1, 2. (a) Ngera te meruul a rechad me bo el sebechir el mo mimokl? (b) Me ngera mlo rsel?

 A REBETOK el meliuekl er a beluulechad er chelechang a mesaod el kirel a llemeltir me a ilmeklir. A rebebil a sorir el mo mimokl er a chelebirukel el omeruul, me a omengetukel me a chelebuul. E a rekuk bebil a sorir el mimokl el melekoi aike el sorir el melekoi, e melilt aike el sorir el tekoi me a rolel a klengar er tir. Me ngkmal bleketakl el kmo a rokui el chad a sorir el mo mimokl.

² Me a rechad a meruul a ultok me a uldikel me bo lemimokl. Engdi tia ngmo uchul e te ngmai aike el sorir? Ngdiak, e le ngblechoel el mo uchul a klou el chelebuul el mo lmuut er a kodall. A tekingel a King el Salomon el ngar er a Olisechakl 8:9 a kmal klemerang el kmo: “A re bebil er a re chad er tial beluulchad a ngar ngii a klisichir, e a re bebil a mo chuarm er tir.”

3. Ngera sebeched el meruul mo bo luchul a mera el deurreng e mo ungilbesul er a rengud aike el ngar er ngii er kid?

³ A Biblia a mengelechel er kid er aike el kired el meruul el mo  uchul a mera el deurreng, e mo ungilbesul er a rengud aike el ngar er ngii er kid. A disaiplo el Jakobus a dilu el kmo: “Ngikel mo ungil el omes er a diak a telemellel el llach el meruul er a re chad el mo mimokl, e kerekikl er ngii . . . ingikel chad ia bo lomekngeltengat er ngii a Dios er a ikel loruul.” (Jakobus 1:25) A cherrungel el llach a mlara Jehovah el mei, e ngii a ungil medengei aike el dousbech el mo uchul a deuil a rengud. Me a Jehovah milsa Adam me a Eva a mera el ilmokl me a rokui el tekoi el lousbech el mo uchul a deuil a rengrir.

4. Ngera mle ilmeklel a Adam me a Eva? (Momes er a siasing er a uchelel a suobel.)

⁴ Sel donguiu er a 1 me a 2 el bliongel er a Genesis, e kede suubii el kmo a Adam me a Eva a mla er ngii a ileakl el ilmeklir el rechad er chelechang a di ourureng er ngii. Ngmla er ngii a rokui el tekoi el lousbech, e dimlak lemedakt a ngii di lengerang, e dimlak a ngii di el chad el meruul a chelebirukel el mo er tir. Te dimlak lebekikl el kirel a kall, me a ureor, me a secher, me a lechub a kodall. (Genesis 1:27-29; 2:8, 9, 15) Engdi ilmeklir, ngdimlak a telkelel? Me bo desang.

5. Alta rechad a ngar er ngii a uldesuir el kirel ilmokl engdi ngera tousbech a rechad me bo el sebechir el mo mimokl?

⁵ A rebetok el chad a omdasu el kmo a lengar er ngii a mera el ilmekled e ngbelkul a kmo, ngsebechir el meruul aike el sorir el diak lebekikl er a mo telemellel. A The World Book Encyclopedia a mesaod a ilmokl el kmo, “ngduch el meruul a omelilt e mo oltaut.” Ngdirrek el melekoi el kmo a rechad a mo mimokl a lsekum a kabelment a diak loluk er a ilmeklir el ngar er a rolel e ngdiak letabesul me a lechub e ngmelemalt. E tia belkul a kmo a bebil er aika el telkael a kirel meketmokl me bo el sebechir a rokui el chad el mo mimokl. Engdi ngtecha ngar er ngii a llemeltel el melilt er a telkelel a tekoi el kmo ngtabesul e ngar er ngii a belkul, e ngar er ngii a ungil luchul?

6. (a) Ngera me ngdi ta el Jehovah a cherrungel a ilmeklel? (b) Ngera el ilmokl a sebechel el mora rechad, e ngera uchul?

⁶ Ngdiak el kired el obes el kmo ngdi ta el Jehovah el Dios a cherrungel a ilmeklel. E ngera uchul? E le ngulemeob a rokui el tekoi e ngii a kot el kedidai el Merreder er a eanged me a chutem. (1 Timothy 1:17; Ocholt 4:11) A King el David a uluusbech a klebokel el tekoi el mesaod er a deruchellel a Jehovah. (Monguiu er a 1 Kronika 29:11, 12.) Engdi klekakerous er ngii a kmo a rokui el bleob er a eanged me a chutem a ngar er ngii a telkelel a ilmeklir. E a Jehovah el Dios a soal a bo dungil medengelii el kmo, ngdi ngii el tang a ngar er ngii a llemeltel el melilt el kmo ngera el ilmokl a tabesul e melemalt. E le uchelel e a Jehovah ulelterekokl a telkelel a ilmokl el mora blebelel.

7. Ngera bebil el tekoi el kired el meruul el mo uchul a deuil a rengud?

⁷ Alta Adam me a Eva a mla er ngii a klou el ilmeklir engdi ngmla er ngii a telkelel. E a bebil er aikang a mle tedebechel a klengar er tir. El ua tiang, a lolemolem el ngar, e ngkirir el outeliil, e mengang e mechiuaiu. Engdi tia ngmle belkul a kmo te dimlak lemimokl? Ngdiak, e le mera er ngii a Jehovah a ulterekeklii el kmo a lsekum te meruul aika el tekoi e ngmo uchul a deuil a rengrir. (Psalm 104:14, 15; Olisechakl 3:12, 13) Kede rokui el oldeu a rengud el outeliil er a ungil eolt, e menga soad el kall, e ungil a cheliued me ngdiak domdasu el kmo ngar er ngii a telkeled sel doruul aikang. Me a Adam me a Eva a locha mle uaisei a uldesuir.

8. Ngera el ulterekokl el omengelechel el Dios a milsa Adam me a Eva, e ngera uchul?

 ⁸ A Jehovah a milsa Adam me a Eva a ulterekokl el omengelechel el mo oungalek, e mekekii tia el chutem, e mengetmokl er ngii. (Genesis 1:28) Me tia el omengelechel ngmlo uchul e ngdiak a ilmeklir? Ngdiak leuaisei e ngbai milesterir a techellir el rullii tia el chutem el mo baradis, e rullii el mo delengcheklir el sebechir el kiei el mo cherechar lobengterir a remecherrungel el ngelekir el ngii a mle moktek er a Dios. (Isaia 45:18) Me chelechang e a chad el melilt el diak bo lebechiil me a lechub e loungalek a diak el ngar er a klengit. (1 Korinth 7:36-38) E ngera uchul? E le ngsorir el mo osiik a uchul a deuil a rengrir. (Psalm 127:3) Me a lsekum a Adam me a Eva ullengesenges er a Jehovah, e nglocha mle sebechir el oldeu a rengrir er a chebechiielir me a telungalek er tir el mo cherechar.

9. Ngera me a omengelechel er a Dios el ngar er a Genesis 2:17 a mle tabesul e melemalt?

⁹ A Jehovah a milengelechel er a Adam me a Eva el mle bleketakl el dmu er tir er a mo duubech a lsekum te diak lolengesenges er ngii. Ngdilu el kmo: “Sel kerrekar er a mo medengei a ungil ma mekngit a diak monga er a redechel. Ele sel sils el mkelii e kom mad.” (Genesis 2:17) Me tia el omengelechel, ngdimlak letabesul e lemelemalt? Ngmlo uchul e ngmlo diak a ilmeklel a Adam me a Eva? Ngdiak leuaisei e le rebetok el chellimosk er a Biblia a omdasu el kmo a omengelechel er a Dios a olechotel a llomeserreng e kmal bleketakl. E a ta er tir a melekoi el kmo ngosisecheklid el kmo “ngdi ta el Dios a medenge ungil . . . el kirel a klechad e medenge el kmo ngera diak lungil . . . el kirir. Me a bo loldeu a rengrir er a ‘ungil,’ e a rechad a kmal kirir el oumera el ulsirs er a Dios e olengesenges er ngii. Engdi a lsekum te diak lolengesenges, e te di mo tir el melilt el kirir el kmo ngera ungil . . . e ngera diak lungil.” E tia el tekoi a meringel er a rechad el di tir el meruul er ngii.

10. Ngera me a ilmekled el melilt a diak losisiu ngii me sel llemelted el melilt a kmo ngera ungil me a mekngit?  

¹⁰ A rebebil a omdasu el kmo a Jehovah dimlak lebsa Adam a ilmokl el mo meruul a soal. Me nguaisei engdi te dimlak el lutebengii el kmo a ilmokl el meruul a tekoi me a lechub e ngllemelted el melilt a bo doruul a diak losisiu ngii me sel llemelted el melilt el kmo ngera ungil me a mekngit. Me a Adam me a Eva a mla er ngii a ilmeklir el melilt el mo olengesenges er a Dios me a lechub e ngdiak engdi, ngdi ta el Jehovah a ngar er ngii a llemeltel el melilt el kmo ngera ungil me a mekngit. Me a “kerrekar er a mo medengei a ungil ma mekngit” a ulechotii tiang. (Genesis 2:9) Ngdiak deblechoel el medengei a mo duubech er a uriul er a dolilt a tekoi, e diak el sebeched el mo medengei el kmo ngblechoel el mo ungil a ulebengelel. Me tiakid a uchul me kede blechoel el meseterir a rechad el ungil a moktek er tir sel loruul a omelilt er tir, engdi ngokiu aika el omelilt er tir e ngmo uchul a chelebuul, me a meklou el telemall. (Osisechakl 14:12) Me ngbleketakl el kmo a rechad a ngar er ngii  a telkelel a loruul a tekoi. E ngokiu a omengelechel el mlora Adam me a Eva el diak el bo longa redechel sel kerrekar, e a Jehovah ulsisecheklterir el kmo ngkirir el olengesenges er ngii me bo el sebechir el ngar er ngii a mera el ilmeklir. Engdi tirkang, te millilt el mo mekerang?

11, 12. Ngera me a omelilt er a Adam me a Eva mlo uchul a telemall? Mosaod.

¹¹ Ngklengiterreng e le Adam me a Eva a millilt el mo diak lolengesenges er a Jehovah. A Eva millilt el mo orrenges er a Satan er sera letibir el kmo: “Ng mo mellomes a rengmiu, e mo ua [Dios] el mo medengei a ungil ma mekngit.” (Genesis 3:5) Me a omelilt er a Adam me a Eva, ngmlo uchul a klou el ilmeklir el ua lullekoi a Satan? Ngkmal dimlak. Te bai milsa el kmo ngmo uchul a telemall a lsekum kede oltngakl a ulekrael er a Jehovah. (Genesis 3:16-19) E ngera uchul? E le Jehovah dimlak lebesterir a rechad a ilmokl el di tir el melilt el kmo ngera ungil me a mekngit.​—Monguiu er a Osisechakl 20:24; Jeremia 10:23.

¹² Tia sebeched el omekesiu er ngii el mora chad el omekall er a skoki. A lebo er sel basio el kirel el mo er ngii el diak lemekesakl, e ngkirel el merael er sel mla moterekokl el omerollel el ousbech er a navigation tools e mengedecheduch er tirke el air traffic controllers. Engdi lsekum e ngdiak loltirakl a ulekrael e di suebek el ngar sel soal e ngsebechel mo uchul a telemall. Me ngdi ua ngika el omekall er a skoki, a Adam me a Eva a di mirruul aike el sorir me tultngeklii a ulekrael er a Dios. Me ngera mlo rsel? Ngmlo uchul a telemall! A omelilt er tir a mlo uchul me tir me a rengelekir a mlo oudiukes er a klengit me a kodall. (Rom 5:12)  Ngdirrek el mlo uchul me ngdimlak el medechel a ilmeklir el okiu sel lolilt el kmo ngera ungil me a mekngit e te bai urridii a mera el ilmokl el Jehovah milsterir.

13, 14. Ngmekera denguu a mera el ilmokl?

¹³ A rebebil a omdasu el kmo ngkmal mo ungil a lsekum ngdiak a telkelel a ilmekled. Engdi ngmera el tekoi? Alta ngmo uchul a betok el klungiaol sel lengar er ngii a ilmekled engdi ka molatk er a beluulechad a lsekum ngdiak a telkelel a rokui el tekoi? A The World Book Encyclopedia a mesaod el kmo a llach el kirel a bek el beluu a kmal meringel e le ngkirir lomekerreu e a osisiu el taem e te meluk er a ilmeklir a rechad. E tia diak lebeot el tekoi a uchul me kede blechoel el mes a betok el llach me a rechad er a llach me a kerrekeriil el melasem el mesaod e oltaut.

¹⁴ A Jesus Kristus a milsaod er a uchul me ngsebeched el nguu a mera el ilmokl er a ledu el kmo: “A kmo kom diblechoel ngara tikingek, e ko meral Obengkek, me ko mo medengei a klemerang, ma klemerang a meskemiu a ilmokl.” (Johanes 8:31, 32, BT) Me a bo denguu a mera el ilmokl e ngkired el meruul a teblo el tekoi el kot, e ngkired el kongei er a klemerang el Jesus a ullisechakl er ngii. E a ongerung e ngkired el mo disaiplo er ngii, e a doruul aikang e kede mo nguu a mera el ilmokl. Engdi ngilmokl er a ngerang? A Jesus a dilu el kmo: “A chad el di mor a klengit a cheldereder er a ngelbesel a rengul el mo meruul a klengit.” E dirrek el dilu el kmo: “Ma lsekum a Ngalek a rullemiu el mo mimokl, e kom meral mo mimokl.”​—Johanes 8:34, 36.

15. Ngera me sel ilmokl el Jesus a tilbir a mo uchul a mera el ilmokl?

 ¹⁵ A ilmokl el Jesus a tilbir el mora redisaiplo er ngii a lmuut el ungil er sel ilmokl el ruumesingd el chad er chelechang a sorir. A Jesus er a ledu el kmo, “Ma lsekum a Ngalek a rullemiu el mo mimokl, e kom meral mo mimokl” e ngmilsaod el kirel a ilmokl er a klsibai er a klengit el ngii a kot el mekngit el rolel a klsibai el klechad a mla chobengelii. Me ngokiu a ngera el rolel e kede sibil a klengit? A klengit a rullid el mo meruul a mekngit, e merrob er kid me ngdiak doruul aike el dodengei el kmo ngmelemalt me a lechub e dolasem el meruul a tekoi el ngar er a tkurrebab el sebeched, e tia mo uchul a ringelel a uldasu, me a ringelel a klechad, me a chelebuul el mo lmuut er a kodall. (Rom 6:23) A apostol el Paulus a mlo chormii a ringelel a desibil a klengit. (Monguiu er a Rom 7:21-25.) Me a lsekum e a klengit a mokngemed e kede mo nguu a mera el ilmokl el Adam me a Eva ulebang er a uchelel.

16. Kede mekerang e mera el mo mimokl?

¹⁶ A tekingel a Jesus el kmo, “a kmo kom diblechoel ngara tikingek” a ochotii el kmo a lsoad a Jesus a lerellid el mo mimokl e ngar er ngii a kired el meruul. Ngera el tekoi? Kid el Kristiano a mla mechere sel dimla klechad er kid e kongei aike el tekoi el Jesus a kiltmokl el mora redisaiplo er ngii. (Mateus 16:24) Me ngdi ua letilbir a Jesus, kede mera el mo mimokl er a ngar medad el klebesei sel dengai a rokui el klengeltengat lokiu a olubet el tenget.

17. (a) Ngmekera mo sebechel el dmeu a rengud? (b) Ngera kede mo mesuub er a ongingil el suobel?

¹⁷ Me a bo ledeu a rengud, e kid el disaiplo er a Jesus a kired el mo olengesenges a osisecheklel. E a lsekum kede meruul er tiang e ngmera el mo sebeched el mo mimokl er a klengit me a kodall. (Monguiu er a Rom 8:1, 2, 20, 21.) Me ngar er a ongingil el suobel e kede mo mesuub er a rolel e kede mo ungil lousbech er a ilmekled er chelecha el taem. E seikid e ngsebeched el mengebkall er a Jehovah el Dios er a mera el ilmokl el mo cherechar.