A bebil el ulaoch el ngar tia el chart a mesaod a tekoi el dilubech er a osisiu el taem. Ngii el rokui el ulaoch a meketeklii el kmo kede kiei er a “taem er a ulebongel.”​—Dan. 12:4.

• Bades Och. 11:7; 12:13, 17; 13:1-8, 12

  Ulaoch A tebelik el “charm” a mla mengedereder er a beluulechad el betok el dart el rak. Ngar a taem er a ulebongel, e sel ongeuid el bdelul a miltemall. E a uriul, e ngmlo mechubs e a “beluulchad el rokir” a mlo oltirakl er ngii. A Satan a ousbech er ngii el mo “oldechelakl er tirkel medechel.”

  Otutel A uriul er a Ieleb, e ngmlo er ngii a kabelment el omtok er a Jehovah. E a betok el dart el rak er a uriul, er sera Kot el Mekemad, e a Renged er a Britain a mlo diak a kmal klisichel. Ngliluut el mo mesisiich er a bo lobengkel a Merikel. Chelecha el taem er a ulebongel, e a Satan a ousbech a rokui el kabelment el omekcharm er a rechedal a Dios.

• Bades Dan. 11:25-45

  Ulaoch Ngar a taem er a ulebongel, e a king er a diluches me a king er a dimes a mo kaumekemad el kirel a klisiich.

  Otutel A Germany a uluumekemad er a Britain me a Merikel. Sera 1945, e a Soviet Union me aike el beluu el olengeseu er ngii a mlo king er a diluches. E sera 1991, e ngmlo diak a Soviet Union, e a uriul, e a Russia me aike el beluu el olengeseu er ngii a mlo king er a diluches.

• Bades Isa. 61:1; Mal. 3:1; Lk. 4:18

  Ulaoch A Jehovah a ulderchii a ‘oderchelel’ el mo ‘kudmeklii a rael’ er a uchei er a lemeteketek a Rengedel a Mesias. Ngika el ‘oderuchel’ a miluchelii a ureor el mo “ouchais er a ungil chais el mor a re mechebuul.”

  Otutel Ngulemuchel er a 1870, e a Brother Russell me a rebebil a mle blak a rengrir el mesuub er a Biblia me bo lodengei a mera losisecheklel. Me sera 1881, e te miltebengii el kmo ngkmal klou a ultutelel el kirir a remesiungel a Dios el omerk er a klumech. Me te uleltobed a suobel el ua “Wanted 1,000 Preachers” me a “Anointed to Preach.”

• Bades Mt. 13:24-30, 36-43

  Ulaoch A ta el chad a ulemriid a ungil tane er a sersel. E a cheraro a mei el mriid a tane er a mekngit el dellomel. Me ngmlukeroul el chuucheb a ungil dellomel. Me a temel a omeridm, e a mekngit el dellomel a mo meakl er a ungil dellomel.

  Otutel Ngulemuchel er a 1870, e ngmlekekokil el obeketakl a klekakerous er a remera el Kristiano me a reklsuul. E ngar a taem er a ulebongel, e a remera el Kristiano a mo mechudel e meakl er a reklsuul el Kristiano.

• Bades Dan. 2:31-33, 41-43

  Ulaoch A uach el rruul er a chutem me a deel a ochil a bleob el chaus el rruul er a betok el kakerous el deel.

  Otutel A chutem a omtechei er a rechad el ngar cheungel a Britain me a Merikel, e omtok a omengederederir. Tir a uchul me aika el kabelment a diak lsebechel mo mui lousbech a klisichir.

• Bades Mt. 13:30; 24:14, 45; 28:19, 20

  Ulaoch “A ungil dellomel” a mechudel el mo er a “blil a dellomel” e a “blak a rengul e mellomes a rengul el mesiou” a metutk el mo oungerachel er “tirkel bebil er a re mesiou.” E a “Ebangkelio el kirel ngii el Renged” a mo oberk el mora “beluulchad el rokir.”

  Otutel Sera 1919 e a blak a rengul mesiou a meltutk el mo omekerreu er a rechedal a Dios. Ngomuchel er sel taem, e a Remesuub er a Biblia a liluut el meleketek a urerir er a berkel a klumech. Me chelechang, e a Resioning er a Jehovah a omerk er a klumech er a betok er a 200 el beluu, e oltobed a babier el mengai er a Biblia, el ngar a betok er a 1,000 el omelekoi.

• Bades Dan. 12:11; Och. 13:11, 14, 15

  Ulaoch A eru orsul el charm a melekoi er a rechad el mo meruul er a “bleob el okesiul ngikel kot el charm” e “dokouii a klengar el loia” er ngii.

  Otutel A Britain me a Merikel a miluchelii a League of Nations. A lmuut el bebil er a beluu a mlo chedal tia el cheldebechel. E sera 1926 el mora 1933, e a king er a diluches a mlo chedal. Me a rechad a uluumerang el kmo a League of Nations a sebechel toketekii a budech, engdi ngdi ta el Rengedel a Dios a sebechel rullii. Te dirrek el oumerang el kmo a United Nations (UN) me nguaisei.

• Bades Dan. 8:23, 24

  Ulaoch A medecherecher a rengul el king a “mo uchul a kdekudel tellemall.”

  Otutel A Britain me a Merikel a mla mekodeterir a rekmal betok el chad e mla mo uchul a betok el tellemall. El ua tiang, sera Ongeru el Mekemad, e a Merikel a urrebet a teblo el dub er a beluu el mle cherrouel ngii me a Britain. Aika el dub a mlo uchul a kmal klou el tellemall el dirkak lebo er ngii er seikid el taem.

• Bades Dan. 11:31; Och. 17:3, 7-11

  Ulaoch “A bekerkard el charm” el teruich a orsul a me tuobed er a datk, e ngii a ongeai el king. A babier er a Daniel a mesaod er ngii el kmo ng “Melemall a Chedaol.”

  Otutel A League of Nations a mlo diak er sera Ongeru el Mekemad. E a uriul, e ‘ngmildalem’ a UN. Me ngdi ua League el melasem el meruul er a tekoi el Rengedel a Dios a sebechel rullii. E ngii el UN a mo oldechelakl a klechelid.

• Bades 1 Th. 5:3; Och. 17:16

  Ulaoch Aika el renged sel ledu el kmo “ng budech ma rokui el tekoi a di ungilbesul,” e seikid e a “truich el orsul” me “ngikel charm” a mo oldechelakl er a “prostitute” e okngemedii. E a uriul, e ngmo nguemed aika el renged.

  Otutel Aika el renged a mo melekoi el kmo te mla toketekii a budech me a ulekerreu. E aike el renged el olengeseu er a UN a mo okngemed a cheldebechelel a klsuul klechelid. Tiaikid a mo uchelel a kloul ringel. E tia el ringel a mo merek lobengkel a telemellel tia el beluulechad er a Satan er a Armakedon.

• Bades Ese. 38:11, 14-17; Mt. 24:31

  Ulaoch A Kok a mo omtok er a rechedal a Dios. Seikid e a rechanghel a mo chudelterir a “re ngellitel.”

  Otutel A king er a diluches me a rokui el kabelment a mo oldechelakl er a rechedal a Dios. A uriul er a lomuchel tiang, e tirke el dirk medechel el ngellitel a mo mechudel el mora eanged.

• Bades Ese. 38:18-23; Dan. 2:34, 35, 44, 45; Och. 6:2; 16:14, 16; 17:14; 19:20

  Ulaoch Ngike el “mlar bebul” a “becheleleu el uos” a mo “oumekemad” el okngemedii a Kok me a resoldau er ngii. E “ngkel charm” a “obidokl er a chelsel a diosech el ngau,” e a bad a subechii er a bleob me ngmecherad.

  Otutel A Jesus el King er a Rengedel a Dios, a me olsobel. Ngii me a rubengkel el 144,000, me a rechanghel a mo okngemed a cheldebechel er a renged, el kabelment er a Satan.