1, 2. (a) Ngmilekerang e omuchel a chebechiil? (b) Ngera el tekoi el kirel a chebechiil a blo lodengelii tirke el kot el obekel? (Momes er a siasing er a uchelel a suobel.)

 NGUNGIL tekoi a lsekum a rechad a mo bechiil. Engdi ngmilekerang e mo er ngii a chebechiil, e ngera moktek er a chebechiil? A klemedengei er kid er tia el tekoi a rullii el mo tabesul a uldesued el kirel a chebechiil, me a klengeltengat el denguu er ngii. A Dios a milebii a kot el chad el Adam e dilu er ngii me ngmo omngakl a rokui el charm. Me a Adam a miltebengii el kmo a rokui el charm a di kakub, “e ngdi ngii a dirkak a mo chelmengel e ngelsuil.” Me a Jehovah a rirellii a Adam el kmal mo imiit a medal, e ngiluu a ta er a chiuesel a kekengel el mebii a redil. E sola e ngiluu el msang a Adam me ngmlo bechil. (Monguiu er a Genesis 2:20-24.) Me ngsebeched el mesang el kmo a chebechiil a sengk el mla er a Jehovah.

² A betok el rak er a uriul, e a Jesus a ulemelekl a tekingel a Jehovah er a lengar er a sers er a Eden el kmo: A “sechal a mo cheroid er a demal ma delal e mo obengkel a bechil, me tir el terung a mocha tal chad.” (Mt. 19:4, 5) Me sel omeruul el Dios a ngiluu a ta er a chiuesel  a kekengel a Adam el mebii a kot el redil, a uchul me tirka el obekel a mlo medengei el kmo ngdiak el kirir el mo chacheroid. A Jehovah a kmal chetil a rebechiil el chad a lorort a chebechiielir me a lechub e bo lebetok a rebecherir.

3. Ngera klou a ultutelel el moktek er a chebechiil?

³ A Adam a kmal mlo dmeu a rengul er a lebo er ngii a bechil, me ngmilengeklii el Eva. Ngikang a mlo chelmengel e ngelsuil, me te dilak el terung el kmal mle dmeu a rengrir. (Gen. 2:18) Me a klou a ultutelel el moktek er a chebechiil, a kirir a rubekel el mo oungalek el mekekii tia el beluulechad. (Gen. 1:28) Me a rengalek el sechal me a redil a kirir el mo betik a rengrir er a redemerir me a rederrir, engdi ngmo er ngii a taem e ngmo kirir el mo ileakl e kuk mo bechiil e omekeroul a telungalek er tir. Me ngmo sebechir a rechad el mekekii tia el chutem e rullii el mo baradis.

4. Ngera dilubech el mo er sel kot el chebechiil?

⁴ Tia el kot el chebechiil a miltemall er sera bo lak lolengesenges er a Jehovah a Adam me a Eva. Me “ngikel bersoech er a rechuodel,” el Satan el Diabelong a ulumulak er a Eva e dilu er ngii el kmo a bo longa er sel “kerrekar er a mo medengei a ungil ma mekngit” e ngmo mellomes a rengul. Me a belkul a tekingel a Satan a ua ledu el kmo, a lsekum ngmo kolii tia el rodech e ngmo meduch el melilt a ungil me a mekngit. Me a Eva a dimlak lolecholt a omengull el mo er a Adam el ngii a bdelul a delengcheklir er sera lekengei el mo kolii ngii el rodech el dimlak lenguu a turk er ngii er a kot el uchul. Me a Adam a ulechotii a chelitechetul e mlo diak lolengesenges er a Dios er sera lekengei el nguu a rodech er a bechil e longa er ngii.​—Och. 12:9; Gen. 2:9, 16, 17; 3:1-6.

5. Ngera kede suubii er a nger er a Adam me a Eva el mo er a Jehovah?

⁵ Me a Jehovah er sera loker er tir, e a Adam a uleltelechakl er a bechil, e dilu el kmo: “Ngikal redil el bilskak a milskak mak killii.” E a Eva a kuk uleltelechakl er a bersoech el kmo ngulumulak er ngii. (Gen. 3:12, 13) Me a Adam me a Eva a di milsaod er tir el melubet er tir er a klengit e le tir el mlo diak lolengesenges a uchul, me a Jehovah a uluukerrekeriil er tir el kmo te chad el ulemtok. Me a omerellir a kmal ungil el uleklatk el kired! Me a chebechiil a sebechel el mo ungil a lsekum a sechal me a redil a mo olengesenges er a Jehovah e kongei el mo mukngerachel el kirel a omerellir.

6. Ngmekera omosaod er a Bades er a Genesis 3:15?

⁶ Me alta e a Satan a rirellii a kmal mekngit el tekoi er a chelsel a Eden, engdi a Jehovah a mo kutmeklii a tekoi el mo uchul, e ngmo er ngii a omeltkir a rechad el kirel a ngar mederir el klebesei. E tia el omelatk a debetik er ngii er sel kot el ulaoch el medung er a Biblia. (Monguiu er a Genesis 3:15.) Tia el ulaoch a meketeklii el kmo “a uldidellel a rsechel” a “redil” a mo okngemedii a Satan. A rebetok el ungil el anghel el mesiou el ngar er a eanged a kmes a deleuill er tir me a Dios, me te di ua lebechil a Jehovah. Me a Jehovah a mo oderchii a ta er tir el me “rukemii” a bdelul a Diabelong. Me ngike el uldidellel a rsechel a redil a mo mekengii a techall el kirir a rebekongesenges el chad, me ngsebechir el mo dmeu a rengrir er a tekoi el lurridii tirke el mle kot el obekel. Me a rebekongesenges el chad a mo er ngii a techellir el mo kiei el mo cherechar er tia el chutem, el oltirakl er sel di mla moktek er a Jehovah.​—Jn. 3:16.

7. (a) Kede mes a ngera el tekoi el meketmokl er a chelsel a chebechiil er sera bo lomtok a Adam me a Eva el mei er chelechang? (b) Ngera ngmesaod a Biblia el kirel a rebechiil el sechal me a rebecherir?

⁷ Me a ultok el lerirellii a Adam me a Eva a mlo uchul a telemellel a chebechiielir me a dirrek el rokui el chebechiil el mlo er ngii er a uriul. El ua tiang, a Eva me a rokui el ngelekel el redil a mo chuarm er a ringel sel bo lomechell. E a redil a melemolem el sorir el mo obengterir a rebecherir, e a rebecherir el sechal a mo mengedereder er tir, e a lebebil er a taem e ngmo mekngit a omerellir el mo er tir el ua omeruul el domes er chelechang.  (Gen. 3:16) A Jehovah a mengerechir er a rebechiil el sechal el tir a bdelul a delengchokl el mo oubltikerreng, e dirrek el mengerechir er a rebechiil el redil el mo olengesenges er a rebecherir. (Efe. 5:33) Me a lsekum a rubekel el Kristiano a oureor el ta rengrir e ngkosadel a mondai er a chebechiielir.

8. Ngera reksi er a chebechiil el ulemuchel er a taem er a Adam el mo er a taem er a Ieleb?

⁸ A Adam me a Eva a mlo oungalek er a resechal me a redil er a uchei er a lemad. (Gen. 5:4) Me ngike el kot el ngelekir el sechal el Kain a mlo bechil a ta er a chedal er a uriul. Me a ta er a chad er a klengelakel er ngii el Lamek a kot el chad el medung er a Biblia el kmo ngmla er ngii a reteru el bechil. (Gen. 4:17, 19) Me sel taem er a Adam el mo er a taem er a Noah, e te di mle kesai el chad a milengull er a Jehovah. E a rebebil er tir a mle Abel me a Henok me a Noah me a telungalek er ngii. Me ngar er a taem er a Noah, e a re “bebil ngelekir a re chelid [“rengelekel a mera el Dios,” NW] a milseterir tirkel redil el mle klebokel, me te mlo becherir tirkel sorir el redil.” Engdi tia el omeruul a kmal mekngit, me a rengelekir tirka el anghel me a redil er tia el chutem a mle okedongall el Nefilim, e tirkang a kmal mle mekoar e mekngit a blekerdelir. Ngar er sel taem, e a “re bek el chad er a beluulchad a kmal mle dengerenger, ma mekngit el uldasu a blechoel el omekeek a uldesuir.”​—Gen. 6:1-5.

9. Ngera ngrirellii a Jehovah el mo er tirke el mekngit el chad er a taem er a Noah, e ngera klubeled el denguu er ngii?

⁹ A Jehovah a dilu el kmo, ngmo otengelii a ieleb el me er a chutem el mo okngemedeterir a rokui el mekngit el chad. A Noah el “ngikel omerk ra llemalt” a uluuchais er a rechad el kirel a merkung el Ieleb. (2 Pe. 2:5, BT) Engdi te dimlak el lorrenges er a Noah e le te kmal mle mechesang er a klengar er tir, el uldimukl er a tekoi er a chebechiil. A Jesus a ulemekesiu er a taem er a Noah el mei er a taem er kid. (Monguiu er a Mateus 24:37-39.) Chelecha el taem, e a ruumesingd el chad a diak el lorrenges er a klumech el kirel a Rengedel a Dios el domerk er ngii. Kede omerk er ngii er a uchei er a lengemed tia el mekngit el beluulechad. Ngera klubeled el desuubii er a taem er a ieleb? Ngkmal diak el kired el ngmai a tekoi er a chebechiil me a klengelakel el mo er uchei er a ngii di el tekoi me bo luchul e dobes el kmo a sils er a Jehovah a kmedu el mei.

10. (a) Ngar er a betok el beluu, e ngera el rolel a deleboes a mlo blekerdelel a klengar er tir? (b) Ngmilekera Abraham me a Sara e ochotii a ungil el kerebai er a chebechiielir?

¹⁰ A Noah me a retedei el ngelekel el sechal a di mle derta rebecherir. Engdi a uriul er a ieleb, e a rebetok el chad a mlo betok a rebecherir. Ngar er a betok el beluu, e a rechad a milechei a deleboes el omeruul me ngmlo tedebechel a klengar er tir. Me sera lolukl a Abraham me a Sara el mo er a Kanaan, e te mle iliuekl er a rechad el ngar er a deleboes, e dimlak el olecholt a omengull el kirel a chebechiil. A Jehovah a tilemall aike el mats er a Sodom me a Gomora. A Abraham a kmal mle ngodech er tirka el chad e le ngkmal mle ungil el bdelul a telungalek, e a Sara a ulechotii a ungil el kerebai el ullengesenges er ngii. (Monguiu er a 1 Petrus 3:3-6.) A Abraham a mle soal a ngelekel el Isak a bo lebechil a redil el mengull er a Jehovah. E a Isak a rirellii a osisiu el tekoi el mo er a ngelekel el Jakob, el rengelekel a mlo uchelel aike el 12 el klebliil er a Israel.

11. Ngmilekera Llach er a Moses e omekerreu er a rechad er a Israel?

¹¹ A uriul, e a Jehovah a rirellii a telbiil el lobengkel a renged er a Israel. Ngmilsterir a Llach er a Moses, el mo omekerreu er a rebechiil el sechal me a rebecherir er a omengull er tir el mo er a Jehovah. El ua tiang, ngmla er ngii a llach el kirel a chebechiil, el uldimukl er a llach el kirel a  chad el betok a bechil, me a rechad er a Israel a dimlak el kirir el mo becherir a remengull a ngodech el chelid. (Monguiu er a Duteronomi 7:3, 4.) Me sel bo er ngii a meklou el mondai er a chelsel a chebechiil, e a remechuodel a mo olengeseu er tir. Ngdirrek el mla er ngii a llach el merrob er a rechad el mengeblad, e mechechei, e dirrek el oltelechakl. Ngmle sebechir el merort a chebechiil, engdi a llach a mla er ngii el omekerreu er a derta er tir. El ua tiang, a bechiil el sechal a sebechel dortii a chebechiielel lobengkel a bechil a lsekum e “ngar ngii a le biltik el diak lungil.” (Dut. 24:1) A Biblia a diak losaod el kmo, ngera sel “diak lungil,” engdi a bechiil el sechal a diak el sebechel el ousbech er a di kekerei el mondai el mo uchul e ngmerort er a chebechiielel.​—Lev. 19:18.

12, 13. (a) Ngmle uangera omerellir a rebebil el chad el mo er a rebecherir er a taem er a Malakai? (b) A lsekum a chad a choitii a bechil e mo bechil a tang er chelecha el taem, e ngmo uchul a ngera el tellemall?

¹² Ngar sel taem er a profet el Malakai, e a rebetok el bechiil el chad er a Judea a millekoi a betok el tekoi el mo uchul e te merort a chebechiielir. Te mirruul el uaisei me bo el sebechir el mo becherir a remekekerei el redil me a lechub e te redil el dimlak losiou er a Jehovah. E ngar sel taem er a Jesus, e tirka el chad er a Judea a dirk millemolem el merort a chebechiielir el di diak a ungil el uchul. (Mt. 19:3) A Jehovah a kmal ouketui er a rechad el merort a chebechiielir el diak a ungil el uchul.​—Monguiu er a Malakai 2:13-16.

¹³ Chelecha el taem, e a Resioning er a Jehovah a kmal diak lekengei a omengeblad er a chelsel a chebechiielir, e tia el omeruul a kmal derta el lebo er ngii. Engdi a lsekum a telecholb el bechiil el chad a mo er a laokreng e dortii a chebechiielel e le ngsoal el mo bechil a ta er a chad, e diak lobult er tia el mekngit el omerellel, e ngkirel el mo mesuld a ngklel me bo el sebechel a ongdibel el melemolem el klikiid. (1 Ko. 5:11-13) A chad a kirel el ‘ochotii olechotel el kmo ngmla obult er a kngtil’ er a uchei er a lekengei er ngii el lmuut el me soiseb er a ongdibel. (Lk. 3:8; 2 Ko. 2:5-10) Ngdiak a telutk el klemengetel a taem el kirel a chad el lmuut el me soiseb er a ongdibel. Ngsebechel el mo ta el rak me a lechub e ngmo betok el rak, e a chad a mera el obult er a mekngit el omerellel e mo sebechel el lmuut el mei. Engdi ngmo lmuut er sel lemei, me ngii el chad a dirk kirel el “mor medal a Dios e ng mo oukerrekeriil” er ngii el ochotii el kmo ngmera el mla obult er a mekngit el omerellel.​—Rom 14:10-12; momes er a The Watchtower, November 15, 1979, er a 31-32 el llel.

14. Ngera sel mle moktek er a Llach er a Moses? E ngera beches el telbiil el lulsaod er ngii a Jesus?

¹⁴ A rechad er a Israel a mle kirir el oltirakl er a Llach er a Moses el kuk betok er a 1,500 el rak. Tia el Llach a ngilsuterir a rechedal a Dios er a betok el tekoi. El ua tiang, ngulemesterir a rechad a omellach el ngosuterir el sumechokl a mondai er a telungalek, e dirrek el ulemekrael er tir el mo lmuut er a lemei a Mesias. (Gal. 3:23, 24) Me sera lemad a Jesus, e ngmlo ulebongel er a Llach er a Moses, e a Dios a rirellii a beches el telbiil. (Heb. 8:6) Me nguaisei, engdi a bebil er a tekoi el lekilengei er ngii a Llach er a Moses, a dikea el kirir a Rekristiano er chelechang el oltirakl er ngii.

15. (a) Ngerang a llach er a chebechiil el kirir a Rekristiano el ngar er a ongdibel el oltirakl er ngii? (b) Ngoeak a ngera el rolel, e a Kristiano a sebechel el merort er a chebechiielel?

¹⁵ A ta er a taem e a rebebil Farisi a uleker a ker er a Jesus el kirel a chebechiil. Me a Jesus a ulenger el kmo, a Dios a kilengei a omerort el chebechiil er a rechad er a Israel el oltirakl er a Llach er a Moses, alta e tia el omeruul a dimlak lekengei er ngii er a kot el uchul. (Mt. 19:6-8) Me a nger er a Jesus a ochotii el kmo, a llechul a Dios er a uchelel el kirel a chebechiil a kirir a Rekristiano  el mo oltirakl er ngii er chelechang. (1 Ti. 3:2, 12) Me a tekoi el “tal chelechad” a belkul a kmo a rebechiil a kirir el di melemolem el bechiil. Me a bltkil a rengrir el mo er a Dios me tir el terung a rulleterir me ngsorir el melemolem el dmak. Me a bechiil el chad el soal merort er a chebechiielel el diak el deleboes el omeruul a uchul, a diak a ilmeklel el mo bechil a ta er a chad. (Mt. 19:9) Engdi a chad a locha mo kongei el ousubes er a bechil, el ngii a mlo er a deleboes el omeruul. E tiang a dilubech el mo er a profet el Hosea el uluusubes er a bechil el Gomer el ngii a mirruul a deleboes. Me a dirrek el sel taem el Jehovah a uluusubes er tirke el mera el ulebult er a kngterir el chad er a Israel. (Hos. 3:1-5) Me a lmuut el tang, a lsekum a chad a medengei el kmo a bechil a mlo er a deleboes e kongei el lmuut el mo bad el obengkel, e tiang a ochotii el kmo ngmla ousubes er ngii. Me seikid e ngmo diak a ungil el uchul e ngmerort er a chebechiielel.

16. Ngera ngdilu Jesus el kirir a remesobil?

¹⁶ A Jesus a dilu el kmo ngdi ta el deleboes el omeruul a mo uchul e a Kristiano a merort er a chebechiielel. E a uriul e ngmilsaod el kirir a rebebil el tir a kongei el di mesobil, me ngdilu el kmo: “Ngikel sebechel el nguu tial osisechakl bo lenguu.” (Mt. 19:10-12) Me te betok a melemolem el di mesobil e le ngsorir el mesiou er a Jehovah el diak a mengesang er tir, me ngkmal kired el chemat er tir el kirel a telbiil el bla lerellii!

17. Ngera ngosuir a Kristiano el mo ungil el melilt el kmo ngmo bechiil me a lechub e ngdiak?

¹⁷ Ngera sebechel el ngosuir a chad el melilt el mo bechiil me a lechub e ngmelemolem el di mesobil? Ngkirel el di ngii el melilt el kmo ngsebechel el melemolem el di mesobil me a lechub e ngdiak. A apostol el Paulus a chilat er a remesobil el chad, engdi ngdirrek el dilu el kmo: “E ngdi ongetikaik el mor a deleboes a uchul, e a re bek el sechal bo lechur er a re becherir, ma re bek el redil me bo lechur er a re becherir.” Ngdirrek el dilu el kmo: “E ngdi lak el sebechir el osarech a rengrir, e bo le bechiil kung. Ele ng bai ungil a bo le bechiil er a lomichoech a rengrir er a ngibes er a deleboes.” Me a remesobil a kirir el mo kerekikl el melatk er a tekoi el kmo te mla mo kltmokl el mo bechiil me a lechub e ngdiak. A Paulus a dilu el kmo: “A lsekum a chad a omdasu el kmo ng diak lungil a blekerdelel el mor a ekebil el telbiil a delongelir el mo kaubuch, ele ngii el dikea loserchii a rengul el kirel, me ng omdasu el kmo ng mla mo kirel el mo bechiil, e le bor sel soal me bo le kaubuch, e ng diak le klengit.” (1 Ko. 7:2, 9, 36; 1 Ti. 4:1-3) Me a chad a diak el kirel el orreched el mo bechiil, e le ngii el kmal mla mo soal el meruul a tekoi er a durs el rebetok el mekekerei el chad a meruul. E le nglocha dirkak bo el sebechel el kutmokl a ngerechelel er a chelsel a chebechiil. Engdi a lsekum a chad a mo bechiil, e tiang a mo uchul me ngdiak lerebet er a deleboes el omeruul me a lechub engdi ngii el mengelooch er ngii.

18, 19. (a) Ngoeak a ngera el rolel, e ngomuchel a chebechiielir a Rekristiano? (b) Ngera kede mo mesaod er a ongingil el suobel?

¹⁸ A chebechiielir a Rekristiano a kirel el omuchel er a delongelel a telecholb el sechal me a redil, el tir a betik a rengrir er a Jehovah er a rengrir el rokir. Ngdirrek el kirir el kmal kaubltikerreng el terung, me ngsorir el dmak el diak a ulebengelel. A Jehovah a mo omekngeltengat er tir, e le tir el olengesenges er a ulekrael el kirel a chebechiil, el mo bechiil el di “ngara Rubak.” (1 Ko. 7:39, BT) Me a lsekum te melemolem el oltirakl a ulekrael er a Biblia, e ngkmal mo ungil a chebechiielir.

¹⁹ Me chelechang, e kede kiei er a taem er a “ulebongel er a beluulchad” me a rebetok el chad a diak lolecholt a ungil el blekeradel el kirel a ungil el chebechiil. (2 Ti. 3:1-5) Ngar er a ongingil el suobel, e kede mo mesaod a mekreos el omellach er a Biblia, el sebechel el ngosuterir a Rekristiano el mo ungil a chebechiielir, alta e te chelebangel a omelsemai er a klengar er tir. Tiang a mo ngosuterir me te melemolem el merael er a rael el mo er a diak a ulebengelel el klengar.​—Mt. 7:13, 14.