1, 2. Ngmo uangera uldesuir a rengeasek el kirel a Jehovah a lebebil er a taem? E ngera el ulekrael a sebeched el ngmai er a Biblia?

 A TA el ngalek er a skuul a dilu er a ngeasek el odos er kid er a Britain el kmo: “A llemesel a rengum a kirel el rullau me ngdiak moumerang el kmo ngar er ngii a Dios.” E a ta el odam el ngar er a Dois a milluches el kmo: “A resensei er ngak a oumerang el kmo aike el cheldecheduch el ngar er a Biblia el kirel a bleob a di delbochel el tekoi. Me te rulleterir a rengalek er a skuul el mengal mo oumerang el kmo kede mla er a mongkii el mei.” E a ngeasek el odos er kid er a France a dilu el kmo: “A resensei er a skuul a kmal mo mechas a rengrir sel bo lodengei el kmo te ngar er ngii a rengalek er a skuul el dirk oumerang er a Biblia.”

² A rebetok el chad er chelechang a oumerang el kmo a Dios a dimlak lomeob er kid. Me a lsekum ke ngeasek el mesiungel a Jehovah me a lechub e ke mesuub el kirel, e nglocha mo er ngii a taem e ke mo omdasu el kmo ak mekerang e meketeklii el kmo Ngii ngike el Ulemeob er kid. A Biblia a dirrek el sebechel el ngosukid el mo kerekikl el omtab aike el tekoi el derenges me a dechuiu e osisecheklid el mo meduch el mesaod er tia el tekoi. A Tekingel a Dios a kmo: “A llemesem ma sekutaberreng er kau a mo sobecheklau.” El okiu a ngera el rolel? Ngmo ngosukau el mo meduch el oltngakl a blulak el tekoi e dirrek el smisichii a klaumerang er kau er a Jehovah.​—Monguiu er a Osisechakl 2:10-12.

3. Ngera kede mo mesaod er tia el suobel?

 ³ A mesisiich el klaumerang er kid er a Jehovah a mo er ngii el okiu sel bo dungil el medengelii. (1 Ti. 2:4) Me sel monguiu er a Biblia me aike el babilenged, e ngklou a ultutelel el bo mchelellakl e momtab aike el tekoi el losaod, e molasem el mo medengei a belkul a tekoi el monguiu. (Mt. 13:23) Tiaikid el rolel a omesuub a mo uchul e ngsebechem el metik a betok el olechotel el kmo a Jehovah a ngike el Ulemeob er kid, e a Biblia a babilengel.​—Heb. 11:1.

4. Ngoeak a ngera el rolel e a klaumerang el kmo kede mla er a mongkii el mei a di osisiu er a klaumerang el kirel a blebelel a Dios? Me ngera kired el meruul er ngii?

⁴ Alta e a chad a mo dmu er kau el kmo, “Ngak a oumerang el kmo kede mla er a mongkii el mei, e le re scientist a dmu el kmo tiang a klemerang el tekoi. Me ke mekerang e mo oumerang er a Dios el dirkak a chad el mesang?” Te betok el chad a omdasu el uaisei, e mera el tekoi ngdirkak a ta er kid el mla mesa Dios me a lechub e lulemes er ngii el lomeob. (Jn. 1:18) Engdi te kuk mekerang a rechad el oumerang el kmo kede mla er a mongkii el mei? Te dirrek el oumerang er a tekoi el diak el sebechir el mesang. Ngdirkak a ta el scientist me a lechub e ngii di el chad el mla mesang a klengar er a tang el obult el mo ta er a bedengel a klengar. El ua tiang, ngdirkak a chad el mla mesa bersoech el obult el mo laion. (Job 38:1, 4) Me ngkmal kired el mo ungil melatk a tekoi, e mo kerekikl el omtab e melilt el kmo aika ngomeketakl er a ngerang. A rebetok el chad a mla omes e omtab a betok el tekoi el kirel a klengar e mo “bleketakl” er a rengrir el kmo ngmera el ngar er ngii a Dios. Te mo mtebengii el kmo ngmera el ulemeob a rokui el tekoi, e dirrek el kot el mesisiich, e ngar er ngii a betok el ungil el blekerdelel.​—Rom 1:20.

5. Ngera el klekedall a sebechel el ngosukid el mesuub a lmuut el betok el kirel a bleob?

⁵ Me sel domes a rokui el klengar e bo dekerekikl el omtab e kede mo mesang el kmo a rokui el tekoi a ulebeob el okiu a mengasireng el rolel. A klaumerang er kid a uchul me kede oumerang el kmo ngar er ngii a Ulemeob, alta e ngdiak el sebeched el mesang. Kede dirrek el mo medengei el kmo ngar er ngii a ungil el blekerdelel e kmal mellomes a rengul. (Heb. 11:3, 27) Ngsebeched el mesuub el kirel a lmuut el betok el blebelel el okiu sel donguiu el kirel a tekoi el bla letiriter a re scientist. E a bebil er ngii a sebeched el metik er aike el DVD er kid el The Wonders of Creation Reveal God’s Glory, me a brochure el Was Life Created? me a The Origin of Life​—Five Questions Worth Asking, me sel babier el Is There a Creator Who Cares About You? E ngar er aike el Awake! el magazine, e ngblechoel el  mesaod a tekingir a re scientist me a relmuut el bebil el mesaod er a uchul me chelechang e te mla mo oumerang er a Dios. Ngdirrek el ngar er aike el suobel el “Was It Designed?” e ngmesaod a dmolech el omesodel a tekoi el kirel a charm me a lmuut el bebil er a klengar, me a dirrek el sel rolel e a re scientist a melasem el meruul a tekoi el oltirakl er a rolel a loureor aika el bleob.

6. Ngmekerang aika el klekedall e ngosukau?

⁶ A 19 a rekil el odam el ngar er a beluu er a Merikel a mesaod el kirel aika el eru el brochure el kmo: “Aikang a kot el mekreos er a renguk el babier. Ngkmal mla mo betok el taem el kusuub ngii el babier.” E a odos el ngar er a France a milluches el kmo: “Aike el suobel el ngar er a ‘Was It Designed?’ a kmal chosir a renguk! Ngmeketeklii el kmo a rekot el meduch el engineer a locha mo melasem el mesuub a rolel a loureor aika el bleob engdi ngkmal diak el sebechir el mo cherrungel el mekesiur.” E ngar er a South Africa e a rubekel el oungalek er a 15 a rekil el redil a kmo: “Sel kot el tekoi el loruul er ngii a ngelekam sel longuiu er a Awake! a omes aike el tekingir a rechad el ngar er a chelsel.” Me aika el babier a sebechel el ngosukau el mo mesang a bleketakl el olechotel el kmo ngmera el ngar er ngii a Ulemeob, e dirrek el ngosukau me ngmo sebechem el mo medengei e otngakl a klsuul el osisechakl. Seikid e a klaumerang er kau a lmuut el mo mesisiich me ke mo ua kerrekar el mesisiich a risel me ngsebechel el melemolem el dechor el outekangel er a ses el eolt.​—Jer. 17:5-8.

7. Ngera me a Dios a soal a di lekau el merriter a tekoi?

⁷ Ngmo cheleuid a uldesued a lsekum kede mo melatk el kmo, ‘Ngera uchul me a kuumerang a tekoi el medung er a Biblia?’ Ngdiak leuaisei, e le Jehovah a kmal diak el soal a obo moumerang a tekoi e le rechad el oumerang er ngii. Ngbai soal sel “morriter a rokui el tekoi” me bo mungil el medengelii a Biblia me lobeketakl er a rengum el kmo ngmera el babilengel. Me sel lemukeroul a klemedengei er kau er ngii e nglmuut el smisichii a klaumerang er kau. (Monguiu er a 1 Thesalonika 5:21; 1 Timothy 2:4.) A ta er a rolel e ke mo ungil medengelii a Biblia a sel mosuub el kirel a derta el tekoi el soam el lmuut el mekurulii a klemedengei er kau er ngii.

8, 9. (a) Ngera el suobel a sorir a rebebil el mesuub el kirel? (b) Te milekerang a rebebil e ngmai a klungiolir er a tekoi el lulenguiu e melebedebek?

⁸ A rebebil a kmal sorir el mesuub el kirel a ulaoch el ngar er a Biblia. Me a lechub e te kuk sorir el omekesiu a cheldecheduch er a Biblia el mo er a tekingir a rechad er a reksi me a re scientist me a lechub e te archeologist. El ua tiang, ngar er a Genesis 3:15, e a Jehovah a dillii a kot el klou a ultutelel el ulaoch er a uriul er a Adam me a Eva a bo lomtok er a Jehovah me sel omengederederel. E tiang a kot el ulaoch el obengkel a lmuut el betok el ngii a sebechel el ngosukid el mo medengelii a rolel, e a Rengedel a Dios a mo meketeklii el kmo a omengederederel a Dios, a kot el ungil el rolel a dereder, e mekerang a bo lokngemedii a ringel. Me ngmekerang a omosuub er tia el bades er a Genesis 3:15? Ngsebechem el lmuches aike el bades el mesaod el kmo ngmekerang e mo tmaut tia el ulaoch. E sola e morriter el kmo aika el bades, ngmilluches er oingerang, e momechobech el ngar er a melemalt el bldeklel. Seikid e ke mo medengei el kmo tirke el milluches a babier er a Biblia a kiliei er a kakerous el taem, engdi a derta er tir a milluches a tekoi el lmuut el meketeklii tia el ulaoch. Tiaikid el rolel a meketeklii er a uldesuem el kmo a Jehovah a uluusbech er a chedaol reng er ngii el omekrael er tirka el chad.​—2 Pe. 1:21.

⁹ A odam el ngar er a Dois a millatk er a rolel e a derta el babier er a Biblia a mesaod a dmolech el omesodel a Rengedel a Dios, me ngdilu el kmo: “Ngmera el tekoi, alta e te bekord el 40 el chad a milluches er a Biblia, e a rebetok er tir a kiliei er a kakerous el taem e dirrek el diak lekaodengei.” A odos el ngar er a Australia a milsuub er a suobel el ngar er a Ongkerongel, e mlo medengelii sel rolel e tia el Baskua me a Genesis 3:15 me a dirrek el Mesias a dmak el tekoi. ^[1] Me ngmilluches el kmo: “Ngmera el mileketeklii er a renguk el kmo a Jehovah a mera el ungil el Dios. Sel rolel e ngkiltmeklii tia el tekoi el kirir a rechad er a Israel e dirrek el rullii el mo tmaut el okiu  a Jesus a kmal chosir a renguk. Me ngmle kirek el mo chelellakl el telkib e omdasu er a rolel e tia el ulaoch el kirel a Baskua a mileketmokl!” Ngera me ngmlo uaisei a uldesuel ngika el odos? Ngmle dmolech el melebedebek aike el tekoi el lulenguiu me ngmlo medengei. E tiang a liluut el smisichii a klaumerang er ngii e lmuut el okesengii a deleuill er ngii me a Jehovah.​—Mt. 13:23.

10. Ngmekerang a melemalt el omesodir a remilluches er a Biblia e smisichii a klaumerang er kid er ngii?

¹⁰ Ka di molatk a melemalt el omerellir tirke el milluches er a Biblia. Te mle blechoel el ouchais a klemerang e dimlak lemedakt el meruul uaisei. A rechad el milluches a babier er sel taem a di mle blechoel el meluches el kirel a ungil tekoi el kirel a belurir me a remengeteklel a belurir. Engdi a reprofet er a Jehovah a dimlak di loluches el kirel a ungil tekoi, e te dirrek el milluches aike el mekngit el tekoi el lurruul a rechad er a Israel me tirke el king er tir. (2 Kr. 16:9, 10; 24:18-22) Te dirrek el milsaod el kirel a cheleuid el omerellir me a omerellir tirke el bebil el mesiungel a Dios. (2 Sa. 12:1-14; Mk. 14:50) A ta el ngeasek el odam er a beluu er a Britain a dilu el kmo: “Me a omerellir el kmal mle melemalt a diak lebeot el tekoi, me tiang a lmuut el oterekokl a rengud el kmo a Biblia a mera el babilengel a Jehovah.”

11. Ngmekera ulekrael el debetik er a Biblia e oterekokl a rengud el kmo ngbabilengel a Dios?

¹¹ A rechad a mo mesang a klungiolel sel lekengei el oltirakl a ulekrael er a Biblia. E tiang a lmuut el oterekokl a rengrir el kmo ngmera el babilengel a Dios. (Monguiu er a Psalm 19:7-11.) A ngeasek el odos er kid er a Siabal a milluches el kmo: “Sel taem el telungalek er ngak a oltaut a ulekrael er a Biblia e ngkmal mo dmeu a rengmam, e mo er ngii budech me a kltarreng me a bltikerreng er a delongelam.” Me a Biblia a mla ngosuterir a rebetok el mo mtebengii el kmo, a bebil er a tekoi el luluumerang a klsuul el tekoi. (Psa. 115:3-8) A Biblia a omekrael er a rechad el mo ultuil er a Jehovah el ngii a kot el mesisiich el Dios. Ngdirrek el meskid a telbiil el kirel a ungil klengar er a ngar medad. Me a lmuut el tang, a rebebil el melekoi el kmo ngdiak a Dios, a bai mla remuul a bleob el mo ua chederir. E a rekuk bebil a kmo a rechad a sebechir el kutmeklii a ungil el rolel a klengar er a ngar medad, engdi sel domes e ngme lmuut er chelechang e ngdirkak a ta el chad el mla mo sebechel sumechokl a rokui el mondai er a beluulechad.​—Psa. 146:3, 4.

12, 13. Ngmekerang a dosaod el kirel a blebelel a Dios me a lechub a Biblia el mo er a rechad?

¹² A kot e ngungil el molasem el mo medengei el kmo a chad ngoumerang er a ngerang er a uchei er a omosaod el kirel a Biblia me a lechub e ngblebelel a Dios. E lak mobes el kmo te ngar er ngii a rebebil el oumerang el kmo kede mla er a mongkii el mei el dirrek el oumerang el kmo ngar er ngii a Dios. Te melekoi el kmo nguluusbech er a mongkii el omeob a rokui el tekoi. E a rekuk bebil a oumerang el kmo a uldasu el kmo kede mla er a mongkii el mei a mera el tekoi, e le te olisechakl er ngii er a skuul. E a rebebil a mo diak loumerang er a Dios el mekngit el omeruul er a klechelid er tir a uchul. Me ngungil a domuchel el korir a chad el kmo ngera ngoumerang er ngii e ngera uchul me ngoumerang er tia el tekoi. E bom kerekikl el omtab a tekingel. Seikid e nglocha mo kongei el rongesau.​—Tit. 3:2.

¹³ Ke mo dmu el kmo ngerang, el mo er a chad el dmu er kau el kmo, ngklebelung a uldesuem el omdasu el kmo ngar er ngii a Ulemeob? Ngsebechem el korir a uldesuel el kirel a rolel e ngulemuchel a klengar. Ngdirrek el sebechem el mesaod el kmo, ngmo sebechel a klengar el mukeroul a lsekum a kot el ngar el tekoi a mo er ngii a betok el osisiu el uai ngii. E a ta el chellimosk el chad er a chemistry a dmu el kmo, ngusbechall a lmuut el betok el tekoi el diak di el chimo el klengar e merekong. A (1) ngkirel mo er ngii a budel a bedengel el omekerreu er ngii, (2) ngmo er ngii a duch er ngii el melai a energy e mo meduch el ousbech er ngii, (3) ngmo sebechel el di ngii el omtebechel er ngii me a blekerdelel me a okurulel, e a (4) ngmo sebechel el di ngii el omekdubech a osisiu el tekoi. Me ngdmu el kmo: “Ngkmal mechas a rengud er a kmal komakai el omesodel a kot el kekerei el klengar.”

14. Ngera el beot el omesodel a tekoi a sebechem el mesaod el kirel a blebelel a Dios?

 ¹⁴ Me sel mosaod el kirel a blebelel a Dios, e ngsebechem el ousbech a beot el omesodel a tekoi el ua lurruul er ngii a Paulus. Ngmilluches el kmo: “A bek el blai a ngar ngii a chad el meruul, e ngdi Dios a ngii a meruul a rokui el tekoi.” (Heb. 3:4) Me a blai a ngar er ngii a chad el milluches er a llecheklel e meleketek er ngii. Me a klengar el ngii a lmuut el chetituokel a omebelel a ulterekokl el ngar er ngii a ulemeob el mileob. Ngdirrek el sebechem el ousbech aike el babilenged. A ta el odos er kid a milengedecheduch er a kekerei el chad el dimlak loumerang er a Dios. Ngmilsang a teblo er aike el brochure el dulsaod er a uchei, e a uriul er a ta el sandei e ngii el chad a dilu el kmo: “Chelechang e ak mla mo oumerang el kmo ngar er ngii a Dios.” Me ngulemuchel el mesuub a Biblia e a uriul e ngmlo metecholb el mo ta er a odam er kid.

15, 16. Ngkired el mekerang er a uchei er a desodii el mo er a chad el kmo a Biblia a babilengel a Dios? E ngera el tekoi a kired el melatk er ngii?

¹⁵ Ngmekerang a omosaod a tekoi el mo er a chad el diak loumerang er a Biblia? Ngdirrek el sebechem el omuchel el korir el kirel a klaumerang er ngii. E molasem el mo medengei a tekoi el lesemeriar er ngii. (Osi. 18:13) A lsekum e ngsoal a tekoi er a science, e mocholt aike el omesodel a Biblia el kirel a tekoi er a science el kmo ngblechoel el melemalt el omesaod. E a lsekum e ngsoal a tekoi er a reksi, e ngsebechem el mesaod aike el tekoi el dilubech el ngar er a Biblia e mochotii er ngii a rolel e a Biblia a ulemlaoch el kirel aika el tekoi er a betok el rak er a uchei er a leduubech. A rebebil er a rechad a locha mo kongei el orrenges er kau sel mochotii er a Biblia a tekoi el sebechel el remuul a klengar er tir el lmuut el mo ungil, el ua sel ulekrael el medung el ngar sel Cheldecheduch el Ngar er a Rois.

¹⁶ Lak mobes, ngdiak el soad el mengaititekangel er a rechad. Ngsoad a lungil a rengrir el mengedecheduch er kid e losuub el kirel a Biblia. Me mochotii a omengull sel moker a ker, e bom kerekikl el rongesii a chad. Bo lungil a delecherul a ngerem sel mouchais el kirel a klaumerang er kau el ileakl a lsekum a chad a klou er kau. Sel molecholt er a omengull e te dirrek el mo oba omengull el bedulkau. Te dirrek el mo mechas a rengrir er kau el kmal kekerei e kerekikl el melatk el kirel a tekoi el moumerang. Me nguaisei, engdi a lsekum a chad a kuk di soal el mengaititekangel me a lechub e ngomekako er kau e lak mongoit a temem el onger er ngii.​—Osi. 26:4.

17, 18. (a) Ngera sebechel el ngosukau el lmuut el smisichii a klaumerang er kau er a Biblia? (b) Ngera el ker a bo dosaod er a ongingil el suobel?

¹⁷ Alta e kede medengei a betok el osisechakl el ngar er a Biblia, engdi kede dirk ousbech a lmuut el betok el mo melisiich er a klaumerang er kid. Ngdirk kired el mo dmolech el merriter e osiik el ua dosiik a mekreos el klalo el berrotel. (Osi. 2:3-6) A ta er a ungil el rolel e ke melisiich er a klaumerang er kau a sel mchiuii a Biblia el rokir. Nglocha sebechem el melasem el menguiu er ngii er a chelsel a ta el rak. Tiang a ngilsuir a ta el odam el oldingel a ongdibel el lmuut el mo kmeed er a Jehovah er sera dirk lekekerei, me ngdilu el kmo: “A ta el tekoi el ngilsukak el mo oba omereng el saul e melatk el kmo a Biblia a Tekingel a Dios, a sera kchiuii el rokir. Me aike el tekoi el ksiluub er a cheldecheduch er a Biblia er a dirk kngeasek a kmal ulebeketakl er a uldesuek.” Ngdirrek el ungil el mousbech aike el research tools el ngar er ngii er a omelekingem el ngosukau el mo medengei a tekoi el monguiu. Nglocha ngar er ngii er a Watchtower Library el DVD, me a Watchtower ONLINE LIBRARY, me a Watch Tower Publications Index, me a lechub a Research Guide for Jehovah’s Witnesses.

¹⁸ Me kemiu a ruungalek, nglmuut el klou a ultutelel el mosisecheklterir a rengelekiu el kirel a Jehovah. Me ke mekerang e ngosuterir el mo mesisiich a klaumerang er tir er a Dios? A ongingil el suobel a mo mesaod a bebil el rolel e ngsebechem el meruul er tia el tekoi.