1. Ngera te meruul a rebetok el menglou er a omesiungir el mora Jehovah?

 NGKMAL betok a ureor el kirel meketmokl er chelecha lolekeda ulebongel er tia el mekngit el blekeradel. (Mt. 24:14; Lk. 10:2; 1 Pe. 5:2) E kid el rokui a kmal soad el mesiou er a Jehovah el mo er sel kot el tkurrebab el sebeched. Te betok a sorir el menglou omesiungir. A rebebil a sorir el mo mesiou el pioneer. A rekuk bebil a sorir el mo mesiou er a Bethel me a lechub e ngureor lomekedechor. E betok el odam a blak a rengrir el oureor el mo ta er a remesiou er a ongdibel me a lechub e ngta er a remechuodel. (1 Ti. 3:1, 8) A Jehovah a kmal dmeu a rengul sel lomes er a rechedal el losiik a bek el rolel e ngsebechir el meruul er a omesiungir el mo er ngii!​—Psa. 110:3; Isa. 6:8.

2. Nglocha mo uangera uldesuir a rebebil sel lak el sebechir el oltaut a bebil turrekong er tir er a klereng?

² Me nguaisei, engdi ngsebechel mo mechitechut a rengud a lsekum kede mla melasem el kemanget el taem e dirkak deruul aika el turrekong er kid. Me a lechub e ngmo mechitechut a rengud e le rekid me a lechub ngblekerdelel a klengar er kid a tomer er kid me ngdiak el sebeched el ngmai a bebil ileakl el techall. (Osi. 13:12) El ua tiang, a Melissa * kmal soal el mo mesiou er a Bethel me a lechub e ngmora Skuul el Kirir a Rumerk er a Rengedel a Dios engdi ngmelekoi el kmo: “Ngkmal mla engelakl a rekik me ngdiak el sebechek el ngmai chouaika el techall. A lebebil e ngkmal mo mechitechut a renguk el kirel tiang.”

3. Ngera kirir el meruul a rebebil me bo el sebechir el ngmai a lmuut el bebil er a ngerachel er omesiou?

³ A rebebil a kmal dirk ngeasek e mesisiich a bedengir engdi ngkirir el omekeroul a bebil blekeradel er a uchei er a bo el ngai a lmuut el bebil er a ngerachel. El ua tiang, a rebebil a locha kmal mellomes  a rengrir, e sebechir el di mereched el melilt a tekoi, e kongei el meruul a ureor. Me nguaisei engdi nglocha kirir el mesuub el moba kllourreng, e mo kerekikl a loruul a tekoi, e mo olecholt omengull el mora rebebil. Molatk er a experience er a Nick. Sera el lluich a rekil e ngkmal mlo mekngit a rengul e le ngdimlak lemetutk el mo ta er a remesiou er a ongdibel. Ngmelekoi el kmo: “Ak mlo omdasu el kmo nglocha ngar ngii a mekngit er ngak.” Me nguaisei engdi ngdimlak el stob lomekeroul aike el ungil blekeradel el lousbech. Ngmle blak a rengul meruul aike el sebechel er a ongdibel me a berkel a klumech. Chelecha el taem e ngmesiou el ta er a Chelechad el Omekerreu a Obis er a Resioning er a Jehovah.

4. Ngera kede mo mesaod er tia el suobel?

⁴ Kau, ngmechitechut a rengum e le ngdirkak motutii a ileakl el turrekong er kau er a klereng? A leuaisei e mouchais er a Jehovah aike el ngar er a rengum. (Psa. 37:5-7) Me a lmuut kung, molengit er a remesisiich a klaumerang er tir el odam el kirel a ulekrael el kmo ngmekera sebechem el lmuut el mo ungil el ngar er a omesiungem el mora Jehovah. E bora tkurrebab el sebechem el oltirakl aike el ledung. A omoruul uaisei e nglocha mo sebechem el otutii a turrekong er kau. Me nguaisei engdi ke locha ua Melissa el ngike el dulsaod er ngii er a uchei el kmal diak el sebechem el otutii tia el turrekong er kau. Ngmekera sebechel dirk melemolem el ngar ngii a deurreng er kau? Tia el suobel a mo mesaod a edei el tekoi el mo onger er tia el ker. (1) Ngera sebechel meskau a deurreng, (2) rolel e ke menglou er a deurreng er kau, me a (3) ngera el turrekong a sebechem el meruul el mo melechel er a deurreng er kau.

5. A lsoad el metik er a deurreng e ngngera kired loturk osenged er ngii? (Olisechakl 6:9)

⁵ A Olisechakl 6:9 a smodii a rolel e ngsebeched el metik er a deurreng. (Monguiu.) A chad el dmeu a rengul ‘er a ikel ngar ngii er ngii’ a oba omereng el saul el kirel aike el lolab. Me nguaisei engdi ngike el ‘di blechoel el ngar ngii a soal’ a oureng a tekoi el diak el sebechel ngmai. Me ngera klubeled er tiang? A lsoad el metik er a deurreng e ngkired loturk osenged er aike el tekoi el dolab me aike el tekoi el sebeched el meruul.

6. Ngera el okesiu a bo dosaod er ngii, e ngera kede mo suubii er ngii?

⁶ Ngmera el sebeched el mo dmeu a rengud er aike el ngar ngii er kid? A rebetok a kmo ngdiak le kid a rechad a soad el mesuub el kirel a beches el tekoi, me nguaisei engdi ngmera el sebechel mo dmeu a rengud “er aike el ngar ngii” er kid. Ngmekera sebeched el meruul el uaisei? Kede mo medengelii a nger er tiang sel bo dosaod er a okesiu er a Jesus el kirel a udoud el talent * el ngar er a Mateus 25:14-30. Kede mo suubii a rolel e ngsebeched el metik e menglou er a deurreng er kid er aike el techall el dolab er chelechang.

7. Mouchais er a kedeb el omesodel a okesiu er a Jesus el kirel a udoud el talent.

⁷ Ngar tia el okesiu e ngike el chad a mlora omerael. A uchei er a lorael e ngulleker er a remesiungel e milsterir a derta er tir a udoud el talent el bo longereker. * Ngika mle medengei el kmo te kakerous a duch er tir me ngmilsterir a udoud loltirakl aike el sebechir el remuul. Ngmilsa kot el mesiou a 5 el talent, ngike el ongerung a 2 el talent, e ngike el ongedei a 1 el talent. Ngike el kot me a ongeru el mesiou a mle meringel el oureor el mengereker el kirel a mastang er tir. Me nguaisei engdi ngike el ongedei a  dimlak lokerang me a mastang er ngii a silmesmechii.

8. Ngera uchul me ngike el kot el mesiou a locha kmal mle dmeu a rengul?

⁸ Ngike el kot el mesiou a locha kmal mlo dmeu a rengul er a lengai eim el talent er a mastang er ngii. Tia kmal mle klou el udoud me ngulechotii el kmo a mastang er ngii a kmal uluumerang er ngii. Engdi ngkuk mekerang ngike el ongeru el mesiou? Ngmle sebechel mo mechitechut a rengul e le ngdimlak el osisiu a ildisel a udoud el lengai. Me nguaisei, engdi ngmilekerang?

9. Ngera dimlak el dung a Jesus el kirel ngike el ongeru el mesiou? (Mateus 25:22, 23)

⁹ Monguiu er a Mateus 25:22, 23. A Jesus a dimlak ledu el kmo ngike el ongeru el mesiou a ngilasech a rengul e le ngdi ngilai a teblo el talent. Me a lechub e lolekoi el kmo ngika el mesiou a dilu el kmo: ‘Ngdi ikaikid a kulai? Ngak ngdiak kmeringel loureor el ua ngike el mesiou el ngilai a eim el talent? A lsekum a mastang er ngak a diak lodengei a meringel el urerek e ngbai ungil ak dakl aika el udoud e di kuruul aike el soak.’

10. Ngike el ongeru el mesiou ngmilekera ike el udoud el lengilai?

¹⁰ Ngika el ongeru el mesiou a di ua ngike el kot el ulemes er a ngerachel el lengiluu el kmal klou a ultutelel me ngmle meringel el oureor el kirel a mastang er ngii. Me ngika riruul aika el eru el talent el ngilai el mo eua el talent. Me a mastang er ngii a ulemekngeltengat er ngii er a meringel lurerel. Ngkmal chilat er ngii e milsa lmuut el betok el ngerachel!

11. Ngmekera sebeched el menglou er a deurreng er kid?

¹¹ Ngdi osisiu, ngsebeched el menglou er a deurreng er kid sel bo leblak a rengud el meruul  aike el sebeched er a omesiunged el mora Jehovah. Bo le ‘blak a rengum’ el omerk er a klumech e bo mui el teloi a tekoi er a ongdibel. (Rel. 18:5, BT; Heb. 10:24, 25) Bo mungil kltmokl el kirel a miting me bo el sebechem el onger el ngar er a rolel e ke melisiich er a rebebil. Bo mungil kutmokl a part er kau er a miting. E a lsekum e te olengit er kau el molengeseu er a ileakl el ureor er a ongdibel e bo molab a taem e dirrek el bo el sebeched el ultuil er kau. Lak bo momdasu el kmo a ngerachel el bla mnguu a diak el sal klou a ultutelel e kmal di waste a temem. Bo meringel el oureor el menglou a duch er kau. (Osi. 22:29) Sel mongoit er a klou el temem el meruul a tekoi el kirel a Jehovah e ke mo olengeriakl e lmuut el mo dmeu a rengum. (Gal. 6:4) Ngdirrek el mo beot er kau a mo dmeu a rengum el kirir tirke el ngmai a ngerachel el mle soam el ngmai.​—Rom 12:15; Gal. 5:26.

12. Ngera te mirruul a reteru el Sioning el menglou er a deurreng er tir?

¹² Ke dirk melatk er a Melissa el ngike el odos el mle soal el mo mesiou er a Bethel me a lechub e ngmora Skuul el Kirir a Rumerk er a Rengedel a Dios? Alta ngdimlak el sebechel ngmai aika el ileakl el techall engdi ngmelekoi el kmo: “Ak mora tkurrebab el klisichek el meruul er a omesiungek el pioneer e meruul aike el kakerous el rolel e ngsebeched el omerk er a klumech. Tia mla meskak a klou el deurreng.” E milekera Nick e mo mesisiich er a chelitechetul a rengul le ngdimlak el metutk el mo ta er a remesiou er a ongdibel? Ngkmo: “Ak mirruul aike el sebechek el ua omerk er a klumech e mo ungil onger er a miting. Ak dirrek el mle apply el mora Bethel. Ta el rak er uriul e a kulemuchel el mesiou er a Bethel.”

13. Ngera mo duubech sel lebo el blak a rengum el meruul aike el sebechem er chelechang? (Olisechakl 2:24, NW)

¹³ Me a lsekum e ngmo blak a rengud el meruul aike el sebeched er chelechang, e ngbelkul a kmo kede mo ngmai a lmuut el betok el ngerachel er a ngar medad? Nglocha sebechel, el ua ledilubech el mora Nick. Engdi a lsekum e ngdiak el sebechem el ua Melissa me nguaisei a deurreng er kau a di mo medechel sel bo leblak a rengum er a omesiungem. Ngdirrek el kmal mo dmeu a rengum er aike el moruul el kirel a Jehovah. (Monguiu er a Olisechakl 2:24, NW. *) Me a lmuut kung, ngkmal mo dmeu a rengum e le ke medengei el kmo a meringel el urerem odeuir a rengul a Mastang er kid el Jesus Kristus.

14. Ngera kired el diak dobes er ngii sel dolatk a turrekong er kid er a omesiunged el mora Jehovah?

¹⁴ A lsekum e kede blak a rengud el meruul aike el sebeched er chelechang e tia ngbelkul a kmo ngdiak a belkul a dosiik a rolel e donglou er a omesiunged el mora Jehovah? Ngkmal diak el uaisei! Ngkmal kired el meruul a turrekong el ngii a mo ngosukid el olengeriakl er a omesiunged e mo meruul a lmuut el betok el olengeseu er a rudam me a rudos er kid. Me ngsebeched el oltaut aika el turrekong sel bo lak di dolatk er a di kid e bai bo doba llomeserreng me a tabesul el uldasu el olengeseu er a rebebil.​—Osi. 11:2; Rel. 20:35.

15. Ngera bebil er a turrekong el sebechel ngosukau el menglou er a deurreng er kau?

¹⁵ Ngera el turrekong a sebechem el meruul? Molengit er a Jehovah me lengesukau el mo medengei e meruul a turrekong el sebechem el oltaut. (Osi. 16:3; Jak. 1:5) Ngsebechem el melasem el mo meruul er a ta er aike el turrekong el mildung er a  kot el parakurab el mo auxiliary me a lechub e ke regular pioneer, mesiou er a Bethel, me a lechub e ke olengeseu er a ureor el omekedechor? Me a lechub e ngsebechem el suubii a kuk ta er a omelekoi me bo el sebechem el merkii a klumech me a lechub e ke mo mesiou er a  kuk ta er a basio. Ngsebechem el mo medengei a betok el kirel a derta er aika el turrekong sel monguiu er a 10 el bliongel er a book el Organized to Do Jehovah’s Will me sel mongedecheduch er a remechuodel er a ongdibel er kau el kirel. * Sel bo leblak a rengum el oureor el kirel aika el turrekong, e a rebebil a mo mesa el kmo ke melasem el olengeriakl e dirrek el lmuut el medechel a deurreng er kau.

16. Ngera sebechem el meruul er ngii a lsekum ngdiak el sebechem el otutii a ileakl el turrekong?

¹⁶ Engdi ngkuk mekerang a lak lsebechem el oltaut aika el turrekong er chelechang? A klou a ultutelel a omsikii a turrekong el sebechem el otutii. Ka molatk a bebil er aikang.

17. A doltirakl er a 1 Timothy 4:13, 15, e ngmekera sebechel a odam el mesuub el mo ungil lolisechakl?

¹⁷ Monguiu er a 1 Timothy 4:13, 15. A lsekum e ke telecholb el odam e ngsebechem el melasem el lmuut el mo ungil mengedecheduch e olisechakl. E ngera uchul? Sel bo “le blak a rengum” el menguiu, mengedecheduch, e olisechakl e ngmo sebechem lungil ngosuterir tirke el orrenges er kau. Mrellii a turrekong er kau el mo mesuub e oltaut aike el tekoi el ngar er a brochure el Mosuub el Mo Ungil Menguiu e Molisechakl. Mosuub a derta er aika el tekoi er a temel a omesubem, e bo leblak a rengum el practice er ngii sel omngar er a blim, e molasem el loltaut er ngii sel moltobed a cheldecheduch. Moker er a auxiliary counselor er a ungil ulekrael me a lechub e te kuk bebil er a remechuodel el blak a rengrir el “omerk e olisechakl.” * (1 Ti. 5:17) Lak di molasem el mo medengei a derta er aike el suobel el ngar tia el brochure, mdirrek el melatk er a rolel e ngsebechem lousbech el  ngosuterir tirke el orrenges er kau el mo melisiich er a klaumerang er tir e mo oltaut a tekoi el losuub. Sel moruul el uaisei e ke mo menglou er a deurreng er kau me tir.

18. Ngera sebechel ngosukid el otaut a turrekong er kid er a berkel a klumech?

¹⁸ Ngngerecheled el rokui el mo omerk e meruul er a redisaiplo. (Mt. 28:19, 20; Rom 10:14) Kau, ngsoam el menglou er a duch er kau er tia el klou a ultutelel el ureor? Me moruul a turrekong er kau sel mosuub e moltaut aike el msuub er a brochure el Menguiu e Molisechakl. Ngdirrek el sebechem el metik a ngeso er a uldasu er A Klengar er Kid a Rekristiano me a Omesiunged​—Subeled er a Miting me a dirrek aike el video el olecholt er a rolel e ngsebeched el mechelii a cheldechedechad. Molasem a kakerous el tekoi el mo medengei el kmo ngerang a kmal oureor el kirem. Sel moltirakl aika el ngeso er a uldasu, e ke mo medengelii sel deurreng el diak a mo mekesiur el loba Kristiano el mla nguu a duch er ngii er a berkel a klumech.​—2 Ti. 4:5.

19. Ngmekera sebechem lomekeroul a blekeradel lodeuir a rengul a Dios?

¹⁹ Sel moruul a turrekong e lak mobes el kmo a ta er a kmal klou a ultutelel el turrekong el sebechem el meruul er ngii a mo omekeroul a blekeradel lodeuir a rengul a Dios. (Gal. 5:22, 23; Kol. 3:12; 2 Pe. 1:5-8) Ngmekera omoruul er tia el turrekong? El ua tiang, a leko ngsoam el omekeroul er a mesisiich el klaumerang. Ngsebechem el menguiu a suobel el ngar aike el babilenged el mesaod a rolel e ngsebeched el melisiich er a klaumerang er kid. Ngdirrek el mo uchul a klungiolem omomes a video er a JW Broadcasting^® el mesaod er a rudam me a rudos el ullecholt a klaumerang er a chelsel a kakerous el ringel. E a uriul e molatk a rolel e ngsebechem loukerebai er a klaumerang er tir er a klengar er kau.

20. Ngera sebeched el meruul el menglou er a deurreng er kid e mo diak bo lemechitechut a rengud?

²⁰ Me kid el rokui el locha kmal soad el meruul a lmuut el betok el kirel a Jehovah er aike el sebeched el meruul er chelechang. Ngar er a chelsel a beches el blekeradel, e ngmo sebeched el remuul el rokui. Me nguaisei, engdi sel bo doruul aike el rokui el sebeched er chelechang e ngsebeched el menglou er a deurreng er kid e mo diak bo lemechitechut a rengud er aike el diak el sebeched. E sel lmuut el klou a ultutelel a kmo kede mo msa klebkall me a odanges el mora Jehovah el ngii a “dmeu a rengul el Dios.” (1 Ti. 1:11, NW) Me a leuaisei e bo el deu a rengud er aike el techall el dolab er chelechang!