilu er ngii a Jehovah?

⁶ Ngmle betok el rak el David a chilarm er a odechelakl me ngmle kirel el melukl er a ta el basio el mo er a tang. E a uriul er a bo el king e ngkiliei er a kmal klebokel e ungil blai. Me ngdilu er a profet el Nathan el kmo: “Ka mesekak, ak kiei er a blai el kerrekar el sidar, e a Blil a Telbiil er a RUBAK a di ngar a tento.” Ngkmal uluureng el mo omekedechor er a klebokel tento el kirel a Jehovah. Me a Nathan a dilu er ngii el kmo: “Di bor a ikel momdasu, le Dios a obengkem.” Engdi tiang a dimlak luldesuel a Jehovah. Me ngdilu er a Nathan me bo lsbedii a David el kmo: “Ng kmal diak moleketek er a blai el bo kkie er ngii.” Me alta Jehovah a tilbir el mo er a David el kmo Ngii a di mo blechoel lobengkel, engdi David a mlo medengei el kmo ngta er a rengelekel el sechal a mo omekedechor er a templo. Me ngmlo uangera uldesuel a David?​—1 Kronika 17:1-4, 8, 11, 12; 29:1.

7. Ngmlo uangera uldesuel a David el kirel a ulekrael er a Jehovah?

⁷ A David a kmal mle soal lomekedechor er a templo er a Jehovah, me nglocha mlo mekngit a rengul. Engdi ngkilengei el melisiich er a ureor el ngelekel er a Salomon a mo oungerachel er ngii. Me a David a ullengeseu lomekrael er a rechad er a ureor, e milengudel a brons me  a airong el deel me a silber me a kolt me a dirrek el kerrekar. Ngdimlak lomdasu el kmo ngtecha mo nguu a chetengakl el kirel okedecherul a templo, el uriul e ngmo okedongall el templo er a Salomon. Ngbai millisiich er a Salomon er a ledu el kmo: “Mada rungalek, a RUBAK bo lobengkem, me bo le sebechem el lomelemii a okedecherul a blil a RUBAK el Dios er kau, le ng dilu ikal tekoi el kirem.”​—1 Kronika 22:11, 14-16.

8. Nglocha ngera uchul me a David a ulemdasu el kmo, a Salomon a dirkak bo lsebechel mekedecherur a templo? Me ngera ngriruul ngii el David?

⁸ Monguiu er a 1 Kronika 22:5. A David a locha ulemdasu el kmo, a Salomon a dirkak bo lsebechel el meruul er tia el kmal klou a ultutelel lureor. Tia el templo a “kirel el kmal mo klebokel,” e a Salomon a “dirk kekeriei e metitur.” Engdi a David a mle medengei el kmo, a Jehovah a mo ngosuir a Salomon el rullii tia el ileakl lureor. Me ngdi riruul aike el sebechel el olengeseu er ngii el mo kltmokl el kirel tia el kmal klou lureor.

9. Te mekera remechudelang e mo dmeu a rengrir el mesterir a rebebil a ngerechelir? Mosaod er a okesiu.

⁹ A remechudelang el odam a diak lekirir el mo mechitechut a rengrir, a lsekum e ngmo kirir lomesterir a remekekerei el chad a bebil ngerachel. E le kede rokui el medengei el kmo a kot el klou a ultutelel el tekoi er chelechang, a urerel a Jehovah. Me sel dosisecheklterir a remekekerei el mo meruul a ngerachel, e ngmo sebeched el rokui el rullii tia el ureor. Ka molatk er tiang, sera dirk mkekerei e ke locha ulemes er a demam lomekall er a mlai. Me sera obo mklou, e ngsilodii a tekoi el lurruul er ngii. E a cherengel a taem, e ngmlo er ngii a license er kau e ulemuchel lomekall a mlai. Engdi ngmo lmuut er seikid el taem, e a demam a dirk ulemekrael er kau. Me a lebebil e ngkuk mo omekall, engdi sera lorael el mo chuodel e ngdi mlo kau el tang a omekall. Me a ker a kmo, ngmlo mekngit a rengul a demam sel momekall? Ngdiak, nglocha mle ungil a rengul e le ke  ngar ngii el sebechem el oltak er ngii el meliuekl. Me ngdi osisiu, a remechudelang lodam a dirrek el dmeu a rengrir el omes er a remekekerei el bla losisecheklterir el mo kltmokl el kirel a lmuut el bebil er a ngerachel er a chelsel a cheldebechelel a Jehovah.

10. Ngmle uangera uldesuel a Moses el kirel a chetengakl me a dereder?

¹⁰ Ngkmal kired el mo kerekikl me lak demechechei a ngerechelir a rebebil. Ngsebeched el nguu a klubeled er a blekerdelel a Moses, er sel taem el rebebil el chad er a Israel a mlo meruul a tekoi el ua reprofet. (Monguiu er a Ulecherangel 11:24-29.) Me a Josua a mle soal merrob er tir, engdi Moses a dilu el kmo: “Kau ke mechechei el kirek? Ak uureng el le chulekum a RUBAK a mesterir a rokui el chedal a reng er ngii e rulleterir el rokui me te mengedecheduch el ua re profet.” A Moses a mle ungil medengei el kmo a Jehovah a omekrael er tia el tekoi. E ngii el Moses a dimlak el soal a chetengakl a lebo er ngii, e ngbai mle soal a lebo er ngii a ngerechelir a rokui el mesiungel a Jehovah. E kid a kuk mekerang? Ngdmeu a rengud a lsekum a rebebil a mukngerachel el mo meruul a bebil lureor er a chelsel a cheldebechelel a Jehovah?

11. Ngera ngdilu ta lodam el kirel a ngerachel el moterekokl er a rebebil?

¹¹ Te kmal betok a rudam el tir a blak a rengrir el oureor el betok el rak el mesiou er a Jehovah, e dirrek el mla osisecheklterir a remekekerei el mo ngmai a lmuut el betok el ngerachel. Ngsebeched el mo mesaod er a odam er kid el Peter. Chelsel a 74 el rak el losiou el mui el taem, e ngchiloit a 35 el rak el mesiou el ngar er a obis er a Resioning er a Jehovah er a beluu er a Europe. Ngkmal mle kemanget el taem el loureor el ngar er a Service Department. E a uriul e tia el ngerachel a mlo er a Paul, el kekerei el chad el Peter a ullisechakl er ngii. Me a Peter, ngmlo mekngit a rengul er sera lebo er ngii tia lomelodech? Ngdiak, ngbai dilu el kmo: “Ngkmal dmeu a renguk e le te ngar ngii a rudam el mla mosisechakl e kongei el mo meruul a meklou lureor, e kmal blak a rengrir e ungil el meruul ngii lureor.”

12. Ngera klubeled el denguu er a omerellel a Rehoboam?

¹² Sera bo leking a ngelekel a Salomon el Rehoboam, e nguleker a uldasu er a remechudelang el kirel a beches el ngerachel el moterekekla er ngii. Engdi nguleiit a tekingir! E bai mlo oltirakl a uldesuir tirke el di ua meklungel el chad. Me tia el omerellel a mlo uchul a klou el tellemall. (2 Kronika 10:6-11, 19) Me ngera kede suubii er tiang? Nguchul a llomeserreng,  a lsekum kede olengit a ulekrael er tirke el mechudelang e meklou a klemedengei er tir er kid. Me a remekekerei el chad a diak lekirir el morimel el mo meruul a tekoi el kmal di ua lurruul er a ngar er a mong. Engdi ngdirrek el kirir el mo mengull a uldesuir a remeklou el chad, e diak lekirir el di mereched el mo omdasu el kmo, a rolel a loruul a tekoi a dikea loureor er chelecha el taem.

13. Te mekera remekekerei e mo ungil loureor lobengterir a remechudelang er a delongeled?

¹³ A lebebil er a taem, e a remekekerei a mukngerachel el mo omes a urerir a remechudelang, e meklou a klemedengei er tir er a delongeled. Me ngkmal ungil a bo losuub a betok er tirka el mechudelang. El ua tekingel a Paul el ngike el mlo meruul er sel urerel a Peter, el mlo oungerachel a ureor er sel Bethel department. Ngdilu el kmo: “Ak mle blechoel mengoit a taem el oker a uldesuel a Peter, e dirrek el millisiich er a rebebil el mo meruul er a osisiu el tekoi.”

14. Ngera kede suubii er sel rolel e a Timothy me a Paulus a dilak loureor?

¹⁴ A Timothy a kmal mle kekerei er a apostol el Paulus, engdi te dilak loureor. (Monguiu er a Filipi 2:20-22.) A Paulus a dilu er a Rekristiano er a Korinth el kmo: “Ak ulderechii a betik er a renguk e blak a rengul el ngelekek el oltirakl er a Rubak, el Timothy el me omeklatk er kemiu er a rolel otireklel a Kristus el kultirakl er ngii, e olisechakl er ngii er a Ikelesia er ker me ker.” (1 Korinth 4:17) Me ngsebeched el mesang el kmo, a Paulus me a Timothy a kmal mle ta rengrir el dmak loureor e kaingeseu er a delongelir. E a Paulus a milengoit a temel lolisechakl er a Timothy “er a rolel a otireklel a Kristus,” e a Timothy a kmal mlo ungil suub ngii el tekoi. A Paulus a kmal mle betik a rengul er a Timothy e mle ulterekokl a rengul el kmo, ngmo ungil lomekerreu er a rudam me a rudos el ngar er a Korinth. Me a remechuodel a sebechir loukerebai er a Paulus, e mo blak a rengrir el olisechakl er a rebebil rudam er tir el mo meduch el omekerreu er a ongdibel.

15. Ngmekera Rom 12:3-5 e ngosukid el mo kongei a omelodech?

¹⁵ A taem el dekiei er ngii a kmal kosekedelang, me a meues el cheldebechelel a Jehovah a di meleketek el okiu a betok el rolel. Me tiang a belkul a kmo, ngbetok a tekoi el di mengedengodech. E a bebil er ngii a ngar ngii a lerellii er kid, me a lechub e ngmo kired el outekangel er ngii. Ngmo ngosukid el mo oba klengariourreng, e mo blechoel el melatk a klungiaol el bo dengai lokiu a Renged, e bai diak di domdasu el kirel aike el soad er chelechang. E sel doruul uaisei, e ngmo er ngii a kltarreng er a delongeled. A Paulus a milluches el mo er a Rekristiano er a Rom el kmo: Ak “melekoi er a ta ma tar kemiu el kmo, lak bo momdasu el kmo kom kmal ngarbab el mo engelakl a uldesuiu.” E a uriul e ngmilsaod el kmo a derta el klekedellel a bedenged a ngar ngii a ileakl el urerel, me a derta el chedal a ongdibel a dirrek el ngar ngii a ileakl el ngerechelel.​—Rom 12:3-5.

16. Ngera sebechel derta el Kristiano el meruul er ngii me lolemolem el ngar ngii a budech me a kltarreng, er a chelsel a cheldebechelel a Jehovah?

¹⁶ Kid el rokui el chedal a Jehovah a kmal soad  loureor el kirel a Renged, e kongei el mo meruul a ngii di el ngerachel el moterekokl er kid. Me a remechudelang lodam a sebechir el olisechakl er a remekekerei el chad. Me ngmo sebechir a remekekerei el kuk mo ngmai a lmuut el betok el ngerachel el okiu a omengull me a tabesul el rolel a tekoi. Me a rebechiil el odam a kmal loba omereng el saul el kirir a rebecherir el kongei el olengeseu er tir sel lebo er ngii a ngeldechel a tekoi. Tirka el redil a sebechir el loukerebai er a Prisila, el kmal mle blak a rengul lolengeseu er a bechil el Akuila.​—Rellir 18:2.

17. Ngerang ngullisechakl a Jesus el mo er a disaiplo er ngii?

¹⁷ A Jesus a milecherei a kot lungil kerebai el kilengei el olisechakl er a rebebil. Ngmle ungil medengei el kmo, a rebebil a dirk kirir el melemolem el meruul er a urerel. Ngdirrek el mle ungil medengei el kmo a redisaiplo er ngii a diak lemecherrungel, engdi ngmle ulterekokl a rengul el kmo, te mo merkii a klumech er a ungil chais el mo er aike el beluu el dimlak lebo er ngii. (Johanes 14:12) Me ngmle blak a rengul el olisechakl er tir, e tir a mle sebechir el lomerk er a klumech el mo er aike el beluu el mle sebechir el mong.​—Kolose 1:23.

18. Ngera lureor a bo doruul er ngii er a ngar medad el klebesei? E ngera lureor a doruul er ngii er chelechang?

¹⁸ Sera lemad a Jesus, e a Jehovah a ulekisii er a kodall e milsa lmuut el betok el ngerechelel me a klisichel a dereder el kuk “ngar bab er a rokui el mengedereder er a melidiul, ma rulab a klisiich ma re ngar a deruchall, ma omerreder, ma re merreder; e telechull er a dui el kuk ngarbab er a rokui el dui er a klisichel omerreder.” (Efesus 1:19-21) Me a lsekum e ngmelemolem el blak a rengud el mesiou er a Jehovah, e sel demad er a uchei er a Armakedon, e kede lmuut el mo mekiis e mo er ngii a lmuut el betok el meklou a ultutelel el urered er a chelsel a beches el beluulechad. Engdi chelechang e ngar ngii a ileakl el ngerecheled el rokui el kired lomerk er a klumech er a ungil chais, e meruul er a remo disaiplo. Me kid el rokui, el meklou me a remekekerei, bo leblak a rengud el rokui el melemolem el meruul er a urerel a Rubak.​—1 Korinth 15:58.