1. A rokui el mesiungel a Dios ngsorir el mekerang, e ngera uchul? (Momes er a siasing er a medal tia el babier.)

A KRISTUS JESUS a milengelechel er a rultirakl er ngii el kmo “morael el mor a bek el bedengir a re chad er ker me ker e moruul er tir el mo obengkek.” (Mt. 28:19) A rokui el blak a rengrir el mesiungel a Dios a sorir el suubii a rolel e ngsebechir el “churrengelii” tia el omesiungir el mla moterekokl er tir. (2 Ti. 4:5) E le tia el ureor a lmuut el klou a ultutelel, e mekreos, e dirrek el kmal orechudel a domekesiu er ngii er a ngii di el ureor er chelecha el taem. Nguaisei, engdi ngsebechel el mo meringel er kid el mengoit a soad a ildisel el taem el meruul er a omesiunged.

2. Ngera el meringel el blekeradel a bo dechelebangel sel doruul er a omesiunged?

² Ngbetok a meklou a ultutelel el tekoi el sebechel ngosur a klou el temed me a klisiched. Alta ngkired el oureor el betok el sikang el mo mesiou er kid me a telungalek er kid. Nglocha dirrek el ngar ngii a kuk bebil er a ngerecheled er a telungalek er kid, e smecher, e meringel a uldesued, me a lechub e ngmeringel a bedenged el cheluodel a uchul. Me kede mekera sebeched el outekangel aika el meringel el blekeradel e a osisiu el taem e kede churrengelii a omesiunged?

3. Ngera sebeched el melekoi el kirel a tekingel a Jesus el ngar er a Mateus 13:23?

³ Ngdiak el kirel el mo mechitechut a rengud a lsekum a blekerdelel a klengar er kid a mo uchul e ngdi kesai a temed el mesiou er a Jehovah. A Jesus a mle medengei el kmo a derta el chad a kakerous a sebechir el remuul er a omesiungir el omerk er a klumech er a Renged. (Monguiu er a Mateus 13:23.) A Jehovah a omes a rokui el doruul el kirel a omesiunged el kmal mekreos a lsekum kede meruul er ngii el ngar er a tkurrebab el sebeched. (Heb. 6:10-12) Me nguaisei, engdi kede locha mo mtebengii el kmo ngsebeched el remuul a lmuut el betok. Ngar tia el suobel, e kede mo omes a rolel e ngsebeched el nguu a omesiunged el mo kot er a chelsel a klengar er kid, e domekbeot er a klengar er kid, e bo dolengeriakl er a rolel a  domerk er a klumech e dolisechakl er a rechad. Engdi a kot, e kede mo mesaod el kmo ngera belkul a bo decherrengelii a omesiunged?

4. Ngera belkul a bo decherrengelii a omesiunged?

⁴ Me a bo decherrengelii a omesiunged a belkul a kmo, ngkired el blak a rengud el omerk e olisechakl er a rechad er sel sebeched. Engdi ngar ngii a lmuut el betok el uldimukl er tiang el diak di el ildisel a taem e lemerekong. A moktek er kid a klou a ultutelel er a osengel a Jehovah. Kid el betik a rengud er a Jehovah me a ngar bita er kid a uchul me kede oba blakerreng el meruul er tia el omesiunged el Kristiano. * (Mk. 12:30, 31; Kol. 3:23) Me a dosiou er a Dios el oba klengar er kid el rokir e ngbelkul a kmo kede mora tkurrebab el klisiched el meruul er a omesiunged el mo er ngii. Me sel bo dodengei el kmo ngileakl el techall a dobang el omerk er a klumech, e kede mo melasem el ouchais er a ungil chais el mora rebetok el chad el sebeched el omerk el mo er tir.

5-6. Mosaod er a rolel e a chad el di kesai a temel a sebechel el rullii a omesiungel el mo kot el klou a ultutelel tekoi er a klengar er ngii.

⁵ Ka molatk er a ta el kekerei el chad el kmal soal loukita. Me ngsoal ousekool er ngii er a bek el techellel. Me a cherengel a taem, e ngmetik er a urerel el oukita er a cafe sel le weekend. Me nguaisei, engdi a ududel a diak el sebechel el siungii. Me ngmo oureor el cashier er a stoang er a Kot el mora Ongeim el Ureor. Me alta klou el temel a ngar er a stoang, engdi ngkmal dirk soal chad er a ongngak. Me ngoureng el kmal mo meduch er tia el tekoi me bo el sebechel el meruul er ngii el mui el taem. Me alta nguaisei engdi ngdirk dmeu a rengul er a techall el sebechel el loukita alta ngdi kirel a kedeb el taem.

⁶ Me ngdi osisiu, nglocha diak el sebechem el mengoit er a soam el ildisel a taem el omerk er a klumech. Engdi ngtekoi el kot el soam el meruul er ngii. Me ke melasem el mo olengeriakl er a rolel e ngsebechem el melisiich a rengrir a rechad el ousbech er a ungil chais. Me kau el betok a kirem el meruul a uchul me ke locha mo melatk er a rolel e ngsebechem el rullii a berkel a klumech el mo kot el klou a ultutelel el tekoi er a klengar er kau.

7-8. Kede mekera mo oba osisiu el uldasu el luleba Jesus el bedul a omesiungel?

⁷ A Jesus a kiltmeklii a kot el ungil kerebai el kirel a osengel el bedul a omesiungel. Ngmle kot el klou a ultutelel el tekoi er a klengar er ngii sel losaod el kirel a Rengedel a Dios. (Jn. 4:34, 35) Ngmirrael a betok el dart el mael el mo omerk el mora rebetok el chad el lebiltik er tir. E mle blechoel el osiik a rolel e ngsebechel el mo mengedecheduch er a rechad el ngar er a blirir me a lechub e ngii di el basio er a buai el lemla er ngii. A Jesus a ngiluu a omesiungel el mo kot er a chelsel a klengar er ngii.

⁸ Ngsebeched el oukerebai er a Kristus lokiu sel dosiik a techall el mo mengedecheduch er a rechad el kirel a ungil chais er a ngii di el taem me a basio. Kede kongei el chemoit a soad el tekoi me bo el sebeched el omerk er a klumech. (Mk. 6:31-34; 1 Pe. 2:21) A rebebil el ngar er a ongdibel a mesiou el special me a lechub e te regular me a lechub e te auxiliary pioneer. A rekuk bebil a mla suubii a ta er a omelekoi me a lechub e te mla melukl el mora basio el ousbech er a ruumerk er a klumech. Nguaisei, engdi a klou el tedobech er a ureor er a berkel a klumech a loruul er ngii a re publisher el tir a meruul aike el sebechir. Me a lsebeched el remuul a betok me a lechub e ngdi kesai el ngar er a omesiunged, e a Jehovah a diak longerechir er kid el mo meruul aike el diak el sebeched. Ngsoal a derokui el mo dmeu a rengud er a omesiunged el mo er ngii el omerk er a “ungil chais el kirel a dmeu a rengul el Dios.”​—1 Ti. 1:11, NW; Dut. 30:11.

9. (a) Ngmilekera Paulus e rirellii a ureor er a berkel a klumech el mo klou a ultutelel alta ngmle kirel el oureor? (b) A Rellir 28:16, 30, 31, ngera ngochotii el kirel a osengel a Paulus el bedul a omesiungel?

⁹ A apostol el Paulus a dirrek el kiltmeklii a ungil kerebai el rirellii a omesiungel el mo kot el klou a ultutelel el tekoi er a klengar er ngii. Sera lengar er a Korinth er a ongeru el omerollel el missionari, e ngmlo diak a ududel me ngmlo kirel el oureor el meruul a tento. Nguaisei, engdi a Paulus a dimlak lomes er tia el ureor er a omeruul tento el klou a ultutelel. Ngbai mirruul er ngii me bo el sebechel el di ngii el mesiou er ngii e loruul er a omesiungel e lomerk er a ungil chais el mora rechad er a Korinth el ‘diak lolai a udoud el kirel.’ (1 Ko. 9:18) Me alta Paulus a mle kirel el oureor el mengereker engdi ngmillemolem el omes er a omesiungel el klou a ultutelel e ulemerk er a klumech er a bek el Ulengull el Sils. Me sera bocha lulterekokl a klengar er ngii, e ngmlo sebechel el kilungii a temel er a omesiungel. Me ngulemuchel “uluusbech a rokui el temel el olisechakl a Ebangkelio, e olecholt er a re chad er a Judea el kmo a Jesus a Mesias.” (Rel. 18:3-5; 2 Ko. 11:9) E a uriul, e ngmle kelebus er a blil el ngar er a Rom el eru el rak, e uluusioning el mo er tirke el mle oldingel er ngii e dirrek el milluches a babier. (Monguiu er a Rellir 28:16, 30, 31.) Me a Paulus a dimlak lebechei a ngii di el ngerang me lebo ruchei er a omesiungel. Ngmilluches el kmo: “Ng milskemam tial ngerachel, me ng diak bo le mechitechut a rengmam.” (2 Ko. 4:1) Me kede di ua Paulus, el dirk sebeched el rullii a ureor er a Renged el mo kot el klou a ultutelel el tekoi er a klengar er kid, alta ngkired el mengoit a taem el oureor.

10-11. Kede mekera churrengelii a omesiunged a lsekum ngar ngii a sechered me ngdiak el sebeched el remuul aike el soad?

¹⁰ A lsekum e ngdiak el sebeched el meruul a betok el omerk er a klumech e le kede chudelang me a lechub e ngar ngii a sechered, engdi sebeched el oldeu er a rengud el omerk er a klumech el oeak a kuk bebil er a rolel. A Rekristiano er a irechar a ulemerk er a klumech el mora rechad er aike el basio el mle sebechir el metik er tir. Te uluusbech a bek el techall el mo mesaod el kirel a klemerang el okiu sel loldingel a obliil, me a lengar er a buai me a lengar er a ngii di el ker, el ike el basio el ‘blo lengelakl’ er ngii a rechad. (Rel. 17:17; 20:20) Me a lsekum e ngdiak el sebeched el merael el kemanget el taem, e nglocha sebeched el di dengchokl er aike el basio el betok a rechad er ngii e omerk er a klumech el mo er tirke el engelakl er kid. Me a lechub e ngsebeched el ousioning er sel taem el doruul a urered er a bek el sils, me a lechub e kede meluches a babier, me a lechub e kede oudengua. A rebetok el publisher el diak  el sebechir el blechoel oldingel a obliil e le ngsecherir me a lechub a kuk bebil er a mondai a uchul, a dirk sebechir el mo dmeu a rengrir e le tir el meruul aika el kakerous el rolel a lomerk er a klumech.

¹¹ Me alta ngar ngii a secherem, engdi ngdirk sebechem el churrengelii a omesiungem. Ka mluut el melatk er a kerebil a apostol el Paulus. Ngmillekoi el kmo: “Ngar ngii a klisichek el remuul aike el rokui el mei er ngak el okiu a klisiich el lomeskak a Jehovah.” (Fil. 4:13, NW) A Paulus a uluusbech er tia el klisiich er sel taem er a bo el secher er a ta er aike el omerollel el missionari. Ngmilsaod el mora rechad er a Galatia el kmo: “Ser a kot el kulisechakl er a Ebangkelio er kemiu e ak mle smecher a uchul me ng mlo sebechek el kiei e olisechakl.” (Gal. 4:13) Me ngdi osisiu, a secherem a sebechel el meskau a techall el mo omerk er a ungil chais el mora rebebil el ua retoktang, me a nurs me tirke el olengeseu el omekerreu er kau. A rebetok er tirka el chad a oureor er sel taem el re publisher a oldingel er a rekeblirir.

12. Ngera belkul a bo ‘lungil osenged’?

¹² A Jesus a dilu el kmo: “A medad a ua lolbdelel a bedenged. Ma lsekum ng ungil osengem, e a bedengem el rokir a di mellomes.” (Mt. 6:22) Ngera mle belkul a tekingel? Ngbelkul a kmo ngkired el ultaut a osenged er a di ta el turrekong me a lechub e ngmoktek, el diak a ngera el mengesang er ngii. A Jesus a kiltmeklii a kerebai el kirel tiang er a lousbech er a klengar er ngii el kirel a omesiungel, e lolisechakl er a redisaiplo er ngii el mo ultaut a osengir er a omesiungir el mora Jehovah me a Rengedel. Me kede oukerebai er a Jesus el oeak sel derellii a ureor er a berkel a klumech el mo kot el klou a ultutelel el tekoi er a klengar er kid, el okiu sel ‘domuchel losiik ra rengedel a Dios ma llemeltel.’​—Mt. 6:33.

13. Ngera sebechel el ngosukid el mo ultaut a osenged er a omesiunged el Kristiano?

¹³ A ta er a rolel e ngsebeched el ultaut a osenged  er a omesiunged a okiu sel domekbeot er a klengar er kid me bo el sebeched el mengoit a klou el taem el olengeseu er a rebebil el mo medengelii a Jehovah e mo betik a rengrir er ngii. * El ua tiang, ngsebeched el melodech a temed el oureor me bo el sebeched el mengoit a klou el taem el oldingel sel Kot el mora Ongeim el Ureor? Ngsebeched el kosadel a temed el kirel a tekoi er a ongelaod el ngii a nguu a klou el temed?

14. Ngera el omelodech a mle kirel a ta el obekel el meruul er ngii me bo el sebechir el mengoit a klou el temir me a klisichir el kirel a omesiungir?

¹⁴ Tiakid a tekoi el lurruul er ngii a ta er a remechuodel el Elias me a bechil. Ngmesaod el kmo: “Ngdimlak el sebecham el di mereched el mo pioneer, engdi ngmla er ngii a tekoi el sebecham el remuul me ki bo mousbech er a klou el temam er a ureor er a berkel a klumech. Me aki mirruul a mekekerei el tekoi me bo el sebecham el menglou a temam el omerk er a klumech. El ua tiang, ngmlo diak ki msal mengoit a udoud. Aki dirrek el miltebengii el kmo aki milengoit a klou el taem el kirel a tekoi er a ongelaod me aki mlo mengesadel a temam el kirel chouaika el tekoi. E ullengit er a remerreder er a ureram me bo el sebecham el ngodechii a temel a ureram me bo el klou a temam el omerk er a klumech. Sei a uchul me ngmlo sebecham el omerk er a klumech sel lekebesengei, e mlo er ngii a betok el chad el ki mosuub a Biblia el obengterir, e dirrek el mlo oldingel el eru el taem er a chelsel a ta el sandei el ta el buil. Tia mlo uchul a klou el deuil a rengmam!”

15-16. A doltirakl er a 1 Timothy 4:13, 15, e ngmekera dolemolem el olengeriakl er a duch er kid el omerk er a klumech? (Dirrek el momes er a baks el “ Turrekong el Ngosukak el Churrengelii a Omesiungek.”)

¹⁵ A lmuut el ta er a rolel e ngsebeched el churrengelii a omesiunged a okiu sel dolengeriakl er a  duch er kid el meruul er tia el ureor er a berkel a klumech. A rechad el meruul a bebil er a ureor a kirir el blechoel el ngar er a training me bo el sebechir el olengeriakl er a klemedengei me a duch er tir. E tiang a dirrek el uaisei el kirir a ruumerk er a klumech er a Renged. Ngkired el melemolem el mesuub er a rolel e ngsebeched el lmuut el mo meduch el meruul er a omesiunged.​—Osi. 1:5; monguiu er a 1 Timothy 4:13, 15.

¹⁶ Engdi ngmekerang e mo sebeched el melemolem el olengeriakl el ngar er a omesiunged? Ngokiu sel bo dekerekikl el omtab aike el osisechakl el dengai er sel Miting er a Klengar er Kid me a Omesiunged el ngar ngii er a bek el sandei. Tia el miting a meskid a klou a ultutelel el training el mo ngosukid el melemolem el olengeriakl er a duch er kid el oldingel. El ua tiang, ngike el odam el oungerachel sel louchais er tirke el uleltobed a cheldechedecherir aike el luluureor er ngii, e ngsebeched el suub a tekoi el ngosukid el olengeriakl er a omesiunged. E dirrek el sebeched el oltaut aika el ulekrael er sel taem el dosaod er a ungil chais el mora chad. Ngsebeched el olengit er ngike el odam el oungerachel er a group er kid er a odingel el kirel a ngeso me a lechub e kede oureor el obengkel me a lechub e ngta er a chad el meduch el omerk er a klumech, me a lechub e ng pioneer, me a lechub e ngodam el oldingel a ongdibel. Me a cherengel a taem el bo demeduch el ousbech a derta er aike el dongu el ngar er a Blil a Dongu el Kirel a Osisechakl, e ngmengal mo dmeu a rengud el omerk e olisechakl.

17. Ngera mo duubech el eko er kau sel mcherrengelii a omesiungem?

¹⁷ Ngkmal ileakl el techall a dobang el Jehovah a kongei er kid el mo “kldemel . . . er a ureor”! (1 Ko. 3:9) Me sel ‘mngilt a ikel kot’ el meklou a ultutelel el tekoi e bo lultaut a osengem er a omesiungem el Kristiano, e ke mo ‘mesiou er a Jehovah el oba deurreng.’ (Fil. 1:10; Psa. 100:2, NW) Me kau el ta er a mesiungel a Dios a uchul me ngsebechel mo ulterekokl a rengum el kmo ngmo meskau a klisiich el mousbech er ngii el mo kutmeklii a omesiungem alta ke mo chelebangel a omelsemai me a lechub e ngmondai. (2 Ko. 4:1, 7; 6:4) Me alta blekerdelel a klengar er kau a uchul me ngdi sebechem el mengoit er a klou me a lechub e ngdi kekerei el taem el omerk er a klumech, engdi ‘ngungil a rengum’ e le kousbech er a klengar er kau el rokir el kirel a omesiungem. (Gal. 6:4) Me sel mcherrengelii a omesiungem, e kochotii a bltkil a rengum el mora Jehovah me a ngar bita er kau. “Cho bo mua isei, e kosebelau kau me tirkel orrenges er kau.”​—1 Ti. 4:16.