NGMLE 12 a rekik er sera bo kudengei el kmo ngar er ngii a mekreos el tekoi el sebechek el merous er ngii. Ngar er a ta el sils el ongdibel, e a ta el odam a milengemedaol er ngak el mo omerk er a klumech el obengkel. Me alta e ngdirkak a ta el kuruul er tia el tekoi, engdi ak kilengei er ngii. Me aki mlo er a ta el basio e ngmilskak a bebil el babier el mesaod el kirel a Rengedel a Dios, e dmu er ngak el kmo: “Ke mo mengedecheduch er a rechad er sel bita el rael, e ngak a kuk mo er tia el bitang.” Ak di mle bekikl, engdi a kulemuchel el mengedecheduch er a rechad er a blai. Me ngkmal mlo ungil a renguk er sera krous a rokui el babier el kullab. Me ak mlo medengei el kmo a rebetok el chad a sorir aika el kumesterir.

Ngak a milechell er a rak er a 1923, er a Chatham er a Kent er a beluu er a England. Me ngar er a chelsel aike el rak er a uriul er a Kot el Mekemedil a Beluulechad, e a rechad a uleba omelatk el kmo a beluulechad a lmuut el mo ungil el beluu. Engdi sera bo lak lemotaut a uldesuir, e a rebetok el chad a mlo mekngit a rengrir. Me a rechad er a blik me ngdirrek el mlo mekngit a rengrir. Te dirrek el kmal miltirm a rengrir er a omerellir tirke el mengeteklel a klechelid er a Baptist, el di mle sorir el melai a ngarbab el deruchall er a chelsel a ikelesia er tir. Me sera bo el 9 a rekik, e a delak a mlo omais el mo er a ongdibel er a International Bible Students Association, el Resioning er a Jehovah a mo er ngii e ngar er a miting. A ta el odos a ullisechakl er kemam a rengalek a suobel el mengai a uchetemel er a Biblia me a babier el The Harp of God. Me ngkmal mle soak aike el tekoi el ksiluub.

Sel taem er a bocha kngeasek, e ngkmal mle dmeu a renguk el mesaod er a omelatk el mo er a rechad el ousbech er a Tekingel a Dios. Ak mle blechoel el oldingel a obliil el di ngak el tang, engdi sel kuk bo kuldingel el obengterir a rebebil e ak suub a betok er tir. El ua tiang, a ta er a taem e ngak me a ta er a klou el odam a uleldingel, e ngmengelakl a ta el mengeteklel a klechelid, me ak dilu el kmo: “Ngke kaming el mochang.” Me ngika el odam er ngak el mla er a rrat a mlo stob e ulleker er ngak el mo dengchokl e dmu er ngak el kmo: “Ngtecha milskau a llemeltem el mo oukerrekeriil el kmo ngtecha kaming? Bai di bo ledeu a rengud el omerk er a ungil chais el mo er a rechad, e debecherei a kerrekeriil me lengerechelel a Jehovah.” Me ngar aike el taem, e ak siluub a betok el kirel a deurreng el denguu sel ledeu a rengud el merous.​—Mateus 25:31-33; Rellir 20:35.

A ta er a klou el odam a dirrek el ulsisecheklak er a rolel e ngmo dmeu a rengud el merous. E le bebil er a taem e ngmo kired el oba kllourreng el outekangel. A bechil ngika el odam a kmal mle chetil a Resioning er a Jehovah. Me a ta er a taem e ngika el odam a ngilikak el mo er a blirir el mo melim a mekelekolt. Engdi a bechil a kmal mle  kesib a rengul er ngii e le ngtilobed el mo oldingel me ngullab a tea el ometech er kemam. Engdi ngika el odam a dimlak lengasech a rengul er ngii, e bai di ulecherechur e lmuut el ngmai aika el tea el smuk er a blil. Me a betok el rak er a uriul, e ngiluu a omeksullel el kirel tia el kllourreng er ngii er a bo lemetecholb a bechil el mo ta er a Sioning er a Jehovah.

Sera rak er a September 1939, e ngmle 16 a rekik, e a beluu er a Britain a mlo oumekemad er a beluu er a Dois. E ngar er a March 1940, e ngak me a delak a miltecholb er a Dover. E sera June 1940, e ak dengchokl er a medal a tuangel er a blik e omes er a rebetok el telael el soldau el me engelakl el ngar er a torak. Tirka tirke el silobel er a Battle of Dunkirk. Ngmle sebechek el mesang el kmo tirka el chad a mera el medektang e dikea omeltkir. Ngkmal mle soak el ouchais er tir el kirel a Rengedel a Dios me lebo er ngii a omeltkir el kirel a ngar mederir el klebesei. Ngar er a ulebongel er seikid el rak e a rechad er a Dois a ulemuchel el melub er a beluu er a Britain. Me ngmle bek el kesus el rechad er a Dois a suebek el meliuekl er bebul a belumam. Me aki kmal mo medakt sel ki morrenges a oto er a dub el ousisuau sel lemereberebet. Me sel bo lekukuk e ngdi telemall a beluu me a blai. Aika el tekoi a ngilsukak el lmuut el mo ulterekokl a renguk el kmo, ngdi ta el Rengedel a Dios a meskak a omelatk el kirel a ngar medad el klebesei.

Sera 1941, e ak ulemuchel el mesiou el mui el taem, me ngkmal mlo dmeu a renguk er a klengar er ngak. Ak uluureor er a Royal Dockyard er a beluu er a Chatham, el mesuub el meleketek a diall. E tia el ureor a mle sorir a rebetok el chad el meruul er ngii, e le ngdirrek el mle betok a ungil el benefit er ngii. Engdi a remesiungel a Jehovah a mla mo medengei el kmo a Rekristiano a diak el kirir el teloi a mekemad er a delongelel a beluu. Me sera 1941, e aki mla mo medengei el kmo ngdiak el kiram el oureor a ngii di el ureor el meruul a klekedall er a mekemad. (Johanes 18:36) E tia el urerek a dirrek el mirruul a submarine, me ak tilbir el kmo ngmla mo kirek el choitii, e mo omuchel el mesiou el mui el taem. Me sel mle kot el urerek a mlo mesiou el ngar er a Cirencester, el klebokel el beluu er a Cotswolds.

E sera bo el 18 a rekik, e ak mlo kelebus el 9 el buil e le ngdimlak kengei el mo soldau. Ngkmal mlo mekngit a renguk er a losisebak er a kelebus e lechesmerii a chesimer me di blo lengak el tang. Engdi ngdi mle telkib el taem e a remengkar me a rekelebus a ulemuchel el oker er a uchul me ak ngar tiang, me ngkmal mlo ungil a renguk el mesaod er a klaumerang er ngak el mo er tir.

Me sera ktobed er a kelebus, e ak mlo obengkel a Leonard Smith, * e aki omerk er a klumech er a chelsel a betok el hang er a belumam er a Kent. A rechad er a Nazi a mlo sorir el melub er a beluu er a London, me ngmle kirir el suebek el me okiu a bebul a beluu er a Kent. Me ngulemuchel er a 1944, e a betok el telael el dub el ngklel a doodlebugs, a mle ruebet er a belumam. E aika el dub a ua  jet plane el diak a omekall er ngii engdi ngmui er a dub. Me sel kim rengesii a mesil er a jet plane el mad, e aki medengei el kmo ngdi chelsel a sesei el bio, e ngruebet el obuu. Me a rechad a kmal mle medakt. Seikid el taem e aki milsuub el obengkel a ta el telungalek el chedam me a chedil me a retedei el ngelekir. Me a lebebil e aki ngar er a cheungel a tebel el rruul er a deel me ngsebechel el omekerreu er kemam a lsekum ngmongkangk a blai. Me a cherengel a taem e tirka el telungalek a mlo metecholb.

A uriul er a mekemad, e ak milsiou el mui el taem er a beluu er a dimes er a Ireland el eru el rak. Me aki mirrael el mo er a bek el obliil el ouchais er a rechad el kmo aki missionari, e ulsiik a blai el sebecham el mo kiei er ngii. Aki dirrek el mirrous a magazine er a rechad el merael er a rael. Engdi tia el beluu a kuk ngodech er a beluu er a England. A oumesingd er a rechad a omdasu el kmo ngklebelung a uldesuam el omdasu el kmo a rechad er a chelsel tia el beluu el di chedal a klechelid er a Katolik a mo kongei el orrenges er kemam! Me a ta el taem el chad a ulemecheracheb er kemam, e aki mlo ouchais er a bulis, e ngdmu er kemam el kmo: “Me ak mekerang?” Ngdimlak ki mutebengii el kmo, a reprist a lmuut el klou a klisichir er a rebulis. A rechad a oriid a urerir a lsekum te kongei el ngmai a babilengam. E kemam a mlodik er a blai el kim kiliei er ngii.

Aki silubii el kmo sel ki bo er a ta er a basio e ngungil a kim omerk er a klumech er aike el basio el reprist er ngii a diak lodengelkemam. Me ngmle kiram el merael el mo cheroid er sel basio el kim kiliei er ngii e omuchel er isei e mengedecheduch er a rechad. E a uriul e aki mo mengedecheduch er a rechad er aike el telkib el kmeed el basio. Me ngar er a Kilkenny, e aki milsuub el obengkel a kekerei el chad el 3 el taem er a ta el sandei, alta e te mla er ngii a remekngit el chad el omecheracheb er kemam. Me ngak el kmal mle soak el olisechakl el kirel a Biblia a uchul me ngmlo soak el mo missionari, me ak lilechesii a ongtik el mo er a Watchtower Bible School of Gilead.

Me a uriul er a 5 el buil el kusuub el ngar a beluu er a New York, e a reteua er kemam a tilobed er a skuul er a Gilead, e mlodurech el mo mesiou el ngar er a mekekerei el iungs er a Caribbean Sea. Me ngar er a November 1948, e aki tilobed er a New York e merael el ngar er a 59-el fit a klemengetel (18-meter) el sailboat el ngklel a Sibia. Ngdirkak a ta el kngar er a omerael er a daob, engdi ak kmal mle semeriar. A Gust Maki el dirrek el tilobed er a skuul a kmal meduch el omekall er a daob, me ngulsisecheklemam er aike el beot el rolel a domekall a ears el ua sel dorerd er a ears e doltengel er ngii. Ngdirrek el ulsisecheklemam el mo meduch el ousbech a compass me a rolel e kede omekall el omtok er a eolt. Me ngar er a 30 el klebesei el omerollam er a chelsel a meringel el daob, e a Gust a kmal mle meduch el omekall el ngoikemam el mo er a beluu er a Bahamas.

Me a uriul er a sesei el buil el ki molisechakl er a chelsel aike el mekekerei el iungs er a Bahamas, e aki ulemekall el mo er a iungs er a Leeward me a Windward. A cherridel aika el iungs a bekord el 500 el mael (800 kilometer) a delongelel er a Virgin Islands me a Trinidad. Me ngmle 5 el rak el ki molisechakl er aike el cheroid el iungs el dimlak a ta el Sioning er ngii. A lebebil e ngmo betok el sandei el diak el sebecham el oldurokl e melai a mail. Engdi ngkmal mle dmeu a rengmam el omerk er a klumech el kirel a Jehovah el ngar er aika el cheroid el iungs!​—Jeremia 31:10.

Me sel ki momak er a olekerodel, e a rechad er a beluu a me kldibel el semeriar el omes el kmo aki rua techang. A rebebil a dirkak a ta el lesa bilas el ua bilsengam, e dirrek el ketengir el mesterir a rebecheleleu el chad. A rechad er aika el iungs a kmal mle ungil a blekerdelir e mle ungil medengelii a Biblia, e blechoel el omeskemam a odimam el ngikel me a avocado me a peanuts. Alta e ngmle kosekodel a basio er a bilsengam, engdi ngmle sebecham  el meruul a kelam, e mechiuaiu er ngii, e mesilek a selekelam.

Aki mo er a beluu me aki oldingel e mengedecheduch er a rechad el ta el sils. E dmu er tir el kmo ngmo er ngii a cheldecheduch el mesaod er a Biblia. E sel bo lekebesengei, e aki chosmii a kambalang er a bilas. E sel domes e te mera el klebokel a rechad el merael el mei, e le olbdelir a ua omisebusech el btuch el metengela er a bukl. A lebebil e te mo dart el chad a mei, e di oker a ker el mo osoi. Ngkmal ungil a rengrir el mengitakl, me aki mle type a bebil er a chelitakl e mesterir. E sel ki mongitakl e ngkmal mo blak a rengmam el teuang me ngmo sebechir a rechad el mengitakl el obengkemam, e mera el ungil a chiklir. Me tiang a mera el mle taem er a deurreng!

Me a uriul er a omesubel a Biblia, e a rebebil er tir a obengkemam el merael el mo er a bebil el telungalek el ki bo moldingel er tir, me bo lsebechir el teloi er a omesuub. E a uriul er a sesei el sandei el kim ngar er a ta el basio, e ngmo kiram el kuk merael. Me aki blechoel el olengit er tirke el kmal semeriar, me te melemolem el mesuub lobengterir a rebebil el mo lmuut er sel ki mluut el mong. Me ngkmal mle dmeu a rengmam el omes er a rebebil er tir el blak a rengrir er a ngerachel el moterekekla er tir.

Me ngar er a chelsel a betok er aika el iungs e ngdi meseked er a re tourist er chelechang, engdi sel taem e ngmle chelellakl el basio el oumellemau a debel, e di chelechol me a kerrekar el palm trees. Me aki blechoel el omekall sel leklebesei el ngar er a ta er a iungs el mo er a tang. E a demul a melechesokl er bita er a bilsengam, e di oto er a bilas el merael er a daob a omorrenges er ngii. E a dichel a buil er bebul a daob a ua didech el dmiich el bedul a uchul a eanged.

Me a uriul er a 5 el rak el kusiou el ngar aika el iungs, e aki ulemekall el mo er a Puerto Rico el mo melai er a beches el bilas el ngar er ngii a mesil er ngii. Me sera ki bong, e ak miltik er a Maxine Boyd el klebokel el odos el mle missionari e kmal mlo soak. Ngikang a kmal blak a rengul el mesiou el ulemuchel er a dirk lekekerei el redil. E a uriul e ngmlo missionari er a Dominican Republic el mo lmuut er a rak er a 1950, el sel taem el llach er a Katolik a uleldik er ngii er tia el beluu. E ngak a mle chad er a diall a uchul, me ngmla er ngii a babilengek el sebechek el kiei er tia el beluu el ta el buil. E a uriul e ngmle kirek el omekall el mo er aike el iungs me ak mo cheroid el betok el rak. Me ak mlo omdasu el kmo, ‘A lsekum ngsoak ngika el redil e ngkirek el mereched el subedii.’ Me ngdi mle chelsel a 3 el sandei e ak ullengit er ngii el mo bechik, me a uriul er a 6 el sandei e aki mlo bechiil. Me ngak me a Maxine a mlo kiram el mesiou el missionari er a beluu er a Puerto Rico, me tiang a mlo ulebongel er a omerollek el ngar er a diall.

Sera 1956, e aki ulemuchel er a ureram el merael el oldingel a ongdibel, me ngkmal mle dmeu a rengmam el oldingel er a rudam er kemam. Te betok er tir a kmal mle chebuul. El ua sel beluu er a Potala Pastillo, e ngmla er ngii a eru el telungalek, el Sioning er a Jehovah el kmal mle betok a rengelekir, me ak mle blechoel el ousekool a flute e te orrenges. Ak uleker er a ta er tirka el mekekerei el Hilda a ngklel el mo obengkemam el mo oldingel. E ngdilu er ngak el kmo: “Ngkmal soak, engdi ngdiak a oecherek.” Me aki milechar a oecherel me ngulebengkemam el mo oldingel. Betok el rak er a uriul e ngak me a Maxine a mlo oldingel er a Brooklyn er a rak er a 1972, e a odos el dirk tilobed er a Skuul er a Gilead a mle mengedecheduch er kemam. Ngikang a mengetmokl er ngii el mo mesiou er a beluu er a Ecuador, e dilu el kmo: “Kemiu, ngdiak mdengchak? Ngak ngike el kekerei el ngalek er a Pastillo el dimlak a oecherek.” Ngka Hilda! Me ngkmal mlo dmeu a rengmam el mesang me aki di lilangel!

Ngar er a rak er a 1960, e aki ulemuchel el mesiou el ngar er a obis er kid er a Puerto Rico, el ngar er a kekerei el blai el ngar er a beluu er a Santurce, San Juan. Me a kot el uchul, e ngak me a Lennart Johnson a mirruul a oumesingd el ureor. Ngii me a bechil a mle kot el Sioning el ngar er a beluu er a Dominican Republic, e sera 1957, e te millukl el mei er a Puerto Rico. E a uriul, e a Maxine a mlo oldurokl a magazine el mo er a rechad el milluches a ongterir el sorir el menguiu. Me a chelsel a ta el sandei e ngodurokl a ta el telael el magazine. Ngkmal mle soal tia el urerel e le ngblechoel el melatk el kirir tirke el rokui el mesuub el kirel a Jehovah.

Ngkmal dmeu a renguk el oureor er a Bethel, e le ngmeskak a techellek me a kuusbech a klisichek el mesiou er a Jehovah. Engdi tiang a diak lebeot el tekoi. El ua tiang, ngar sel kot el klou el ongdibel er a Puerto Rico er a rak er a 1967, e ngkmal mlo meringel er ngak el remuul a rokui el tekoi el mle kirek el meruul. E a Nathan Knorr el ngii a uluungerachel er a cheldebechel er a Resioning er a Jehovah, a mlei er a Puerto Rico. Ngulemdasu el kmo ngdimlak kungil el kutmokl a rolel a olidiuul el kirir a remissionari el mlei er tia el beluu, alta e ak riruul a ngerechelek. Me a uriul e ngmle meringel el mellach er ngak el kirel a bo dungil el kltmokl, e dirrek el dilu el kmo ngdiak el deu a rengul el kirek. Me ngdimlak el soak el omtok er ngii, engdi ak mlo omdasu el kmo ngdimlak lemelemalt a omerellel el bedul ngak, me ngmlo telkib el taem el mekngit a uldesuek. Engdi ngak me a Maxine er sera ki mluut  el mesang a Brother Knorr, e ngulemekedong er kemam el mo er a blil e mirruul a kelam e aki omengur.

Ngmle betok el taem el ki bo moldingel er a rechad er a blimam er a England. E a demak a dimlak lekengei er a klemerang engdi ngak me a delak a kilengei. Me sel taem el rudam el ngar er a Bethel a me oldingel er a belumam, e a delak a blechoel el oltuchakl er tir el me kiei lobengkemam. Me a demak a ulemes er tirka el odam el kmal mle ngariou a rengrir. Te kuk mle ngodech a omerellir er tirke el mengeteklel a klechelid el ulengesechii a rengul er a betok el rak er uchei. Me sera rak er a 1962, e a demak a mlo metecholb el mo ta er a Sioning er a Jehovah.

Me ngika el betik er a renguk el bechik el Maxine a mlad er sera 2011. Ak kmal omes el beduluchei el kirel a taem er a okiis e bo kisang, e kmal dmeu a renguk sel kulatk er ngii! Ngar er a chelsel aike el 58 el rak el ki mdak, e ngmlo sebecham el mesang a ildisir a Resioning er a Jehovah er a Puerto Rico el mle bekord el 650 e ngmasech el mo 26,000! E sera 2013, e a obis er a Puerto Rico a mlo dmak ngii me a obis er a Merikel, e te ulemekedong er ngak el mo mesiou el ngar er a Wallkill, er a New York. Me ngar er aike el mereko el 60 el rak el kusiou el ngar aike el iungs, e ak melatk el kmo ak di ua coquí, er a Puerto Rico el ngii a merael a chisel el dechedech el mengitakl el kmo, ko-kee, ko-kee sel lekebesengei. Ngkmal mle dmeu a renguk el ngar er a Puerto Rico, engdi chelechang e ngkuk mla mo temek el merael.

Ngdirk dmeu a renguk el mesiou er a Dios el ngar er a Bethel. Chelechang e a rekik a mla engelakl er a 90, e a urerek a melisiich er a rechad el ngar er a Bethel. Sera kot el mei er a Wallkill, e ak mla melisiich er a rudam me a rudos el kuk betok er a 600 a ildisir. A rebebil el me omes er ngak a sorir el mesaod a mondai er tir me a mondai er a telungalek er tir. Me a rebebil a osiik a ngesou er a rolel e ngsebechir el mo ungil el mesiou el ngar er a Bethel. Ngdirrek el ngar er ngii a rebebil el osiik a ngesou, e le tir el dirk mlo bechiil me a lechub e te mlo mesiou el pioneer. Ak kurrenges er a rokui el chad el me mengedecheduch er ngak, e sel lebo er ngii a techellek e ak blechoel el dmu er tir el kmo: “‘A Dios a soal ngikel ungil a rengul e olengeseu.’ Me bo ledeu a rengum er a urerem e le ngmo er a Jehovah.”​—2 Korinth 9:7.

A lsekum e ngsoam el mo dmeu a rengum el ngar er a Bethel me a lechub e ngii di leker, e ngkirem el melatk er sel uchul me ngklou a ultutelel tia el ureor el moruul er ngii. A rokui el tekoi el doruul er a Bethel a omesiou el mo er a Dios. E tiang a ngosuir “ngikel blak a rengul e mellomes a rengul el mesiou” el mo omesterir a kelir a rudam el meliuekl er a beluulechad. (Mateus 24:45) Me a dosiou er a Jehovah er a ngii di el basio e tiang a meskid a techelled el mo oldanges er ngii. Me bo ledeu a rengud el meruul aike el tekoi el soal a doruul e le “Dios a soal ngikel ungil a rengul e olengeseu.”