Ngera me ngdiak a ngii di el chad el kirel el post a publication er a Resioning er a Jehovah er a kuk bebil el website me a lechub e ngar er a social media?

A rebebil a omdasu el kmo kid el merous a publication el diak el ocheraol a uchul me ngsebechir el copy me a lechub e te post er a bebil er a website me a lechub e ngar er a social media. Engdi tiang a sebechel mo uchul a meklou el mondai e omtok a llechul a Terms of Use * (momes er a footnote) er a website er kid. Aika el Terms a bleketakl a omesodel el kmo ngdiak el kirel a ngii di el chad el “post a artwork, me a electronic publication, me a trademarks, me a chelitakl, me a siasing, me a video, me a lechub a suobel el ngar tia el website el ngar er a Internet (ngii di el website, me a file-sharing site, me a video-sharing site, me a lechub a social network).” E ngera uchul?

A rokui el tekoi el motobed er a website er kid a ngar ngii a copyright er ngii el belkul a kmo ngmukerreu lokiu a llach. Tiang a kmal klou a ultutelel e le ngolengeseu el merrob a mekngit el usbechel tia el website er kid. A lebebil er a taem e a rumtok a mera el osisechakl me a lmuut el bebil er a rechad el sorir el melemall er tia el urered a locha ika el babilenged er a website er tir el melasem el olechau a osengir a Resioning er a Jehovah me a relmuut el bebil er a rechad. Engdi ngar aika el website e te dirrek el locha bebil tekoi el sebechel omekerrau a rengrir a rechad. (Psalm 26:4; Osisechakl 22:5) E a rekuk bebil a mla ousbech aike el mla motobed er a website er kid me a lechub a jw.org logo el ngar er a advertisement, me a mobile app, me a dirrek a kloklir el sorir lolterau. Engdi ngokiu a llach e ngulekerreu aika el mla motobed er a website er kid me a logo er kid, a uchul me ngsebeched el mora kort e merrob er tir me lak loruul uaisei. (Osisechakl 27:12) Engdi a kort a locha diak lsebechel ngosukid a lsekum kede mechititerir a rebebil er a rechad, el mo lmuut er a rudam er kid me te post a publication er kid er a kuk ta er a website me a lechub e te ousbech er a jw.org logo er kid el olterau a kloklir.

Ngkdekudel tekoi a lsekum kede download a publication er a ta er a website el diak el jw.org. A Jehovah a omeskid a kall er a klereng el di okiu a “blak a rengul e mellomes a rengul el mesiou.” (Mateus 24:45) Ngika el “mesiou” a di ousbech aike el official website er kid el oltobed a kall er a klereng el ngii a​—www.pr418.com, me a tv.pr418.com, me a wol.pr418.com. Ngdirrek el ngar ngii a edei el official app el kirel a mobile device er kid el​—JW Language^®, me a JW Library^®, me a JW Library Sign Language^®. Me ngar aika el site me a dirrek el apps e ngkmal diak debetik a ngii di el advertisement me a lechub e ngtekoi er tia el beluulechad er a Satan er a chelsel. Engdi a lsekum kede melai a publication er kid er a kuk ta er a website me a lechub a app, e ngkmal sebechel mo kdekudel e le rechad el meruul a sebechir el ngmodech a tekoi e otuu er a chelsel.​—Psalm 18:26; 19:8.

Me a lmuut el tang, a lsekum kede post aike el mla motobed er a website er kid er aike el website el sebechir a rechad el loltobed a uldesuir el kirel, e tiang a mesterir a techellir a rumtok a mera el osisechakl me a relmuut el bebil er a rechad el mo melekoi a mekngit loltuub er a cheldebechelel a Jehovah. A rebebil er a rudam a mo outoketok er tirka el chad, e tia el omeruul a mengal mo uchul a otuub el bedul a Jehovah. Me a chouaika el omesodel a tekoi el ngar a Internet a kmal diak lemelemalt el rolel a dosmechokl er a uldesuel a chad e dolengeseu er ngii el mo medengelii a klemerang. (1 Timothy 6:3-5; 2 Timothy 2:23-25) Me a lmuut el tang, a rebebil er a rechad a mla remuul a website me a social media er tir el domes e kede mo omdasu el kmo ngmla er a cheldebecheled me a lechub a rudam er kid el chedal a Chelechad er a Ruungerachel. Engdi aikang a kmal di blulak. Ngdiak a ta el chedal a Chelechad er a Ruungerachel el ngar ngii a ileakl el Web page me a lechub a account er ngii er a ngii di el site er a social media.

Sel domekrael er a rechad el mora jw.org, e kede olengeseu er a ureor er a berkel a klumech er a “ungil chais.” (Mateus 24:14) Aika el website me a apps er kid a kmal ungil e di merael lmuut el mo ungil. Ngkmal soad a rokui el chad a bo lengai a klungiolir er ngii. Me ngsebeched el e-mail er a rebebil a copy er a babilenged me a lechub e kede odureklii a link er a website er kid el mo er tir. Ngoeak tiaikid el rolel e kede omekrael er a rechad el mo ngmai a okelel a reng er tir el okiu a di ta el rolel el ngii a “blak a rengul e mellomes a rengul el mesiou” el Jehovah a ousbech er ngii el merous a kall er a klereng.