1. Mosaod a blekeradel er sel kot el taem el Jesus a rirellii a mengasireng el tekoi.

 MOLATK er a lomuchel a omesiungel a Jesus er a ulebengelel a rak er a 29 C.E. A Jesus me a delal er a Maria me a rebebil er a disaiplo er ngii a lulengemedaol er tir el mora merengel a chebechiil er a Kana, el beluu el mlara diluches er a belual a Jesus er a Nasareth. A Maria sechelirir a telungalek er a remo bechiil me ngolengeseu el omekerreu er a rechad el mlei. Engdi ngdilubech a mondai er a temel a merengel a chebechiil el ngii a uchul a klou el rur el mora tirka el mlo bechiil me a telungalek er tir. Ngmlo diak a bilong. b A rechad el mlei a locha mle betok er a lullatk er ngii. Me a Maria mlora ngelekel e dmu el kmo: “Ng mla mo diak a bilong er tir.” (Jn. 2:1-3) Ngmilekera Jesus? Ngrirellii a mengasireng el tekoi. Ngmilult a ralm el mo “sel kot el ungil bilong.”​—Jn. 2:9, 10.

2-3. (a) Ngmilekera Jesus e ousbech er a klisichel? (b) Ngmekera mo uchul a klungioled sel dorriter a mengasireng el tekoi el lurruul a Jesus?

² A Jesus a riruul a lmuut el betok el mengasireng el tekoi er a temel omesiungel. c Nguluusbech er a klisichel el olengeseu er a rebetok el telael el chad. El ua tiang, a teblo er aike el mengasireng el tekoi el lurruul e ngulemeka er a re 5,000 el sechal e a uriul e te kuk mle 4,000 el sechal. A lsekum e kede omechur er a  redil me a rengalek el mla er ngii e tirka locha mle betok er a 27,000 el chad. (Mt. 14:15-21; 15:32-38) Ngar er aika el osisiu el taem e ngdirrek el ulemekungil er a resmecher. (Mt. 14:14; 15:30, 31) Molatk er a uldesuel a seked el lulemekungil e omeka er tir a Jesus. Nglocha kmal mle mechas a rengrir!

³ A mengasireng el tekoi el lurruul a Jesus a meklou a belkul el kired er chelecha el taem. Ngar tia el suobel e kede mo mesaod a bebil tekoi el desuub er aika el mengasireng el tekoi el lurruul el ngii a melisiich er a klaumerang er kid. A uriul e kede mo merriter a rolel e ngsebeched loukerebai er a klengariourreng me a klechubechub lulechotii a Jesus er a loruul aika el mengasireng el tekoi.

4. Mengasireng el tekoi el lurruul a Jesus ngosisecheklid el kirel techang, el melisiich er a klaumerang er kid?

⁴ Aike el mengasireng el tekoi el lurruul a Jesus a diak di losisecheklid a tekoi el melisiich a klaumerang er kid er ngii, e ngdirrek el kirel a Demal. E le Jehovah a Uchul sel klisiich el mirruul aika el mengasireng el tekoi. A Rellir 10:38 a melekoi el kmo: “Dios [a milsang a Jesus a] Chedaol Reng ma klisiich. A Dios a ulebengkel me ng mirrael a bek el beluu el meruul a ungil e omekungil er tirkel rokui el mlar eungel a klisichel a Diabelong.” Lak mobes el kmo aike el rokui el tekoi el ledilung me a lurruul a Jesus luldimukl er aike el mengasireng el tekoi el lurruul, e ngmle cherrungel loukerebai er a uldesuel me a rengul a Demal. (Jn. 14:9) Molatk a edei el tekoi el sebeched el suub er a mengasireng el tekoi el lurruul a Jesus.

5. Ngera uldbechii a Jesus el mo meruul a mengasireng el tekoi? (Mateus 20:30-34)

⁵ A kot, a Jesus me a Demal a kmal betik a rengrir er kid. A Jesus er a lengar tia el chutem e ngulechotii a dmolech el bltkil a rengul el mora rechad er a lousbech er a klisichel el omekbeot a ringelir. (Monguiu er a Mateus 20:30-34.) Mutebengii el kmo Jesus a “mlo chubteterir” me ngulemekungil er tir. Tia el dmolech el klechubechub er ngii el olechotel a bltikerreng, a dirrek el uldbechii el mo omekang er a resongerenger e omekungil er a rechebedes. (Mt. 15:32; Mk. 1:41) Ngkmal sebechel mo ulterekokl a rengud el kmo a Jehovah el Dios el “bekokuii e kmal chubechub” me a Ngelekel, a kmal betik a rengrir er kid e uchul a ringel el mo er tir sel lomes er kid el chuarm. (Lk. 1:78; 1 Pe. 5:7) Ngkmal urungulir el mo choroid a rokui el ringel lomekringel er a rechad!

6. A Dios ngmla msang a Jesus choua ngerang el klisiich?

⁶ Ongerung, a Dios a mla msa Jesus a rokui el klisiich el mo sumechokl a mondai er a rechad. Ngoeak aike el mengasireng el tekoi el lurruul, e a Jesus ulechotii a klisichel el mesmechokl aike el rokui el mondai el diak el sebeched el di kid el sumechokl. El ua tiang, ngngar ngii a klisichel el rullid el mo mimokl er aike el luchul a mondai er a rechad el ngii, a klengit el duldiukes er ngii el uchul a secher me a kodall. (Mt. 9:1-6; Rom 5:12, 18, 19) A mengasireng el tekoi el lurruul ochotii el kmo ngsebechel omekungil a “bek el bedengel” a secher e olekiis er a rulekoad. (Mt. 4:23; Jn. 11:43, 44) Ngdirrek el ngar ngii a klisichel el chollakl a mesisiich el eolt e rulleterir a rechad el mo mimokl er a remekngit el chelid. (Mk. 4:37-39; Lk. 8:2) Ngmera el olterekokl a rengud sel dodengei el kmo a Jehovah mla msang a Ngelekel chouai tia el klisiich!

7-8. (a) Ngera ngolterekokl a rengud er ngii a mengasireng el tekoi el lurruul a Jesus? (b) Ngera el mengasireng el tekoi a kmal momes el beduluchei el kirel er a beches el blekeradel?

⁷ Ongedei, ngmera el sebechel mo ulterekokl a rengud el kmo aike el rokui el klengeltengat el mo er ngii er cheungel omengederederel a Rengedel a Dios a mo tmaut. Aike el mengasireng el tekoi el lurruul a Jesus er a lechad er tia el  chutem ouchais er kid aike el bo loruul er a beluulechad el rokir el King er a Rengedel a Dios. Molatk aike el bo de experience er cheungel omengederederel a Kristus. Ngmo cherrungel a klisichel a bedenged, e le ngmo okngemed a rokui el rakt me a chelitechetul a bedenged el lechuarm a rechad. (Isa. 33:24; 35:5, 6; Och. 21:3, 4) Ngkmal diak bo dolsengerenger me a lechub e bo dechuarm e le ngtelemellel a beluu a uchul. (Isa. 25:6; Mk. 4:41) Kede mo oba klou el deurreng loutkeu er a rebetik er a rengud el mla mad el “tuobed er a debellir.” (Jn. 5:28, 29) Ngera el mengasireng el tekoi a kmal momes el beduluchei el kirel er a beches el blekeradel?

⁸ A Jesus er a loruul a mengasireng el tekoi e ngulechotii a klou el klengariourreng me a klechubechub, el blekeradel el soad loukerebai. Me dosaod a eru lolechotel. A kot e kede mo mesaod er a merengel a chebechiil er a Kana.

9. Ngmilekera Jesus er a merengel a chebechiil? (Johanes 2:6-10)

⁹ Monguiu er a Johanes 2:6-10. Sera bo lak a bilong er a merengel a chebechiil, e a Jesus ngmla er ngii a ngerechelel er ngii? Ngdiak. Ngdiak a ulaoch el mesaod el kirel a Mesias el kmo ngmo omekdubech a bilong el ngar er a mengasireng el rolel. Engdi ka dim imagine omko ngmo diak a ilumel er a merengel a chebechiielem. A Jesus a locha kmal mlo chubteterir a rechedal a telungalek, tokubets tirka el mlo bechiil, e mle soal ngosuterir me lak bo lemerur. Me ngua dulsaod er ngii er a uchelel,  ngrirellii a mengasireng el tekoi. Ngmilult a 103 el kalong el ralm el mo kmal lungil bilong. Ngika locha milult a kmal betok le nglocha millatk el kmo, a derengel bo lousbech er a ngar medad el taem me a lechub e loterau lolengeseu er tirka el dirk mlo bechiil er a rolel a tekoi er a udoud. Tirka el dirk mlo bechiil el obekel a ulterekokl el kmal uleba omereng el saul!

10. Ngera bebil er a meklou a ultutelel el tekoi a debetik er a cheldecheduch el ngar er a 2 el bliongel er a Johanes? (Dirrek el momes er a siasing.)

¹⁰ Molatk a bebil el meklou a ultutelel el tekoi er a cheldecheduch el debetik er ngii er a 2 el bliongel er a Johanes. Ke mtebengii el kmo ngdiak el Jesus a ulemekeek aike el bekai er a ralm? Ngdimlak lolechau osengir a rechad el mo er ngii e ngbai dilu er a remesiou me lebekeek. (6, 7 el kekerei el bades) Uriul er a leruul a ralm el mo bilong, e ngdimlak lengai a bebil er ngii el mo msa ngike el oungerachel er a merengel a chebechiil. E ngbai dilu er a remesiou me lengai el mong. (8 el kekerei el bades) Jesus a kmal dimlak lenguu a kob er a bilong e lodersii er mederir a rechad e lolecholt er ngii el kmo, ‘Mongarm er tia el bilong el dirk krirellii!’

11. Ngera sebeched el suub er a mengasireng el tekoi el lerirellii a Jesus?

¹¹ Ngera kede suub er a mengasireng el tekoi el lerirellii a Jesus el milult a ralm el mo bilong? Kede suubii a klengariourreng. A Jesus a dimlak lolecholt er ngii. Ngkmal dimlak a ta el losaod a ngii di el tekoi el leriruul. E ngbai mle ngariou a rengul e mle blechoel lomsa Demal a klebkall. (Jn. 5:19, 30; 8:28) A lsekum kede mo oukerebai er a Jesus e mo oba ngariou el uldasu el kired, e ngkmal diak bo dosaod a ngii di el tekoi el bla deruul. Ngii di el tekoi el bo deruul el ngar er a omesiunged el mora Jehovah e lak dosaod el kirel, e bai debsa klebkall a Dios, el doba ileakl el techall el mesiou er ngii. (Jer. 9:23, 24) Debsa odanges el lerredemelel, e le ngkmal diak el sebeched el kutmokl a ngii el di el ngerang lungil a lak denguu a ngelsuil a Jehovah.​—1 Ko. 1:26-31.

12. Ngera ta er a rolel e ngsebeched loukerebai er a klengariourreng er a Jesus? Mosaod.

¹² Molatk er a ta er a rolel e ngsebeched loukerebai er a klengariourreng er a Jesus. Ka molatk er tia el blekeradel: A ta er a remechuodel a mengoit er a klou el temel lolengeseu er a kekerei el odam el ministerial servant el ketengel loltobed er a cheldecheduch el mora buai. Ngelsuil ngii el mechuodel a uchul me ngika el odam ultebedii a kmal ungil cheldecheduch el kmal mle sorir a rechad er a ongdibel. Uriul er a miting e a chad a mo er ngika el mechuodel e dmu el kmo: ‘A odam, ngdimlak lotebedii a kmal lungil cheldecheduch?’ Ngika el odam ngmo kmo: ‘Chochoi, engdi ak milengoit er a klou el taem lolengeseu er ngii.’ Me a lechub e ngungil lochotii a klengariourreng e dmu el kmo: ‘Chochoi. Ak kmal proud er ngii.’ Sel lengariou a rengud e ngdiak a belkul douchais aike el lungil doruul el kirir a rechad. Ngungil a rengud el medengei el kmo a Jehovah mes e oba omereng el saul el kirel aike el doruul. (Momekesiu er a Mateus 6:2-4; Heb. 13:16) Nguaisei, kede kmal odeuir a rengul a Jehovah sel doukerebai er a Jesus lolecholt er a klengariourreng.​—1 Pe. 5:6.

13. Ngera ngmilsa Jesus er a lebocha er a beluu er a Nain, e ngera ngrirellii? (Lukas 7:11-15)

¹³ Monguiu er a Lukas 7:11-15. Molatk er a tekoi el dilubech er a melengel a omesiungel a Jesus. Ngika mlora Nain, el beluu er a Galilea el diak lecheroid er a Sunem, el sel beluu el Elisa ulekisii a ngelekel a redil el sechal er a bekord el 900 el rak er uchei. (2 Ki. 4:32-37) A Jesus er a lebocha er a siseball er a beluu e ngomes er a kemeldiil el tobeda er a beluu. Tia kmal klengiterreng el blekeradel. Ngika el melakl el dil a mla oridii a di ta el ngelekel. Engdi ngdiak di lengii  el tang. Klou el seked er a rechad er a beluu obengkel. A Jesus a mle stob er tir e rullii a kmal ileakl el tekoi el kirel ngika el chedil el ngar er a klengiterreng. Ngulekisii a ngelekel er a kodall! Tia kot er aike el edei el okiis el louchais aike el Ebangkelio.

14. Ngera bebil er a meklou a ultutelel el tekoi a debetik er a cheldecheduch el ngar er a 7 el bliongel er a Lukas? (Dirrek el momes er a siasing.)

¹⁴ Molatk a bebil el meklou a ultutelel el tekoi er a cheldecheduch el debetik er ngii er a 7 el bliongel er a Lukas. Ke miltebengii el kmo a Jesus a ‘milsa’ chedil el ngar er a klengiterreng e mlo “chubur”? (13 el kekerei el bades) Me a tekoi lulemtab, el locha ngii el redil el lmangel e okiuechei er a bedengel a ngelekel, a uchul me a Jesus a kmal mlo chubur. A Jesus a dimlak di bo lechebur ngii el chedil, ngulechotii a klechubechub. Ngmilengedecheduch er ngii lolterekokl er a rengul el kmo: “Lak mlangel.” E mirruul er a tekoi el mo ngosuir. Ngulekisii a ngelekel er a kodall e “ngiluu el msa delal.”​—14, 15 el kekerei el bades.

15. Ngera sebeched el suub er a mengasireng el tekoi el lerirellii a Jesus?

¹⁵ Ngera kede suub er a mengasireng el tekoi el lerirellii a Jesus el ulekisii a ngelekel a melakl el dil? Kede suubii el kmo ngkired lochotii a klechubechub el mo er tirke el ngar er a klengiterreng. Nguaisei ngdiak el sebeched el mo ua Jesus lolekiis er a rulekoad er a kodall. Engdi ngsebeched el mo ua Jesus el milekurulii a klechubechub el bedul tirke el ngar er a klengiterreng er a lebiusech a medal. Ngsebeched el mo olecholt a klechubechub loeak aike el dolekoi, me a doruul aike el sebeched el mo olengeseu e mengelaod er tir. d (Osi. 17:17; 2 Ko. 1:3, 4; 1 Pe. 3:8) Mo lmuut er a di mekekerei el ungil el tekoi el doruul me ngsebechel melisiich e mengelaod er tir.

16. Ngua desa er a siasing, ngera ke suubii er a experience er a chedil el dirk mlad a ngelekel el redil?

¹⁶ Molatk er tia el experience. Sesei el rak er a mla memong e a ta el odos a milsa chedil el dilengchokl er a basio el kmeed er ngii, el lmangel er a temel a chelitakl er a miting. A chelitakl a milsaod er a omelatk er a okiis, e ngii el chedil a kmal dirk mlad a ngelekel redil. Ngika lodos a  mle medengelii tiang me ngdi mle mereched el mo dechor er bita er ngii e ngiluu a chimal mechulii, e te rirekir a chelitakl. Ngika el chedil a uriul e ngdilu el kmo: “Ngkmal mlo betik a renguk er a rudam me a rudos er ngak.” Ngkmal uleba omereng el saul le ngmlora miting. Ngdmu el kmo: “A Blil a Ongdibel, tiakid a dengai a ngeso er ngii.” Ngkmal sebechel mo ulterekokl a rengud el kmo a Jehovah a mes e oba omereng el saul el kirel aike el tekoi el doruul el mo lmuut er aike el mekekerei, lolecholt er a klechubechub el mo er tirke el ngar er a klengiterreng e “chelam a rengrir.”​—Psa. 34:18.

17. Ngera kede mla suub er tia el suobel?

¹⁷ Aike el cheldecheduch el kirel a mengasireng el tekoi el lurruul a Jesus a ungil el project er omesuub el kmal mo smisichau. Ngosisecheklid el kmo a Jehovah me a Jesus a kmal betik a rengrir er kid, me a Jesus a ngar ngii a klisichel el mo sumechokl a rokui el mondai er a rechad, me kid a sebechel mo ulterekokl a rengud el kmo a klengeltengat el mo er ngii lokiu a Renged a kmal di kmedung e ngmo tmaut. Sel dorriter aika el cheldecheduch, e ngsebeched el melebedebek a rolel e ngsebeched loukerebai a blekerdelel a Jesus. Nglocha sebechem el rullii a schedule er kau el mo meruul er a omesubem el di kau el tang me a lechub e ngomengull el telungalek er kemiu, el mesuub el kirel aike el bebil er a mengasireng el tekoi el lurruul a Jesus. Mesa el kmo ngngera sebechem el suub er ngii, em share aike el msuub lobengterir a rebebil. Ka di molatk a rolel aika el cheldechedechemiu a mo uchul a klasisiich!​—Rom 1:11, 12.

18. Ngera kede mo mesaod er a ongingil el suobel?

¹⁸ Ngar er a mo bedul a ulebengelel a omesiungel a Jesus, e ngrirellii sel ongedei e ulebongel okiis el louchais er ngii a Biblia. Engdi tia el okiis a ngodech er aike el bebil. Ngika ulekisii a sechelil, e rirellii tiang el ngar er a kmal ngodech el rolel. Ngera sebeched el suub er tia el cheldecheduch er a okiis? E mekera sebeched el smisichii a klaumerang er kid er a omelatk er okiis? A ongingil suobel a mo onger aika el ker.