1. Ngera el ileakl el techall a dmeu a rengud el kirel?

NGKMAL ileakl el techall el kid a chedal a ongdibel er a Jehovah! Kede ngar er a baradis er a klereng el teloi er a rechad el oba deurreng me a budech. Me ngera basio er kau er a chelsel a ongdibel?

2. Ngera el okesiu a luluusbech er ngii a apostol Paulus er a bebil er aike el mlukreng el babilengel?

² Ngsebeched el suub a betok el kirel tiang er a okesiu el luluusbech er ngii a apostol Paulus el ngar er a mlukreng el babilengel. Ngar er a bebil er aika el babilengel, e a Paulus a ulemekesiu er a ongdibel er a bedengel a chad. Ngdirrek el ulemekesiu er a rederta el chad er a ongdibel el mora klekedellel a bedenged.​—Rom 12:4-8; 1 Ko. 12:12-27; Efe. 4:16.

3. Ngera el edei el tekoi a bo dosuub er tia el suobel?

³ Ngar tia el suobel, e kede mo mesaod a edei el meklou a ultutelel el tekoi el sebeched el suub er a okesiu er a Paulus. A kot, e kede mo mesaod el kmo a rederta er kid a ngar ngii a basio * er ngii er a chelsel a ongdibel er a Jehovah. E a ongerung, e kede mo mesaod aike el sebeched el meruul sel lebo lemeringel er kid a mesa basio er kid er a ongdibel. E a ongedei, e kede mo mesaod er a uchul me ngkired el di melemolem el meruul a ngerecheled er a chelsel a ongdibel er a Dios.

4. Ngera ngosisecheklid er ngii a Rom 12:4, 5?

⁴ A kot el tekoi el desuubii er a okesiu er a Paulus a kmo a rederta er kid a klou a ultutelir er a chelsel a telungalek er a Jehovah. A Paulus a ulemuchel er tia el okesiu el kmo: “A bedenged a betok a keskelel, e ngii el rokui a diak di losisiu a urerel. Me kid me kede ua isei el betok el chad, e di tal chelechad, el ulak a delongeled el okiu a Kristus, me kede kerous bedenged e ngdi kaukuak a delongeled.” (Rom 12:4, 5) Ngera belkul a tekingel a Paulus? Kede rokui el kakerous a ngerecheled er a chelsel a ongdibel, engdi ngmeklou a ultuteled.

5. Ngera el “sengk” a bla lebsa ongdibel a Jehovah?

⁵ Me sel molatk er tirke el ngar ngii a basio er tir er a ongdibel, e ke locha di kot e melatk er tirke el loungerachel. (1 Th. 5:12; Heb. 13:17) Nguaisei, ngokiu a Kristus, e a Jehovah a omesterir a rechad el “sengk” el mora ongdibel er Ngii. (Efe. 4:8) Tirka uldimukl er a rechedal a Chelechad er a Ruungerachel, me tirke el mla metutk el lolengeseu er tir, me a rechedal a Chelechad el Omekerreu a Obis er a Resioning er a Jehovah, me tirke el loldingel a ongdibel, me tirke lolisechakl, me a remechuodel me a remesiou er a ongdibel. Tirka el odam a mla metutk lokiu a chedaol reng el mo omekerreu er a remekreos el sib er a Jehovah e mesiou el melisiich a ongdibel.​—1 Pe. 5:2, 3.

6. A doltirakl er a 1 Thesalonika 2:6-8, e ngera lolasem el meruul er ngii a rudam el mla metutk er a chedaol reng?

⁶ A rudam a metutk er a chedaol reng el mo meruul a kakerous el ngerachel. Me ngua kakerous el klekedellel a bedenged, el ua chim me a uach el dmak el oureor el mo uchul a klungiolel a bedenged el rokir, a rudam el mla metutk er a chedaol reng a meringel el oureor el mo uchul a klungiolel a ongdibel. Te diak losiik a chetengakl, te bai melasem el meleketek e melisiich er a rudam me a rudos er tir. (Monguiu er a 1 Thesalonika 2:6-8.) Kede mereng a sulel a Jehovah er tirka el odam el ngmai aike el lousbech a rebebil el mo ngaruchei er aike el lousbech!

7. Ngera el klengeltengat a loldeu a rengrir er ngii a rebetok el ngar er a mui el taem el omesiou?

⁷ A rebebil el ngar er a ongdibel a locha miltutk el mo missionari, me a re special pioneer, me a lechub e te regular pioneer. Meliuekl er a beluulechad el rokir e a rudam me a rudos a mla nguu a berkel a klumech me a omeruul el disaiplo el mo mui el taem el urerir. Me a omelilt er tir a mla ngosuterir a rebetok el mo disaiplo er a Kristus Jesus. Me alta ngdiak lebetok a kloklir engdi Jehovah a mla mesterir a betok el ungil tekoi. (Mk. 10:29, 30) Kede kmal mengreos er tir, e oba omereng el saul el kmo te chedal a ongdibel!

8. Ngera me a rokui el publisher a meklou a ultutelir er a Jehovah?

⁸ A rudam el mla metutk me a rengar er a mui el taem el omesiou, ngdi tir a ngar ngii a basio er tir er a ongdibel? Ngkmal diak! A rokui el publisher er a ungil a chais a meklou a ultutelir el mora Dios me a ongdibel. (Rom 10:15; 1 Ko. 3:6-9) E le ta er a kot el klou a ultutelel el turrekong er a ongdibel a meruul er a remo disaiplo er a Rubak el Jesus Kristus. (Mt. 28:19, 20; 1 Ti. 2:4) Me a rokui el ngar er a ongdibel el telecholb me a rediak letelecholb el publisher a melasem el meruul er tiang el mo kot el klou a ultutelel el ureor er a klengar er tir.​—Mt. 24:14.

9. Ngera me kede mengreos er a rudos el Kristiano?

⁹ A Jehovah a mengebkall er a rudos e mesterir a basio er tir er a ongdibel. Ngmengreos er a rebechiil redil, rechedil, remelakl el  dil, me a remesobil el tir a blak a rengrir el mesiou er ngii. A Bades a mesaod er a rebetok el ungil a blekerdelir el redil el uleldeu er a rengul a Dios. Te mle ungil kerebai er a llomeserreng, klaumerang, blakerreng, blekeurreng, blekeruraurreng, me a ungil ureor. (Lk. 8:2, 3; Rel. 16:14, 15; Rom 16:3, 6; Fil. 4:3; Heb. 11:11, 31, 35) Me kede kmal oba omereng el saul el mora Jehovah e le ngar er a chelsel a ongdibel e te ngar ngii a Rekristiano el redil, el olecholt aika el osisiu el ungil blekeradel!

10. Ngera me kede mengreos er a remechudelang?

¹⁰ Kede dirrek el ngeltengat e le te betok a remechudelang er a delongeled. A bebil ongdibel a ngar ngii a remechudelang el rudam me a rudos el tir a mla mesiou er a Jehovah er a klengar er tir el rokir. A rekuk bebil el mechudelang a locha dirk mlo medengelii a klemerang. Me tirka el kldemed a locha ngar ngii a secherir el cheluodel a uchul. Aika locha uchul e ngdiak el sebechir el meruul a betok er a ongdibel me a dirrek el berkel a klumech. Me nguaisei, engdi te meruul aike el sebechir el omerk er a klumech, e ousbech a klisichir el melisiich e olisechakl er a rebebil! E kid a ngmai a klungioled er a experience er tir. Te mera el klebokel er a osengel a Jehovah me kid.​—Osi. 16:31.

11-12. Ngera el omelisiich a bla mngai er a rengeasek er a ongdibel er kau?

¹¹ Ka kuk molatk er a rengeasek er a delongeled. Te chelebangel a betok lomelsemai e le te mukeroul er tia el beluulechad el longedereder er ngii a Satan me a mekngit luldasu a mengesuseu er tir. (1 Jn. 5:19) Me nguaisei, engdi ngkmal melisiich er kid sel deseterir el onger er a miting, e lomerk er a klumech, e loba blekeu el mesebechakl er a klaumerang er tir. Me kemiu el ngeasek a kmal meklou a ultuteliu er a ongdibel er a Jehovah!​—Psa. 8:2.

¹² Me nguaisei, engdi a rebebil er a rudam me a rudos a meringel er tir a oumerang el kmo ngmeklou a ultutelir er a ongdibel. Ngera sebechel ngosukid el mo melechesuar el kmo a rederta er kid a ngar ngii a basio er kid er a ongdibel? Me bo dosaod er tiang.

13-14. Ngera me a rebebil a mo omdasu el kmo ngdiak a ultutelir er a chelsel a ongdibel?

¹³ Momtab er a ongeru el tekoi el desuubii er a okesiu er a Paulus. Ngmesaod er a mondai el lechelebangel er ngii a rebetok er chelecha el taem, el meringel er tir a oumerang el kmo ngar ngii a ultutelir er a chelsel a ongdibel. Ngmilluches el kmo: “Ma chomko uach a mo kmo ng diak le chim me ng diak le klekedellel a bedenged, me ngii a diak bo lak le telkib er a bedenged. Ma chomko ding a mo kmo, ng diak le mad me ng diak le klekedellel a bedenged, me ngii a diak bo lak le telkib er a bedenged.” (1 Ko. 12:15, 16) Me ngera ngulemeketakl er ngii a Paulus?

¹⁴ Sel momekesiu er kau er a rebebil er a chelsel a ongdibel, e ngmo meringel er kau a mesa klungel a ultutelem er a ongdibel. A rebebil el ngar er a ongdibel a ngar ngii a duch er tir el olisechakl, ungil chelderoder a tekoi el loruul, me a remeduch el mengelaod e melisiich er a rebebil. Me ke locha omdasu el kmo ngdiak el sebechem el mo uai tir. Tia ochotii el kmo ngariou a rengum e tabesul a uldesuem. (Fil. 2:3) Engdi bo mkerekikl, sel oblechoel omekesiu er kau er tirke el ngar ngii a duch er tir, e ngmo mechitechut a rengum. Me ngua lulsaod a Paulus, ke locha mo omdasu el kmo, ngdiak a basio er kau er a ongdibel. Ngera sebechel el ngosukau sel bo el uaisei a uldesuem?

15. A doltirakl er a 1 Korinth 12:4-11, e ngera kired el mo medengei el kirel a sengk el dolab?

¹⁵ Momtab er tiang: A Jehovah milsterir a rebebil er tirke el kot el Kristiano a mengasireng el sengk er a chedaol reng, engdi ngdimlak lekaisisiu a sengk el mo er tir. (Monguiu er a 1 Korinth 12:4-11.) A Jehovah a milsterir a kakerous el sengk me a duch, engdi a rederta el Kristiano a mle meklou a ultutelir. Chelecha el taem, e ngdiak dolab a mengasireng el sengk er a chedaol reng. Engdi kede dirk oltirakl er tia el omellach. Nglocha diak losisiu a duch er kid, engdi kid el rokui a meklou a ultuteled er a Jehovah.

16. Ngera el omellach er a apostol Paulus a kired el oltirakl er ngii?

 ¹⁶ Me lak domekesiu er kid er a rebebil er a Rekristiano, e bai doltirakl er a mlukreng el omellach er a apostol Paulus el kmo: “Ma ta ma tar a chad di lengii el merriter a urerel, me ng ngar ngii a ungil el le rirellii e bo lungil a rengul, e lak lomekesiu a urerel er a urerel a kuk tar a chad.”​—Gal. 6:4.

17. Ngera el klungiaol a bo dengai a doltirakl er a omellach er a Paulus?

¹⁷ A bo doltirakl er a mlukreng el omellach er a Paulus e dorriter a urered, e ngsebeched el mo medengei el kmo ngar ngii a ileakl el sengk me a duch el dolab. El ua tiang, a ta er a remechuodel a locha diak lemeduch lolisechakl sel lengar er a medal a ongdibel, engdi ngkmal meduch er a ureor el meruul er a remo disaiplo. Me a lechub e ngdiak lemeduch el choderoder a tekoi el ua rebebil mechuodel, engdi ngbeot er a rechad a mo er ngii el kirel a ulekrael er a Biblia. Me a lechub e kede medengelii el blechoel el oltuchakl er a rechad. (Heb. 13:2, 16) Me sel bo dodengei a duch er kid, e ngmo er ngii a uchul a deuil a rengud el kirel aike el sebeched el remuul el mora ongdibel. E seikid e ngmo diak demechechei er a rudam el kuk ngodech a duch er tir er kid.

18. Ngmekera domekeroul a duch er kid?

¹⁸ Me kede rokui el kakerous a basio er kid er a ongdibel engdi a urunguled a mo olengeriakl er a omesiunged e omekeroul a duch er kid. Ngokiu a cheldebechelel, e a Jehovah a omeskid a ungil osisechakl el ngosukid el mo olengeriakl. El ua tiang, sel miting er kid er a Ongeua el Ureor a meskid a ulekrael el mo meduch el omerk er a klumech. Kau ke melasem el ousbech aike el ulekrael el ngar tia el miting?

19. Ke mekera e otutii a turrekong er kau el mora Skuul el Kirir a Rumerk er a Rengedel a Dios?

¹⁹ A lmuut el ta er a kmal ungil prokuram er a osisechakl a Skuul el Kirir a Rumerk er a Rengedel a Dios. Tia el skuul a mora rudam me a rudos el ngar er a mui el taem el omesiou el rekrir a ngar er a 23 el mora 65. Ke locha omdasu el kmo ngkmal diak el sebechem el otutii tia el turrekong. Lak moruul er a list er kau er aike el uchul e ngdiak el sebechem el mong, e bai mrellii a list er kau er aike el uchul e ngsoam el mong. E mongetmokl er a rolel e ngmo sebechem el mo er tia el skuul. Ngokiu a ngelsuil a Jehovah me a dechal a rengum, e ngmo sebechem el kutmokl a tekoi el dimlak momdasu el kmo ngsebechel meketmokl.

20. Ngera kede suubii er a Rom 12:6-8?

²⁰ A ongedei el tekoi el desuubii er a okesiu er a Paulus a debetik er ngii er a Rom 12:6-8. (Monguiu.) Ngar tiang e a Paulus a lmuut el ochotii el kmo a rechad er a ongdibel a kakerous a duch er tir. Engdi chelechang e ngolterekokl er kid el mo ousbech aika el duch er kid el mo meleketek e melisiich er a ongdibel.

21-22. Ngera kede suubii er a Robert me a Felice?

²¹ Molatk er a tekoi el dilubech el mora odam el bo domekedong er ngii el Robert. A uriul er a losiou el ngar er a ta er a beluu, e ngmiltutk el mo mesiou er a Bethel el ngar er a belual. Me a rudam a millisiich er a rengul el kmo ngdimlak el ngii a uchul tia el omelodech, engdi ngdilu el kmo: “A mekngit el uldasu el kuleba el kirek el kmo, ngdimlak ketmeklii a ngerechelek er sel ta er a beluu, a milengesang er a uldesuek el kemanget el taem. Ngmlo er ngii aike el taem el mlo soak el choitii a ngerechelek er a Bethel.” Ngmilekera e lmuut el mo er ngii a deuil a rengul? A ta er a remechuodel a ulemeklatk er ngii el kmo a Jehovah a osisecheklid er aike el di mla ngerecheled me ngmo  sebechel mo klou a usbechelled er a ngerecheled er chelecha el taem. Me a Robert a milsa el kmo, ngkirel mo diak di lomdasu a mla mo merek el tekoi e bai mo ultaut a osengel er aike el sebechel el remuul er chelechang.

²² A Odam el Felice Episcopo a mlo chelebangel er a osisiu el tekoi. Ngii me a bechil a tilobed er a Skuul er a Gilead er a 1956 e mlo teloi er a ureor el oldingel a ongdibel er a Bolivia. E sera 1964, e ngmlo er ngii a ngelekir. Me a Felice a dilu el kmo: “Ngkmal mle meringel er kemam el choitii tia el kmal mle somam el ngerachel. Ak kmal di bleketakl el kmo ngmle ta el rak el di lemekngit a renguk el kirel tia el tekoi. Engdi ngokiu a ngelsuil a Jehovah, e ak ngildechii a uldesuek e mlo ultaut a osengek er a beches el ngerechelek el chedam.” Kau ke di ua uldesuel a Robert me a Felice? Ngmo mechitechut a rengum e le ngdikea molab a osisiu el ngerachel er a omesiou el mullab er a uchei? A leuaisei, e ngmo dmeu a rengum a bo lultaut a osengem er aike el sebechem el remuul er chelechang el mesiou er a Jehovah me a rudam er kau. Bo blechoel el ousbech a sengk me a duch er kau el olengeseu er a rebebil, e seikid e ke mo metik a deurreng sel moleketek er a ongdibel.

23. Ngera kired el mengoit a taem el meruul er ngii, e ngera kede mo mesaod er a ongingil el suobel?

²³ A derta er kid a mekreos er a osengel a Jehovah. Ngsoal a bo dechedal a telungalek er ngii. Me a lsekum kede mengoit a taem el melebedebek el kirel aike el sebeched el meruul el mo meleketek er a rudam me a rudos er kid e mo blak a rengud el kutmeklii a ngerecheled, e ngmo diak di domdasu el kmo ngdiak a basio er kid er a ongdibel! Engdi ngkuk uangera osenged el kirir a rebebil el ngar er a ongdibel? Ngmekera dochotii el kmo kede oba omereng el saul el kirir? Ngar er a ongingil el suobel, e kede mo mesaod er tia el klou a ultutelel el tekoi.