1. Ngera el ulaoch a ledillii a Isaia el kirel a Jesus, e ngera uchul me tia melisiich er kid?

 A ULOCHEL a Isaia el kirel a Jesus Kristus a melisiich e meskid a omelatk. A Isaia a ulemlaoch el kmo a Jesus a “diak bo loukerrekeriil el okiu a ikel le ues ma ikel le renges” e ngbai “mo melemalt el oukerrekeriil er a re mechebuul.” (Isaia 11:3, 4) Me ngera me tia melisiich er kid? E le kede kiei er a chelsel a beluulechad el di mui er a omengetukel, me a rechad a oukerrekeriil er a ta er a chad el okiu aike el lomes el tekoi. Me kede kmal ousbech er a cherrungel el Chad er a Kerrekeriil el ngii a Jesus el kmal diak a ta el bo loukerrekeriil er kid loeak aike el lomes!

2. Ngera ngmilengelechel er kid a Jesus el mo meruul, e ngera kede mo mesaod er tia el suobel?

² Bek el sils e ngdi ngar ngii a uldesued el kirir a rebebil. Engdi kid a diak deua Jesus el cherrungel, me a uldesued a dirrek el diak lecherrungel. Me ngbeot er kid el mekesuseu a uldesued el di oeak aike el tekoi el domes. Me nguaisei, engdi a Jesus a milengelechel el kmo: “Lako moukerrekeriil el di kirel a ues, e bai moukerrekeriil a melemalt el kerrekeriil.” (Johanes 7:24, BT) Me a Jesus a kmal soal a bo doukerebai er ngii e bo lak doukerrekeriil er a rechad el lokiu aike el tekoi el domes. Me ngar tia el suobel, e kede mo mesaod a edei el tekoi el sebechel mengesuseu a uldesued el ngii a belual a chad me a  lechub e ngchiro er a chad, me a ildisel a ududel, me a dirrek el rekil. E ngar er a derta er aika el tekoi, e kede mo suubii a rolel e ngsebeched lolengesenges er a Jesus, e dirrek el mo diak doukerrekeriil lokiu aike el tekoi el domes.

3, 4. (a) Ngera me a Petrus a ngildechii a uldesuel bedul a rechad er a Chisentael? (Momes er a siasing er a uchelel a suobel.) (b) A Jehovah, ngulsisecheklii a Petrus er a ngera el beches el tekoi?

³ Ka di molatk er a uldesuel a Petrus er sera lemodurech el mora Sesarea, el belual a Kornelius el chad er a Chisentael! (Rellir 10:17-29) Ngika el Petrus a mlukeroul el oumerang el kmo a Rechisentael a diak leklikiid el chad. Engdi ngar ngii a bebil el tekoi el dirk dilubech el ngildechii a uldesuel. El ua tiang, ngmilsa ues el mlara Dios. (Rellir 10:9-16) Ngar tia el ues, e ngmilsa ua teletelel a sheets el mui er a bek el bedengel a diak leklikiid el charm el metengelang er a eanged. E a ngor a dilu er ngii el kmo: “Petrus, bekiis el omekoad e mongang!” Me a Petrus a uleltngakl er ngii, e a ngor a kmo: “A ikel bla ledu Dios el kmo ng klikiid, lak momdasu el kmo ng diak le klikiid.” Me a uriul er tia el ues, e a Petrus a dimlak bo lodengelii a belkul a tekoi el ngor a ouchais er ngii. E ngar iseikid el taem, e a ruderchelel a Kornelius a meremang. Me a chedaol reng a ulemekrael er a Petrus el mora blil a Kornelius, me ngmirrael lobengterir tirka el mlara oderuchel el mei.

⁴ Oleko Petrus a uluukerrekeriil “el di kirel a ues,” e ngdimlak lebo er a blil a Kornelius. A rechad er a Judea a kmal dimlak lsebechir el mora blirir a rechad er a Chisentael. Me ngera uchul me a Petrus a mlong? Alta e ngdirk mla er ngii a omengetukel er a rengul el bedul a rechad er a Chisentael, engdi a ues el lilsang me a ulekrael er a chedaol reng er a Dios a ngildechii a uldesuel. Me a uriul er a lerengesii a Kornelius el mengedecheduch e ngdilu el kmo: “Chelecha e ak meral mocha medengei el kmo a Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rellir 10:34, 35, BT) Me tia el beches el tekoi a kmal ble lesemeriar er ngii a Petrus, e dirrek el ngar ngii a bo lerellii el mora rokui el Kristiano. El okiu a ngera el rolel?

5. (a) A Jehovah, ngsoal a rokui el Kristiano a bo lodengelii a ngera el tekoi? (b) Alta kede mla mo medengelii a klemerang, engdi ngera el uldasu a dirk sebeched el mo obang?

⁵ A Jehovah a uluusbech er a Petrus el mo ngosuterir a rokui el Kristiano el mo medengei el kmo Ngii a kmal diak longetukel. Ngar er a osengel a Jehovah, e ngdiak a belkul er ngii a chiro me a belual me a kleblilel me a lechub a omelekingel a chad. A lsekum kede meluu er a Dios e meruul a llemalt, e ngkongei er kid. (Galatia 3:26-28; Ocholt 7:9, 10) Kau a locha medengelii tia el tekoi. Engdi ngua ngera uldesuem oleko ke mlukeroul er a beluu me a lechub a telungalek el ngar ngii a omengetukel er a chelsel? Ke locha mo omdasu el kmo kau a diak mongetukel, engdi kau, ngdirk ngar ngii a techellem el mo mengetukel er a rechad? A Petrus a ngilsuterir a rechad el mo medengei el kmo a Dios a diak longetukel, engdi ngdirk ngmilengetukel. (Galatia 2:11-14) Me kede mekerang e mo olengesenges er a Jesus e mo diak doukerrekeriil er a rechad lokiu aike el tekoi el domes?

6. (a) Ngera sebechel ngosukid el mo diak dongetukel? (b) Ngmilekera report er a ta el betok a ngerechelel el odam e ochotii a uldesuel?

 ⁶ A lsoad el mo medengei el kmo kede dirk mengetukel, e ngungil a di lekid el merriter er kid. Ngkired el mo omekesiu a blekerdeled el mora aike el desuub er a Tekingel a Dios. (Psalm 119:105) Ngdirrek el sebeched el oker er a sechelid a lsekum ngmtebengii el kmo kede dirk mengetukel, e le ngdiak lsebeched el di kid el mtebengii tia el tekoi. (Galatia 2:11, 14) Kede locha kmal mla mo smau aika el blekerdeled me ngmeringel er kid el mtebengii el kmo ngar ngii a omengetukel er a rengud. Tia el tekoi a dilubech el mora ta el betok a ngerechelel el odam. Ngmilluches er a report er ngii el kirir a rubekel el kmal blak a rengrir el mesiou el mui el taem. Ngike el bechiil el sechal a mle chad er a klebliil el betok el chad a omes er tir el ua lengariou el chad. Me ngika el betok a ngerechelel el odam a liluches a betok el ungil tekoi el kirel ngika el bechiil sechal, engdi ngdirrek el dilu el kmo: “Alta e ngika el bechiil sechal a chad er [tia el beluu], engdi a blekerdelel me a rolel a klengar er ngii a ngosuterir a rebebil el mo medengei el kmo alta e kede chedal [tia el kebliil], engdi ngdiak lebelkul a kmo a klengar er kid a kikiongel e chebuul el ua rebetok el chedal [tiaikid] el kebliil.” Me ngera kede suubii er tiang? Alta ngbetok a ngerecheled er a cheldebechelel a Jehovah, engdi ngkired el di kid el merriter er kid e kongei a ngeso el dengai me bo el sebeched el mo medengei el kmo, kede dirk mengetukel me a lechub e ngdiak. Me ngera dirrek el sebeched el remuul?

7. Kede mekera ochotii el kmo a ‘reng er kid a mla mesasech’?

⁷ A lsekum a ‘reng er kid a mla mesasech,’ e kede nguu a bltikerreng el mtechir a omengetukel. (2 Korinth 6:11-13, BT) Me kau, ngdi soam el mengoit a temem lobengterir a rechad el di ua chiro er a bedengem, me a beluam me a kleblilem me a lechub a omelekingem? A lsekum e nguaisei, e bo molasem el mengoit a temem lobengterir a rebebil. Ngsebechem el mengemedaol er a rudam me a rudos er kau el kakerous a blekerdelel a klengar er tir el mo obengkem loldingel a obliil. Me a lechub e ke omekedong er tir el mo omengur er a blim me a lechub e kom dmak el kldibel e milil. (Rellir 16:14, 15) E a cherengel a taem, e ngmukeroul a bltikerreng er a chelsel a rengum el mo uchul e ngmo diak a basio er a omengetukel er a chelsel. Me chelechang e bo dosaod er a kuk ta er a rolel e ngdirk ngar ngii a techelled el mo oukerrekeriil “el di kirel a ues.”

8. Ngera sebeched el suubii er a Levitikus 19:15 el kirel a osenged el bedul a iltetel a chad me a lechub e ngchelebulel?

⁸ A osenged el bedul a rebebil a sebechel mo ultuil er a iltetir a rechad me a lechub a chelebulir. A Levitikus 19:15 a kmo: “Bo bliochel e melemalt sel momiich a tekoi el okiu a llach; lak molab el mor a re mechebuul, ma lechub e medakt er a re meteet.” Ngoeak a ngera el rolel e a osenged el bedul a iltetel a chad me a lechub a chelebulel a sebechel ngar ngii a lerellii er a uldesued el bedul ngii?

9. Ngera el klemerang el tekoi a lulluches el kirel a Salomon? E tia ngosisecheklid el kirel a ngerang?

⁹ A Salomon a mlukrael el mo meluches er tia el kmal mekngit a rengud er ngii el blekeradel el  kmo: “Ng diak a chad el soal a chebuul chad, ng mo lmuut er a ngar bitar ngii me ng diak el soal ngii, ngdi re meteet a betok a re sechelirir.” (Osisechakl 14:20) Me tia ngera ngosisecheklid er ngii? A lsekum ngdiak dekerekikl, e nglocha mo soad el omak a klausechelei er kid lobengterir a rudam el merau e mo mengemikr er a remechebuul. Ngera uchul me ngkdekudel el tekoi a lsekum kede mo oukerrekeriil er a rechad el ultuil er aike el ngar ngii er tir me aike el diak?

10. A Jakobus, ngmilengelechel er a Rekristiano el kirel a ngera el mondai?

¹⁰ A lsekum kede oukerekeriil er a rudam er kid el ultuil er a iltetir me a lechub a chelebulir, e ngsebeched el toketek a klekakeakl er a chelsel a ongdibel. E tia el blekeradel a dilubech er a chelsel a bebil el ongdibel er a irechar, me a Jakobus a milengelechel er tirke el Kristiano el kirel. (Monguiu er a Jakobus 2:1-4.) Me ngdiak el kired el mechei a klekakeakl me lebo er ngii er a chelsel a ongdibel. Me a leuaisei, e kede mekerang e oibngid me lak doukerrekeriil er a rechad el ultuil er aike el ngar ngii er tir?

11. A kloklel a chad, ngar ngii a lerellii er a deleuill er ngii lobengkel a Jehovah? Mosaod.

¹¹ Ngkmal kired el mo omes er a rudam er kid el ua osengel a Jehovah. A chad el mekreos er a osengel a Jehovah a diak lultuil er a kmo ngmerau me a lechub e ngchebuul. A ildisel a ududed me a lechub a klokled a diak a ngera lerellii er a deleuill er kid lobengkel a Jehovah. Ngkmal klemerang a tekingel a Jesus el kmo “ng kmal meringel er a re merau el chad el mo soiseb er a Rengedel a eanged,” engdi ngdimlak ledu el kmo  ngdiak lsebechel. (Mateus 19:23) A Jesus a dirrek el dilu el kmo: “Kom ngeltengat a re mechebuul, ele Rengedel a Dios a klokliu!” (Lukas 6:20) Engdi tiang a diak lebelkul a kmo a rokui el mechebuul a mo orrenges er a Jesus e dirrek el mo ngmai a ileakl el klengeltengat. E le te mle betok a remechebuul el dimlak bo loltirakl er a Jesus. Me a klemerang el tekoi a kmo, ngdiak el sebeched loukerrekeriil er a deleuill er a chad lobengkel a Jehovah el okiu a kloklel.

12. A Bades, ngolisechakl a ngerang el kirir a remerau me a remechebuul?

¹² Ngar er a delongelir a rechedal a Jehovah e te ngar ngii a rudam me a rudos el merau me a dirrek el remechebuul. Engdi te rokui el betik a rengrir er a Jehovah e mesiou er ngii er a rengrir el rokir. Me a Bades a mengelechel er a remeteet me lak “lultuil a rengrir er a ikel di mo remiid el ilteet, e bai lotuil a rengrir er a Dios.” (Monguiu er a 1 Timothy 6:17-19.) E a Tekingel a Dios a mengelechel er a rokui el mesiungel a Jehovah el merau me a remechebuul el kmo ngkdekudel tekoi a bo lebetik a rengud er a udoud. (1 Timothy 6:9, 10) Me a lsekum kede mo omes er a rudam er kid el ua osengel a Jehovah, e ngmo diak doukerrekeriil er tir lultuil er aike el ngar er ngii er tir me a lechub aike el diak er tir. Engdi ngkuk mekerang el kirel a rekil a chad? Tiang ngungil uchul me ke oukerrekeriil er a rebebil?

13. Ngera ngosisecheklid er ngii a Biblia el kirel a dolecholt a omengull el mora remechudela el chad?

¹³ A Biblia a blechoel mesaod el kmo ngkmal kired el mo olecholt a omengull el mora remechudela el chad. A Levitikus 19:32 a kmo: “Mocholt omengull er kemiu el bedul a re mechuodel e mongull er tir, ele kom meluu er ngak.” E a Osisechakl 16:31 a ouchais er kid el kmo “A kemanget el klengar a omeksullel a melemalt el chad, ma cheball el chui a krone er a klebkall.” Me a Paulus a ulemeklatk er a Timothy me lak lolekoi a mekngit el mora remechudelang e bai bo lomekerreu er tir el ua le demal. (1 Timothy 5:1, 2) Me alta e a Timothy a mla er ngii a ngerechelel el omekrael er a remechudela lodam er ngii, engdi ngmle kirel blechoel lolecholt er a omengull me a klechubechub el mo er tir.

14. Ngoingerang a ungil taem el dosmechokl er a chad el ngii a klou er kid?

¹⁴ E kuk mekerang a lsekum a ta er a chudela el chad a durengul el mora klengit me a lechub e ngmelisiich a tekoi el diak lekengei er ngii a Jehovah? A Jehovah a kmal diak lekengei lousubes er a chad el mle durengul mora klengit, el mo lmuut er a klou el chad el rebetok a oba omengull el bedulngii. Ka momtab er a omellach el debetik er ngii er a Isaia 65:20, NW el kmo: “Ngike el mo er a klengit a mo medebeakl alta e ngkiei el mo 100 a rekil.” Kede metik er a osisiu el omellach el ngar er a ues el lilsang a Esekiel. (Esekiel 9:5-7) Me a kot el klou a ultutelel el tekoi a bai kired el ochotii a omengull el bedul a Jehovah el Ngike el Mle Ngar er a Irechar el Mei. (Daniel 7:9, 10, 13, 14) A omengull er kid el bedul Ngii a mo meskid a blekeu me ngmo sebeched el mesmechokl er a chad el ousbech a ngeso el diak lultuil er a rekil.​—Galatia 6:1.

15. Ngera klubeled el denguu er a apostol el Paulus el kirel a olechotel a omengull el bedul a remekekerei el rudam?

¹⁵ E kuk mekerang a lsekum a odam a dirk kekerei el chad? Tiang belkul a kmo ngdiak lerredemelel a nguu a omengull er kid? Ngdiak leuaisei. A Paulus a milluches el mora Timothy el kmo: “Lak a ngii di le chad el metetoech a medal er kau ele kau el dirk ngeasek, e bai bo lungil a blekerdelem me losuub er kau a ruumerang, er a ungil el omerellem ma tekoi er a ngerem, ma bltikerreng er kau, ma blakerreng er kau er a ngerchelem, ma klikiid el klechad er kau.” (1 Timothy 4:12) Sel taem er a loluches a Paulus, e a Timothy a locha mle bekord el 30 a rekil, me nguaisei engdi Paulus a mla oterekokl er ngii a meklou el ngerachel er a ongdibel. Me ngera  kede suubii er tiang? Ngkmal diak el kired loukerrekeriil er a remekekerei el rudam lultuil er a rekrir. Ka di molatk a rokui el tekoi el lurruul a Jesus er sel taem el dirk 33 a rekil!

16, 17. (a) Te mekera remechuodel a lolilt el kmo a odam a mla mo rredemelel a mo mesiou er a ongdibel me a lechub e ngta er a remechuodel? (b) Ngoeak a ngera el rolel e a uldesued me a lechub a siukang a sebechel mo omtok a tekoi el losaod a Bades?

¹⁶ Ngokiu a bebil siukang, e a rechad a diak lolecholt a omengull el mora remekekerei el chad. E tiang a mo uchul me a rebebil el mechuodel er a ongdibel a mo diak lekengei el melilt er a kekerei el chad el mo ta er a remesiou er a ongdibel, alta e ngmla mo rredemelel a meruul er tia el ureor. Engdi a Biblia a kmal diak a ta el losaod el kmo ngkirel mo tela rekil a odam e mochu sebechel mengilt el mo ta er a remesiou er a ongdibel me a lechub e ngmo ta er a remechuodel. (1 Timothy 3:1-10, 12, 13; Titus 1:5-9) Me a lsekum a ta er a remechuodel er a ongdibel a meruul a llach el oltirakl a siukang er a belual, e ngbelkul a kmo ngdiak loltirakl er a Tekingel a Dios. A remechuodel er a ongdibel a kmal diak el kirir loukerrekeriil er a remekekerei el chad el ultuil er a di uldesuir me a lechub a siukang er a beluu, e ngbai kirel lultuil er a Tekingel a Dios.​—2 Timothy 3:16, 17.

¹⁷ A lsekum a remechuodel er a ongdibel a diak loltirakl a llach er a Biblia el kirel a omelilt er a remo mesiou er a ongdibel me a lechub a remo mechuodel, e ngsebechir el mo mengemikr a techellir a rudam el tir a mla mo rredemelel aika el rolel a omesiou. Ngar er a ta el beluu, e a ta el mesiou er a ongdibel el odam a kmal mle blak a rengul er a ngerechelel, me a remechuodel er a ongdibel a kilengei el kmo ngmla mo rredemelel a mo ta er a remechuodel. Me nguaisei, engdi a rebebil er a remechuodel a milsaod el kmo ngika el odam a dirk ua mederir a rengalek, me ngmlo diak lekengei el ngiltii. Me ngklengiterreng e le ngika el odam a mlo diak lemengilt, e le ngosengir er ngii a uchul. E tia el uldasu a klou er a chelsel a betok el beluu er a beluulechad. Me ngkmal klou a ultutelel el kired el mo ultuil er a Biblia el diak di luldesued me a lechub e ngsiukang er a beluu. A bo doruul uaisei, e kede mo olengesenges er a Jesus, e mo diak doukerrekeriil er a rechad loltirakl er a osenged er tir.

18, 19. Ngera sebechel ngosukid el mo omes er a rudam er kid el ua osengel a Jehovah?

¹⁸ Kid a diak demecherrungel, engdi ngdirk sebeched el mesuub el mo diak dongetukel er a rechad el ua blekerdelel a Jehovah. (Rellir 10:34, 35) Me ngkmal kired el mo blechoel el kerekikl el mesuub a uleklatk el ngar er a Tekingel a Dios. Me sel bo doltaut ngii el uleklatk, e kede mo olengesenges er a omellach er a Jesus el kmo “Lako moukerrekeriil el di kirel a ues.”​—Johanes 7:24, BT.

¹⁹ Ngkmal di kmedung e a King er kid el Jesus Kristus a mo oukerrekeriil er a rokui el chad. E tia el kerrekerilel a mo meketmokl el ultuil er a melemalt el llechul a Dios, el diak lultuil er a tekoi el lomes me a lechub e ngorrenges. (Isaia 11:3, 4) Me kede kmal semeriar lomes el beduluchei el kirel tia el kmal ungil taem!