Ngera uchul me a uchei er a lemad a Jesus e ngmillekoi a tekingel a David el ngar er a Psalm 22:1?

A uchei er a lemad a Jesus e ngdilu el ngar er a Mateus 27:46 el kmo: “Dios er ngak, Dios er ngak, ngera uchul me ke mla choitak?” A Jesus er a ledu aika el tekoi e ngultutii a tekingel a David el ngar er a Psalm 22:1. (Mk. 15:34) Me ngcheleuid el tekoi a dedu el kmo, a Jesus a millekoi aika el tekoi le ngii el mle mekngit a rengul me a lechub e ngmlo diak a klaumerang er ngii el telkib el taem. A Jesus a mle ungil medengelii a uchul me ngmle kirel el mad, e kmal kilengei el meruul el uaisei. (Mt. 16:21; 20:28) Ngdirrek el mle medengei el kmo a Jehovah a diak bo ‘longkar’ er ngii er a taem er a kodellel. (Job 1:10) Me a Jehovah milsa techellel a Jesus el mo ochotii el kmo alta ngmo meringel a kodellel engdi ngmo lomelemii a blakerreng er ngii.​—Mk. 14:35, 36.

Me ngera uchul me a Jesus a millekoi aika el tekoi er a psalm? Alta ngdiak a bleketakl el nger er tiang engdi ngsebeched el mo melatk a locha bebil er a uchul. *

A Jesus ngmillisiich el kmo a Jehovah diak bo lolengeseu er ngii er a taem er a kodellel er a ledu aika el tekoi? A Jesus a mle kirel di ngii e kokedir a olubet. Ngika mle chad e kirel mad me le “chormii a kodall el kirir a rokuil chad.”​—Heb. 2:9, BT.

A Jesus ngulemelekl a bebil tekoi er tia el psalm e le ngmle soal a rechad a bo lolatk aike el rokui el tekoi er tia el psalm? Ngmle blekerdelir  a Rechijudea er seikid el taem el memorize a betok el psalm. Me sel lerengesii a bades er a psalm e te mo melatk er sel bliongel el lemlengai er ngii. A lsekum e tiang a mle moktek er a Jesus e ngbelkul a kmo ngilsuterir a Rechijudea el uleltirakl er ngii el mo melatk aike el betok el ulaoch el ngar tia el psalm el mesaod a tekoi el mo duubech er a taem er a kodellel. (Psa. 22:7, 8, 15, 16, 18, 24) Ngdirrek el ngar er a ulebengelel tia el bliongel er a psalm e ngmesaod er a Jehovah el King er a beluulechad el rokir.​—Psa. 22:27-31.

A Jesus ngmillekoi el kmo ngdiak a telemellel er a ledu aika el tekingel a David? A Jesus er a uchei er a lemad e ngmlukerrekeriil er a diak lemelemalt el kerrekeriil e mlotelechakl el kmo ngoltuub er a Dios. (Mt. 26:65, 66) Ngmle osoi e te meruul er tia el kerrekeriil me tir a dirrek el dimlak loltirakl a llechul a doruul a kerrekeriil. (Mt. 26:59; Mk. 14:56-59) A Jesus er a loker el kmo “Dios er ngak, Dios er ngak, ngera uchul me ke mla choitak?” e nglocha ulemeketakl el kmo ngdimlak el rredemelel tia el kerrekeriil el mlo er ngii.

A Jesus ngulemeketakl el kmo a David el milluches er tia el psalm alta ngmlo chelebangel a ringel engdi ngdiak el belkul a kmo ngdiak loba kengei er a Jehovah? Tia el keril a David a diak el belkul a kmo ngdiak a klaumerang er ngii. E le uriul el tekingel a ochotii el kmo ngmle ulterekokl a rengul el kmo a Jehovah olsobel er a rechedal. A Jehovah dirrek el millemolem el omekngeltengat er ngii. (Psa. 22:23, 24, 27) Ngdi osisiu, alta Jesus el “Ngelekel a David” a mildeel er a teluo el kerrekar engdi tia diak el belkul a kmo ngmlo diak loba kengei er a Jehovah.​—Mt. 21:9.

A Jesus ngullecholt er a kngtil a rengul e le Jehovah a diak bo lomekerreu er ngii me bo el sebechel churrengelii a blakerreng er ngii? Ngdimlak el moktek er a Dios er a uchelel el kmo a Ngelekel a mo chuarm e mad. A ultok er a Eden a uchul me tia el tekoi a mlo kirel meketmokl. Ngdimlak a mekngit el lerellii a Jesus engdi ngmlo kirel el mo chuarm e mad me bo lsebechel monger a ker el lukdubech a Satan e dirrek el mo kutmeklii a olubet el mechar aike el lurriid a Adam. (Mk. 8:31; 1 Pe. 2:21-24) Tia di sebechel meketmokl a lsekum a Jehovah a diak el bo lolengeseu er a Jesus.

A Jesus ngmle soal a rultirakl er ngii a bo lolatk er a uchul me a Jehovah milecherei me ngmo nguu chouaitia el kodall? * A Jesus a mle medengei el kmo a kodellel er a teluo el kerrekar a mo soibesengeterir a rebetok. (1 Ko. 1:23) Me a lsekum a rultirakl er ngii a mo melatk er a uchul a kodellel e te mo mtebengii sel mera el belkul a kodellel. (Gal. 3:13, 14) Seikid e te diak el bo lomes er ngii el dengerenger el chad e te bai mo mesa el kmo ngika osebelir.

Me alta ngdiak dodengelii a uchul me a Jesus a millekoi aika el tekoi engdi kede medengei el kmo, a Jesus a mle medengei el kmo a tekoi el ble lechebangel er ngii a moktek er a Dios el kirel. E le uriul er a ledu aika el tekoi e ngdilu el kmo: “Ng mla mecherrungel a rokui el tekoi!” (Jn. 19:30; Lk. 22:37) A Jehovah el mlo diak lomekerreu er a Jesus el telkib el taem a uchul me a Jesus a mle sebechel churrungel aike el mle kirel el mei er tia el chutem el mo meruul. Ngdirrek el mlo uchul me ngtilaut a “bek el tekoi el llechukl el [kirel] el ngar a Llach er a Moses, ma babier er a re profet, ma Psalm.”​—Lk. 24:44.