1. Ngngera baradis er a klereng, e ngera soad el rullii er a rengud el mo meruul er ngii?

 NGNGAR ngii a baradis er tia el chutem el mui er a rechad el kmal mechesang el meruul a ungil tekoi. Ngmui er a rechad el ngar ngii a mera el budech er tir. Tirke el ngar er a chelsel tia el baradis a mla remuul a rengrir el diak bo letobed er ngii. Ngdirrek el kmal sorir a rokui el chad a lemei e lobengterir el ngar tia el kmal ileakl el basio. Tiang ngera el basio? Ng baradis er a klereng! a

2. Ngera uchul me a baradis er a klereng a kmal ileakl?

² A Jehovah mla kutmeklii a okesiul a basio el rechedal a ngar ngii e ngar er a budech me a kltarreng alta te ngar er a chelsel tia el beluulechad el Satan a mla rullii el mo mui er a kltui me a delengerenger, e kengaol. (1 Jn. 5:19; Och. 12:12) A betik a rengul el Dios er kid a mesa telemellel tia el mekngit el blekeradel e mla meskid a osebechakl me bo lsebeched el meloseb er a tekoi er a klereng. A Tekingel a mesaod er tia el baradis er a klereng el kmo ng ‘klekerenged’ e “ungil selubs el sers.” (Isa. 4:6; 58:11) Ngoeak a klengeltengat er a Jehovah e a rechad el ngar er a baradis er a klereng a selebechakl e dmeu a rengrir er a temel aika el meringel el uriul sils.—Isa. 54:14; 2 Ti. 3:​1, BT.

3. Ngera mle kot el otutel a ulaoch el ngar er a 65 el bliongel er a Isaia?

³ A Jehovah uluusbech er a profet Isaia el mesaod er a mo klengar er tirke el ngar er a baradis er a klereng. Ngsebeched el metik er a omesodel er a 65 el bliongel er a Isaia, el ngii a kot e ngtilaut er a 537 B.C.E. Ngar tiakid el taem e a rulebult el Chijudea mlengubet er a blebaol er a Babilon e liluut el mora belurir. A Jehovah  ulemekngeltengat er a rechedal e ngilsuterir el rullii a cheloit el mats er a Jerusalem el lmuut el mo klebokel e toketekii a templo el blil a mera el omengull er a beluu er a Israel.—Isa. 51:11; Sek. 8:3.

4. Ngera otutel a ulaoch el ngar er a 65 el bliongel er a Isaia er chelecha el taem er kid?

⁴ Ongeru el otutel a ulochel a Isaia a tilaut er a 1919 C.E. er a bo lemimokl er a Kloul Babilon a rechedal a Jehovah er chelecha el taem er kid. Seikid e a baradis er a klereng a milekekokil loberk er a beluulechad. A reblak a rengrir lomerk er a klumech er a Renged a tileketek a betok el ongdibel me a rechedal ngii el ongdibel a mlo olecholt a blekerdelir a Rekristiano. Resechal me a redil el mle mekngit a blekerdelir e sorir loldechelakl me a re mlara deleboes a mlo “[oubail] er ngikel beches el chad, el ulebeob el okesiul a Dios.” (Efe. 4:​24, BT) Nguaisei el betok er aike el klengeltengat el losaod a Isaia a mo tmaut er a ngar er a medad er a chelsel a beches el blekeradel. Engdi chelechang e ngdirrek el ngar ngii a klengeltengat el dolai. Me dosaod el kmo ngngera ngrullii a baradis er a klereng el mei er kid me a uchul me ngdiak el soad el tuobed er ngii.

TELETELIR TIRKE EL NGAR ER A BARADIS ER A KLERENG

5. Ngua letibir a Isaia 65:13 (NW), ngera kede oldeu er a rengud er ngii er a chelsel a baradis er a klereng?

⁵ Healthy e ungil a rengrir. A ulochel a Isaia mesaod er a klekakerous er a klengar er a rechad el ngar er a chelsel a baradis er a klereng me tirke el ngar er a ikrel. (Monguiu er a Isaia 65:​13, NW. b) Jehovah bekururau lomesterir a remengull er ngii aike el lousbech er a tekoi er a klereng. Kede oba chedaol reng, Tekingel, me a betok el kall er a klereng me kede “mengang . . . melim . . . [e] oldeu er a [rengud].” (Momekesiu er a Ocholt 22:17.) Ngkmal ngodech er tirke el ngar er a ikrel a baradis er a klereng el “olsengerenger . . . meched a [rengrir] . . . [e] mo merur.” Te diak lengai aike el lousbech er a tekoi er a klereng er tir.—Amo. 8:11.

6. Ngmekera Joel 2:​21-24 a losaod a bebil er a tekoi el lomeskid a Jehovah, e mekera uchul a klungioled?

⁶ Ngar er a ulochel a Joel e nguluusbech a klekedall el ua redechel a wheat, bilong, me a cheluch lolecholt el kmo a Jehovah bekururau lomesterir a rechedal aike el lousbech, e a kall er a klereng a uldimukl er ngii. (Joel 2:​21-24) El ua tiang, ngmla meskid a Biblia me aika el babilenged el mengai er a Biblia, website er kid, me a dirrek el miting, assembly, me a convention. Ngsebeched el melai okelel a reng er a bek el sils me a uchul me kede healthy er a klereng e ungil a rengud.

7. Ngera uchul me ‘ngungil a rengud’? (Isaia 65:​14, NW)

⁷ Dmeu a rengrir e ungil a rengrir er aike el ngar ngii er tir. A rechedal a Dios a sebechir el “oldiu er a deurreng” e le te kmal oba omereng el saul el mora Jehovah. (Monguiu er a Isaia 65:​14, NW. c) A klemerang er a Biblia el kmal melisiich er kid me a telbiil er a Biblia el mengelaod er kid me a omeltked el mengai er a olubet el tengetengel a Kristus a uchul me ‘ngungil a rengud.’ Ngkmal mo dmeu a rengud sel dosaod aikang lobengterir a rudam me a rudos er kid!—Psa. 34:8; 133:​1-3.

8. Ngera teblo el tekoi er a baradis er a klereng el kmal ileakl?

⁸ A bltikerreng me a kltarreng er a delongelir a rechedal a Dios a teblo el tekoi er a baradis er a klereng el kmal ileakl. Tia el ‘semosem’ a meskid a siasing er a mo klengar er a beches el blekeradel, el remesiungel a Jehovah mo oldeu a  rengrir er a lmuut el klou el bltikerreng me a kltarreng er sel ngar ngii er chelechang. (Kol. 3:14) A ta el odos a mesaod er a lultebengii er a lekot el meet er a rechedal a Jehovah el kmo: “Ak mle metitur lolecholt er a deurreng, mo lmuut er a chelsel a telungalek. A kot el taem el kisang a bltikerreng el ngar omeruul a sera bo kudengelterir a Resioning er a Jehovah.” A chad el soal el mo oba mera el deurreng a kirel el mei er a chelsel a baradis er a klereng. Alta beluulechad a mo ngodech a uldesuel el kirel a remesiungel a Jehovah engdi ngungil a chisir er medal a Jehovah me tirke el rokui el mengull er ngii.—Isa. 65:15.

9. Ngera ngtibir a Isaia 65:​16, 17 el kirel aika el ringel er a klengar?

⁹ Relaxed e chelellakl a rengrir. A Isaia 65:14 (NW) a mesaod er tirke el melilt el di ngar er a ikrel a baradis er a klereng el kmo te “lmangel le ngchelam a [rengrir] e mo mengeiung e le ngdikea [omeltkir].” Engdi ngkuk mekerang aike el ringel luchul me a rechedal a Dios a kmal chuarm? Ngdi kmedung e aikang a “mo diak e diak a melatk.” (Monguiu er a Isaia 65:​16, 17.) Jehovah mo choroid a rokui el ringel e a cherengel a taem e ngmo diak a lmatk.

10. Ngera uchul me ke feel el kmo ke mera el ngeltengat el teloi er a rudam me a rudos el Kristiano? (Dirrek el momes er a siasing.)

¹⁰ Mo lmuut er chelechang me sel dengar er a miting er a ongdibel e ngchelellakl a rengud, e sebeched el relax e diak dolatk aika el stress er tia el mekngit el beluulechad. Kede dirrek el melechel er a chelellakl el reng er a ongdibel sel bo dolecholt er a bltikerreng, deurreng, budech, blekokuii el reng, me a delemedemek el reng, el ngii a bebil er aike el rodech er a chedaol reng er a Dios. (Gal. 5:​22, 23) Ngmera el klengeltengat le kede chedal a cheldebechelel a Dios! Tirke el melemolem el ngar er a baradis er a klereng a mo mesa cherrungel el otutel a telbilel a Dios er a “beches el beluulchad ma beches el melidiul.”

11. A doltirakl er a Isaia 65:​18, 19, ngerang ngkirel rullii el mei er kid a baradis er a klereng el lulemeob er ngii a Jehovah?

¹¹ Oba omereng el saul e blekebek. A Isaia dirrek louchais er a uchul me ngkired el “blekebek e di le blechoel el dmeu a [rengud]” er a chelsel a baradis er a klereng. Tia el okesiul a basio a ulebeob er a Jehovah. (Monguiu er a Isaia 65:​18, 19.) Me ngdiak el mechas a rengud er a Jehovah el lousbech er kid el mo omekrael er a rechad el mo tuobed er aika el cheldebechel er a beluulechad el ngar er a bosech er a tekoi er a klereng, el mei er tia el klebokel el baradis er kid er a klereng! Kede blekebek er aika el betok el klengeltengat el dolai le kid el ngar er a klemerang, e ngii odbechid el mo ouchais er a rebebil el kirel.—Jer. 31:12.

12. Ngera ke feel er ngii el kirel aike el telbiil el losaod Isaia 65:​20-24, e ngerang?

 ¹² Kede kmal oba omereng el saul e blekebek er a omelatk el dobang le kid ngar er a chelsel a baradis er a klereng. Ka di molatk aike el bo domes e doruul er a chelsel a beches el blekeradel er a Dios! A Biblia tibir el kmo: “A re tolechoi a dikea bo lemad sel le tolechoi, ma re bek el chad a mo lomolem a klemengetel a klengar er tir.” Kede “mo toketek a blai e mo kiei er ngii . . . [e] mo dualem a sers er a bilong, e mo dmeu a [rengud] er a bilong.” “A ureor el bo [doruul] a di mo ungil” e le Jehovah “mo omekngeltengat er [kid].” Ngtibir el kmo a klengar er kid a mo ungil e ngar ngii a mera el belkul. “Uchei er a loluluuch” ngmedengei a lousbech a derta el chad e mo “omotech a rengrir a rokui el di ngar.”—Isa. 65:​20-24; Psa. 145:​16, NW.

13. Ngmekera Isaia 65:25 (NW) a losaod omelodech el loruul a rechad er a klengar er tir sel lomuchel el mesiou er a Jehovah?

¹³ Budech e selebechakl. Ngoeak a ngelsuil a chedaol reng er a Dios e a rebetok el lullab a blekerdelir a tebelik el charm a mla ngmodech a klengar er tir. (Monguiu er a Isaia 65:​25, NW. d) Te mla meringel loureor el chemoit aike el diak lungil el blekerdelir. (Rom 12:2; Efe. 4:​22-24) Me nguaisei, a rechedal a Dios dirk diak lemecherrungel me te dirk mo remuul a cheleuid. Engdi Jehovah mla oldak er a “rebek el bedengir a rechad” loba diak el sebechel metemall el bltikerreng me a budech. (Tit. 2:​11, NW) Ngdi ta el Dios el olab a bek el klisiich a sebechel rullii tia el mengasireng el tekoi!

14. Ngmekera Isaia 65:25 (NW) e mla tmaut el kirel a ta el odam?

¹⁴ A rechad ngmera el sebechir el ngmodech a blekerdelir? Molatk er tia el experience. Ta el kekerei el chad el di tiluu e tuobed er a blil a kelebus er a lebocha el 20 a rekil a kmal mlara deleboes el delengerenger e soal el melemall er a rechad. Ngmlo kelebus el kirel omerechorech el mlai, me a kuk di kirel omerechorech, me a lmuut el bebil er a oberaod el tekoi. Ngika kmal mle soal lomuchel a klakoad lobengkel a ngii di el chad. Sera lekot el rongesii a klemerang er a Biblia e lomuchel el ngar er a miting er a Resioning er a Jehovah, e ngmlo ulterekokl a rengul el kmo ngmla metik er a belkul a klengar er ngii, el mo mesiou er a Jehovah er a chelsel a baradis er a klereng. Uriul er a lemetecholb e ngblechoel el mo melatk er a rolel e a Isaia 65:25 (NW) a melutk er ngii. Ngika ngilodech a blekerdelel el kora blekerdelel a laion el soal el melemall el mo uai a blekerdelel a sib el soal a budech.

15. Ngera uchul me ngsoad el mengemedaol er a rebebil el me obengked el ngar er a baradis er a klereng, e mekera doruul er tiang?

¹⁵ Isaia 65:13 (NW) omuchel el kmo: “Aika tekingel a Jehovah el Olab a Bek el klisiich.” E a ulebengelel a 25 (NW) el kekerei el bades a kmo: “aika tekingel a Jehovah.” A tekingel a blechoel el tmaut. (Isa. 55:​10, 11) A baradis er a klereng a ngar ngii er chelecha el taem. A Jehovah mla rullii a kmal ileakl el klodam. Kid el chedal a telungalek er ngii a uchul me ngsebeched el melechesuar er a budech me a osebechakl er a chelsel tia el kmal mekngit el beluulechad. (Psa. 72:​7, NW) Tia uchul me ngsoad lolengeseu er tirke el sebeched el ngosuterir el me chedal a klodam er kid er a Rekristiano. Kede meruul er tiang loeak a doruul er a remo disaiplo.—Mt. 28:​19, 20.

NGMEKERA DOLECHAU ER A REBEBIL EL MEI ER A BARADIS ER A KLERENG

16. Te mekera rechad e mo sorir el mei er a baradis er a klereng?

¹⁶ A derta er kid a ngar ngii a klou a ultutelel el ngerechelel meruul er a baradis er a klereng  me ngmo sorir a rechad el mei er ngii. A doruul er tiang e ngkired el loukerebai er a Jehovah. Ngika diak lorrimel er a rechad el mo chedal a cheldebechelel. E ngbai mekekokil el ‘omekrael’ er a rechad el mei er ngii. (Jn. 6:44; Jer. 31:​3, NW) A rebliochel a rengrir el chad el suubii el kirel a bltikerreng er a Jehovah e mo medengelii a kmal mo sorir ngii. Me ngmekera e sebeched lousbech a ungil blekerdeled me a ungil omerelled el olechau er a rechad el mei er a baradis er a klereng?

17. Ngmekera sebeched lolechau er a rebebil el mei er a baradis er a klereng?

¹⁷ A ta er a rolel e ngsebeched el lolechau er a rebebil el mei er a baradis er a klereng oeak sel dungil el mora rekldemed er a klemerang e dolecholt er a bltikerreng el mo er tir. Ngsoad a rebeches el mei er a miting er a ongdibel a lebo leuai tirke el dimlak loumerang el mlora miting er a rechad er a Korinth er a irechar. Tirka dilu el kmo: “A Dios a meral ngar a delongeliu.” (1 Ko. 14:​24, 25; Sek. 8:​23, NW) Seikid a uchul me ngkired el melemolem loltaut er a omellach el mo ‘budech a delongeled.’—1 Th. 5:13.

18. Ngera locha mo olechau er a rechad el mei er a cheldebecheled?

¹⁸ Ngkired el mo omes er a rudam me a rudos er kid el ua lomes er tir a Jehovah. Kede meruul el uaisei loeak a domes aike el ungil blekerdelir el diak el chelitecheterir, el ngii a mo diak. E sebeched el mesmechokl a mlo mekngit er a delongeled loba bltikerreng a lsekum kede mo “bekokuii e chubechub ra delongeled, e dul kausubes.” (Efe. 4:​32, BT) Seikid e a baradis er a klereng a mo olechau a rengrir a rechad el sorir a leuaisei omerellir a rechad el mo er tir el dirrek. e

 LAK MTOBED ER A BARADIS ER A KLERENG

19. (a) Ua desang er a baks el “ Te Tilobed e Liluut el Mei,” ngera bebil er a tekingir tirke el tilobed er a baradis er a klereng e mla lmuut el mei? (b) Ngera kired el rullii er a rengud el mo meruul er ngii? (Dirrek el momes er a siasing.)

¹⁹ Kede kmal oba omereng el saul el kirel a baradis er a klereng! Ngmera el mla mo klebokel e mla mo betok a remengull er a Jehovah er a chelsel! Me lak doridii omereng el saul er kid el kirel a baradis er a klereng el bla lomeob er ngii a Jehovah el kired. Ngii di el chad el soal mukbeches a rengul, mo ungil a rengul, e chelellakl a rengul e selebechakl a kirel mei er a chelsel a baradis er a klereng e diak el letobed er ngii! Engdi bo mkerekikl e le Satan a meringel loureor el mengesuseu er a rechad el me tuobed er ngii. (1 Pe. 5:8; Och. 12:9) Engdi ngdiak el kired el mecherei me lebo el mesisiich. Doureor el meringel lomekerreu er a klebekelel, klekiidel, me a budech er a baradis er a klereng.