1, 2. (a) Ngmekerang a bades er a Isaia 60:22 e mla tmaut er chelecha el taem er a ulebongel? (b) Ngera ngousbech er chelechang tia el tedebechel a cheldebechelel a Jehovah el ngar er a chutem?

 ‘NGMO lmuut er a kot el kekerei e kot el ngariou el telungalek me ng mo chetengakl el ua tar a mesisiich el beluu!’ (Isa. 60:22) Aika el tekoi a toutang er chelecha el taem er a ulebongel. E le sera rak er a 2015, e te mla er ngii a 8,220,105 el mesiungel a Jehovah el tir a omerk er a klumech er a ungil chais el kirel a Rengedel a Dios er a beluulechad el rokir! Me a Dios a milsaod el kirel tia el ildois er a rechedal el kmo: “Ak mo otutii tiang el di mereched sel le mei sel kirel belsechel.” Me a cherengel a taem, e nglmuut el mo betok a ureor el kired el rokui el mo meruul. Me kid, kede meruul aike el rokui el sebeched el omerk e olisechakl el kirel a ungil chais? A rebetok el rudam me a rudos a mesiou er chelechang el regular me a lechub e te auxiliary pioneer. Me a rebebil er tir a mla melukl el mo er a bebil el beluu el mo olengeseu er a ureor er a berkel a klumech, e a rebebil a kuk teloi er a ureor er a okedecherul a Blil a Ongdibel.

² Me ngbek el rak e a bekord el 2,000 el beches el blil a ongdibel a meteketek, e dirk betok a kirel meketmokl. El ua tiang, aika el ongdibel  a ousbech er a remo mesiou el mechuodel me a remesiou er a ongdibel. Bek el rak, e a rebetok el telael el remesiou er a ongdibel a kirir el mo mesiou el mechuodel, e a rebetok el odam a kirir el mo olengeseu el mesiou er a ongdibel. Me ngbleketakl el kmo ngkmal dirk betok a ‘ureor el kirel a Rubak,’ e aikang a diak di lebo er a rudam e ngdirrek el mo er a rudos.​—1 Ko. 15:58.

3, 4. Ngua ngera uldesuem el kirel a omesiungem?

³ Monguiu er a 1 Timothy 3:1. A apostol el Paulus a chilat er a rudam el tir a “semeriar el mo mengeteklel a ikelesia.” Tirkang a ua chad el melasem el melai er a klalo el cheroid er ngii me ngtometii a chimal el mo melai er ngii. Me ka molatk er a odam el soal el mo ta er a remesiou er a ongdibel. Ngmedengei el kmo ngkirel el mo blak a rengul el omekeroul a blekerdelel a Kristiano. E sel taem el bo leta er a remesiou er a ongdibel, e ngkirel el melemolem el blak a rengul el meruul er a omesiungel me ngmo sebechel el rredemelel a ngmai a lmuut el betok el ngerachel er a chelsel ongdibel.

⁴ A rebebil el rudam me a rudos a melodech a blekerdelel a klengar er tir e le ngsorir el lmuut el olengeriakl er a omesiungir el mo er a Jehovah. El ua tiang, te locha sorir el mo pioneer, me a lechub e te mo oureor er a Bethel, me a lechub e te mo teloi er a ureor er a okedecherul a Blil a Ongdibel. Me bo desa rolel e ngsebechel a Biblia el ngosukid el rokui el mo olengeriakl er a omesiunged.

5. Te mekerang a remekekerei el chad e ousbech a klisichir el kirel a ureor er a Renged?

⁵ Ngkmal betok el rolel a omesiou el mo er a Jehovah a sebechir a remekekerei el chad el meruul e le ngdirk mesisiich a bedengir. (Monguiu er a Osisechakl 20:29.) A rebebil el mekekerei el chad el ngar er a Bethel a olengeseu el print e meruul a babier me a Biblia. E a rebetok el mekekerei el rudam me a rudos a omekedechor a Blil a Ongdibel me a lechub e te olengeseu el omekbeches. E a rekuk bebil a mo olengeseu sel lebo er ngii a meklou el telemellel a beluu. Te dirrek el ngar er ngii a rebetok el pioneer el mesuub a ngodech el omelekoi, me a lechub e te melukl el mo er a ta er a beluu el mo omerk er a ungil chais el kirel a Renged.

6-8. (a) Ngmilekerang a ta el kekerei el chad e ngodechii a uldesuel el kirel a omesiungel el mo er a Dios, me ngmlo ua ngerang? (b) Ngera el omelodech a sebechel el ngosukau el lmuut el mo olengeriakl er a omesiungem?

⁶ Kid a kot el betik a rengud er a Jehovah e kmal soad el msang aike el kot el ungil er kid. Me nguaisei, engdi kede locha dirrek el mo ua uldesuel a Aaron el ta er a odam er kid. Ngkmal mle soal el mesiou er a Dios, engdi ngdimlak el deu a rengul. Alta e ngulemais el ngar er a miting e mo oldingel a obliil er sera dirk lekekerei, me ngdilu el kmo, “Ngdimlak semeriar el meruul aika el tekoi.” Me ngmilekerang?

⁷ A Aaron a mlo blak a rengul el menguiu er a Biblia er a bek el sils, e mengetmokl er ngii el kirel a miting, e dirrek el mlo onger er a miting. Ngdirrek el mlo blechoel el meluluuch. Aika el rokui el tekoi a ngilsuir el mo olengeriakl er a omesiungel. Ngliluut el mo ungil medengelii a Jehovah e ulemuchel el mo betik a rengul er Ngii, me a uriul e ngmlo dmeu a rengul. Ngmlo pioneer, e ullengeseu er a rebebil sel lebo er ngii a meklou el telemellel a beluu, e dirrek el mlo omerk er a klumech er a ta er a beluu. E chelechang e ngmla mo ta er a remechuodel e mesiou el ngar er a Bethel. Me ngua ngera uldesuel a Aaron er chelechang? Ngdmu el kmo: “Ak mla chormii el kmo ‘ng ua ngeral ungil a Jehovah.’ Me ngokiu a klengeltengat el bla kngai, e ak medengei el kmo ak kmal belsel me ngsoak el meruul a lmuut el betok er a omesiungek, e tiang a mo uchul a betok el klengeltengat.”

⁸ A ta er a milluches er a Psalm a dilu el kmo: “Di le kau el osiik el kmo ng ua ngeral ungil a RUBAK!” Ngdirrek el dilu el kmo: “Tirkel olengesenges er a RUBAK a diak le ngesonges er a ungil  tekoi.” (Monguiu er a Psalm 34:8-10.) Me kede ungil medengei el kmo sel debsa Jehovah aike el kot el ungil er kid, e ngmo dmeu a rengud e le kede medengei el kmo kede oldeu er a rengul. E ngii a mo otutii a telbilel el kmo ngmo omekerreu er kid.

9, 10. Ngera me ngklou a ultutelel el kired el “mengiil er a Dios”?

⁹ Nglocha mo soad el meruul a lmuut el betok er a omesiunged. Engdi ngmo uangera uldesued a lsekum kede mengiil a techall er a omesiou me a lechub e kede melatk el melodech er a rolel a omesiunged el kmal kemanget el taem? Ngkmal kirel el mo klou a rengud. (Mik. 7:7) Alta e a Jehovah a mechei aika el tekoi me ngmelemolem, engdi ngulterekokl a rengud el kmo ngdi blechoel el olengeseu er kid. Ngsebeched el nguu a klubeled er a kerebil a Abraham. A Jehovah a tilbir el mo er ngii el kmo ngmo oungalek er a ngalek el sechal, engdi ngmle kirel el mengiil el betok el rak e ngmocha er ngii a Isak. Me ngar sel taem, e a Abraham a mle klou a rengul e dimlak bo lak loumerang er a Jehovah.​—Gen. 15:3, 4; 21:5; Heb. 6:12-15.

¹⁰ Ngdiak el beot el tekoi a omengiil. (Osi. 13:12) Engdi a lsekum kede di melatk er a blekeradel el dechelebangel er ngii me a kngtil a rengud, e ngrullid el kmal mo mechitechut a rengud. Me ngbai ungil a dousbech a temed el melisiich a ungil blekerdeled, el ngii a bo dousbech er sel taem el lemoterekokl er kid a ngerachel er a ongdibel.

11. Ngera el blekeradel a sebeched el omekeroul, e ngera uchul me aikang a meklou a ultutelel?

¹¹ Momekeroul a blekeradel me a duch el bo mousbech. Me sel monguiu er a Biblia e molebedebek aike el monguiu, e ngdochelii a llemesel a  rengum, e mo sebechem el ungil melatk e melilt a tekoi. Me a rudam a kmal kirir el ousbech aika el blekeradel me a duch me bo el sebechir el ungil el omekerreu er a ongdibel. (Osi. 1:1-4; Tit. 1:7-9) Me sel dosuub er a Biblia, e kede mo medengelii a uldesuel a Jehovah el kirel a betok el tekoi. Seikid e ngmo sebechel el bek el sils el dousbech aike el tekoi el bla desuub el mo melilt a tekoi el ngii a oldeu er a rengul a Jehovah. El ua tiang, ngrullid el mo ungil a omerelled el mo er a rebebil, e mo meduch el ousbech a ududed, e dirrek el mo ungil melilt a bail el doubail me a rolel a ongelaod el doruul.

12. Te mekerang a rechedal a ongdibel e ochotii el kmo ngsebeched el ultuil er tir?

¹² Bo leblak a rengum el meruul a ngerachel el moterekokl er kau. A rechedal a Dios er sera lluut el mo meleketek er a templo, e a Nehemia a mlo ousbech er a rechad el mo meruul a kakerous el ngerachel. Me ngmillilt er tirke el mle ungil a chisir el chad. Ngmle medengei el kmo tirka el chad a betik a rengrir er a Dios, me te mo blak a rengrir el meruul a ngii di el ureor el moterekokl er tir. (Neh. 7:2; 13:12, 13) Me ngdi osisiu er chelechang, tirke el blak a rengrir el oureor a mo ungil a chisir, e dirrek el mo ngmai a betok el ngerachel er a chelsel a ongdibel. (1 Ko. 4:2) Me a lsekum e ke odam me a lechub e ke odos, e ngkmal kirem el mo blak a rengum el meruul aike el rokui el ngerachel el moterekokl er kau.​—Monguiu er a 1 Timothy 5:25.

13. Ke mekerang e oukerebai er a Josef er sel taem el rechad a mo mekngit a omerellir el bedul kau?

¹³ Multuil er a Jehovah. Ke mo mekerang a lsekum a rebebil a mo mekngit a omerellir el bedul kau? Nglocha sebechem el smodii a uldesuem el mo er tir. Engdi a lsekum ke di mesosaod er kau e omdasu el kmo a uldesuem a melemalt, e ngsebechem el rullii a mondai el lmuut el mo klou. Ngsebeched el ngmai a klubeled er a kerebil a Josef, el rudam er ngii a kmal mle mekngit a omerellir el bedul ngii. Me a rechad a millekoi a blulak el kirel, e ngdirrek el mlo kelebus el kirel a tekoi el dimlak lerellii. Engdi a Josef a di mle ultuil er a Jehovah, e le ngmillatk aike el telbilel, me ngmillemolem el blak a rengul. (Psa. 105:19) Me ngar er a chelsel aike el meringel el taem er a klengar er ngii, e ngulemekeroul a ungil blekeradel el mlo ngosuir er a uriul er sera lemoterekokl er ngii a klou a ultutelel el ureor. (Gen. 41:37-44; 45:4-8) Me a lsekum a rebebil a mo mekngit a omerellir el bedul kau, e moluluuch el mo er a Jehovah el kirel a llomeserreng. Ngmo ngosukau me ngmelemolem el chelellakl a rengum e mo ungil a tekingem el mo er tir.​—Monguiu er a 1 Petrus 5:10.

14, 15. (a) Ngera uchul me ngkired el mo ‘kerekikl er kid me a tekoi el dolisechakl’? (b) Ke mekera e ngodechii a rolel a omoldingel? (Momes er a siasing er a uchelel a suobel me a baks el “ Kau, Ke Kongei el Melasem a Kuk Bebil el Rolel?”)

¹⁴ A Paulus a dilu er a Timothy me luut el mesuub el mo ungil el mesaod a Bades er a ledu el kmo: “Bo mkerekikl er kau, ma tekoi el molisechakl.” (1 Ti. 4:13, 16) A Timothy a mla mo betok el rak el olisechakl. Me ngera uchul me ngkirel el lmuut el mesuub? E le ngmle medengei el kmo a rechad me a blekeradel a mengodech. Me ngmle soal a rechad a lolemolem el lorrenges er ngii, a uchul me ngmle kirel el melemolem el olengeriakl e melodech a rolel a lolisechakl er tir. Me kid el olisechakl er chelechang, a kired el meruul er a osisiu el tekoi.

¹⁵ Ngar er a bebil el basio, e sel doldingel a obliil e ngdiak a rechad er a blai. E a kuk bebil el basio, e te ngar er ngii a rechad el ngar er a blai engdi ngdiak el sebeched el mo soiseb er a chelsel. Me a lsekum a territory a uaisei, e kau, ngsebechem el kuk ousbech er a ta er a rolel e ngmo sebechem el metik er a rechad?

16. Ngera me ngkmal ungil el tekoi a dousioning er a buai?

¹⁶ Te betok el rudam me a rudos a kmal oba deurreng sel lousioning er a buai. El uai tiang, te mo er a train station, me a bus station, me a makit,  me a dirrek el park el osiik er a rechad e mengedecheduch er tir. Ngsebechel a Sioning el omuchel el mengedecheduch er a chad el mesaod er a tekoi el dirk dilubech. Me a lechub e ngsebechel dmu ungil el tekoi el kirel a ngelekel ngii el chad me a lechub e ngoker a ker el kirel a urerel. E a lsekum a chad a kora semeriar e ngsebechel el mesaod a tekoi el ngar er a Biblia me a lechub e ngoker er a uldesuel. A rechad a blechoel el sorir el mo medengei a betok el kirel a Biblia.

17, 18. (a) Ke mekera e mo ulterekokl a rengum sel mousioning er a buai? (b) Ngera me komes er a blekerdelel a David el uleldanges er a Jehovah el klou a ultutelel?

¹⁷ Ke locha metik el kmo ngmeringel er kau a omuchel a cheldechedecham el mo er a rechad el ngar er a buai el diak modengelterir. Tia el tekoi a blo lechelebangel er ngii a Eddie el pioneer er a New York City. Engdi ngmiltik er a rolel el ngilsuir el mo ulterekokl a rengul. Ngdilu el kmo: “Ngar er a temel a omengull el telungalek er kemam, e ngak me a bechik a meruul a research el kirel a ultekengir me a uldesuir a rechad, e dirrek el oker a uldesuir a rebebil el Sioning.” Me chelechang, e a Eddie a kmal semeriar el mo ousioning er a buai.

¹⁸ Sel doldeu er a rengud er a omesiunged e deluut el mo ungil el mengedecheduch er a rechad el kirel a ungil chais, e ngobeketakl el kmo kede olengeriakl er a omesiunged. (Monguiu er a 1 Timothy 4:15.) Ngdirrek el locha sebeched el ngosuir a chad el mo ta er a mesiungel a Jehovah. A David a dilu el kmo: “Ak mo blechoel el oldanges er a RUBAK; ng diak bo kmekimd el oldanges er ngii. Ak mo oldanges er ngii el kirel a ikel bla leruul; tirkel rokui el chuarm bo le sebechir el orrenges e bo lungil a rengrir!”​—Psa. 34:1, 2.

19. Ngera uchul me a mesiungel a Jehovah a dmeu a rengul alta e a blekerdelel a klengar er ngii a kmal meringel?

¹⁹ A David a dirrek el dilu el kmo: “A rokui el blebelem e RUBAK, a mo oldanges er kau, ma re chedam a mo mereng a sulem! Te mo melekoi er a klebkellel a rengedem, e ouchais er a klisichem, ma rokui el chad a mo medengei a klisichel omerellem, ma kebkall el klengarbab er a rengedem.” (Psa. 145:10-12) Tirke el rokui el betik a rengrir er a Jehovah e blak a rengrir er ngii a kmal sorir el ouchais er a rebebil el kirel. Engdi ngmekerang a lsekum e ngsecher me a lechub e ngcheluodel a uchul, e ngmo diak el sebechem el mengoit er a klou el temem el oldingel a obliil? Lak mobes el kmo, ke oldanges er a Jehovah er a bek el taem sel mosaod el kirel, el mo er tirke el ngar er bita er kau el ua nurse me a lechub e ngtoktang. E a lsekum e ke ngar er a kelebus el klaumerang er kau a uchul, e ngdirk sebechem el ouchais er a rebebil el kirel a Jehovah, e tia mo uchul a deuil a rengul. (Osi. 27:11) Ngdirrek el kmal dmeu a rengul sel mosiou er ngii, alta e a rebebil el telungalek er kau a diak. (1 Pe. 3:1-4) Ngdirrek el ngar er a chelsel a meringel el blekeradel, e ngsebechem el oldanges er a Jehovah, e olekeed er kau er ngii, e olengeriakl er a omesiungem.

20, 21. A lsekum ngmla moterekokl er kau a lmuut el bebil el ngerachel er a cheldebechelel a Jehovah, e ngmekera e sebechem el mo uchul a klengeltengat el mo er a rebebil?

²⁰ A Jehovah a mo omekngeltengat er kau sel molemolem el olekeed er kau er ngii e mo er a tkurrebab el sebechem el mesiou er ngii. Nglocha sebechem el melodech a temem me a lechub e ngblekerdelel a klengar er kau me bo el klou a techellem el olengeseu er a rechad el mo medengei aike el ungil el telbilel a Dios. Ngdirrek el sebechem el mo olengeseu er a rudam er kau. Ka di molatk er a klungel a bltkil a rengrir a rudam me a rudos er kau sel lomes er kau el blak a rengum el olengeseu er a ongdibel.

²¹ Alta mla mo kemanget me a lechub e ngdirk kedeb el taem el dosiou er a Jehovah, engdi kid el rokui a sebeched el melemolem el olekeed er kid er ngii e olengeriakl er a omesiunged. Ngar er a ongingil el suobel, e kede mo mesaod er a rolel e ngsebeched el olengeseu er a rebebil el mo olengeriakl er a omesiungir.