1. Ngera te mo feel er ngii a rebebil sel lolatk a mo omerk er a klumech e mengedecheduch er a rechad? (Dirrek el momes er a siasing.)

 KID el chedal a Jehovah omerk el mora rechad e le ngbetik a rengud er a Demad el ngar er a eanged e soad el ngosuterir a rengar bita er kid el mo medengelii. A rebetok er a re publisher a sorir lomerk er a klumech. Engdi te ngar ngii a rebebil el meringel er tir el metik er a deurreng el omerk. E ngerang? A rebebil a kmal sekemerur e omdasu el kmo te diak el meduch lolisechakl. A rekuk bebil a meringel er tir a mora blirir a rechad el dimlak el lomekedong er tir. A rebebil a diak el sorir el motngakl er a rechad. E a rekuk bebil a mlosisechakl el mo mengeroid er tir er a mo mondai. Me alta te kmal betik a rengrir er a Jehovah engdi tirka el rudam me a rudos er kid a meringel er tir a mengedecheduch er a ungil chais el mora rechad el diak lodengelterir. Te medengei el kmo tia el ureor a kmal klou a ultutelel me a uchul e te blechoel el mo omerk er a klumech. Te kmal odeuir a rengul a Jehovah!

2. A lsekum e ngmo meringel er kau a metik a deurreng el lomerk er a klumech, e ngera uchul me ngdiak el kirel mo mechitechut a rengum?

² Kau, a lebebil e ngmo diak el deu a rengum lomerk e le ke mo feel el uaisei? A leuaisei e lak bo lemechitechut a rengum. Tia locha ochotii el kmo ngngariou a rengum e diak el soam lolechau a attention el mo er kau. Ngdirrek el lochotii el kmo ngdiak el soam loumondai. E kmal diak a chad el soal motngakl, tokubets a lsekum e ngmelasem el meruul a ungil. A Demam el ngar er a eanged a kmal medengei omelsemai er kau e soal ngosukau er aike el mousbech. (Isa. 41:13) Ngar tia el suobel e kede mo mesaod a  eim el ngeso er a uldasu el ngosukau sel obom feel el uaisei me a rolel e ngsebechel mo dmeu a rengum lomerk er a klumech.

BECHEREI A TEKINGEL A DIOS ME LESISICHAU

3. Ngera ngilsuir a profet Jeremia el mo omerk?

³ Irechar el mei er chelechang el tekingel a Dios a mla smisicheterir a rechedal sel lebo el meringel er tir el churungel a ngerechelir. Ka molatk er a profet Jeremia. A Jehovah er a lebsang a ngerechelel el mo omerk e ngulemai er a rengul. Ngdilu el kmo: “Ak metitur el mengedecheduch; ak kmal dirk ngeasek.” (Jer. 1:6) Ngera ngilsuir el mo oba blekeu el omerk? Ngtekingel a Dios el mo er ngii a silsichii. A Jeremia a kmo: “A klmechem a . . . chelsimer er a chelsel a chiuesek. Ng mo mechitechut a bedengek a kurreked er ngii.” (Jer. 20:​8, 9) Me a territory er a Jeremia mle meringel engdi a klumech el mle kirel el mo omerk er ngii a silsichii el mo kutmeklii a ngerechelel.

4. Ngera duubech sel donguiu e dolebedebek er a Tekingel a Dios? (Kolose 1:​9, 10, NW)

⁴ A Rekristiano me te dirrek el melai omelisiich er a Tekingel a Dios. A apostol Paulus er a loluches el mora ongdibel er a Kolose e ngdilu el kmo, sel lolai er a melemalt el klemedengei e ngmo odbecheterir el mo ‘merael loltirakl er a soal a Jehovah,’ e melemolem el ‘meruul a bek lungil lureor.’ (Monguiu er a Kolose 1:​9, 10, NW. a) A berkel a ungil chais a uldimukl er a ungil lureor. Me sel donguiu er a Tekingel a Dios e dolebedebek er ngii, e a klaumerang er kid er a Jehovah mo mesisiich, me ngii a mo bleketakl a klungel a ultutelel a uchul me ke domerk er a klumech er a Renged.

5. Ngmekera demui el ngmai a klungioled er omengiuel me a omesubel a Biblia?

⁵ A lsoad el mui el ngmai a klungioled er a Tekingel a Dios, e ngkired el diak dorreched el menguiu, mesuub, e melebedebek. Ngkired el take a temed. A lsekum ke mora bades el meringel er kau a understand er ngii, e lak em skip er ngii. Bai mousbech er a Watch Tower Publications Index me a lechub e ng Research Guide for Jehovah’s Witnesses el sikii omesodel. A lsekum ke take a temem sel mosuub, e ke smisichii a klaumerang er kau el kmo aike el lolekoi a Biblia a klemerang. (1 Th. 5:21) Sel lemenga el mo ulterekokl a rengum me kau a mo dmeu a rengum el share aike el bla msuub er a rebebil.

 BO MUNGIL EL PREPARE ER KAU EL MO OMERK ER A KLUMECH

6. Ngera uchul me ngungil bo dungil prepare er kid el mo omerk er a klumech?

⁶ Sel bo mungil prepare er kau el mo omerk er a klumech e nglocha mo diak el sal louedikel a rengum sel mongedecheduch er a rechad. A Jesus ullengeseu el prepare er a redisaiplo er ngii er a uchei er a loldurech er tir el mo omerk. (Lk. 10:​1-11) Redisaiplo el uleltirakl aike el lullisechakl er tir a Jesus a uchul me ngmle dmeu a rengrir er aike el mle sebechir el kutmokl.—Lk. 10:17.

7. Ngmekera sebeched el prepare el mo omerk er a klumech? (Dirrek el momes er a siasing.)

⁷ Ngmekera sebeched el prepare el mo omerk er a klumech? Ngkired el mo ungil lmatk aike el soad el melekoi e mesaod el ousbech a tekinged, el ngar er a rolel er kid sel dongedecheduch. Ngdirrek el kmal mo ngosukid a lsekum kede melatk a bebil er a rolel e a rechad er a territory mo onger er kid e melatk er a rolel a bo dongedecheduch er tir. Me sel bo dongedecheduch er a rechad, e ngsebeched el relax, smile, e mo friendly.

8. Ngoeak a ngera el rolel e a Rekristiano di ua bekai er okesiu er a apostol Paulus?

⁸ A apostol Paulus a milsaod er a ngerecheled er a berkel a klumech el kmo: “[Kid] a di kor a bekai el oltekau er a meringelchad el klalo.” (2 Ko. 4:7) Tiang ngera el mekreos el klalo? Ngtia el ureor el lolsobel a klengar el ngii a berkel a klumech er a Renged. (2 Ko. 4:1) Ngerang a bekai? Ngomtechei er a remesiungel a Jehovah el tir oba ungil chais el mora rechad. Taem er a Paulus e a rechad el ulterau a klalo uluusbech a bekai el oltekau a mekreos el klalo el ua kall, bilong, me a udoud. Ngdi osisiu, a Jehovah mla omekngerachel er kid er a mekreos el klumech er a ungil chais. Ngoeak a ngelsuil a Jehovah e ngngar ngii a klisiched el mo melemolem el lomerk er tia el klumech.

MOLULUUCH LOLENGIT ER A BLEKEU

9. Ngmekera sebeched el mo mesisiich er a dekted er a rechad me a lechub ngdekted el medakt a lotngeklid a rechad? (Dirrek el momes er a siasing.)

⁹ A lebebil e ngmo er ngii a dekted er a rechad me a lechub kede medakt a lotngeklid a rechad. Ngmekera sebeched el mo mesisiich er tia el omelsemai? Morriter a nglunguchir a rechapostol er a lolekoi er tir me lestob lomerk. Te dimlak bo lemedakt te bai ullengit er a Jehovah me lebesterir a “blekeu el mengedecheduch a [tekingel].” (Rel. 4:​18, 29, 31) A lsekum a dakt er a  rechad a ngar ngii a lerellii el mei er kid e ngkired el dirrek el meluluuch lolengit er a ngelsuil a Jehovah. Molengit er a Jehovah me lengesukau me a bltkil a rengum el mora rechad bo lluut el mesisiich er a dektem er a rechad.

10. Ngmekera Jehovah e olengeseu er kid el Sioning el kirel? (Isaia 43:​10-12)

¹⁰ A Jehovah mla tutkid el mo Sioning er ngii, e tibir el kmo ngmo ngosukid el mo oba blekeu. (Monguiu er a Isaia 43:​10-12.) Molatk a eua el rolel e ngmeruul er tiang. A kot, e a Jesus obengked sel domerk er a ungil chais. (Mt. 28:​18-20) Ongerung, a Jehovah a mla omekngerachel er a rechanghel el mo olengeseu er kid. (Och. 14:6) Ongedei, a Jehovah mla meskid a chedaol reng er ngii el lolengeseu er kid el dobedebek aike el tekoi el bla desuub. (Jn. 14:​25, 26) Ongeuang, e a Jehovah mla meskid a rudam me a rudos el tir obengked. Ngoeak a ngelsuil a Jehovah me a support er a rudam er kid, e ngngar ngii aike el rokui el dousbech el mo melemolem el omerk.

BOM FLEXIBLE E MOLEMOLEM EL POSITIVE

11. Ngmekera sebeched el metik er a relmuut el betok el chad sel domerk er a klumech? (Dirrek el momes er a siasing.)

¹¹ Ngmo mechitechut a rengum sel lak obetik er a rebetok el chad el ngar er a blai? Nglocha ungil a di lekau el oker: ‘Te ngar ker a rechad er a territory er ngak er chelechang?’ (Rel. 16:13) ‘Te oureor me a lechub e te shopping?’ A leuaisei e kau e ngsebechem el metik er a relmuut el betok el chad loeak omomerk er a klumech er a rael? A odam el Joshua kmo, “Ak mla metik a betok lungil techall el mo omerk er a klumech sel kurael er a stoang me a lechub ng parking lot el mora buai.” Ngii me a bechil er a Bridget a metik er a rebetok el chad el ngar er a blai sel loldingel obliil a lekebesesengei me a dirrek el ieta sils er a Sandei.—Efe. 5:​15, 16.

12. Ngmekera sebeched el mo medengei el kmo a rechad ngera te oumerang me a lechub e ngngera ngar er a uldesuir?

¹² A lsekum a rechad a diak el semeriar er a klumech, e molasem el mo medengei el kmo ngera te oumerang me a lechub ngngera ngar er a uldesuir. A Joshua me a Bridget sel longedecheduch er a rechad e te ousbech er a ker el ngar er a medal a one er a tract. El ua tiang, te ousbech er a tract el Ngua Ngera Osengem el Kirel a Biblia? e oker el kmo: “A rebebil omes er a Biblia el kmo ngbabier el mlara Dios engdi rebebil a diak. Ngera uldesuem?” Tia blechoel el muchel a cheldechedecherir lobengterir a rechad.

13. Ngera uchul me ngsebeched el melekoi el kmo kede mla kutmeklii a ngerecheled alta rechad a diak el sorir el lorrenges? (Osisechakl 27:11)

 ¹³ Mo lmuut me a lak lorrenges er kid a rechad sel domerk er a klumech me kid a mla kutmeklii a ngerecheled. E ngerang? E le kede mla rullii sel soal a Jehovah me a Jesus a doruul er ngii, kede mla rullii a sioning. (Rel. 10:42) Me a lak debetik er a chad el sebeched el mengedecheduch er ngii me a lechub e te otngeklii a klumech, e ngsebeched el dmeu a rengud e le kede medengei el kmo kede odeuir a rengul a Demad el ngar er a eanged.—Monguiu er a Osisechakl 27:11.

14. Ngera uchul me ngsebechel mo dmeu a rengud sel lsekum a kuk ta er a publisher a metik er a chad el semeriar?

¹⁴ Ngdirrek el sebechel mo dmeu a rengud sel lsekum a kuk ta er a publisher a metik er a chad el semeriar. A Ongkerongel omekesiu er a urered lomerk el mora osiik er a ririid el ngalek. Te betok a osiik er ngii e osiik er ngii er a betok el basio. Sel lebetik er a ngalek e a rokui el chad a dmeu a rengrir ngdiak di lengike el miltik er ngii. Ngdi osisiu, a meruul er a remo disaiplo ousbech er a ngelsurir a rokui el chad. Kede ousbech er a rokui el chad el mo oureor a territory, me kid el rokui a dmeu a rengud sel lomuchel a beches el chad el ngar er a miting.

BO LULTURK OSENGEM ER A BLTKIL A RENGUM EL MORA JEHOVAH ME A NGAR BITA ER KAU

15. Ngmekera ngosukid el kilungii a klemeriarreng er kid lomerk sel doltaut er a Mateus 22:​37-39? (Dirrek el momes er a siasing.)

¹⁵ Ngsebeched el kilungii a klemeriarreng er kid el mo omerk loeak sel lulturk osenged er a bltkil a rengud el mora Jehovah me a rengar bita er kid. (Monguiu er a Mateus 22:​37-39.) Ka di molatk er a deuil a rengul a Jehovah sel lomes er kid el meruul er a ureor, me a deurreng el bo lomelechesiu er ngii a rechad sel lomuchel el mesuub er a Biblia! E mdirrek el melatk er a osobel lebo lenguu tirke el kongei er a klumech el domerk er ngii.—Jn. 6:40; 1 Ti. 4:16.

16. Ngmekera sebeched el metik a deurreng el omerk er a klumech a lsekum e ngdiak el sebeched el tuobed er a blid? Mosaod a bebil example.

¹⁶ Kau, ngngar ngii a uchul me ngdiak el sebechem el mo cheroid er a blim? A leuaisei e bo lulturk osengem er aike el sebechem el meruul lochotii a bltkil a rengum el mora Jehovah me a rengar bita er kau. A Samuel me a Dania dimlak el sebechir el tuobed er a blirir er a temel a COVID-19 pandemic. Chelsel tia el kmal meringel el taem e te mle blechoel lomerk er a klumech lousbech a dengua, milluches a letter, e milsuub a  Biblia lobengterir a rechad loeak a Zoom. A Samuel a dirrek el lulemerk el mora rechad el ble le meet er tir er sel clinic el lullai a treatment er a kasinoma er ngii. Ngkmo: “A ringel a kmal sebechel ngoikid el mei er riou. Nglocha mo suebek a rengud e mesaul a bedenged me a klaumerang er kid a measem. Ngkired el metik er a deurreng el ngar er a omesiunged el mora Jehovah.” Chelsel tiakid el taem e a Dania rirebet e di mlo ngar er a bet el edei el buil. A uriul e ngmlara wheelchair el elolem el buil. Ngkmo: “Ak millasem el meruul aike el rokui el sebechek loltirakl er a blekeradel el kmla er ngii. Ngmle sebechek lomerk er a klumech el mora nurse el mle omes er ngak, e milengedecheduch er tirke el deliver a klalo er a blai. Ngdirrek el mla er ngii a ungil cheldechedechak lobengkel a chad loureor er a kombalii el kirel a ukeruul.” Me alta blekeradel er a klengar er a Samuel me a Dania uchul me ngdimlak el sebechir el meruul a betok el ua ngar er a mong, engdi te mirruul aike el sebechir e miltik er a deurreng.

17. Ngmekera sebechem el mui el ngmai a klungiolem er aika el ngeso er a uldasu el ngar tia el suobel?

¹⁷ Aike el ngeso er a uldasu el ngar tia el suobel a ungil loureor a lsekum e ngdmak a rellel. A derta er aika el ngeso er a uldasu a ua derta el ingredient er a recipe. Sel dodak a rokui el ingredients e ngmo ungil a kall. Me sel doltaut aika el rokui el ngeso er a uldasu e ngmo beot er kid oltekau a negative el tekoi el bo de feel e metik er a lmuut el klou el deurreng el omerk er a klumech.