Rengeasek, Ngultaut a Osengiu er a Turrekong er a Klereng?
“Moterekeklii a urerem er a RUBAK, e a ikel momdasu a mo mekedmokl.”—OSISECHAKL 16:3.
CHELITAKL: 11, 24
1-3. (a) Ngera el blekeradel a lechebangel er ngii a rengeasek, e sebeched el omekesiu er ngii el mora ngerang? (Momes er a siasing er a uchelel a suobel.) (b) Ngera mo ngosuterir a rengeasek el Kristiano er a chelsel tia el blekeradel?
KA MKORA melatk oleko ke mengetmokl er kau el mora ungil klebesei el ngar er a kmal cheroid el basio. Me a bo el sebechem el mechir, e ngkirem el ngar er a bus el mong. Me a obo er aike el basio el lengar er ngii a bus, e ke kulterekokl el mo rrau a rengum e le ngkmal betok a rechad me a bus. Engdi ngdmeu a rengum e le ke medengelii a soam el mo er ngii me a bus el bo msiseb er ngii. Me ngdiak bo mngasech er a ngii di el bus e le ke medengei el kmo ngmo ngoikau el mora ngodech el basio.
2 A klengar a di ua omerael, e a rengeasek a uai tirke el chad el ngar er aike el basio er a bus. A lebebil er a taem e ngkmal betok a tekoi el kirem el melilt el mo meruul me ngsebechel el rullau el mo rrau a rengum. Engdi sel modengei el kmo ngar ker a soam el mo er ngii, e ngkmal mo beot er kau el mo ungil melilt a tekoi. Me ngkirem el ngiltii a ngera el rolel a klengar?
3 Tia el suobel a mo onger er seikid el ker, e melisiich er kau el mo ultaut a osengem er a klengar el odeuir a rengul a Jehovah. E tia belkul a kmo ke oltirakl a ulekrael er a Jehovah er a rokui el omelilt el moruul el ua tekoi er a skuul me a ureor me a lechub e ngomelilt er kau el mo bechiil e oungalek. Ngdirrek el belkul a kmo ke oureor el oltaut a turrekong er kau er a klereng el ngii a uchul a kmes el deleuill er kau me a Jehovah. Me a lsekum ke melemolem el mesiou er a Jehovah e ngsebechel el mo ulterekokl a rengum el kmo ngmo omekngeltengat er kau e rullii a klengar er kau el mo ungil.—Monguiu er a Osisechakl 16:3.
NGERA ME NGKIREM EL REMUUL A TURREKONG ER KAU?
4. Ngera kede mo mesaod er tia el suobel?
4 Ngkmal lungil a lsekum ke remuul a turrekong er kau. E ngera uchul? Kede mo mesaod a edei el uchul. A kot me a ongerung a mo ngosukau el mo mesa el kmo a omoureor el mo oltaut er a turrekong er kau a rullau el mo ungil sechelil a Jehovah. E a ongedei a mo ochotii a uchul me ngungil a mruul aika el turrekong er kau sel dirk mngeasek.
5. Ngera kot el klou a ultutelel el uchul me kede remuul a turrekong er kid?
5 A kot el klou a ultutelel el uchul me kede remuul a turrekong er kid a olechotel a omereng el saul er kid el kirel a bltkil a rengul a Jehovah me aike el bla leruul er kired. A ta er a milluches er a psalm a dilu el kmo: “Ng meral ungil a doreng a sulem e RUBAK. . . . Ele urerem e RUBAK a rirellak el mo ungil a renguk; ng omerellem a uchul mak mengitakl er a deurreng.”(Psalm 92:1, 4) Me ka molatk el kirel aike el rokui el bla lebeskau a Jehovah el ua klengar er kau, me a klaumerang er kau, me a Biblia, me a ongdibel, me a omelatk el mo kiei el mo cherechar er a Baradis. Sel mruul a turrekong er kau, e kochotii el mo er Ngii el kmo koba omereng el saul el kirel aika el tekoi e tia mo uchul a kmes el deleuill er kemiu el terung.
6. (a) Ngera ngrullii er a deleuill er kau me a Jehovah a turrekong er a klereng? (b) Ngera bebil er a turrekong el sebechem el remuul sel dirk mngeasek?
6 A ongeru el uchul me kede remuul a turrekong er kid a sel doureor el mo oltaut, e kede meruul a ureor el kirel a Jehovah. E tia mo uchul e ke lmuut el mo kmeed er ngii. A apostol el Paulus a dilu el kmo: “A Dios a diak le chebirukel me di lobes a ureriu ma bltkil a rengmiu er ngii.” (Hebru 6:10) Ngkmal sebechem el remuul a turrekong er kau alta ke dirk kekerei. El ua tiang, a Christine a mle 10 a rekil er sera lolilt el mo blechoel menguiu a chisel a klengar er a reblak a rengrir el Sioning. E a Toby a mle 12 a rekil er a lerellii a turrekong er ngii el mo menguiu er a Biblia el rokir er a uchei er a lemetecholb. E a Maxim a mle 11 a rekil me a ochedal el Noemi a mle 10 a rekil er a bo lemetecholb. E te diul riruul a turrekong er tir el mo mesiou er a Bethel, me a bo lultaut a osengir er a turrekong er tir, e te mirekedii a application el mora Bethel er a kbekbel a blirir. E kau a kuk mekerang? Ngsebechem el mdasu a bebil er a turrekong el sebechem el remuul, e oureor el mo oltaut?—Monguiu er a Filipi 1:10, 11.
A lsekum ke medengelii a turrekong er kau, e ngmo beot er kau el meruul a ungil omelilt
7, 8. (a) Ngmekera omeruul el turrekong e rullid el mo meruul a ungil omelilt? (b) Ngera me a ta er a ngeasek a millilt el diak lebo er a university?
7 Ngera ongedei el uchul me ngungil a lsekum ke remuul a turrekong er kau sel dirk mngeasek? Sel dirk mngeasek, e ngkmal betok a omelilt el bo moruul. Ngkirem el melilt el kmo ngera el skuul me a lechub e ngureor a obo er ngii me a lmuut el betok el tekoi. E aika el omelilt a ua metucheklel a rael el bo er ngii sel bora omerael. A lsekum ke medengelii a obo er ngii, e ngkmal mo beot er kau el melilt el kmo ngera el rael a bo mokiu ngii. Me ngdi osisiu, a lsekum ke medengelii a turrekong er kau, e ngmo beot er kau el meruul a ungil omelilt. A Osisechakl 21:5 a kmo: “Ngikel blak a rengul el omdasu a mo betok a ngera er ngii.” Me sel rechedel el mruul a ungil turrekong er kau, e ngmo ungil a klengar er kau. Tiakid a dilubech el mora Damaris er sel taem el mle kirel el rullii a klou a ultutelel el omelilt er sera lengeasek.
8 A Damaris a kmal mle ungil a teng er ngii er a letobed er a high school, me ngmle sebechel el mora university el mo mesuub el mo chad er a llach el diak lomechar er a skulel. Engdi ngbai millilt el mo oureor er a bank. E ngera uchul? E le sera lengeasek, e ngmillilt el kmo ngmo pioneer me ngdilu el kmo: “Tia belkul a kmo ngmle kirek el oureor el di part-time. Omko ngmla er ngii a babilengek er a llach, e ngmle sebechek el mesuk er a klou el udoud engdi ngmo meringel er ngak el di oureor el part-time.” A Damaris a mla pioneer el 20 el rak, e kmal ungil a uldesuel el kirel a turrekong me a omelilt el lerirellii er sera lengeasek. Me sel loureor er a bank, e ngmo medengelterir a rebetok el chad er a llach el tir a meruul er sel ureor el omko e ngmlo er a university e ngmeruul er ngii. Ngmelekoi el kmo a betok er tir a diak ledeu a rengrir er a urerir. Me ngmelatk el kmo aike el rak el lulsiou el pioneer a mlo uchul a deuil a rengul e mla ngosuir me ngdiak bo leuai tir el diak ledeu a rengrir.
9. Ngera me kede kmal chemat er a rengeasek er a delongeled?
9 Te betok el telael el ngeasek el meliuekl er a beluulechad a kmal blak a rengrir me ngkired el chemat er tir. A deleuill er tir me a Jehovah me a turrekong er tir er a klereng el mo kot el klou a ultutelel er a klengar er tir. Tirkaikid el ngeasek a kmal oldeu a rengrir er a klengar, e a osisiu el taem e te mesuub el mo oltirakl a ulekrael er a Jehovah er a chelsel a ngii di el blekeradel el uldimukl er ngii a tekoi er a skuul me a ureor, me a klengar er a telungalek. A Salomon a dilu el kmo: “Moumeral ulsirs er a RUBAK el oba rengum el rokir.” E dirrek el dilu el kmo: “Mletkii a RUBAK er a ikel bek el moruul, e ngii a mo ochotii er kau a melemalt el rael.” (Osisechakl 3:5, 6) Me kemiu a rengeasek, a Jehovah a kmal betik a rengul er kemiu! Kom kmal mekreos er a osengel, me ngmo omekerreu, e omekrael, e omekngeltengat er kemiu.
BO MUNGIL KUTMEKLAU EL MO OUCHAIS ER A REBEBIL EL KIREL A JEHOVAH
10. (a) Ngera me ngkirel a berkel a klumech el mo kot el klou a ultutelel el tekoi er a klengar er kid? (b) Ke mekera mo meduch el mesaod er a klaumerang er kau?
10 A lsekum e ngultaut a osengem el mo odeuir a rengul a Jehovah, e ngmo soam louchais er a rebebil el kirel. A Jesus Kristus a dilu el kmo “a Ebangkelio a kirel el mosisechakl el mor a rokui el chad.” (Markus 13:10) Me a berkel a klumech a kmal orechudel e kirel el ta er aike el meklou a ultutelel el tekoi er a klengar er kid. Me kau, ngsebechem el rullii a turrekong er kau el mo blechoel loldingel? Ngsebechem el mo pioneer? Engdi ngmekerang a lsekum ngdiak ledeu a rengum el omerk er a klumech? E mekera sebechem el mo meduch el mesaod er a klaumerang er kau? Ngar er ngii a teblo el tekoi el sebechel el ngosukau. Ngkirem el mo ungil kutmeklau, e diak meterob el ouchais aike el modengei el kirel a Jehovah el mora rebebil. E seikid e ke locha mo mechas a rengum er a deuil a rengum el omerk er a klumech.
Ke mekera kutmeklau el mo ouchais er a rebebil el kirel a Jehovah? (Momes er a parakurab 11, 12)
11, 12. (a) Ngera sebechem el rullii el mo kltmokl el ouchais er a rebebil el kirel a Jehovah? (b) Ngmilekera ta el odam e ousbech er a techall el mo mesaod el kirel a Jehovah er a skuul?
11 Ngsebechem el omuchel lokiu sel mongetmokl er a mo nger er kau el mora bebil el ker el loker a rengalek el mngar er a osisiu el skuul el ua, “Ngera me koumerang er a Dios?” Ngar er ngii a suobel el ngar er a website er kid el jw.org el sebechel el ngosukau el onger er tia el ker. A lsekum komes er cheungel a BIBLE TEACHINGS > TEENAGERS, e ngsebechem el metik er a worksheet el dai er ngii a kmo “Ngera Uchul me a Kuumerang er a Dios?” Bo moltirakl er tia el worksheet el mo mengetmokl er a nger er kau. Ke dirrek el mo metik a bades er a Biblia el sebechem el ousbech el ua Hebru 3:4, me a Rom 1:20, me a Psalm 139:14. Ngdirrek el ngar er ngii a bebil er a worksheet el sebechem el ousbech el mo onger a lmuut el betok el ker.—Monguiu er a 1 Petrus 3:15.
12 Ngsebechem el louchais er a rengalek el mngar er a osisiu el skuul me bo lomes aike el suobel el ngar er a jw.org. E tiakid a lerirellii a Luca. Ngar er a class er ngii e te milsaod el kirel a kakerous el klechelid, e ngmiltebengii el kmo a textbook a mesaod a cheleuid el tekoi el kirir a Resioning er a Jehovah. Me alta ngmle medakt, engdi ngullengit er a sensei er ngii me bo louchais er a class er ngii el kmo ngera me aike el tekoi a mle cheleuid. Me a sensei er ngii a kilengei er ngii el mo mesaod er a klaumerang er ngii me ngmlo sebechel el ochotii a website er kid el mo er tir. Me a sensei a ulengit er a rokui el ngalek el kmo a mo subelir sel lebo er a blirir a mo omes er sel video el Beat a Bully Without Using Your Fists. Me kau, ngsebechem el melechesuar er sel deuil a rengul a Luca er a losaod el kirel a Jehovah er a skuul?
13. Ngera me ngdiak el kired el meterob sel dechelebangel a omelsemai?
13 Sel bom chelebangel a omelsemai e lak bo el mechitechut a rengum, e bai molemolem el loureor el kirel a turrekong er kau. (2 Timothy 4:2) Tiakid a lurruul er ngii a Katharina. Sera le 17 a rekil e ngrirellii a turrekong er ngii el mo omerk er a ungil chais el mora rokui el chad el ledak el loureor. E a ta er tir a mlo melekoi a mekngit el bedul ngii engdi tia dimlak leterebengii me lak lotutii a turrekong er ngii. A ungil blekerdelel a kmal mle ungil el ocholt el mora ta er a chad er a urerel el Hans a ngklel. Tia rirellii el mo omuchel el menguiu a babilenged, e mo mesuub a Biblia, e mo metecholb. Me nguaisei, engdi Katharina a dimlak lodengei aika el tekoi e le seikid el taem e ngmla melukl el mora ta er a basio. Me a uriul er a 13 el rak e ngkmal mlo mechas a rengul er a lengar er a miting ngii me a telungalek er ngii, e lesa Hans el oltobed er a cheldecheduch. Ngkmal mle dmeu a rengul e le ngmillemolem el oltaut er a turrekong er ngii el mo omerk er a klumech el mora rechad el ledilak el oureor.
LAK MOBES A TURREKONG ER KAU
14, 15. (a) Ngera kirem el melatk er ngii sel lorrimel er kau a rebebil el mo meruul aike el tekoi el loruul? (b) Ngera sebechem el meruul me molemolem el mesisiich sel lorrimel er kau a rebebil?
14 Me tia el suobel a mla smisichau el mo oldeu a rengul a Jehovah er a klengar er kau e mo meruul a turrekong er kau er a klereng. Engdi te betok el chad el ua meklungem a sorir el di oldeu a rengrir. Me te locha mo omekedong er kau el mo meruul aike el tekoi el loruul. Engdi ngmo kirem el lochotii el mo er tir a klungel a ultutelel a bo moltaut a turrekong er kau. Me lak bechititerir a rebebil me lerellau el mo obes aika el turrekong. A lsekum ke mlara ike el basio er a bus el losaod er ngii a uchelel tia el suobel, e kau, ke di mo soiseb er a ngii di el bus e le rechad el ngar er ngii a oldeu a rengrir? Ngkmal diak!
15 Ngera sebechem el meruul me molemolem el mesisiich sel lorrimel er kau a rebebil el mo meruul aike el loruul? Mongeroid er kau er aike el blekeradel el rullii el mo meringel er kau a oltngakl a orrimel. (Osisechakl 22:3) E molatk el kirel aike el meringel el telemellel a cheleuid el omeruul. (Galatia 6:7) E mkengei el kmo kousbech a ungil ulekrael, e morrenges aike el lolekoi a demam me a delam me a rudam me a rudos el klou a klemedengei er tir.—Monguiu er a 1 Petrus 5:5, 6.
16. Ngmekera tekoi el dilubech el mora Christoph e ochotii a klungel a ultutelel a bo lengariou a rengud?
16 A klengariourreng a ngilsuir a Christoph el mo kongei a ungil ulekrael. A uriul er a lemetecholb, e ngmlo blechoel el di omais el mora ike el basio er a exercise. E ngar isei, e a rebebil el ngeasek a millekoi er ngii el mo teloi er a sports club er tir. Me ngmlo mengedecheduch er a ta er a remechuodel el kirel, me ngii el odam a dilu er ngii el mo melatk a bebil er a telemellel tiang el ua tekoi er a klaisichai. Engdi Christoph a di millilt el mo er tia el club engdi uriul e ngmlo mtebengii el kmo ngkmal mle kdekudel me ngliluut el mo mengedecheduch er ngii el odam, me ngmilsa ulekrael el ngar er a Biblia. Me a Christoph a dmu el kmo: “A Jehovah uleldurech er a rungil el chad el me mengedecheduch er ngak me ak ulerrenges er Ngii alta kuluusbech a taem.” Me kau, ngsebechem el mo ngariou a rengum el mo kongei a ungil ulekrael?
17, 18. (a) Ngera soal a Jehovah el kirir a rengeasek er chelechang? (b) Ke mekerang e mo sebechem el diak mouuchel a rengum er a omelilt el mrirellii sel bom klou el chad? Mosaod.
17 A Biblia a melekoi el kmo: “Moldeu er a rengum er a klengeasek er kau, kaul kekerel chad [me a lechub e ke redil]. Bo lungil a rengum er chelechal dirk mngeasek.” (Olisechakl 11:9) A Jehovah soal a ledeu a rengum sel dirk mngeasek. Me ngar tia el suobel, e ke mla suubii el kmo a ta el rolel e ngmo dmeu a rengum a sel bo lultaut a osengem er a turrekong er kau er a klereng, e bo moltirakl a ulekrael er a Jehovah er aike el rokui el tekoi el molib el mo meruul, me a omelilt er kau. Sel rechedel el moruul er tiang, e ngsebechem el mereched el mo chormii a ulekrael, me a ulekerreuil, me a klengeltengat er a Jehovah. E molatk aike el rokui el ungil omellach el lomeskau lokiu a tekingel, e motutii tia el ulekrael el kmo: “Molatk er Omebelem sel dirk mngeasek.”—Olisechakl 12:1.
18 A rengeasek a di mereched el mukeroul el mo meklou el chad. Engdi ngklengiterreng e le te betok er tir a ouuchel a rengrir e le te mlo mekngit el melilt a turrekong er tir me a lechub e ngdimlak a ta el turrekong er tir er a lemekekerei. Me a lsekum ngultaut a osengem er a turrekong er a klereng, e ngmo dmeu a rengum er a omelilt el mrirellii sel bo mklou el chad. E tiakid a mle uldesuel a Mirjana. Sera lengeasek, e ngkmal mle meduch a tekoi er a klekool, me ngmlengilt el mora Winter Olympic Games. Engdi ngdimlak lebong e bai millilt el mo mesiou er a Jehovah el mui el taem. Me a uriul er a kuk betok er a 30 el rak, e ngdirk ngar er a mui el taem el omesiou lobengkel a bechil. Ngmelekoi el kmo a rechad el sorir a chetengakl, me a omengull, me a klisiich, me a ilteet a kmal diak ledeu a rengrir. Ngdirrek el melekoi el kmo a kot el ungil el turrekong a sel bo dosiou er a Dios, e olengeseu er a rechad el mo medengelii.
19. Ngera me ngungil a lultaut a osengem er a turrekong er a klereng sel dirk mngeasek?
19 Kemiu a rengeasek a kmal kired el chemat er kemiu e le ngultaut a osengiu er a omesiungiu el mora Jehovah alta kom chelebangel a omelsemai. Kom riruul a turrekong er kemiu er a klereng, e omes er a berkel a klumech el ta er aike el meklou a ultutelel el tekoi er a klengar er kemiu. Ngdirrek el diak becherei tia el beluulechad me lerellemiu el mo obes a turrekong er kemiu. Me ngsebechel el mo ulterekokl a rengmiu el kmo a meringel el ureriu a diak lak a ultutelel. Ngar er ngii a rudam me a rudos el betik a rengrir e olengeseu er kemiu. Me a leuaisei e ‘moterekeklii a ureriu er a RUBAK, e a ikel momdasu a mo mekedmokl.’