1. Ngera uchul me kede onger er a miting?

 NGERA uchul me kede mora miting er a blil ongdibel? Sel kot el ngarbab el luchul, a oldanges er a Jehovah. (Psa. 26:12; 111:1) Kede dirrek el mora miting me bo lsebeched el kasisiich er a chelsel chelecha el meringel taem. (1 Th. 5:11) Sel doldars chimad e donger, e kede meruul aika el teblo el tekoi.

2. Ngera el techall el mo onger er a miting a dolab?

² Ngngar ngii a techelled el mo onger er a miting er a bek el sandei. El ua tiang, sel weekend e ngngar ngii a techelled el mo teloi er a omesubel Ongkerongel. E ngar sel Miting el Kirel a Klengar me a Omesiunged e ngngar ngii a techelled el longer er a Morriter er a Tekingel a Dios, Omesubel a Biblia el Ongdibel, me a lmuut el bebil er a part.

3. Ngera el omelsemai a locha bo dechebangel, e mekera Hebru 10:24, 25 e ngosukid?

³ Kede rokui el soad loldanges er a Jehovah e melisiich er a rekldemed. Engdi sel donger e kede locha mo chobangel omelsemai. Ngmo ouedikel a rengud, me a lechub e ngkmal soad longer engdi ngdiak leblechoel loleker er a ngkled. Ngera sebechel ngosukid? A babilengel a Paulus el mora rechad er a Hebru ngosukid. Sera losaod el kirel a klungel a ultutelel a bo dekldibel e ngdilu el kmo bo lulturk osengem  er a “kasisiich.” (Monguiu er a Hebru 10:24, 25.) Sel bo dolatk el kmo a rechad el lorrenges er kid a sebechir el ngmai a omelisiich mo lmuut me a di lekedeb a nger er kid el mesaod er a klaumerang er kid, e ngmo ungil a uldesued el kirel onger. A lsekum e ngdiak leblechoel loleker er a ngkled, e ngsebechel mo dmeu a rengud sel dodengei el kmo a rebebil er a ongdibel a ngar ngii a techellir el onger.​—1 Pe. 3:8.

4. Ngera el edei el tekoi a bo dosaod er tia el suobel?

⁴ Ngar tia el suobel e a kot e kede mesaod er a rolel e ngsebeched el kasisiich er a kekerei el ongdibel el di mekesai a rechad el onger. A uriul e kede mo mesaod er a rolel e ngsebeched el kasisiich er a klou el ongdibel el betok a rechad loldars chimorir longer. E a ulebongel e kede mo mesaod a rolel e a tekoi el dolekoi a mera el mo uchul omelisiich el mora rebebil.

5. Ngmekera sebeched el melisiich er a rechad a lsekum kede di mekesai?

⁵ Ngar er a kekerei el ongdibel me a lechub e ng group er omelekoi, e ngdiak lebetok a rechad el sebechel a conductor el loleker er tir. A lebebil e nglocha kirel mengiil er a rechad el kemanget el taem el mo oldars. A miting a locha mo boring e tia kmal diak lolisiich. Ngera sebechem el meruul er ngii? Mblechoel loldars. Omoruul el uaisei, e ke mo melisiich er a rechad el mo teloi er omesuub.

6-7. Nglocha ngera sebechel ngosukid me ngdiak el sal louedikel a rengud el onger?

⁶ Engdi ngmekerang a lsekum e ngkmal louedikel a rengum el mo onger? A rebetok omelechesiu el uaisei. Engdi a lsoam el mo uchul omelisiich el mora rudam me a rudos er kau e mosiik a rolel e ngsebechem el cholleklii a rengum me lsebechem longer. Ngmekera omoruul er tiang?

⁷ Nglocha mo ngosukau sel momes a bebil ngeso er a uldasu el mla tobed er a A Ongkerongel. b El ua tiang, bo mungil el prepare. (Osi. 21:5) Sel bo mungil medengelii a suobel e ngmo beot er kau a oldars chimam el onger. Ngdirrek el di lekedeb a nger er kau. (Osi. 15:23; 17:27) Kedeb el nger a rullii me ngdiak el sal mo ouedikel a rengum. A kedeb el nger, el ngii a locha di one me a lechub e ng two el sentence, a locha beot er a rudam me a rudos er kau el mo medengelii er a bai kemanget el nger el mesaod a betok el tekoi. Sel di lekedeb a nger er kau lousbech a tekingem, e kochotii el kmo ke mle ungil prepare me kau a ungil medengelii a suobel.

8. Ngua ngerang a osengel a Jehovah el kirel sel debsang aike el sebeched?

⁸ Engdi ngmekera a lsekum ke mla melasem aika el ngeso er a uldasu engdi ngdirk ouedikel a rengum el onger el betok el taem? Bo lulterekokl a rengum el kmo a Jehovah oba omereng el saul el kirel a blakerreng er kau el meruul aike el sebechem. (Lk. 21:1-4) A debsa Jehovah sel kot lungil er kid e ngdiak bo doruul lengelakl er sel sebeched. (Fil. 4:5) Morriter aike el sebechem el meruul, mrellii a turrekong er kau el kirel, e moluluuch lolengit er a chelellakl el reng. A uchelel e a turrekong er kau a locha di tang el monger.

9. Ngera el omelsemai a duubech er a chelsel a meklou el ongdibel?

⁹ A lsekum ongdibel er kau a betok a rechad er ngii, e nglocha mo er ngii a kuk ta er  a omelsemai. Te locha betok el odam me a odos oldars chimorir me ngdiak leblechoel loleker er a ngklem. El ua tiang, a Danielle a kmal soal longer er a miting. c Ngomes er ngii el telengtengil omengull er ngii, rolel e ngsebechel melisiich er a rebebil, e dualem a klemerang er a Biblia er a uldesuel. Engdi sera lolukl el mora klou el ongdibel, e te dimlak leblechoel loleker er a ngklel, a lebebil e ngdiak a ta el longer er a miting. Ngmelekoi el kmo, “Ngdimlak lungil a renguk. Ak mle feel el kmo ak mla oridii a ileakl el techall. E sel bo lebetok el taem el uaisei, e ke mo melatk el kmo ngdiak el sorir loleker er kau.”

10. Ngmekera donglou er a techelled el mo onger er a miting?

¹⁰ Kau, ke di ua uldesuel a Danielle? A leuaisei e nglocha soam el give up e di orrenges er a temel a miting. Engdi lak meterob el melasem el onger. Ngera sebechem el meruul er ngii? Nglocha ngosukau sel mketmokl a betok el nger er kau el kirel a derta el miting. Me a lsekum ngdiak lokerau er a uchelel a suobel e ngbetok a techall el sebechem loldars. Sel mongetmokl er kau el kirel omesubel a Ongkerongel, e molatk er a rolel a derta el parakurab ulekuak er a dai er a suobel. Omoruul el uaisei e ngmo betok a techall el sebechem longer er a temel a omesubel a suobel el rokir. Me a lmuut kung, ngsebechem el prepare a nger er kau er aike el parakurab el mesaod a dmolech el klemerang er a Biblia el meringel a dosaod. (1 Ko. 2:10) E ngerang? E le nglocha mo mekesai a chim loldars er ngii. Engdi ngmekerang a lsekum ke meruul aika el rokui, engdi dimlak lokerir a ngklem er aike el mlo merek el miting? Ngsebechem el mengedecheduch er a conductor er a uchei er a miting e ouchais er ngii er a ker el soam el mo onger er ngii.

11. A Filipi 2:4 ngmelisiich er kid el mo mekerang?

¹¹ Monguiu er a Filipi 2:4. A apostol Paulus a mlukreng el mo melisiich er a Rekristiano me bo lomes aike el mo uchul a klungiolir a rebebil. Ngmekera doltaut er tia el omellach er a temel a miting? Ngoeak sel lak dobes el kmo rechad er a ongdibel a di uaikid el sorir el teloi er a miting.

12. Ngera ungil rolel e kede melisiich er a rebebil sel dengar er a miting? (Dirrek el momes er a siasing.)

 ¹² Molatk er tiang. Sel mongedecheduch er a resechelim, ke di mengedecheduch me ngdiak a techellir el mengedecheduch? Ngkmal diak! Ngsoam a le dirrek el teloi er a cheldecheduch. Ngdi osisiu, sel dengar er a miting e ngsoad el mesterir a techellir a rechad el mo onger. E a ta er a kot lungil el rolel e ngsebeched el melisiich er a rudam me a rudos er kid a debesterir a techellir el mo ouchais er a klaumerang er tir. (1 Ko. 10:24) Me dosaod er a rolel e ngsebeched el meruul er tiang.

13. Ngmekera debesterir a rebetok a techall el mo onger?

¹³ A ta er ngii a sebeched el remuul a nger er kid el mo kedeb, e mesterir a techellir a rebebil el mo onger. A remechuodel me a remla mukeroul el publisher a sebechir el kutmeklii tia el kerebai. Mo lmuut me a di lekedeb a nger er kau, lak mosaod a betok el tekoi. A lsekum ke dmu rokui el tekoi er a parakurab, e ngdiak el sebechir a rebebil el onger. El ua tiang, ngar tia el parakurab e ngmeskid a teblo el tekoi, el ngii a remuul a nger er kid el mo kedeb me a diak dosaod a betok el tekoi. A lsekum e ngkau a kot lokerau el mo onger er tia el parakurab, e di mosaod er a ta er ngii.

14. Ngera sebechel ngosukid el moba tabesul el uldasu sel doldars chimad? (Dirrek el momes er a siasing.)

¹⁴ Moba tabesul luldasu sel moldars chimam. A lsekum e ngmo betok el di doldars e kede rullii a conductor el mo feel el kmo ngkirel di oleker er kid alta rebebil a dirkak a techellir longer. Tia sebechel mengitechut er a rebebil me te mo diak loldars.​—Oli. 3:7.

15. (a) Ngkirel mo uangerang a uldesued a lsekum ngdiak lomekedong er kid? (b) Te mekera rudam el conduct e ochotii el kmo te melatk er a rokui el chad? (Momes er a baks el “ A Lsekum e Ngkau a Conduct.”)

¹⁵ A lsekum te betok oldars e ngdiak el  sebeched longer er a bek el taem el doldars a chimad. A lebebil e ngdiak a ta el lomekedong er kid. Tia sebechel tomellii a rengud engdi ngdiak el kirel mo chetid sel lak loleker er kid.​​—Oli. 7:9.

16. Ngmekera dolisiich er a rechad longer?

¹⁶ A lsekum ngdiak el sebechem longer el betok el taem, e kau ngsebechem el mo ungil lorrenges er a rechad el longer e a uriul er a miting e ke chemat er tir el kirel? A rudam me a rudos a locha lmuut el ngmai a klou el omelisiich er kau el chemat er tir, er aike el nger el mle soam el melekoi. (Osi. 10:21) A dechat er a rebebil a ta er a rolel e ngsebeched el kasisiich.

17. (a) Te mekera ruungalek e sebechir el ngosuterir a rengelekir el kutmokl a nger er tir el chatter er a rekrir? (b) A doltirakl er a video, e ngera el eua el tekoi a doruul el prepare a nger er kid? (Dirrek el momes er a footnote.)

¹⁷ Ngera lmuut el bebil er a rolel e kede kasisiich er a miting er a ongdibel? A lsekum ke oungalek, e mngesuterir a rengelekiu el prepare a nger er tir el chatter er a rekrir. (Mt. 21:16) A lebebil e ngoberaod el tekoi a soadel el ua mondai er a chebechiil me a lechub ngsodel a klikiid el omeruul. Engdi ngblechoel el ngar ngii a tang me a lechub e ngeru el parakurab el sebechel a ngalek el longer er  ngii. Dirrek el msodii el mora rengelekem a uchul me te locha diak bo loleker er tir er a bek el taem loldars. Omsodii el mo er tir e ngsebechel ngosuterir me ngdiak el bo el mekngit a rengrir a lsekum te okerir a kuk ta er a chad.​—1 Ti. 6:18. d

18. Ngmekera diak di dosaod er kid sel donger? (Osisechakl 27:2)

¹⁸ Kid el rokui a sebeched el kutmokl a nger er kid el oldanges er a Jehovah e meleketek er a rudam me a rudos er kid. (Osi. 25:11) Me alta lebebil e kede mo ouchais er a kedeb el experience, engdi ngdiak el soad el mengoit er a klou el taem el mesaod el kired. (Monguiu er a Osisechakl 27:2; 2 Ko. 10:18) E ngbai soad el mesaod el kirel a Jehovah, Tekingel, me a rechedal. (Och. 4:11) Me nguaisei engdi lsekum a ker olengit er kid el mo ouchais a uldesued, e kede meruul el uaisei. A ta er a olechotel tiang a desang er a ongingil parakurab.

19. (a) Ngera duubech sel derokui el melatk er a rechad el ngar er a ongdibel? (Rom 1:11, 12, BT) (b) Ngera om appreciate er ngii er a techall longer er a miting?

¹⁹ Me alta ngdiak a llach lolterekokl er a rolel a donger, engdi ngsoad el kasisiich. Tia sebechel belkul a kmo nglocha mo betok el donger. Me a lechub e ngungil a rengud er aike el techelled longer e dmeu a rengud el rebebil a ngar ngii a techellir el mo onger. Sel bo dolatk aike el mo uchul a klungiolir a rebebil, e kede rokui el sebeched el “kasisiich.”​—Monguiu er a Rom 1:11, 12, BT. e