NGAR tia el mlo merek el rak, e a rebetok el miliol el rudam el meliuekl er a beluulechad a miltutk el mo ta er a remechuodel me a remesiou er a ongdibel. Me a lsekum ke ta er tir e kulterekokl el kmal dmeu a rengum el sebechem el mesiou er a Jehovah e olengeseu er a rudam er kau el ngar er tiakid el beches el rolel.

Me ngdiak lemechas a rengud a lsekum ke kora mo suebek a rengum. A Jason el ta er a remechuodel el kekerei el chad a melekoi el kmo: “Sera kmetutk, e ak kmal mle bekikl er tia el beches el ngerachel.” A Moses me a Jeremia a ulemdasu el kmo te dimlak lerredemelel er a lenguu a beches el ngerachel el mlara Jehovah. (Exodus 4:10; Jeremia 1:6) Me a lsekum ke omdasu el uaisei, e ngera sebechem el meruul me bo el sebechem el mo ulterekokl a rengum e melemolem el olengeriakl? Ngkmal sebechem el mesuub a betok er a kerebil a Timothy.​—Rellir 16:1-3.

A Timothy a locha mle bekord el 20 a rekil er a lomuchel el omais a beluu el obengkel a apostol el Paulus. Sera lenguu tia el okedong, e nglocha ulemdasu el kmo ngdiak el rredemelel a mo olisechakl e mellach er a rebebil e le ngii el kmal dirk mle kekerei el chad. (1 Timothy 4:11, 12; 2 Timothy 1:1, 2, 7) Engdi ngdi millemolem el olengeriakl me a uriul er a teruich el rak e a Paulus a dilu er a rechad er a Filipi el kmo: “A lsekum ng ungilbesul er a rengul a Rubak, e ak uureng el kmo, bo le sebechek el oderchii a Timothy el mereched el ekong.” Me ngera uchul me a Paulus a ulemdasu el uaisei? Ngsilodii el kmo: “Ngdi ngii el tang a ua ia renguk.”​—Filipi 2:19, 20.

Ngera me a Timothy a kot el ungil el kerebai el kirir a remechuodel? Molatk aika el elolem el uchul.

1. Ngmera el ulemekerreu er a rechad. A Paulus a dilu er a rudam er a Filipi el kmo a Timothy a “mo omekerreu” er kemiu. (Filipi 2:20) Me a Timothy a mle soal a rudam a bo lolemolem el kmeed er a Jehovah, e kilengei el ousbech a temel me a klisichel el ngosuterir.

A William el mla mesiou el ta er a remechuodel el kuk betok er a 20 el rak a blechoel el melekoi er a rebeches el metutk el mo mechuodel el kmo: “Bo lebetik a rengmiu er a rudam. Momes aike el lousbech er a bai di molatk er a otutel a llach.” Lak bom ua chad el omekall er a bus el di kerekikl el mechir er sel temel el mora bus stop e bai diak lekengei el olsiseb er a rechad er a chelsel a bus.

2. Ngiluu a omesiungel el mora Jehovah el mo kot. A Paulus a dilu el kmo a Timothy a mle ngodech er tirke el chad el di “melatk a di kirir, e diak lolatk a ikel kirel a Jesus Kristus.” (Filipi 2:21, BT) A Paulus a miltebengii el kmo tirke el rudam el mle iliuekl er ngii a di mle mechesang a tekoi er a klengar er tir. A lebebil er a taem e te ngmai aike el sorir el tekoi el mo ruchei er a omesiungir el mora Jehovah, engdi Timothy a kuk mle ngodech! Sel taem er a lebo er ngii a techellel el mo menglou er a omesiungel el mora Dios, e ngmlo ua Isaia el dilu el kmo: “Ng ngak a mong! Moderchak!”​—Isaia 6:8.

Ke mekera mo oba tabesul uldasu sel moruul a tekoi el kirem me a tekoi er a ongdibel? A kot e bo moltirakl er a ulekrael er a Paulus el kmo: “Ngmilt a ikel kot el ungil.” (Filipi 1:10) E mnguu a omesiungem el mora Jehovah el mo kot. E a ongerung, mongeroid er kau er aike el tekoi el ousbech er a klou el temem me a klisichem. A Paulus a dilu er a Timothy el kmo: “Mongeroid er kau er a ngibeserreng er a klengeasek e molekeed er kau er a ungil blekeradel ma reng el oumerang, ma bltikerreng, ma chelellakl el reng.”​—2 Timothy 2:22.

3. Ngmle blak a rengul er a omesiungel el mora Jehovah. A Paulus a millekoi el kirel a Timothy el kmo: “E ngak me ngii a di ua chedam ma ngelekel el dilak el oureor el kirel a Ebangkelio.” (Filipi 2:22) A Timothy a dimlak lemesaik e  ngbai mle blak a rengul el oureor el obengkel a Paulus el mlo uchul a kmes el deleuill er tir el terung.

Ngkmal betok a ureor el loruul a cheldebechelel a Jehovah er chelecha el taem. E aikang a uchul a mera el deurreng, e ngosukid el mo kmeed er a rudam me a rudos er kid. Me a leuaisei, e bo moruul a betok el ureor el “kirel a Rubak.”​—1 Korinth 15:58.

4. Nguleltaut aike el lesiluub. A Paulus a milluches el mora Timothy el kmo: “Kau a uleltirakl chosisecheklek, ma teletelel chomerellek ma sel kulatk er ngii ma kloumera er ngak, ma kllourreng er ngak, ma bltikerreng er ngak, ma ducherreng er ngak.” (2 Timothy 3:10, BT) Me a Timothy a uleltaut aike lesiluub me ngmlukngerachel er a betok el ngerachel.​—1 Korinth 4:17.

Me ngera me ngdiak msikii a ta er a remechuodel el klou a klemedengei er ngii el sebechem el omes er ngii el ungil kerebai? A Tom el mla mo betok el rak el losiou el ta er a remechuodel a dirkak lobes er a ta el klou a klemedengei er ngii el odam el mesiou el ta er a remechuodel el ulecholt er a klemeriarreng el bedul ngii e mlo ungil osisecheklii. Me ngdmu el kmo: “Ak mle blechoel el oker er ngii a ulekrael e oltaut. E tiang a rirellak el mo ulterekokl a renguk.”

5. Ngmillemolem el di ngii el olisechakl er ngii. A Paulus a millisiich er a Timothy el kmo: “Momeksau er kau er a tekoi er a reng me bo lungil a klengar er kau el oltirakl a tekingel a Dios.” (1 Timothy 4:7) Ngmo lmuut me a lsekum a chad er a klekool a ngar ngii a coach er ngii, me ngii a dirk kirel el di ngii el olisechakl er ngii. A Paulus a milengelechel er a Timothy el kmo: “Bo le blak a rengum el menguiu a Chedaol Llechukl el mor a re chad, e mongedecheduch e molisechakl er tir . . . Moungerachel a ikal tekoi, e bo le blak a rengum er ngii, ma re bek el chad bo lomes er a ulekerulem er omesiou ma rolel cho moumerang.”​—1 Timothy 4:13-15.

Me kau me ke dirrek el kirem el melemolem el olengeriakl er a duch er kau. Bo leblak a rengum el mesuub er a Biblia, e bom kerekikl el mo medengei aike el beches el ulekrael el mlara cheldebecheled. Lak momdasu el kmo ke mla mo medengei a rokui el tekoi. Ngkmal cheleuid a lsekum e ke omdasu el kmo ke kmal meduch me ngsebechem el outekangel a ngii di el blekeradel el bom chelebangel el di diak moruul a ungil research er kau. Bai bo mua Timothy el mo “kerekikl er kau, ma tekoi el molisechakl.”​—1 Timothy 4:16.

6. Nguleltuil er a chedaol reng er a Jehovah. A Paulus er a losaod er a omesiungel a Timothy, e ngulemeklatk er ngii el kmo: “Mongkar a ikel klemerang el mloterekokl er kau el oeak a Chedaol Reng el kiei er a chelsed.” (2 Timothy 1:14) Me a Timothy a mle kirel el ultuil er a chedaol reng er a Dios.

A Donald el mla mesiou el ta er a remechuodel el betok el rak a melekoi el kmo: “A remla metutk el odam a kirir el mo mengreos er a deleuill er tir me a Dios. Tirke el meruul el uaisei a ‘merael el mo mesisiich.’ A lsekum te meluluuch el olengit er a chedaol reng er a Dios, e omekeroul a rodech er a reng, e te mera el mo klengeltengat el mora rudam er tir.”​—Psalm 84:7; 1 Petrus 4:11.

Nguchul a omelisiich sel desterir a rebeches el remesiou er a ongdibel me a remechuodel el uai kau el melemolem el olengeriakl er a omesiungir el mora Jehovah. A Jason el dulsaod er ngii er a uchelel a melekoi el kmo: “Ngar er aika el taem el kusiou el ta er a remechuodel, e ak mla suub a kmal betok e dirrek el kmal mla mo ulterekokl a renguk. E mera el dmeu a renguk er tia el ngerechelek er chelechang e omes er ngii el kmal ileakl el techall!”

Me kau, ke mo melemolem el olengeriakl er a omesiungem? A lsekum ke oltirakl er a kerebil a Timothy e ke dirrek el mo klengeltengat el mora rudam me a rudos er kau.