1. Ngmilekera ta el buik e ouchais er a omeltkel er okiis?

 A BUIK el ngklel a Matthew a ngar ngii a oberaod el secherel el uchul me ngmle kirel mora betok el botk. Sera le 7 a rekil e ngulemes er a ta el broadcast er a JW Broadcasting^® ngii me a telungalek er ngii. Ngar er a mochu ulebengelel a prokuram e te ulemes er a music video el kirel a outkeu er a rebetik er a rengud el mla mekiis. b Sera bo el merek lomes er a broadcast e ngmlora rechad er a blil e orreked chimorir e kmo: “Ko mesang e mami me a babpa? Mo lmuut me ak mad me ak mo mekiis er a temel okiis. Ngsebechiu el mengiil er ngak. Ngdi mo ungil a rokui el tekoi.” Ka di molatk er a deuil a rengrir tirka el oungalek e le ngelekir el kmal mesisiich a klaumerang er ngii er a okiis.

2-3. Ngera uchul me ngungil el kired a cherengel a taem e kede kuk melebedebek el kirel a telbiil er okiis?

² Ngkmal ungil kired a cherengel a taem e kede kuk melebedebek el kirel a telbiil er a Biblia er okiis. (Jn. 5:28, 29) E ngerang? E le ngkmal diak dodengei el kmo ngoingerang e kede mo el mo smecher er a oberaod el rakt me a lechub a betik er a rengud a di kiul el mad. (Oli. 9:11; Jak. 4:13, 14) Omeltked er okiis a sebechel ngosukid loutekangel chouaika el ringel. (1 Th. 4:13) A Bades olterekokl er a rengud el kmo a Demad el ngar er a eanged a kmal ungil medengelkid e kmal betik a rengul er kid. (Lk. 12:7) A Jehovah kmal ungil medengelkid me sel lokisid e kede molab a blekerdeled e sebeched el dobedebek aike el rokui el tekoi er a ngar er a mong. E kmal betik a rengul er kid me ngmla meskid a techall el mo kiei el mo cherechar. Mo lmuut er a de mad me ngmo okisid.

³ Ngar tia el suobel, e a kot e kede mo mesaod er a uchul me ngsebeched loumerang er a telbiil er okiis. A uriul e kede mo  merriter er a cheldecheduch er a Biblia el lemlengai er ngii a bades er tia el suobel: “A ochedam a lmuut el mo chad.” (Jn. 11:23) A ulebongel, e kede mo suubii a rolel e ngsebechel omelatk er okiis el mo mera el tekoi er a rengud.

4. A bo doumerang er a telbiil, e ngera kirel mo ulterekokl a rengud er ngii? Momekesiu.

⁴ A bo doumerang er a telbiil, e ngkirel mo ulterekokl a rengud el kmo ngike el meruul er tia el telbiil a ngar ngii a urungulel me a klisichel, me a lechub e ngduch er ngii el mo kutmeklii. Ngsebeched lomekesiu er ngii er tiang: Okmo blim a kmal klou el miltemall er a meses el eolt. A sechelim a mei er kau e tibir el kmo, ‘Ak mo ngosukau el lmuut el mekedecherur a blim.’ Ngsebechem el mesang el kmo ngmera el soal lolengeseu er kau. A lsekum e ngngar ngii a duch er ngii lomekedechor e ngar ngii a klekedellel, e ke medengei el kmo ngmera el sebechel ngosukau. Me koumerang er a telbilel. Me ngkuk mekerang a telbilel a Dios el kirel okiis? Ngmera el ngar ngii a urungulel me a klisichel el mo kutmeklii?

5-6. Ngera uchul me ngsebechel mo ulterekokl a rengud el kmo a Jehovah ngar ngii a urungulel el mo olekiis er a rulekoad?

⁵ A Jehovah ngngar ngii a urungulel lolekiis er a rulekoad? Ngkmal ngar ngii. A rebetok el milluches er a Biblia a mlukreng el mo meluches el kirel a telbilel er okiis, el mo er ngii er a ngar medad. (Isa. 26:19; Hos. 13:14; Och. 20:11-13) E a Jehovah sel lerellii a telbilel, e ngotutii. (Jos. 23:14) Jehovah a kmal omes el beduluchei el mo olekiis er tirke el mla mad. Ngera uchul me ngsebeched el melekoi el uaisei?

⁶ Molatk aike el ledilung a Job. Ngkmal mle ulterekokl a rengul el kmo mo lmuut er a lemad me a Jehovah soal lomes er ngii el lmuut el me ngar. (Job 14:14, 15) A Jehovah osisiu a uldesuel el kirir a rokui el mengull er ngii el mla mad. Ngkmal soal a lluut el me ngar, e lemesisiich a bedengir e ledeu a rengrir. E kuk mekerang el kirir tirke el betok el biliol el mla mad e dimlak a techellir el suubii a klemerang el kirel a Jehovah? A betik a rengul el Dios er kid a dirrek el soal a lluut el me ngar. (Rel. 24:15) Ngsoal mesterir a techellir el mo sechelil e kiei el mo cherechar er tia el chutem. (Jn. 3:16) Ngbleketakl el kmo a Jehovah a ngar ngii a urungulel el mo olekiis er a rulekoad.

7-8. Ngera uchul me ngsebechel mo ulterekokl a rengud er a klisichel a Jehovah lolekiis er a rulekoad?

⁷ A Jehovah ngdirrek el ngar ngii a klisichel el lolekiis er a rulekoad? Chochoi! Ng “Olab a Bek el Klisiich.” (Och. 1:8) Ngkmal mesisiich me ngsebechel mo mesisiich er a ngii di el cheraro, luldimukl er a kodall. (1 Ko. 15:26) Ngkmal melisiich er kid e mengelaod er kid el medengelii tiang. Molatk er a experience er a odos el Emma Arnold. Ngii me a telungalek er ngii a mlo chobangel a meringel el omelsemai er a temel a Ongeru el Mekemad. A rebetik er a rengrir a mlad er aike el Nazi concentration camp. Me a Emma millisiich er a ngelekel el redil el kmo: “A lsekum a rechad el mla mad a diak el sebechir el lmuut el me ngar, e tia belkul a kmo a cherroued er a kodall a lmuut el mesisiich er a Dios. Engdi tia kmal diak el sebechel klemerang.” Ngdiak a ngii di el ngerang el lmuut el mesisiich er a Jehovah! A Dios lolab a bek el klisiich el milebii a klengar a kmal sebechel lolluut a klengar er tirke el mla mad.

⁸ A ta er a uchul me kede medengei el kmo a Dios a ngar ngii a klisichel lolekiis er a rulekoad, a ngii el diak a telkelel omelebedebekel. Ngomekedong a ngklel a derta el btuch. (Isa. 40:26) Ngdirrek el dirkak lobes er tirke el mla mad. (Job 14:13; Lk. 20:37, 38) Ngkmal di beot er ngii a dobedebek a rokui el tekoi el kirir tirke  el mla mad, luldimukl a blekerdelir me a teletelir, experience er a klengar er tir, me a rokui el tekoi el lodengei.

9. Ngera uchul me koumerang er a telbilel a Jehovah el kirel a okiis el mo er ngii er a ngar medad?

⁹ Me ngkmal sebeched loumerang er a telbilel a Jehovah el kirel a okiis er a ngar medad e le kede medengei el kmo ngngar ngii a urungulel me a klisichel el mo meruul el uaisei. Molatk er a ta er a uchul me ngsebeched loumerang er a telbilel a Dios el kirel okiis: A Jehovah mla rullii tiang. Ngar er a taem er a Biblia e ngmilsterir a rebebil el chad luldimukl er a Jesus a klisiich lolekiis er a rulekoad. Ka me dorriter er a ta er a cheldecheduch el kirel okiis el lerirellii a Jesus el ngar er a 11 el bliongel er a Johanes.

10. Ngera dilubech er a lomerk a Jesus er bita er a Jordan, e ngii a milekerang? (Johanes 11:1-3)

¹⁰ Monguiu er a Johanes 11:1-3. Molatk a tekoi el dilubech er a Bethania er a ulebengelel a 32 C.E. A Jesus a ngar ngii a rekmal ungil sechelil er tia el beluu, el Lasarus me a reteru el ochedal er a Maria me a Martha. (Lk. 10:38-42) Engdi Lasarus a smecher, me a ruchedal a kmal bekikl. Me te milsumech el mora Jesus el ngii a mlara bita er a Jordan, el mle eru el klebesei a cheridel er a Bethania a lsekum kede di merael. (Jn. 10:40) Engdi ngklengiterreng e le Lasarus a mlad er a lebo tekoi er a Jesus. Me alta Jesus a mle medengei el kmo a sechelil a mla mad, ngkiliei el lmuut el eru el klebesei e mocha merael el mora Bethania. Me sera lebong a Jesus e a Lasarus a mla mo ulekoad el eua el klebesei. A Jesus a mle soal el meruul er a tekoi el mo uchul a klungiaol el mora resechelil me a klebkall el mora Dios.​—Jn. 11:4, 6, 11, 17.

11. Ngera kede suubii el kirel a klausechelei er tia el cheldecheduch?

¹¹ Kede suubii a klou a ultutelel el suobel el kirel a klausechelei er tia el cheldecheduch. Molatk er tiang: A Maria me a Martha er a losumech a tekoi el mora Jesus, e te dimlak lolengit er ngii me lemei er a Bethania. Te di dilu er a Jesus el kmo a sechelil a smecher. (Jn. 11:3) A Lasarus er a lemad, e ngmle sebechel a Jesus el di cheroid e okisii. Engdi a Jesus a ngileltii el mora Bethania el mo obengkel a sechelil er a Maria me a Martha. Ngngar ngii a sechelim el di diak molengit er ngii e ngmei e ngosukau? Me a leuaisei e ke medengei el kmo ngsebechem lousbech er ngii er a taem er a “chelebuul.” (Osi. 17:17) Me bo deua Jesus, e bo deuaisei el sechelei el mora rebebil! Ka me deluut el mora cheldecheduch e desa el kmo ngngera dilubech.

12. Ngera ngtilbir a Jesus el mora Martha, e ngera uchul me ngsebeched loumerang er a telbilel? (Johanes 11:23-26)

¹² Monguiu er a Johanes 11:23-26. Martha mlo medengei el kmo a Jesus a mocha er a Bethania. Me ngdi mle mereched el mo olsiuekl er ngii e kmo: “Chomko ke mlar tiang e Rubang, e ng dimlak le mad ochedak!” (Jn. 11:21) Ngmerang, ngmera el mle sebechel lomekungil er a Lasarus. Engdi Jesus a mle soal meruul er a lmuut el ileakl el tekoi. Ngtilbir el mo er ngii el kmo: “A ochedam a lmuut el mo chad.” E milsa  Martha lmuut lungil luchul me ngsebechel loumerang er a telbilel. Ngdilu el kmo: “Ngak a okiis er a kodall e klengar.” Nguaisei a Dios a mla msang a klisiich el mo olekiis er a rulekoad. A uchei e ngulekisii a kekerei el ngalek el redil er a lemad, e ulekisii a kekerei el chad er a osisiu el sils er a lemad. (Lk. 7:11-15; 8:49-55) Engdi ngika ngsebechel lokisii a chad el mla mad el eua el klebesei me a bedengel a mla mo chiekl?

13. Ngua losaod a Johanes 11:32-35, ngmilekera Jesus er a lesa Maria me a rebebil el lmangel? (Dirrek el momes er a siasing.)

¹³ Monguiu er a Johanes 11:32-35. Kam imagine er a ongingil tekoi el dilubech. A Maria el ta er a ochedal a Lasarus a mlora Jesus. Ngmelekoi a osisiu el tekoi el ledilu chudelel: “Rubak, chomko ke mlar tiang e ng dimlak le mad ochedak!” Ngii me a rubengkel a kmal mle mekngit a rengrir. A Jesus omes e orrenges er tir el lmangel me ngkmal mocha mekngit a rengul. Ngii el kmal mle chubteterir a resechelil a uchul me nglilangel. Ngmedengelii a ringelel sel lemad a betik er a rengud. Ngulterekokl el kmal soal choridii a uchul a kngtil a rengrir!

14. Ngera sebeched el suubii el kirel a Jehovah er a omerellel a Jesus el kirel a Maria el lmangel?

¹⁴ A omerellel a Jesus el kirel a Maria el lmangel osisecheklid el kmo a Jehovah a Dios er a klechubechub. Ngera uchul me ngsebeched el melekoi el uaisei? Ngua desilubii er a uleak uchei el suobel, a Jesus a cherrungel lochotel a uldesuel me a rengul a Jehovah. (Jn. 12:45) Me sel donguiu el kirel a Jesus el kmal mlo chubteterir a resechelil el ngar er a klengiterreng me nglilangel, e ngsebeched el melekoi el kmo ngdirrek el kmal subechii a rengul a Jehovah sel lomes er kid el lmangel er a klengiterreng. (Psa. 56:8) Tiang ngdiak lerellau el mo soam el lmuut el mo kmeed er a chubechub el Dios er kid?

15. Ngua losaod a Johanes 11:41-44, ngngera dilubech er a debellel a Lasarus? (Dirrek el momes er a siasing.)

¹⁵ Monguiu er a Johanes 11:41-44. A Jesus a mocha er a debellel a Lasarus e olengit er tir me lenguu a bad el choridii. A Martha olekebai er ngii e melekoi el kmo a bedengel a mla mo er ngii a bul. A Jesus a dula er ngii el kmo: “Ng dimlak kdu er kau el kmo cho moumera e ke mo mesa klebkellel a Dios?” (Jn. 11:39, 40) Me a Jesus a mocha dmangesbab e klou  a ngerel meluluuch. Ngsoal msa Jehovah rokui el odanges el kirel a tekoi el mocha duubech. Me ngmocha klou a ngerel el melekoi el kmo: “Lasarus, be mtobed!” Me a Lasarus a mirrael el tobed er a debull! A Jesus a rirellii a tekoi el dimlak a chad lomdasu el kmo ngsebechel el mo tekoi.​—Momes er a study note er a John 11:17.

16. Ngmekera cheldecheduch el debetik er ngii er a 11 el bliongel er a Johanes e smisichii a klaumerang er kid er a omelatk er okiis?

¹⁶ A cheldecheduch el debetik er ngii er a 11 el bliongel er a Johanes a smisichii a klaumerang er kid er a omelatk er okiis. Ngoeak a ngera el rolel? Molatk er a telbilel a Jesus el mora Martha: “A ochedam a lmuut el mo chad.” (Jn. 11:23) A Jesus a di ua Demal el ngar ngii a urungulel me a klisichel el mo otutii tia el telbiil. A lengelel ochotii el kmo ngngar ngii a mesisiich el urungulel el mo torebengii a kodall me a klengiterreng lobengkel. Me a dirrek el sel taem el Lasarus a mirrael el tuobed er a debull ochotii el kmo a Jesus a ngar ngii a klisichel lolekiis er a rulekoad. E mdirrek el melatk a tekingel a Jesus el mora Martha: “Ng dimlak kdu er kau el kmo cho moumera e ke mo mesa klebkellel a Dios?” (Jn. 11:40) Me ngngar ngii a ungil luchul me kede oumerang el kmo a telbilel a Dios el kirel a okiis a mo tmaut. Engdi ngera sebeched el meruul me lluut el mo mera el tekoi er a rengud tia el omelatk?

17. Ngera ungil dolatk er ngii sel donguiu a cheldecheduch er a Biblia el kirel okiis?

¹⁷ Monguiu okiis el mla er ngii er a ngar er a mong e molebedebek el kirel. A Biblia mesaod eai el okisir a rechad el liluut el me ngar er tia el chutem. c Kau ngsebechem el mengoit a taem el merriter a derta er aika el cheldecheduch? Sel moruul er tiang e lak mobes el kmo tirka mle mera el chad, el sechal, redil, me a rengalek. Mosiik a suobel el sebechem el suub er ngii. Molatk a rolel a derta er ngii a ochotii a urungulel me a klisichel a Jehovah el mo olluut  a klengar er a rulekoad. A ngaruchei er ngii e morriter er sel kot el klou a ultutelel el okiis, el ngii okisel a Jesus. Lak mobes el kmo a te betok el dart el chad a milsa okisel, e meskid a mesisiich el uchetemel a klaumerang er kid.​—1 Ko. 15:3-6, 20-22.

18. Ngmekera sebechem el mo ungil lousbech aike el chelitekled el kirel okiis? (Dirrek el momes er a footnote.)

¹⁸ Bo mungil lousbech aike el “chelitakl er a reng” el mesaod er omelatk er okiis. d (Efe. 5:19, BT) Aika el chelitakl a rullii okiis el mo mera el tekoi er a rengud, e smisichii a klaumerang er kid er tia el omelatk. Morrenges aika el chelitakl em practice el mengitakl e mosaod a belkul a tekoi er a chelsel er a temel omengull el telungalek er kemiu. Memorize a tekoi er a chelsel e msichedekl er a rengmiu me a uldesuiu. Me sel bo mchebangel a omelsemai el sebechel mo uchul a klengar er kau me a lechub ngkodellel a betik er a rengum, e a chedaol reng er a Jehovah mo ngosukau el dobedebek aika el chelitakl e ngmai ongelaod me a omelisiich er ngii.

19. Ngera kede mo melatk el kirel sel dolatk er okiis? ( Momes er a baks el “Ngera Ke Mo Oker er Tir?”)

¹⁹ Mousbech er a imagination er kau. A Jehovah mla meskid a duch er kid el sebeched lomes er kid el ngar er a beches el beluulechad. A ta el odos a melekoi el kmo: “Ak mla mengoit er a klou el taem el imagine er ngak el ngar er a beches el blekeradel me ngua el sebechek el tmungel a bara el lomung er a Baradis.” Imagine er kau el meet er a reblak a rengrir el sechal me a redil er a taem er a Biblia. Ngtecha omomes el beduluchei el mo meet er ngii? Ngera el ker obo moker er ngii? Dirrek el molebedebek er kau el lmuut el mo obengterir a rebetik er a rengum el mla mad. Molatk aike el kot el tekoi el bo mdung, kau lomechull er tir, me a deurreng el bo momelechesiu er ngii.

20. Ngera kired el rullii er a rengud el mo meruul er ngii?

²⁰ Kede mera el oba omereng el saul el mora Jehovah el kirel a telbiil er okiis! Ngmera el sebechel mo ulterekokl a rengud el kmo tia el telbiil a mo klemerang, e le ngurungulel a Jehovah e dirrek el ngar ngii a klisichel el mo kutmeklii. Mada derellii er a rengud el mo melemolem el melisiich er a klaumerang er kid er tia el mekreos el omelatk. Sel doruul el uaisei, e kede lmuut el mo kmeed er a Dios el ngii a tibir el mora derta er kid el kmo, ‘A betik er a rengum a lmuut el mo chad!’