1-2. Ngera uchul me a Jesus a mle chuarm a uldesuel?

NGAR sel ulebongel el kesus er ngii el ngar tia el chutem el ua chad, e a Jesus a mle chuarm a uldesuel. Ngdi kmedung e ngmo mukcharm e mokoad lokiu a chimorir a remekngit el chad. Engdi a Jesus a dimlak di el sebek a rengul e le ngii el di kmedung el mo mad. Ngkmal mle betik a rengul er a Demal e mle soal odeuir a rengul. Me ngmle medengei el kmo a lolemolem el blak a rengul er a chelsel tia el meringel el omelsemai el bo lechelebangel er ngii a mo uchul e ngkobkellii a ngklel a Jehovah. Ngdirrek el mle betik a rengul er a rechad, e mle medengei el kmo a techelled el mo kiei el diak a ulebengelel a ultuil er a blakerreng er ngii er tia el chutem.

² Me alta Jesus a mle meringel a uldesuel engdi ngmle budech a rengul. Ngmillekoi er a rechapostol er ngii el kmo: “Ng budech er ngak a kumeskemiu.” (Jn. 14:27) Nguleba “budech er a Dios,” el ngii sel chelellakl el reng el mo er ngii e le chad a ngar ngii a mekreos el deleuill er ngii me a Jehovah. Me tia el budech a rirellii a Jesus el mo budech a rengul me a uldesuel.​—Fil. 4:6, 7.

3. Ngera kede mo mesaod er tia el suobel?

³ Ngdiak a ta er kid el mo chelebangel a osisiu el orimel el luluutekangel er ngii a Jesus, engdi tirke el rokui el oltirakl er a Jesus a mo chelebangel a ringel. (Mt. 16:24, 25; Jn. 15:20) Me kede ua Jesus el mo chuarm a uldesued a lebebil er a taem. Me ngera sebeched el rullii me bo lak lsal suebek a rengud e bo el budech a uldesued? Ka me bo dosaod a edei el tekoi el lurruul a Jesus el ngar er a omesiungel er a lengar tia el chutem e desa rolel e ngsebeched el oukerebai er ngii sel dechelebangel a ringel.

4. Ngoeak a 1 Thesalonika 5:17, e mosaod a bebil kerebai el ochotii el kmo a Jesus a mle blechoel el meluluuch er sel ulebongel el sils er a klengar er ngii er tia el chutem.

⁴ Monguiu er a 1 Thesalonika 5:17. A Jesus a mle blechoel el meluluuch er sel ulebongel el sils er a klengar er ngii el ngar tia el chutem. Sera longetmokl er a Chedaol Belsoil, e ngmiluluuch el kirel a blauang me a bilong. (1 Ko. 11:23-25) Me a uchei er a lorael er sel basio el mla er ngii a Baskua, e ngmiluluuch el obengterir a redisaiplo er ngii. (Jn. 17:1-26) Me sel kesus el ngii me a redisaiplo er ngii a mlora Rois er Olib, e ngdi milluluuch. (Mt. 26:36-39, 42, 44) Me aike el kot el ulebongel el tekoi el lullekoi a Jesus er a uchei er a lemad a meldung lokiu a nglunguuch. (Lk. 23:46) A Jesus a milluluuch el mora Jehovah el kirel aike el rokui el tekoi el dilubech el mo er ngii er sel ulebongel el sils er ngii el ngar tia el chutem.

5. Ngera uchul me a rechapostol a mlo medakt?

⁵ A ta er a uchul me ngmle sebechel a Jesus el outekangel a ringel a ngii el uleltuil er a Demal lokiu a nglunguuch. A rechapostol a bai dimlak leblechoel el meluluuch er seikid el kesus. Sei a uchul me te mlo medakt er sel taem el blo lechelebangel a ringel. (Mt. 26:40, 41, 43, 45, 56) Me kid sel bo dechelebangel a ringel, e ngmo sebeched el lomelemii a blakerreng er kid a lsekum kede oltirakl er a kerebil a Jesus e melemolem el ‘meluluuch.’ Me ngera sebeched el meluluuch el kirel?

6. Ngmekera klaumerang e ngosukid el melemolem el budech a uldesued?

⁶ Ngsebeched el meluluuch el olengit er a Jehovah me ‘lluut el dochel a kloumera er kid.’ (Lk. 17:5, BT; Jn. 14:1) Kede ousbech er a klaumerang e le Satan a mo melasem er tirke el rokui el oltirakl er a Jesus. (Lk. 22:31) Me ngmekera klaumerang e rullii me ngmelemolem el budech a  rengud er sel taem el bo dechelebangel a betok el omelsemai? Sel bla deruul aike el rokui el sebeched el mo outekangel er a ringel, e a klaumerang a mo rullid el mecherei tia el tekoi me ngar er a chimal a Jehovah. Kid el oumerang el kmo ngsebechel el sumechokl a tekoi el kuk ngaruchei er kid a uchul me ngsebechel budech a uldesued me a rengud.​—1 Pe. 5:6, 7.

7. Ngera sebeched el suubii er a tekingel a Robert?

⁷ A nglunguuch a ngosukid el melemolem el budech a uldesued alta kede mo chelebangel a kakerous el ringel. Ka molatk er a kerebil a Robert, el 80 me a derengel a rekil e mesiou el ta er a blak a rengul el mechuodel. Ngmelekoi el kmo: “A omellach el ngar er a Filipi 4:6, 7 a mla ngosukak el outekangel a betok el ringel er a klengar er ngak. Ak mle chelebangel a mondai er a udoud e dirrek el mle telkib el taem el mlo diak kusiou el ta er a remechuodel.” Me ngera mla ngosuir a Robert me ngmelemolem el budech a rengul? Ngmelekoi el kmo: “Sel kumelechesiu er ngak el ouedikel a renguk, e ak di mereched el meluluuch. Ak kuumerang el kmo sel bok blechoel el meluluuch e ngmerael el mo budech a uldesuek.”

8. A doltirakl er a Johanes 8:29, e ngera ta er a uchul me a Jesus a mle budech a uldesuel?

⁸ Monguiu er a Johanes 8:29. A Jesus a mle budech a uldesuel alta ngmlodechelakl e le ngii el mle medengei el kmo nguldeuir a rengul a Demal. Ngmillemolem el lolengesenges el mo lmuut er a taem el mle meringel er ngii el meruul el uaisei. Ngmle betik a rengul er a Demal e rirellii a omesiungel el mora Jehovah el mo kot el klou a ultutelel el tekoi er a klengar er ngii. A uchei er a lemei er a chutem, e ngulebengkel a Demal el “chad er omelib el blai.” (Osi. 8:30) E sera lengar tia el  chutem, e ngmle blak a rengul el olisechakl er a rebebil el kirel a Demal. (Mt. 6:9; Jn. 5:17) Tia el ureor a mlo uchul a klou el deuil a rengul.​—Jn. 4:34-36.

9. Ngmekera bo demechesang er a ureor er a berkel a klumech e ngosukid el melemolem el budech a uldesued?

⁹ Ngsebeched el oukerebai er a Jesus lokiu sel dolengesenges er a Jehovah e bo el ‘blak a rengud ra urerel a Rubak.’ (1 Ko. 15:58, BT) Me sel bo el ‘blak a rengud’ er a ureor er a berkel a klumech, e ngmengal mo ungil a uldesued el kirel a mondai er kid. (Rel. 18:5, BT) El ua tiang, tirke el dongedecheduch er tir sel doldingel a lmuut el meringel a mondai er tir er kid. Engdi sel lesubii el mo betik a rengrir er a Jehovah e bo loltaut a llechul, e ngmo ungil a klengar er tir e mo dmeu a rengrir. Me a bek el taem el desa tia el tekoi el duubech, e ngmo ulterekokl a rengud el kmo a Jehovah a mo omekerreu er kid. E tia el ulterekokl el reng a ngosukid el melemolem el budech a uldesued. A ta el odos a ulemdasu el kmo a klengar er ngii a diak a ultutelel e dirrek el mle chuarm er a meringel el uldasu a miltebengii el kmo tia el tekoi a klemerang. Ngmelekoi el kmo: “Sel bok mechesang el ngar er a omesiungek, e ngmo chelellakl a renguk e dmeu a renguk. Ak melatk el kmo tiang a uaisei e le sel kuldingel a obliil, e ak melechesukak el kmal kmeed er a Jehovah.”

10. Ngera sebechem el suubii er a tekingel a Brenda?

¹⁰ Ka dirrek el molatk er a klengar er a odos el ngklel a Brenda. Ngii me a ngelekel el redil a smecher er a meringel el rakt. Me a Brenda a di ngar er a wheelchair e di blechoel el mechitechut a bedengel. A lebebil er a taem e ngoldingel a obliil, engdi oumesingd el taem e ngousioning lokiu sel loluches a babier. Ngmelekoi el kmo: “Sera bo kudengei e kkengei el kmo a rektek a diak el sebechel el mukar er chelecha el taem, e seikid e ngmlo sebechek el ultaut a osengek er a omesiungek. Sel kumerk er a klumech, e seikid e ngmo diak kullatk el kirel aike el tekoi el suebek a renguk er ngii. Ngbai rullak el mo blak a renguk el olengeseu er tirke el kusaod er a klumech el mo er tir el ngar er a territory er a ongdibel er ngak. E sel kumerk er a klumech, e ngblechoel el omeklatk er ngak er a omelatk er a ngar er a medad el taem.”

11-13. (a) Ngmilekera rechapostol me a rebebil e ochotii el kmo te mera el sechelil a Jesus? (b) A resechelil a Jesus te rirellii el mo uangera uldesuel?

¹¹ Ngar er a omesiungel a Jesus el rokir, e a reblak a rengrir el apostol a mle mera el sechelil a Jesus. Te mlo ua tirke el sechelei el losaod er tir a Biblia el kmo te “sechelid el kuk mo kmeed er kid er a ta er kid.” (Osi. 18:24) Me a chouaitirka el sechelil a kmal mle mekreos er a rengul a Jesus. Ngar er a omesiungel, e ngdimlak a ta er a ruchellel el uluumerang er ngii. (Jn. 7:3-5) A ta el taem, e a rechedal a mlo omdasu el kmo ngkebelung. (Mk. 3:21) Engdi, a Jesus a bai mle sebechel el melekoi er a reblak a rengrir el apostol er ngii er sel kesus er a uchei er a kodellel el kmo: “Kemiu a di ulebengkek er a chelsel a rokui el ongarm el mler ngak.”​—Lk. 22:28.

¹² A lebebil er a taem e a rechapostol a kilengtir a rengul a Jesus, e ngdi ngulemes el engelakl er aike el chelitecheterir e milsa el kmo te uluumerang er ngii. (Mt. 26:40; Mk. 10:13, 14; Jn. 6:66-69) Ngar sel kesus er a uchei er a lemad, e a Jesus a dilu er a reblak a rengrir el chad el kmo: “Ak bai melekoi er kemiu el kmo kom sechelik, ele kmla ouchais er kemiu a bek el tekoi el krirenges er a Demak.” (Jn. 15:15) Me a resechelil a Jesus a ulterekokl el kmal millisiich er ngii. Me a ngeso el lebilsang er a loruul er a omesiungel a rirellii a Jesus el kmal mo dmeu a rengul.​—Lk. 10:17, 21.

¹³ Me nguldimukl er a rechapostol, e a Jesus a dirrek el mla er ngii a rekuk bebil er a resechelil, el sechal me a redil, el tir a ngilsuir er a ureor er a berkel a klumech me a kuk bebil er a rolel. A  rebebil a uluuetkeu er ngii el mora blirir me bo el sebechel omengur. (Lk. 10:38-42; Jn. 12:1, 2) A rekuk bebil a ulebengkel e dirrek el mirrous aike el ngar ngii er tir el mo er ngii. (Lk. 8:3) A Jesus a mla er ngii a rungil sechelil e le ngii el mle ungil sechelirir. Ngmirruul a ungil tekoi el kirir e mle tabesul a osengel er aike el sebechir el remuul. A Jesus a mle cherrungel engdi nguleba omereng el saul el kirir a rediak lemecherrungel el sechelil el tir a ullengeseu er ngii. E tir a ulterekokl el ngilsuir el mo melemolem el budech a uldesuel.

14-15. Ngmekera mo er ngii a rungil sechelid, e te mekera lengesukid?

¹⁴ A rungil sechelid a mo ngosukid el lomelemii a blakerreng er kid el mora Jehovah. E a kot el ungil rolel a lebo er ngii a rungil sechelid a okiu sel bo dungil sechelei. (Mt. 7:12) El ua tiang, a Biblia a melisiich er kid el mo ousbech a temed me a klisiched el ngosuterir a rebebil, el ileakl tirke el “mechebuul.” (Efe. 4:28) Ngar ngii a chad er a ongdibel er kau el sebechem el ngosuir? Ngsebechem el mo shopping el kirel a chad el diak el sebechel el tuobed er a blil e le ngcheluodel me a lechub e ngsecherel a uchul? Ngsebechem el remuul a kall el kelel a telungalek el ngar ngii a mondai er tir er a udoud? A lsekum e ke meduch el ousbech er a website er a jw.org^® me a JW Library^® app, e ngsebechem el ngosuterir a rebebil el ngar er a ongdibel el mo meduch el ousbech? Sel bo demechesang el olengeseu er a rebebil, e ngmengal mo dmeu a rengud.​—Rel. 20:35.

¹⁵ A resechelid a mo ngosukid sel bo dechelebangel a mondai e dirrek el mo ngosukid el melemolem el budech a uldesued. A resechelid a sebechir el ngosukid lokiu sel lorrenges er kid sel douchais aike el ngar er a rengud el ua Elihu el ulerrenges er a Job er a losaod a ringel el chillebangel. (Job 32:4) Ngdiak el kired el mo omdasu  el kmo a resechelid a mo melilt a tekoi el kired, engdi nguchul a llomeserreng a lsekum e kede orrenges a ulekrael er tir el mlengai er a Biblia. (Osi. 15:22) E di ua King el David el mle ngariou a rengul el kongei a ngeso er a resechelil, kid me ngdiak el kired el kmal mo kedidai a rengud el uchul me ngmo meringel er kid el kongei a ngelsurir a resechelid sel dousbech a ngeso. (2 Sa. 17:27-29) A mera er ngii, a reuaisei el sechelid a sengk el mlara Jehovah.​—Jak. 1:17.

16. A doltirakl er a Filipi 4:6, 7, e ngera di ta el rolel e ngsebechel mo budech a uldesued? Mosaod.

¹⁶ Monguiu er a Filipi 4:6, 7. Ngera uchul me a Jehovah a ouchais er kid el kmo ngdi sebeched el nguu a budech el omeskid lokiu a “Kristus Jesus”? E le ngdi sebechel el mo budech a uldesued me a rengud el okiu sel bo dodengelii e bo doumerang er a ngerechelel a Jesus er a chelsel a moktek er a Jehovah. El ua tiang, ngokiu a olubet el tengetengel a Jesus, e ngsebechel el musubes a rokui el kngtid. (1 Jn. 2:12) Tia el tekoi a mo uchul a klou el ongelaod! Ngii el King er a Rengedel a Dios a uchul me a Jesus a mo sumechokl a ngii di el ringel el dechelebangel er ngii el Satan me tia el beluulechad er ngii a uchul. (Isa. 65:17; 1 Jn. 3:8; Och. 21:3, 4) Tia el tekoi a mo uchul a ungil omeltked! E alta Jesus a mla meskid a klou el ureor, engdi ngii a obengked, el olengeseu er kid er aika el uriul sils er tia el beluulechad. (Mt. 28:19, 20) Tia el tekoi a mo uchul e kede oba klou el blekeu! Me a ongelaod, me a omelatk, me a blekeu a kmal meklou a ultutelel el tekoi el dousbech el mo sebeched el melemolem el budech a uldesued.

17. (a) Ngmekera Kristiano e melemolem el budech a uldesuel? (b) Ngera mo sebeched el rullii el ua losaod a Johanes 16:33?

¹⁷ Me ke mekera melemolem el budech a uldesuem sel bo mchelebangel a kmal meringel el tekoi? Ngsebechem el meruul er tiang lokiu sel moltirakl aike el tekoi el lurruul a Jesus. A kot, e moluluuch e molemolem el meluluuch. A ongerung, e molengesenges er a Jehovah, e bo el blak a rengum el omerk er a klumech el mo lmuut er a taem el meringel er kau el meruul el uaisei. E a ongedei, e molengit a ngeso er a resechelim me lengesukau sel bom chelebangel a ringel. E seikid e a budech er a Dios a mo kokerengii a rengum me a uldesuem. E mo sebechem el mo mesisiich er a ngii di el ringel el di ua Jesus.​—Monguiu er a Johanes 16:33.