1-2. Ngera kired el meruul er ngii er chelecha el dongiil er a beches el blekeradel?

 KEDE kmal mengreos er a telbilel a Jehovah el mo mtechir tia el beluulechad er a beches e melemalt el blekeradel. (2 Pe. 3:13) Alta ngdiak dodengei el kmo ngmei a beches el blekeradel er oingerang, engdi blekeradel er a beluulechad ochotii el kmo ngkmal di kmedung.​​—Mt. 24:32-34, 36; Rel. 1:7.

² Me nguaisei, a debla dengar er a klemerang el meketeket me a de dirk mlei, me kid el rokui a kired el melisiich er a klaumerang er kid er tia el telbiil. E ngerang? E le mesisiich el klaumerang a sebechel mo mechitechut. A Paulus a millekoi el kirel a lak a klaumerang er kid el kmo ng “klengit el [mesisiich] el omereked er ngii er kid.” (Heb. 12:1) Ngkired el mo blechoel el melatk aike el lochotii el kmo a beches el blekeradel a kmal di kmedung e ngmei me lak bo lemechitechut a klaumerang er kid.​—Heb. 11:1.

3. Ngera kede mo mesaod er tia el suobel?

³ Ngar tia el suobel, e kede mo mesaod edei el rolel e ngsebeched el melisiich er a klaumerang er kid er a telbilel a Jehovah er a beches el blekeradel: (1) melebedebek el kirel olubet, (2) melatk er a klisichel a Jehovah, e (3) meruul aike el tekoi lolekeed er kid er a Jehovah. E a ulebongel e kede mo mesaod er a rolel a klemechel a Jehovah el mora Habakuk a smisichii a klaumerang er kid er chelecha el taem. A kot e me dosaod a bebil el blekeradel el locha dechelebangel er chelechang el ngii ousbech er a mesisiich el klaumerang er kid er a telbiil el beches el blekeradel el kmal di kmedung.

 BLEKERADEL LOUSBECH ER A MESISIICH EL KLAUMERANG

4. Ngera el omelilt ousbech er a mesisiich el klaumerang?

⁴ Ngbek el sils el doruul omelilt el ngii ousbech er a mesisiich el klaumerang. El ua tiang, kede meruul omelilt el kirir a rechad el dongoit a taem el obengterir, tekoi er ongelaod, skuul, chebechiil, rengalek, me a rolel a tekoi er a ureor. Ngungil di lekid el oker el kmo: ‘A omelilt er ngak ngochotii el kmo, ngkmal ulterekokl a renguk el kmo tia el blekeradel a di tedeb e di kmedung e ngmo mutechei er a beches el blekeradel er a Dios? Me a lechub omelilt er ngak ngua omelilt er a rechad el omdasu el kmo a kodall a ulebongel er a rokui el tekoi?’ (Mt. 6:19, 20; Lk. 12:16-21) Kede mo meruul a kot el ungil omelilt sel desisichii a klaumerang er kid er a beches el blekeradel el ngii a kmal di kmedung e ngmei.

5-6. Ngera uchul me kede ousbech er a mesisiich el klaumerang er a temel a ringel? Momekesiu.

⁵ Kede dirrek el mo chobangel omelsemai el ngii ousbech er a mesisiich el klaumerang. Kede locha mo chobangel a odechelakl, oberaod el secher, me a lechub e nglmuut el bebil er a tekoi el rullid el mo mechitechut a rengud. A kot e kede mo feel el kmo ngsebeched el outekangel. Engdi a lsekum e ngdi melemolem el kemanget el taem, el ua oumesingd el ringel, e kede ousbech er a mesisiich el klaumerang loutekangel e melemolem el mesiou er a Jehovah loba deurreng.​—Rom 12:12; 1 Pe. 1:6, 7.

⁶ Sel dechelebangel er a meringel el blekeradel, e kede locha mo omdasu el kmo a beches el beluulechad a diak lemei. Tiang ngbelkul a kmo ngmechitechut a klaumerang er kid? Ngdiak. Molatk er tia el okesiu. Sel lsekum e ngmla mo chull el betok el sandei, e kede locha mo feel el kmo ngdiak bo desa sils. Me nguaisei, a sils a tobed. Ngdi osisiu, sel kmal mechitechut a rengud e kede mo feel el kmo a beches el blekeradel a diak lemei. Engdi a lsekum a klaumerang er kid a mesisiich, e kede medengei el kmo a telbilel a Dios a mo tmaut. (Psa. 94:3, 14, 15; Heb. 6:17-19) Tiakid el ulterekokl el reng a uchul me kede mo melemolem el nguu a omengull er kid el mora Jehovah el mo kot er a klengar er kid.

7. Ngera el rolel a uldasu a kired el mengeroid er kid er ngii?

⁷ Molatk er a lmuut el ta er a blekeradel lousbech er a mesisiich el klaumerang. Tiang a berkel a klumech. A rebetok el domerk el mo er tir omdasu el kmo a “Ebangkelio” el kirel a merema el beches el blekeradel er a Dios a meringel er kid oumerang er ngii. (Mt. 24:14; Ese. 33:32) Ngkmal diak el soad el mekesuseu er tia el uldesuir. Ngkirel a klaumerang er kid el melemolem el mesisiich me ngdiak bo doba tia el uldasu. Me dosaod a edei el rolel e ngsebeched el meruul er tiang.

MOLEBEDEBEK EL KIREL A OLUBET

8-9. Ngmekera smisichii a klaumerang er kid sel dolebedebek el kirel olubet?

⁸ A ta er a rolel e ngsebeched el melisiich er a klaumerang er kid oeak sel dolebedebek el kirel olubet. A olubet olterekokl er a rengud el kmo a telbilel a Dios a di mo klemerang. Sel dolatk er a uchul e ngmle kirel mo er ngii olubet me a uldimukl er ngii, e ngsmisichii a klaumerang er kid el kmo a telbilel a Dios er a diak a ulebengelel el klengar er a chelsel a ungil beluulechad a mera el mo tmaut. Ngera uchul me ngsebeched el melekoi el uaisei?

⁹ Ngngera mle uldimukl er a olubet? A Jehovah ulderchii a betik er a rengul el Ngelekel, el kot el kmeed er ngii er a eanged el me mechell el chad er a beluulechad. A Jesus er a lengar tia el chutem e ngmlo chobangel a betok el bedengel a ringel. E mlo chuarm e mad er a meringel  el kodall. A Jehovah kilkedir a kmal ngarbab el char! A betik a rengul el Dios a kmal diak lekengei er a Ngelekel me bo lechuarm e mad el kirel di bo lungil a klengar er kid el di tedeb. (Jn. 3:16; 1 Pe. 1:18, 19) A Jehovah el kilkedir a kmal ngarbab el char a uchul me ngmo oterekeklii el kmo a klengar el diak a ulebengelel er a beches el blekeradel a mo mera el tekoi.

MOLATK ER A KLISICHEL A JEHOVAH

10. A doltirakl er a Efesus 3:20, e ngngera sebechel meruul er ngii a Jehovah?

¹⁰ Ongeru el rolel e ngsebeched el smisichii a klaumerang er kid oeak a dolatk er a klisichel a Jehovah. Ngika ngar ngii a klisichel el oltaut a rokui el tekoi el letib. Ngmerang, a rechad er chelechang omdasu el kmo a diak a ulebengelel el klengar er a beches el blekeradel a diak el sebechel tekoi. Engdi a Jehovah blechoel el melib a tekoi el rechad a diak el sebechir el remuul. Ngika sebechel meruul el uaisei e le ng Dios lolab a bek el klisiich. (Job 42:2; Mk. 10:27) Me ngdiak lemechas a rengud sel lolib el mo meruul a kmal mengasireng el tekoi!​—Monguiu er a Efesus 3:20.

11. Mouchais er a ta er a mengasireng el telbilel a Dios. (Momes er a baks el “ Bebil er a Mengasireng el Telbiil el Mla Tmaut.”)

¹¹ Molatk a bebil er a tekoi el Jehovah tilib el mora rechedal el meringel er kid oumerang el kmo ngsebechel mo uaisei. Ngdilu er a Abraham me a Sara el kmo ngmo er ngii a ngelekir er a cheluodel. (Gen. 17:15-17) Ngdirrek el dilu er a Abraham el kmo a ruldidellel a rsechel a mo oubeluu er a Kanaan. A ruldidellel a rsechel a Abraham er a rechad er a Israel a mle sibai er a Ekipten el betok el rak, a uchul me ngmle meringel a doumerang el kmo ngmo uaisei. Engdi ngmera el tilaut. Uriul e a Jehovah dilu er a chudelang el Elisabeth el kmo ngmo er ngii a ngelekel. Ngdirrek el dilu er a Maria el dirkak a ta el bo loilil el kmo, ngmo mechellii a Ngelekel. Tia mo otutii a telbiil el lerirellii a Jehovah er a sers er a Eden er a betok el telael el rak er uchei!​—Gen. 3:15.

12. Ngera ngolterekokl a rengud er ngii a Josua 23:14 me a Isaia 55:10, 11 el kirel a klisichel a Jehovah?

¹² Kede smisichii a klaumerang er kid er a klisichel a Jehovah el mo kutmeklii a beches el blekeradel loeak sel bo de dmolech el melatk aike el telbiil el leriruul e uleltaut. (Monguiu er a Josua 23:14; Isaia 55:10, 11.) Tia rullid el mo kltmokl lolengeseu er a rechad el mo medengei el kmo, a telbiil el beches el blekeradel a diak di el berrous. A Jehovah di mle ngii el melekoi el kirel a beches el eanged me a beches el beluulechad el kmo: “Ikal tekoi a merang e ulterekokl el mo tmaut.”​—Och. 21:1, 5.

MORUUL A TEKOI EL NGII OLEKEED ER KAU ER A JEHOVAH

13. Ngmekera miting er a ongdibel e smisichii a klaumerang er kid? Mosaod.

¹³ A ongedei el rolel e ngsebeched el smisichii a klaumerang er kid, a meruul aike el tekoi el olekeed er kid er a Jehovah. El ua tiang, molatk er a rolel e kede ngmai a klungioled er a miting er a ongdibel. Anna, el mla mengoit a betok el rak el ngar er a kakerous el mui el taem el omesiou a melekoi el kmo: “A miting a mekur a klaumerang er ngak. Mo lmuut me a lsekum a chad el mengedecheduch a diak el sal lungil lolisechakl me a lechub e ngdiak louchais a beches el tekoi, engdi ak blechoel el remenges aike el ngosukak el mo ungil medengelii a Biblia, e tia smisichii a klaumerang er ngak.” b Kede dirrek el ulterekokl loba omereng el saul el kirel a nger er a rechad er a ongdibel el ngii a kmal melisiich er kid.​—Rom 1:11, 12; 10:17.

14. Ngmekera berkel a klumech e melisiich er a klaumerang er kid?

¹⁴ Kede dirrek el smisichii a klaumerang er  kid sel deteloi er a berkel a klumech. (Heb. 10:23) A Barbara el mla mesiou er a Jehovah el betok er a 70 el rak a kmo: “Ak mla metik el kmo a ureor el omerk a kmal melisiich er a klaumerang er ngak. Sel di kungedecheduch er a rechad el kirel a telbilel a Jehovah, e a klaumerang er ngak a lmuut el mengal mo mesisiich.”

15. Ngmekera omesubed el di kid el tang e smisichii a klaumerang er kid? (Dirrek el momes a siasing.)

¹⁵ Molatk er a lmuut el ta er a tekoi el melisiich er a klaumerang er kid: omesubed el di kid el tang. A Susan a metik el kmo ngkmal ngosuir sel lerellii a schedule er ngii el mesuub. Ngmelekoi el kmo: “Sel Sandei e ak mesuub er a suobel er a Ongkerongel el kirel a next el Sandei. E sel le Monday me a Tuesday e ak prepare er ngak el kirel a miting er a Klengar me a Omesiunged. Aike el bebil er a sils e ak meruul a personal study project er ngak.” Susan el blechoel loltirakl er tia el schedule er ngii er omesuub a uchul me a klaumerang er ngii a di meleketek. Irene, el mla mesiou er a world headquarters el betok el rak, a mla metik el kmo ngkmal melisiich er a klaumerang er ngii sel losuub a ulaoch. Ngmelekoi el kmo: “Ngmera el mechas a renguk sel kumes a ulochel a Jehovah el tmaut el mo lmuut er aike el kmal komakai el omesodel.” c

“NGKMAL DIAK LOKOR EL MO TMAUT”

16. Ngera uchul me a tekingel a Jehovah el mora Habakuk a ngar ngii a belkul el kired er chelecha el taem? (Hebru 10:36, 37)

¹⁶ Rebebil er a mesiungel a Jehovah a mla mo kemanget el taem el longiil er a ulebongel er tia el mekngit el blekeradel. Ngar osengir a redi chad, e a otutel a telbilel a Jehovah a kora ua lemeoud. A Jehovah medengei uldesuir a remesiungel me ngdilu er a Habakuk el kmo: “Ngdirkak bo el telutk el temel a ues. Ngorreched el mora ulebengelel, e kmal diak el loumulak. Mo lmuut me a lekora meoud engdi mongiil er ngii! Ngkmal diak lokor el mo tmaut. Ngkmal diak bo lemeoud!” (Hab. 2: 3, NW) A Jehovah ngdi millekoi er tiang el mora Habakuk? Me a lechub a tekingel ngngar ngii a belkul el kired er chelecha el taem? A apostol Paulus a mlukreng el mo mesaod aika el osisiu el tekoi el mora Rekristiano el mengiil er a beches el blekeradel. (Monguiu er a Hebru 10:36, 37.) Chochoi, ngkmal sebechel mo ulterekokl a rengud el kmo a osebeled alta ngkora mo ua lemeoud, engdi “ngkmal diak lokor el mo tmaut. Ngkmal diak bo lemeoud!”

17. Ngmilekera ta el odos e oltaut a tekingel a Jehovah el mora Habakuk?

¹⁷ A rebetok er a remesiungel a Jehovah a oltaut er a tekingel e ‘mengiil’ alta ngmla mo melai a betok el rak. El ua tiang, a Louise ulemuchel el mesiou er a Jehovah er a 1939. Ngmelekoi el kmo: “Ngar tiakid el taem e a kulemdasu el kmo a Armakedon a mei er a uchei er a ktobed er a high school. Engdi ngdimlak bo leuaisei. Chelsel aika el mereko el rak, e ngkmal ngilsukak sel kunguiu aike el kumekedong el kmo, ‘ngcheldecheduch el kirel omengiil.’ Aika cheldecheduch el kirel a Noah, Abraham, Josef, me a relmuut el bebil el milengiil el kemanget el taem er a uchei er a lenguu a klengeltengat el Jehovah tilbir el mo mesterir. Omengiil a mla ngosukak ngak me a rebebil el melemolem ulturk osengam er a beches el blekeradel el kmal kmedang.” A rebetok er a meketeketang el mesiungel a Jehovah me te dirrek el kmal kongei er tiang!

18. Ngmekera domtab a blebelel a Dios e smisichii a klaumerang er kid er a di kmedung el beches el blekeradel?

¹⁸ Ngmerang, a beches el blekeradel a dirkak el mei. Engdi momtab a bebil er a tekoi el ngar ngii el ua btuch, kerrekar, charm, me a rechad. Ngdiak a chad el loumededenger el kmo aikang ngmera el ngar ngii me a lechub e ngdiak alta ngmla er ngii a taem el dimlak aika el tekoi. Ngngar ngii er chelechang e le Dios el mileob. (Gen. 1:1, 26, 27) A Dios er kid a dirrek el mla tibir a beches el beluulechad. Ngmo otutii tia el telbilel. Ngar er a beches el blekeradel, e a rechad a mo oldeu a rengrir er a diak a ulebengelel el klengar el cherrungel a klisichel a bedengir. A beches el blekeradel a mo mera el tekoi er a telutk el temel a Dios.​—Isa. 65:17; Och. 21:3, 4.

19. Ngmekera sebechem el smisichii a klaumerang er kau?

¹⁹ Chelecha el dongiil e dousbech a bek el techall el mo melisiich er a klaumerang er kid. Bekurulii omereng el saul er kau el kirel olubet. Molatk er a klisichel a Jehovah. Bekekii a klengar er kau er aike el tekoi el olekeed er kau er a Jehovah. Sel moruul el uaisei e ngsebechem el mo ta er “tirkei el di uluumerang e uleba kllourreng me te mlo ngma dikesir er a telbilel a Dios.”​—Heb. 6:11, 12; Rom 5:5.