NGAR ER A BEBIL el rolel, e a reblak a rengrir el mesuub er a Biblia a di uai a rechad el osiik a kolt. Tirka el mesuub a kirir el meringel el oureor e melemolem el osiik a Bades er a Biblia el kirel a llomeserreng. Me a dosiik er a llomeserreng, e ngera el edei el tekoi a kired el meruul el ua chad el osiik a kolt?

Ka mkora melatk el merael er a tkul a omoachel, e mesa kekerei el bad el mengeldoech el medidiich er a sils. Me ke mocha terrob el nguu e ungil a rengum le ke mla metik er a kolt. Tiang a kuk kekerei er sel medal a mekebud e meringel a skel a domekesiu er ngii el mo er a mekreos el diamond. Me kulterekokl el lmuut el osiik ngii el kolt.

Me ngdi osisiu el locha diak mobes er sel kot el taem el ta er a Resioning er a Jehovah a ileko er a blim el mesaod a omelatk el debetik er a Biblia. Me ke locha melatk er a taem el blo modengei aike el tekoi el di uai a kolt. E tia locha mlo uaisei er a omkot el mesa ngklel a Dios el Jehovah er a Biblia. (Psalm 83:18) Ke dirrek el locha mlo medengei el kmo ngsebechem el mo sechelil a Jehovah. (Jakobus 2:23) Me ke locha di mle mereched el melechesuar el kmo, ke mla metik er a lmuut el ungil el tekoi el kuk ungil er a kolt, me ngsokom el lmuut el osiik a betok el mekreos el tekoi.

A tebtebil a kolt a lebebil er a taem e ngmo mechudel er a chelsel me a lechub e ngtkul a omoachel. E a ngklel tiang a alluvial gold. Me a chelsel a sesei el buil, e a meringel a urerel el chad el osiik a kolt a sebechel el metik a mla mechudel el tebtebil a kolt el mla mo er ngii a berredel el cheral a sebechel el kuk betok er a 10 el telael el udoud.

Me sera omomuchel el mesuub a Biblia el obengkel a ta er a Sioning er a Jehovah e ke locha ulemelechesiu er kau el ua chad el osiik e metik a kolt. Me a dmolech el omelebedebekem er a derta er aike el bades er a Biblia a ulterekokl el kilungii a klemedengei er kau e dirrek el mo olengeriakl er a omesiungem. Me sel morriter aika el klemerang er a Biblia, e ke suubii a rolel e ke mlo kmeed er a Jehovah e melemolem el ngar er a bltikerreng er ngii, e oba omelatk er a diak a ulebengelel el klengar er a ngar medad.​—Jakobus 4:8; Jude 20, 21.

Me kedi ua chad el osiik a mekreos el alluvial gold, el uleba blakerreng el osiik a mekreos el tekoi er a klereng.  Me a uriul er a omosuub aike el meklou a belkul el uchetemel a Bades, e ngmlo uchul me ke ulengeriakl el mo rullii a telbilel a rengum e mlo metecholb.​—Mateus 28:19, 20.

A chad el osiik a kolt a sebechel el metik er a kolt el ngar er a bad. A bebil er aika el bad a ngar er ngii a ungil a klungel el kolt er a chelsel a uchul, me ngmo kirel el omached er ngii e melai er a kolt el ngar er a chelsel. Ngmeringel er kid el mesa kolt er a chelsel a bad sel dekot el omes er ngii. E ngera uchul? E le klou el bad a sebechel el di ngar er ngii a di 0.3 troy ounce el bekord el (10 gram) el kolt el ngar er a chelsel! Me nguaisei, engdi a chad el osiik a kolt a medengelii a kerresel tia el kolt me ngblak a rengul el melai er ngii.

Me ngar er ngii a tekoi el kirel a chad el meruul er a uriul er a lesuub aike el “uchelel osisechakl el kirel a Kristus.” (Hebru 6:1, 2) Ngkirel el blak a rengul el mesuub el mo medengei a beches el tekoi el ngar er a omesubel a Biblia. Me ngera sebechem el meruul er ngii me lsebechel a omesubem er a Biblia el mo uchul a klungiolem alta ke mla mesuub a Bades el betok el rak?

Molemolem el oba blakerreng el mesuub, e momtab a meklou a ultutelel el tekoi. E le blakerreng er kau a mo uchul e ngsebechem el metik a mekreos el tekoi el uchul a llomeserreng me a ulekrael el ngar er a Bades. (Rom 11:33) A lsoam el menglou er a klemedengei er kau er a Bades, e bo mungil el ousbech aike el research tools el ngar er a omelekingem. Moba kllourreng e mosiik a ulekrael me a nger er a kerim el kirel a Biblia. E moker er a rebebil el kirel a bades me a suobel el bla lebetik el kmo ngileakl el olengeseu e melisiich er tir. E mouchais aike el kuk bla betik er sel taem el mosuub er a Tekingel a Dios.

Me nguaisei, engdi a moktek er kau a diak di lsoam el menglou er a klemedengei er kau er a tekoi. A apostol el Paulus a milengelechel el kmo, “a ikel lodenge chad a koididiur a rengul.” (1 Korinth 8:1) Mada molemolem el oba klengariourreng e bo lemesisiich a klaumerang er kau. A temel a omengull el telungalek me a omesubel a Biblia el di kau el tang a ngosukau me ke melemolem el kiei el oltirakl a llechul a Jehovah, e dirrek el rullau el mo semeriar el olengeseu er a rebebil. E a ngaruchei er ngii, e ngmo dmeu a rengum e le ke mla metik a tekoi el kuk mekreos er a kolt.​—Osisechakl 3:13, 14.