1. Ngera ngulterekokl a rengud er ngii?

 KID el chedal a Jehovah medengei el kmo ngbetik a rengul er kid e soal a lebo lekot lungil a klengar er kid. (Rom 8:35-39) Ngdirrek el ulterekokl a rengud el kmo ngmo uchul a klungioled sel doltaut omellach er a Biblia. (Isa. 48:17, 18) Engdi kede mo mekerang a lsekum e kede chobangel a blekeradel el dimlak dodengei el kmo ngmo uaisei?

2. Ngera el mondai a locha bo dechebangel, e aikang ngsebechel rullid el mo melatk a ngerang?

² A rokui el mesiungel a Jehovah mo chobangel a mondai. El ua tiang, a rechedal a telungalek er kid a locha mo kingtir a rengud. Nglocha ngar ngii a meringel el secherel a bedenged el olekebai er kid me ngdiak el sebeched el meruul a betok el ngar er a omesiunged. Kede locha mo chobengelii a ringelel a telemellel a beluu. Me a lechub e kede modechelakl el kirel a klaumerang er kid. Sel bo dechebangel chouaika el blekeradel e kede locha mo melatk: ‘Ngera uchul me tia duubech el mei er ngak? Ngar ngii a mekngit el bla krellii? Tiang ngbelkul a kmo a Jehovah diak lomekngeltengat er ngak?’ Ngmla ta el bo momdasu el uaisei? A leuaisei, e lak bo lemechitechut a rengum. Rebetok el blak a rengrir el mesiungel a Jehovah me te mlo omelechesiu el uaisei.​—Psa. 22:1, 2; Hab. 1:2, 3.

3. Ngera sebeched el suub er a Psalm 34:19?

³ Monguiu er a Psalm 34:19. Molatk eru el meklou a ultutelel el tekoi er tia el psalm: (1) Rungil el chad a mo chobangel a mondai. (2) Jehovah olsobel er kid er ngii. Ngmekera lolsobel er kid a Jehovah? A ta er ngii a ngolengeseu er kid el mo  oba melemalt el uldasu el kirel a klengar er tia el beluulechad. Alta ngtibir el kmo kede metik a deurreng sel dosiou er ngii, me nguaisei engdi tia diak lebelkul a kmo ngdiak bo dechebangel a mondai. (Isa. 66:14) Ngmelisiich er kid el mo omes el bedul a ngar medad, el sel taem el bo denguu sel klengar el soal a doldeu a rengud er ngii el mo cherechar. (2 Ko. 4:16-18) Engdi chelechang e ngolengeseu er kid el melemolem el mesiou er ngii er a bek el sils.​—Kle. 3:22-24.

4. Ngera kede mo mesaod er tia el suobel?

⁴ Me dosaod aike el desuub er a reblak a rengrir el mengull er a Jehovah er a taem er a Biblia me chelecha el taem. Ngua bo desang, a rebetok er tir a mlo chobangel a mondai el dimlak lodengei el kmo ngmo uaisei. Engdi sel dultuil er a Jehovah e ngkmal diak lokor el mo ngosukid. (Psa. 55:22) Sel dosaod aika el kerebai e di lekau el oker: ‘Ngak ak mo mekerang omko kchelebangel er a osisiu el blekeradel? Ngmekera ika el kerebai e smisichii a klaumerang er ngak er a Jehovah? Ngmekera kultaut aika el suobel er a chelsel a klengar er ngak?’

5. Ngera el omelsemai a blo lechebangel a Jakob el Laban a uchul? (Momes er a siasing er a medal tia el babier.)

⁵ A remesiungel a Jehovah er a taem er a Biblia chilebangel omelsemai el dimlak lodengei el kmo ngmo uaisei. Molatk er a Jakob. A demal a dilu er ngii me bo lenguu a bechil er a rengelekel a Laban el chederir el milsiou er a Dios, e ulelterekokl er a rengul el kmo a Jehovah mo omekngeltengat er ngii. (Gen. 28:1-4) Me a Jakob a rirellii a melemalt el tekoi. Ngtilobed er a Kanaan e mirrael el mora blil a Laban el mle terung a ngelekel redil el Lea me a Rahel. A Jakob a kmal mle soal ngike el kekerei el ngelekel a Laban er a Rahel, e kilengei loureor el euid el rak el mo bechil. (Gen. 29:18) Engdi ngdimlak lebo leuaisei. Laban chilebeldir me ngmlo bechil a klou el ngelekel redil el Lea. Ngkilengei er a Jakob el mo bechil a Rahel er a ta el sandei er uriul a lsekum e nglmuut loureor el kirel el euid el rak. (Gen. 29:25-27) Laban a dimlak el melemalt a rolel a lousiobai lobengkel a Jakob. Ngmle 20 el rak el Laban a dimlak lemelemalt omerellel el mora Jakob!​​—Gen. 31:41, 42.

6. Ngera el lmuut el bebil er a mondai a mle kirel a Jakob loutekangel?

⁶ A Jakob a dirrek luluutekangel a lmuut el bebil er a mondai. Ngika mle klou a telungalek er ngii, engdi a rengelekel a dimlak leblechoel lungil a delongelir. Te ulterur ochellir er a Josef el mo sibai. A reteru er a rengelekel el Simeon me a Levi a ngilai otuub el mora telungalek er ngii me a ngklel a Jehovah. Me a lmuut kung, a betik er a rengul el Rahel a mlad er a lomechell er a ongeru el ngelekir. Me a dirrek el meringel bosech er a kall a uchul me ngmle kirel melukl el mora Ekipten er a cheluodel er ngii.​—Gen. 34:30; 35:16-19; 37:28; 45:9-11, 28.

7. Ngmilekera Jehovah ochotii er a Jakob el kmo ngoba kengei er ngii?

⁷ Alta Jakob a mlo chobangel aikang engdi ngdimlak a ta loridii a klaumerang er ngii er a Jehovah me a telbilel. Me a Jehovah ulechotii er a Jakob el kmo ngoba kengei er ngii. El ua tiang, alta Laban a di ulumulak er ngii, a Jehovah ulemekngeltengat er ngii e milsa betok el kloklel. E molatk er a klou el omereng el saul luleba Jakob er a lluut el mesa ngelekel er a Josef, lulemdasu el kmo ngmlad er a betok el rak er uchei! Kmes el deleuill er ngii me a Jehovah a uchul me ngmle sebechel loutekangel a mondai er ngii. (Gen. 30:43; 32:9, 10; 46:28-30) Sel lolemolem el ngar ngii a  mesisiich el deleuill er kid me a Jehovah, e ngdirrek el sebeched loutekangel a mondai el dimlak dodengei el kmo ngmo uaisei.

8. Ngera ngmle soal el meruul er ngii a King David?

⁸ King David a dimlak el sebechel remuul aike el rokui el mle soal el ngar omesiungel el mora Jehovah. El ua tiang, ngkmal mle soal lomekedechor er a templo er a Dios er ngii. Me nguluuchais er a profet Nathan. Me a Nathan a dilu er ngii el kmo: “Di bor a ikel momdasu, le Dios a obengkem.” (1 Kr. 17:1, 2) Aika el tekoi a locha kmal millisiich er a rengul a David. Nglocha kmal di mle mereched el mo mellib a rolel a bo loruul er tia el kmal klou el ureor.

9. Ngmilekera David er a lengai a diak lungil chais?

⁹ Engdi ngdi mle telkib e a profet er a Jehovah liluut el mo mesang lolab a diak lungil chais: “Ngdi sel kesus” a Jehovah dilu er a Nathan el kmo ngdiak el David a mo omekedechor er a templo e ngbai ta er a rengelekel a mo omekedechor er ngii. (1 Kr. 17:3, 4, 11, 12) Me ngmilekera David? Ngildechii a turrekong er ngii. Ngmlo blak a rengul el mengudel a udoud me a klekedall lousbech a ngelekel er a Salomon el meruul er tia el ureor.​—1 Kr. 29:1-5.

10. Ngmilekera Jehovah omekngeltengat er a David?

¹⁰ Uriul er a ledu er a David el kmo ngdiak el bo lomekedechor er a templo e a Jehovah rirellii a telbiil lobengkel. Jehovah tilbir el mora David el kmo a ta er a ruldidellel a rsechel a mo mengedereder el mo cherechar. (2 Sa. 7:16) Ka molatk er a deuil a rengul a David er a beches el blekeradel sel bo lodengei el kmo ngoldeu a rengul er a klengar el mo cherechar er cheungel a Ta el Telael el Rak er Omengederederel a Jesus, el King el ta er a ruldidellel a rsechel! Tia el cheldecheduch a ngosukid el mo mesa el kmo mo lmuut me a lak deruul aike el rokui el soad el meruul el mora Jehovah, a Dios er kid a locha ngar ngii a lmuut el bebil er a klengeltengat el bo lomeskid el dimlak a ta el dolatk el kmo ngmo uaisei.

11. Te milekera rekot el Kristiano e mukngeltengat alta Renged a dimlak lemei er sel lulemdasu er ngii? (Rellir 6:7)

¹¹ A rekot el Kristiano me te dirrek el mlo chobangel omelsemai el dimlak lomdasu el kmo ngmo uaisei. El ua tiang, te kmal ulemes el beduluchei el kirel a Rengedel a Dios, engdi te dimlak lodengei el kmo ngmei er oingerang. (Rel. 1:6, 7) Me te milekerang? Te millemolem el mechesang er a ureor er a berkel a klumech. E sera loberk a klumech e te milsa el kmo a Jehovah omekngeltengat er tir.​—Monguiu er a Rellir 6:7.

12. Te milekera rekot el Kristiano er a lebo er ngii a bosech er a kall?

¹² A ta el taem e a meringel el bosech a mlo er ngii er a “beluulchad el rokir.” (Rel. 11:28) Tia dirrek el ngar ngii a lerirellii el mora rekot el Kristiano. Molatk er a lerirellii el mo er tir a meringel el bosech er a kall. A rebdelul a telungalek a ulterekokl el mle bekikl el kmo ngmekera lomeka er a telungalek er tir. E kuk mekera rengeasek el mle sorir el menglou er a omesiungir? Te mlo melatk el kmo ngungil longiil el mo merek a bosech er a kall? Me alta ngmle kakerous a blekeradel el ngar ngii engdi te millodech a klengar er tir el mo oltirakl a blekeradel. Te millemolem lomerk el ngar er aike el sebechir, e mle dmeu a rengrir el merous aike el ngar ngii er tir el mora rudam me a rudos el ngar e a Judea.​​—Rel. 11:29, 30.

13. Ngera el klengeltengat a lengilai a Rekristiano er a temel a bosech?

¹³ Ngera el klengeltengat a lengilai er a temel a bosech? Tirka el ngilai a ngeso a milsa el kmo a Jehovah olengeseu er tir. (Mt. 6:31- 33) Te ulemelechesiu er tir el liluut el mo kmeed er a rudam me a rudos er tir el ullengeseu er tir. E tirke el millenget me a lechub e te mirrous aike el ngar ngii a mlo melechesuar a deurreng el mei sel dorous. (Rel. 20:35) Jehovah ulemekngeltengat er tir el rokui el millodech a klengar er tir el mo oltirakl er a blekeradel el lemla er ngii.

14. Ngera dilubech el mora Barnabas me a apostol Paulus, e ngera mlo rsel? (Rellir 14:21, 22)

¹⁴ Rekot el Kristiano mle blechoel el modechelakl. A lebebil e te dimlak lomdasu el kmo a blekeradel a mo uaisei. Molatk er a tekoi el dilubech el mora Barnabas me a apostol Paulus er a lomerk er a klumech er a Listra. A uchelel a rechad uluuetkeu er tir e ulerrenges er tir. Engdi uriul e a rumtok a “milengesuseu er a seked” me a rebebil er tirka el osisiu el chad a miltechii a Paulus e milecherei me ngmad. (Rel. 14:19) Engdi Barnabas me a Paulus a millemolem el omerk er a klumech er a kuk ta er a basio. Ngera mlo rsel? A re “betok el chad a mlo chedal a Jesus,” me a kerebai er tir me a tekingir a millisiich er a rudam me a rudos er tir. (Monguiu er a Rellir 14:21, 22.) A rebetok a ngilai a klungiolir e le Barnabas me a Paulus a dimlak el meterob alta te mlo chobangel a odechelakl. Me a Jehovah mo omekngeltengat er kid a lsekum e ngdiak demeterob el meruul er a ureor el bla lebeskid.

15. Ngera ke suubii er a odam el A. H. Macmillan?

¹⁵ Ngar er aike el rak er a uchei er a 1914 e a rechedal a Jehovah ulemdasu el kmo a meklou el tekoi a di kmedung ngmo duubech. El ua tiang, molatk er a odam el A. H. Macmillan. A odam Macmillan a di ua rebetok er a taem er ngii el ulemdasu el kmo ngdi kmedung e te mora eanged. Ngar er a cheldecheduch lultebedii er a September 1914 e ngdilu el kmo: “Tia locha mo sel ulebongel el cheldecheduch el mora buai el bo kultobed er ngii.” Engdi ngdimlak el uaisei. Odam el Macmillan a uriul e ngmilluches el kmo: “A rebebil er kid ulemdasu el kmo kede di mereched el mora eanged.” Ngdilechelir el kmo: “A tekoi el kired el meruul er ngii er chelechang a mo mechesang el meruul er a urerel a Rubak.” A odam el Macmillan a mera el mle mechesang. Ngkmal mle blak a rengul lomerk er a klumech. Ngmla er ngii ileakl el techellel el melisiich er a rudam el mle kelebus le te dimlak el kengei el mo omekbitang. E mle blak a rengul el ngar er a miting er a cheluodel er ngii. Ngmilekera odam el Macmillan e ngmai a klungiolel er a lolemolem el mechesang el mesiou er a Jehovah e mengiil er a ngkedel? Kedeb el taem er uchei er a kodellel er a 1966 e ngmilluches el kmo: “A klaumerang er ngak a lmuut el mesisiich er chelechang.” Ngmera el ungil kerebai el kired, tokubets a lsekum kede outekangel lengelakl er sel dulemdasu er ngii!​​—Heb. 13:7.

16. Ngera el tekoi a blo lechebengelii a Herbert Jennings me a bechil? (Jakobus 4:14)

¹⁶ A rebetok el chedal a Jehovah er chelechang outekangel a secher el dimlak lomdasu el kmo ngmo uaisei. El ua tiang, ngar er a chisel a klengar er a odam el Herbert Jennings b e ngmesaod el kmo ngii me a bechil a kmal mle sorir a assignment er tir el missionari er a Ghana. Engdi ngika mlo smecher er a oberaod el rakt el ngar ngii a lerirellii er a uldesuel. Ngmillekoi a tekoi el ngar er a Jakobus 4:14 e mesaod er tia el beches el blekeradel el kmo, “ng ‘klukuk’ el dimlak ki modengei el kmo ngmo uaisei.” (Monguiu.) Ngmeluches el kmo: “Ngmle kiram el choitii a Ghana me a rekmeed el sechelimam e lmuut el mora  Canada el kirel a ukeruul.” Alta te mle chelebangel er tia el omelsemai, a Jehovah ngilsuir odam el Jennings me a bechil el melemolem el mesiou er ngii.

17. Ngmilekera kerebai er a odam el Jennings e melisiich er a rudam me a rudos?

¹⁷ Odam el Jennings el di mle bleketakl louchais a tekoi el dilubech er a klengar er ngii a kmal ngilsuterir a rebebil. Ta el odos a milluches el kmo: “Ngkmal rirtechii a renguk er ak chiuii tiang. . . . Sel kunguiu el kirel a odam el Jennings el chilitii a assignment el mo omekerreu er a secherel, e ngngilsukak el mo oba tabesul el uldasu el kirel a blekeradel el kngar ngii.” Ngdi osisiu, a ta el odam a milluches el kmo: “Uriul er a kusiou el ta er a remechuodel el teruich el rak, e ngmle kirek el stob le ngmlo er ngii a secherel a uldesuek. Ak kmal mlo omdasu el kmo ngdimlak el sebechek el kutmeklii a ngerechelek e kmal mlo depressed el diak el sebechek el menguiu a chisir a klengar er a rechad. . . . Engdi blakerreng er a odam el Jennings a kmal millisiich er ngak.” Tia omeklatk er kid el kmo mo lmuut me sel dechebangel a blekeradel el dimlak domdasu el kmo ngmo uaisei, me kid a sebeched el dirk melisiich er a rebebil. Mo lmuut me a lsekum a klengar er kid a dimlak bo leuai sel domdasu er ngii, me kid a dirk sebeched el mo kerebai er a klaumerang me a ducherreng.​—1 Pe. 5:9.

18. Ngua desa er a siasing, ngera ke suubii er a melakl el dil er a Nigeria?

¹⁸ Mo lmuut a tellemall el ua COVID-19 pandemic me ngklou a bla lerellii el mora rebetok er a rechedal a Jehovah. El ua tiang, a ta el melakl el dil er a Nigeria mlo mekesai aike el lousbech. A ta el tutau e a ngelekel redil a uleker er ngii el kmo ngera te mo mengang sel lekelii a kelir el beras. Odos er kid a dilu er a ngelekel el kmo ngdiak a ududir me a kelir engdi ngungil loukerebai er a melakl el dil er a Sarefath el rirellii sel uriul el blengrir e mlo mui el ulsirs er a Jehovah. (1 Ki. 17:8-16) Uchei er a lolatk el kmo ngngera mo kelir er a  sueleb, e te ngiluu a ngeso er a rekldemir er a klemerang. Tia el ngeso a mle kall el kirel a betok er a eru el sandei. Ngika lodos a melekoi el kmo ngkmal dimlak lodengei el kmo a Jehovah mle kerekikl lorrenges aike el lullekoi er a ngelekel. Nguaisei, sel demui lulsirs er a Jehovah, aike el mondai el dimlak dodengei el kmo ngmo uaisei a bai mo olekeed er kid er ngii.​​—1 Pe. 5:6, 7.

19. Ngera el odechelakl a bla loutekangel a odam el Yershov?

¹⁹ Ngar er aika el mereko el rak e a rudam me a rudos a mla outekangel odechelakl el dimlak lomdasu el kmo ngmo uaisei. Molatk er a odam el Aleksey Yershov el kiei er a Russia. A rechedal a Jehovah a ulemelechesiu er a ilmokl er sel taem er a lemetecholb a odam Yershov er a 1994. Engdi ngmlengodech a blekeradel er a Russia. Sera 2020 te tiluu er a blil odam e search er ngii e ngilai a betok el kloklel. Sesei el buil er uriul e a kabelment ultelecheklii el kmo ngtilemellii a llach. Aika el ultelecheklir a mengai er a video el lullai er ngii a chad el mla mo ta el rak lomulak el kmo ngsoal mesuub a Biblia. Tia mera el mekngit el omeruul!

20. Ngmekera odam el Yershov e mla smisichii a deleuill er ngii me a Jehovah?

²⁰ Ngar ngii a ungil el mla tobed er a odechelakl el mora odam el Yershov? Chochoi. A deleuill er ngii me a Jehovah a kmal mla mo mesisiich. Ngmelekoi el kmo: “Ngak me a bechik a mla mo betok aike el taem el ki mdak el meluluuch. Ak mlo mtebengii el kmo ngkmal di sebechek loutekangel er tia el blekeradel loeak a ngelsuil a Jehovah.” Ngmelemolem el melekoi el kmo: “Omesubek el di ngak el tang a ngosukak me ngdiak bo lemechitechut a renguk. Ak melebedebek a kerebai er a reblak a rengrir el chad er a ngar er a mong. Aika el cheldecheduch er a Biblia ochotii el kmo ngkmal klou a ultutelel a di dechelellakl e doumera el ulsirs er a Jehovah.”

21. Ngera kede mla suub er tia el suobel?

²¹ Ngera ke mla suubii er tia el suobel? Ngkmal diak lulterekokl a klengar er tia el beluulechad. Me nguaisei a Jehovah olengeseu er a rechedal sel lulsirs er ngii. Ngua losaod a bades el lemlengai er ngii tia el suobel, “a ungil chad a chuarm er a betok el chelebuul, e ngdi RUBAK osebelii er ngii el rokui.” (Psa. 34:19) Mada lak lulturk osenged er a ringel el dechelebangel, e ngbai klisichel a Jehovah lolsobel. Seikid e ngsebeched el melekoi el ua apostol Paulus el kmo: “Ngar ngii a klisichek el remuul aike el rokui el mei er ngak el okiu a klisiich el lomeskak a Jehovah.”​—Fil. 4:13, NW.