“A ROKUI el mekemad el mlo er ngii er a uchei, a diak el sebechel el mekesiur a rengelel a klengar el mla er ngii er a beluu er a Europe.” Me a Ongkerongel er a September 1, 1915, a milsaod er a kot el mekemad er a beluulechad, el lulemerk er ngii el mo er a 30 el meklou el beluu er a beluulechad. Me a mekngit el omeruul el mo er a rechad a uchul me a Ongkerongel a millekoi el kmo: “A ureor er a [Renged] a mlo soal el meterrob el ileakl el ngar er a beluu er a Dois me a France.”

A Remesuub er a Biblia a mle chelebangel a uldikel el mla er ngii er a oumesingd el beluu er a beluulechad, a uchul me ngdimlak lecherrungel a klemedengei er tir er a deruchellir el Kristiano el diak el lomekbitang er a tekoi er a mekemad. Me nguaisei, engdi ngmle ulterekokl a rengrir el mo omerk er a ungil chais. A odam el Wilhelm Hildebrandt a mle soal el mo teloi er a ureor er a Renged me ngilai a babilengel el The Bible Students Monthly el tekoi er a France. Ngdimlak el ngar er a beluu er a France el omerk er a klumech el mui el taem, me a lechub e ng (colporteur), ngbai mla er tia el beluu el soldau er a Dois. Ngika el odam el mle ua cheraro, a uluubail a bilir a resoldau e omerk er a klumech el mlo uchul me a re mle engelakl el chad er a France a mle mechas a rengrir er ngii.

A tekoi el llechukl er a The Watch Tower a ulechotii el kmo, a rebebil er a Remesuub er a Biblia el chad er a Dois a mle sorir el mo teloi er a ureor er a Renged alta e te mle soldau. A Brother Lemke el ngii a mle soldau el Navy a uluuchais el kmo, te mla er ngii a resoldau el ledilak el mle semeriar er a ungil chais me ngmilluches el kmo “Ngmo lmuut er ak ngar er a diall, e ak mirridm a rodech el oldanges er a Jehovah.”

A Georg Kayser a mle ta er a resoldau, engdi uriul e ngmlo remei el ta er a remesiungel a Dios. Ngera dilubech? Ngmla er ngii a rolel e ngiluu a ta er a babilengir a Remesuub er a Biblia el mlo uchul, e ngmlo medengelii a klemerang e kmal mlo mekreos er a rengul. Tiang a mlo uchul, e ngmlo diak el soldau e mlo meruul a ureor el diak el chelsechusem er a klsoldau. Me a uriul er a mekemad e ngmlo mesiou el ta er a blak a rengul el pioneer el betok el rak.

Me alta e a Remesuub er a Biblia a dimlak el bleketakl a klemedengei er tir el kmo, ngdiak el kirir el omekbitang er a tekoi er a mekemad, engdi uldesuir me a blekerdelir a kmal mle ngodech er a uldesuir me a blekerdelir a rechad el mle sorir a tekoi er a mekemad. Me a rechad er a balatiks me a remengeteklel a klechelid a millisiich er a uldasu el kmo, a bebil el beluu a kuk ungil er a bebil, engdi Remesuub er a Biblia a millemolem el omes el kirel a “King er a  Budech.” (Isaia 9:6) Me alta e a rebebil a dimlak lemesisiich el oltngakl er a tekoi er a mekemad, engdi a ta er a mle uchetemel a klaumerang er tir, a mlocholt er a tekingel a Konrad Mörtter el ngii a Mesuub er a Biblia er a ledu el kmo, “Ngmle bleketakl a klemedengei er ngak er a tekingel a Dios el kmo a Rekristiano a diak el kirir el omekoad.”​—Exodus 20:13. *

Ngar er a beluu er a Dois, e a llecherir a dimlak el kengei er a chad el chetil mo soldau el ukltkel a uchul. Tiang a mlo uchul me a 20 el Remesuub er a Biblia a uleltngakl a ngii di el tekoi el mo mengesechusem er tir er a klsoldau. A bebil er tir a lullekoi er tir el kmo ngmekngit a bderrir el uai a Gustav Kujath, el lengiluu el loia er a blai el blirir a remekngit a bderrir e ulemsa kar me ngmillai. A Hans Hölterhoff a dirrek el uleltngakl er a tekoi er a klsoldau me ngmlo kelebus, engdi ngdirrek el uleltngakl a ngii di el bedengel a ureor el chelsechusem er a tekoi er a klsoldau. A remengkar er a resoldau a mililii er a straitjacket el mo lmuut er a bo lak lolechesiu a rsel a ochil. Sera bo lak el oureor tia el tekoi el mlo er ngii el melemall a klaumerang er ngii, e a remengkar a uluumulak er ngii el kmo te mo mekodir. Me nguaisei engdi Hans a millemolem el blak a rengul el mo lmuut er a bo lemerek a mekemad.

A rebebil er a rudam el mle teloi er a klsoldau a dimlak el kengei el mo olab a klekedall er a mekemad, me a lechub e loruul a ureor el oumekemad er a rebebil. * A Johannes Rauthe a uleltirakl er tia el tekoi me ngmlodurokl el mo oureor er a railways. E a Konrad Mörtter a mle chad er a ukeruul, e a Reinhold Weber a mle nurse. A August Krafzig a mle dmeu a rengul er a urerel el dimlak el bo loumekemad. Tirka el Remesuub er a Biblia me a rebebil el uai tir a mle ulterekokl a rengrir er a omesiungir el mo er a Jehovah, el okiu a klemedengei el ulebang el kirel a blakerreng me a bltikerreng.

Me a blekerdelir a Remesuub er a Biblia er a temel a mekemad a mlo uchul a mesisiich el omerritel el kirel aike el tekoi el loruul. Aike el ongingil el rak e a Remesuub er a Biblia er a beluu er a Dois a mlo chelebangel a betok el telael el ultutakl er a kort el kirel a urerir er a berkel a klumech. Me a Branch office el ngar er a Dois a milekdebechii a ta er a obis el kirel a tekoi er a llach er a Bethel el ngar er a Magdeburg el mo olengeseu el kirel a llemeltir el omerk er a klumech.

A Resioning er a Jehovah a ulengeriakl a klemedengei er tir el kmo ngmo diak el lomekbitang er a tekoi er a mekemad. Me sera lomuchel a ongeru el mekemad er a beluulechad, e te millemolem el diak lomekbitang er a tekoi er a mekemad, e milengikiid er tir er a ngii di el tekoi er a mekemad. Tiang a mlo uchul me te ulemes er tir el ua cherrouel a beluu er a Dois, me te kmal mlo meringel el omekcharm er tir. Engdi tiang a mo ta er a suobel el “Milengai er a Omesodel a Reksi er Kid.”​—Milengai er a omesodel a reksi er kid er a Central Europe.