A Sara, * a dmu el kmo, “Ngak a kmal sekemerur e diak a ngera el kmeduch er ngii. Me ngmeringel er ngak a teloi er a rechad el kmal mesisiich a blekerdelir. Engdi ngbeot er ngak el obengkel a chad el medemedemek e ngariou a rengul. Ngsebechek el ouchais a ngar a renguk me a mondai er ngak el mora chad el uaisei. A resechelik a medemedemek e ngariou a rengrir.”

A tekingel a Sara a ochotii el kmo a delemedemek el blekeradel a rulleterir a rechad el mo sorir sechelid. Ngdirrek lodeuir a rengul a Jehovah. A Tekingel a mengelechel er kid el kmo: “Moubail ra . . . delemedemek.” (Kol. 3:12, BT) Ngerang a delemedemek? Ngmilekera Jesus e ochotii? E mekera tia el blekeradel e rullid el mo dmeu a rengud er a klengar er kid?

A delemedemek a sel lebudech a uldesued. A medemedemek a rengul el chad a ungil omerellel el mora rebebil, e sebechel chelellakl e ulserechakl a rengul sel lechebangel a chetituokel el blekeradel.

A delemedemek a diak el chelitechetul a chad. A tekoi er a Grik el lousbech er ngii a Biblia el kirel a “delemedemek” a mesaod er a tebelik el uos el mla mo kedung. Me sel dolecholt er a delemedemek, e ngmo sebeched el di kid el mtebechelid, e toketek a budech er a delongeled kid me a rebebil.

Ngsebeched el mo omdasu el kmo ‘Ngak a diak el medemedemek a renguk.’ E le kede kiei el teloi er a rechad el mesisiich a blekerdelir e mekedeb a rengrir, me ngmo meringel er kid lolecholt er a delemedemek. (Rom 7:19) Me ngkirel mo blak a rengud lomekeroul er ngii, e a chedaol reng er a Jehovah a mo ngosukid. (Gal. 5:22, 23) Ngera me ngkirel mo blak a rengud lomekeroul er a delemedemek?

A delemedemek a ochau a rengrir a rechad. El ua ledilu Sara, ngsoad el teloi er a rechad el medemedemek a rengrir. A Jesus a kot lungil kerebai er a chad el medemedemek a rengul e ungil a blekerdelel. (2 Ko. 10:1) Me a rengalek el dimlak lsal medengelii a mle sorir el mo kmeed er ngii.​—Mk. 10:13-16.

A delemedemek a mekerreuid kid me tirke el iliuekl er kid. A lsekum ngmedemedemek a rengud, e ngdiak di lemereched el mo kesib a rengud. (Osi. 16:32) Seikid e ngdiak bo douuchel a rengud e le kid el tilemall a rengrir a rechad, el ileakl tirke el  betik er a rengud. A delemedemek a mtebechelid me ngdiak bo doruul a tekoi el mo tomall a rengrir a rechad el iliuekl er kid.

A Jesus a mle oberaod a ngerechelel e mle mechesang, engdi ngullecholt er a delemedemek el mora rokui el chad. Te betok el chad er a taem er ngii a mle chuarm e oberaod er a mondai me te uluusbech a ulengull. Me ngulterekokl el mlo mechelaod a rengrir er a ledu el kmo: “Mer ngak, . . . ele ngak a medemedemek e ngariou a renguk”!​—Mt. 11:28, 29.

Ngmekerang a domekeroul er a delemedemek el ua Jesus? Bo dosuub er a Tekingel a Dios el kmo ngmilekerang a Jesus er a lobengterir a rechad e losmechokl a meringel blekeradel. Seikid e sel bo dechelebangel a blekeradel el melasem er a delemedemek er kid, e kede melasem el mo oukerebai er ngii. (1 Pe. 2:21) Bo dosaod a edei el tekoi el ngilsuir el mo oba delemedemek.

A Jesus a mle ngariou a rengul. Ngdilu el kmo ngak a “medemedemek e ngariou a renguk.” (Mt. 11:29) A Biblia a mesaod aika el eru el blekeradel el dmak, e le delemedemek a oureor el obengkel a klengariourreng. (Efe. 4:1-3) E ngera uchul?

A klengariourreng a ngosukid me ngdiak di lemereched el metemall a rengud er a tekingir a rechad. Ngmilekera Jesus er sel taem el rechad a millekoi a mekngit el kirel el kmo, “ngemokel e sekengim ra bilong”? Nguleak a blekerdelel e ngmileketeklii el kmo aikang a di blulak, e uleba klengariourreng el smodii el kmo a ‘llomeserreng a ochotii a urerel el kmo ngmelemalt.’​—Mt. 11:19, BT.

A lsekum a chad a melekoi a mekngit el kirel a beluam, me kau, me a ulekurulem, e bo molasem el oba delemedemek el onger. A Peter, el ta er a remechuodel er a South Africa a kmo: “Sel bo el chetik a tekingel a chad, e ak melatk el kmo, ‘Ngmo mekerang a Jesus?’” Ngdirrek el kmo: “Ak mla suubii el kmo ngdiak el kirek el di mereched el metemall a renguk er a tekingir a rechad.”

A Jesus a mle medengei el kmo a rechad a diak lemecherrungel. A redisaiplo er ngii a mle sorir el meruul a llemalt, engdi ngdimlak lemecherrungel me ngmle meringel er tir el meruul uaisei. El ua tiang, sel kesus er a uchei er a kodellel, e a Petrus, Jakobus, me a Johanes a dimlak lolemolem el mekar el ua lullengit a Jesus. A Jesus a mle ungil medengei el kmo, “a rengul a chad a soal, e ngdi klechad er ngii a mechitechut.” (Mt. 26:40, 41) Ngmle medengei el kmo ngdiak lemecherrungel a uchul me ngdimlak bo lekesib a rengul er tir.

A ta el odos el Mandy a mle blechoel melatk a kngterir a rebebil, engdi chelechang e ngmelasem el oukerebai er a delemedemek er a Jesus. Ngdmu el kmo, “Ak melasem el omtab el kmo a rokui el chad a diak lemecherrungel e dirrek el omes a ungil blekerdelir, el di ua Jehovah.” Me a osengel a Jesus el kirel a chelitechetul a klechad, ngsebechel ngosukau el mo olecholt er a delemedemek?

A Jesus a uluumerang el kmo a Dios a mo sumechokl a rokui el tekoi. Sera lengar a chutem, e nguluutekangel a diak lemelemalt lomeruul. Te uleltuub, e ulemekcharm e dimlak lemelemalt a uldesuir el kirel. Me nguaisei, engdi ngmillemolem el oba delemedemek, e le nguluumerang er a “Dios el melemalt a loukerrekeriil.” (1 Pe. 2:23) Ngmle medengei el kmo a Demal el ngar a eanged a mo omekerreu er ngii, e mo omals er tirke el ulemekcharm er ngii er sel blsechel.

A bo el kesib a rengud er a diak lemelemalt el omeruul, e ngsebechel rullii a tekoi el mengal mo chetituokel. Sei a uchul me a Bades a omeklatk el kmo: “A ngesechel a rengul a chad a diak a ngeral le rellii er a ikel ungil er a rengul a Dios.” (Jak. 1:20) Me alta ngar ngii a uchul a ngesechel a rengud, engdi ngkid el diak demecherrungel me ngsebeched el mo meruul a mekngit.

A Kathy el odos el ngar a Germany a ulemdasu el kmo, ‘A lsekum ngdiak mosebechakl er kau, e ngdiak a chad el sebechel.’ Engdi sera losuub el mo ultuil er a Jehovah, e ngmlengodech a uldesuel. Ngkmo, “Chelechang e ngdikea kulasem el di mesebechakl er ngak. Ak bai olecholt er a delemedemek, e le kuumerang el kmo a Jehovah a mo sumechokl a  rokui el mekngit el ngar tia el beluulechad.” A lsekum ke mla chormii a mekngit lomeruul, e moukerebai er a Jesus el oumerang el kmo a Dios a mo ngosukau me ke melemolem loba delemedemek.

A Jesus a milsaod el kmo, a lsoad el mo dmeu a rengud, e ngkired el mo oba delemedemek. Ngdilu el kmo, “Te ngeltengat ar medemedemek.” (Mt. 5:5, BT) Molatk er a rolel e a delemedemek a ngosukau er a chouaika el blekeradel.

A delemedemek a kosadel a mondai er a chebechiil. A Robert el odam er a Australia a kmo, “Ak mla dmu betok el mekngit el tekoi er a bechik. E sel ta el lemedung, e ngdikea lsebechel moluut. Me a kuuchel er a renguk sel kudengei el kmo ak mla tomellii a rengul.”

“Kede rokui el blechoel el mo e mecheuid” a dongedecheduch, me a terrekakl el cheldecheduch a sebechel tomellii a budech er a chebechiil. (Jak. 3:2) Me ngar chouaika el blekeradel, e a delemedemek a ngosukid el mo chelellakl a rengud e oserechii a churad.​—Osi. 17:27.

A Robert a uluureor lomekeroul er a chelellakl el reng me a ulserechakl el reng. Me ngera dilubech? Ngdmu el kmo, “Chelechang e sel bo el kakebosech a uldesuek ngak me a bechik, e ak melasem el orrenges, e mengedecheduch loba delemedemek, e diak lengasech a renguk, me ngmla mo ungil a delongelam.”

A delemedemek a ngosukid el mo meduch el teloi er a rechad. Tirke el mereched el ngmasech a rengrir a blechoel diak a resechelirir. Engdi a delemedemek a ngosukid el mo ‘omtebechel er a . . . budech el merenged el oldak er kid.’ (Efe. 4:2, 3) A Kathy el dulsaod er ngii a kmo, “A delemedemek a mla rullak el mo sebechek el teloi er a rechad, el uldimukl er tirke el meringel er kid a obengterir.”

A delemedemek a meskid a budech. A Biblia a oldak er a “llomeserreng el ngar bab el mei” er a delemedemek me a budech. (Jak. 3:13, 17) A medemedemek a rengul el chad a oba “chelellakl el uldasu.” (Osi. 14:30) A Martin el mla melasem lomekeroul er a delemedemek, a mtebengii el kmo, “Ngdikea di kurrimel er a rechad el mo oltirakl a uldesuek, me ngmla mo budech a uldesuek e dmeu a renguk.”

Ngmerang, ngkirel mo blak a rengud el omekeroul er a delemedemek. A ta el odam a kmo, “Ngar ngii a taem el kmal mo kesib a renguk.” Engdi Jehovah a melisiich er kid el mo omekeroul er a delemedemek e mo ngosukid el olecholt er ngii. (Isa. 41:10; 1 Ti. 6:11) Ngsebechel “sumechokl a rokui el tekoi” el kired e ‘smisichid.’ (1 Pe. 5:10) E a cherengel a taem, e kede mo ua apostol Paulus, el sebeched loukerebai er a “delemedemek ma klengariourreng er a Kristus.”​—2 Ko. 10:1.