1-2. A doltirakl er a Psalm 34:8, NW e ngmekera sebeched el suubii el kmo a Jehovah mera el ungil?

KA MOLEBEDEBEK er a chad lomeskau a kall el dirkak a ta el monga er ngii. Ngsebechem el merriter er ngii, melungel er ngii, mo medengelii a recipe er ngii, me a lechub e koker tirke el mla chormii el kmo ngua ngera chazi er ngii. Me nguaisei engdi a di ta el rolel e ke mera el mo medengei a di lekau el mo chormii.

² Ngsebeched el mesuub el kmo a Jehovah kmal ungil sel donguiu er a Biblia me aike el babilenged, me sel dorrenges er a rebebil el mesaod a klengeltengat el bla lengai er a Jehovah. Me nguaisei engdi ngsebeched el mera el mo mtebengii a ungilreng er a Jehovah sel di lekid el ‘chormii’ el kmo a Jehovah mera el ungil. (Monguiu er a Psalm 34:8, NW. *) El ua tiang, okmo ngsoad el mesiou er a Jehovah el mui el taem. Tia ousbech er kid el mo omekbeot er a klengar er kid. Kede locha blechoel el menguiu er a telbilel a Jesus el kmo a denguu a Renged el mo kot e a Jehovah a mo meskid aike el dousbech, engdi ngdirkak a ta el de experience er tia el tekoi. (Mt. 6:33) Me nguaisei engdi ke dotuil a klaumerang er kid er tia el telbilel a Jesus me kede olengeasek a ocheral a klalo, kosadel a sils er kid loureor el mengereker, e mengoit er a klou el taem el omerk er a klumech. Kede meruul el uaisei e mocha mesa el kmo a Jehovah a mera el lomeskid aike el dousbech. Kede mocha ‘chormii’ el kmo a Jehovah mera el ungil.

3. A doltirakl er a Psalm 16:1, 2, e a Jehovah ngungil el mora rua techang?

³ A Jehovah a “ungil el mor a re bek el chad” el uldimukl er tirke el diak lodengelii. (Psa. 145:9; Mt. 5:45) Me nguaisei engdi  ngtokubets el ungil el mo er tirke el betik a rengrir er ngii e mesiou er ngii el oba klengar er tir el rokir. (Monguiu er a Psalm 16:1, 2) Ka molatk a bebil ungil tekoi el bla lebeskid a Jehovah.

4. A Jehovah ngomesterir tirke el omuchel lolekeed er tir er ngii a ngera el ungil tekoi?

⁴ Bek el taem el doltaut aike el desuub er a Jehovah e kede mes a ungil leruul er a klengar er kid. El ua tiang, sera dosuub el kirel a Jehovah e bo lebetik a rengud er ngii e ng ngilsukid el mo mesisiich er a uldasu me a omeruul el uchul e kede mle cheroid er ngii. (Kol. 1:21) E sel taem er a detibir a rengud el mo er ngii e demetecholb, e ngmilskid a ungil ukltked e mlo er ngii a mesisiich el deleuill er kid me ngii.​—1 Pe. 3:21.

5. Kede mekera melechesuar er a ungilreng er a Jehovah sel domerk er a klumech?

⁵ A Jehovah melemolem lomeskid a ungil tekoi sel domerk er a klumech. Kau, ke sekemerur el chad? A rebetok el chedal a Jehovah me te uaisei el sekemerur. A uchei er a obom ta er a Sioning er a Jehovah e ke locha ulemdasu el kmo ngkmal diak el sebechem el leko ke melngod er a blil a chad el diak modengelii e mengedecheduch er ngii el kirel a Biblia. Me nguaisei engdi tia mla mo tekoi el oblechoel el meruul er ngii er chelechang. Me a lmuut kung, ngoeak a ngelsuil a Jehovah e ngkmal soam el meruul er tia el ureor! E mla melechesuar er a ngelsuil el ngar er a betok el rolel. A Jehovah mla ngosukau el mo melemolem el chelellakl a rengum sel mekngit a blekerdelel a chad el momerk el mo er ngii. Ngmla ngosukau el dobedebekii a bades el le kmal luluusbech el rongesii a chad er a blai. Ngdirrek el mla ngosukau el melemolem el omerk er a klumech alta rechad a diak el sorir el orrenges.​—Jer. 20:7-9.

6. Ngmekera training lomeskid a Jehovah e ochotii a ungilreng er ngii?

⁶ A Jehovah dirrek el lochotii a ungilreng er ngii loeak sel lengesukid el mo ungil omerk er a klumech. (Jn. 6:45) Ngar er aike el miting er kid er a melengel a week e kede mes a rolel e ngsebeched lomuchel er a cheldechedechad. Kede dirrek el muchelechel el mo ousbech aikang el omerk er a klumech. A uchei e kede locha mo medakt lousbech aika el beches el rolel me nguaisei engdi sel dousbech e kede mo mtebengii el kmo aika kmal loureor er a rechad el ngar er a territory. Kede muchelechel er a miting me a meklou el ongdibel el mo ousbech aike el bebil er a rolel e kede omerk er a klumech, el ngii el tekoi a locha dirkak a ta el dousbech. Kede locha dirrek el mo medakt me nguaisei engdi sel bo dousbech aikang el ngar er a omesiunged e kede msa Jehovah a tekoi el sebechel lomekngeltengat. Ka me bo dosaod a bebil ungil tekoi el Jehovah a mo meskid sel bo doumera el ulsirs er ngii e dolasem aika el beches el rolel e ngsebeched el msa sel kot el ungil er kid. A uriul e kede mo mesaod a rolel e ngsebeched el menglou er a omesiunged.

7. Ngera el klengeltengat a bo dengai sel dolasem el menglou er a omesiunged?

⁷ Kede lmuut el mo kmeed er a Jehovah. Ka molatk er a kerebil a ta er a remechuodel el Samuel * me a bechil, el tir a mesiou er a beluu er a Colombia. Tirka kmal mle dmeu a rengrir el pioneer er a ongdibel engdi ngmle sorir el lmuut el menglou er a omesiungir e mo olengeseu er a ongdibel el ousbech a ngeso. Ngmle kirir el mengoit a bebil el tekoi me bo lsebechir el meruul er tiang. A Samuel a kmo, “Aki mlo oltaut er a Mateus 6:33 e mlo diak ki di momechar a klalo el diak ki mousbech. Me nguaisei engdi sel kot el mle meringel a melukl er a apartment er kemam. Tia mle rruul el ngar sel somam el rolel e dimlak kim blals er ngii.” Sera lebora beches el assignment er tir e te milsa el kmo te  dimlak el lousbech er a klou el udoud el mesiou er tir. A Samuel a melekoi el kmo, “Ki mla mesa Jehovah el omekrael a rolam e onger a nglungucham. Aki melechesuar el kmo ki oba kengei er ngii e dirrek el melechesuar er a bltikerreng el dirkak a ta el ki molechesuar er ngii.” Kau, ngsebechem el menglou er a omesiungem? A omoruul uaisei e ngsebechel mo ulterekokl a rengum el kmo ke lmuut el mo kmeed er a Jehovah e ngii a mo omekerreu er kau.​—Psa. 18:25. 

8. Ngera ke suub er a tekingel a Ivan me a Viktoria?

⁸ Ngmo dmeu a rengud er a omesiunged. Molatk a tekingel a Ivan me a Viktoria, el obekel el pioneer er a beluu er a Kyrgyzstan. Te ulemekbeot a klengar er tir me bo lebeot er tir a kongei a ngii di el ngerachel el ngai, el uldimukl er a ureor el omekedechor. A Ivan a kmo: “Ngmle blak a rengmam el meruul a derta el ngerachel el ki mngai. Me alta ngmesaul a bedengam er a uriul er a ureor engdi ngmle budech e ungil a rengmam le ki medengei el kmo aki uluusbech a klisicham el kirel a ureor er a Renged. Ngdirrek el kmal dmeu a rengmam er a rebeches el sechelimam me a ungil experience el ki mngilai.”​—Mk. 10:29, 30.

9. Ngera ngmirruul a odos el meringel a klengar er ngii el mo menglou er a omesiungir? E ngera mlo rsel?

⁹ Kede metik a deurreng er a omesiunged el mora Jehovah alta kede chelebangel a meringel el blekeradel. El ua tiang, a Mirreh el chudela el melakl el dil er a beluu er a West Africa, a mla retire el toktang e chelechang pioneer. Ngika ngar ngii a kmal meringel el rektel el arthritis me ngdiak el sebechel loldingel a obliil el kemanget el taem. Me nguaisei engdi ngsebechel mengoit er a klou el taem lomerk er a klumech er a buai. Ngkmal betok a return visit me a rechad el losuub a Biblia el obengterir, el bebil er tir a lebiltik er tir loeak a dengua. Ngera uchul me a Mirreh soal meruul a lmuut el betok el mora Jehovah? Ngmelekoi el kmo: “Ngkmal betik a renguk er a Jehovah me a Jesus Kristus. Me ak blechoel el meluluuch el kmo Jehovah lengesukak el mora tkurrebab el sebechek el meruul er a omesiungek.”​—Mt. 22:36, 37.

10. El ua losaod a 1 Petrus 5:10, ngngera te ngmai er a Jehovah tirke el menglou er a omesiungir?

¹⁰ Kede ngmai a lmuut el bebil er a training er a Jehovah. A Kenny el pioneer er a beluu er a Mauritius a mlo mtebengii tiang. Sera lesubii a klemerang e ngchilitii a daingak, miltecholb, e ulemuchel el mesiou er a Jehovah el mui el taem. Ngmelekoi el kmo, “Ngsoak el mo ua profet Isaia el dilu el kmo: ‘Ng ngak a mong! Moderchak!’” (Isa. 6:8) A Kenny mla teloi a betok el ureor el omekedechor e dirrek el mla olengeseu el oliuid aike el babilenged el mo omelekingir. Ngkmo: “Ak ngilai a training el ngilsukak el mo meduch el meruul a ngerechelek.” Me nguaisei engdi ngdimlak di losuub el mo meduch el meruul a ngerechelel. Ngmelemolem el melekoi el kmo: “Ak mlo medengei a ngelsengesek me a blekeradel el kirek lomekeroul me bo lsebechek el mo ungil mesiungel a Jehovah.” (Monguiu er a 1 Petrus 5:10.) Kau me nglocha sebechem el dirrek el meruul omelodech er a klengar er kau me lsebechel train er kau a Jehovah el ngar er a lmuut el betok el rolel.

11. Ngera te mirruul a rudos er a South Korea me bo lsebechir el teloi er a ureor er a berkel a klumech, e ngera mlo rsel? (Momes er a siasing er a medal tia el babier.)

¹¹ Ngmo lmuut er a Resioning el mla mesiou er ngii el betok el rak me te ngmai a training er a Jehovah sel lolasem a beches el rolel a omesiou. A remechuodel er a ta el ongdibel er a South Korea a milluches el kirel a lebo er ngii a COVID-19 pandemic el kmo: “A rebebil el dimlak el sebechir el teloi er a berkel a klumech el secherir a uchul, a omerk er a klumech er chelechang el ousbech a videoconferencing. A retedei el odos el okai me a derengel a rekrir a silubii el mo meduch lousbech a technology e  chelecha ngbekord el bek el sils el lomerk er a klumech.” (Psa. 92:14, 15) Kau, ngsoam el menglou er a omesiungem me mchermii el kmo ngkol uangera lungil a Jehovah? Molatk a bebil el tekoi el sebechem el meruul el ngosukau el otutii tia el turrekong er kau.

12. Ngera ngtibir a Jehovah el mo er tirke el oumera el ulsirs er ngii?

¹² Mosuub el mo oumera el ulsirs er a Jehovah. Ngtibir el mo meskid a betok el klengeltengat sel bo doumera el ulsirs er ngii e debsa sel kot el ungil er kid. (Mal. 3:10) A odos er a Colombia el ngklel a Fabiola milsa Jehovah el otutii tia el telbilel el mo er ngii. A uriul er a lemetecholb e ngkmal mle soal el mo regular pioneer. Me nguaisei engdi ngika milsiou er a bechil me a retedei el ngelekel. Me sera lebo el sebechel retire e ngkmal di milluluuch lolengit a ngeso er a Jehovah. Ngmelekoi el kmo: “Ngblechoel el meoud a le process a pension, engdi ngak a di mle ta el buil er uriul er ak apply e ngmo merek a babilengek. Tia mera el mle mengasireng el tekoi!” Eru el buil er uriul, e ngulemuchel el pioneer. Ngmla mo okeuid me a derengel a rekil e dirk pioneer. Ngmla pioneer el betok er a lluich el rak. Chelsel tiakid el taem e ngmla ngosuterir a reteai el chad el mo metecholb. Ngdmu el kmo: “Alta ngmo mechitechut a bedengek engdi Jehovah a olengeseu er ngak er a bek el sils el oltirakl er a schedule er ngak.”

13-14. Ngera el kerebai a sebechel ngosukid el mo oumera el ulsirs er a Jehovah e mo menglou er a omesiunged?

¹³ Mngai a klubelem er a kerebai er tirke el uluumera el ulsirs er a Jehovah. A Biblia betok a ungil kerebai er ngii er a rechad el kmal mle  blak a rengrir er a omesiungir el mora Jehovah. Oumesingd el taem e te ngilai a ileakl el klengeltengat er uriul er a lochotii er a Jehovah el kmo te oumera el ulsirs er ngii. El ua tiang, uriul er a Abraham a lechitii a delengcheklel e lorael el mora “dimlak lodengelii [el] beluu” e seikid e a Jehovah mlo omekngeltengat er ngii. (Heb. 11:8) Ngdi mle uriul er a Jakob a lodelecheklii a anghel e seikid e ngngiluu a ileakl el klengeltengat. (Gen. 32:24-30) E sel taem el renged er a Israel a mlo soiseb er a Beluu er a Nglat e a rechad a mlo sebechir el mo imuul er a uriul er a reprist a bo ledechor er a chelsel a Omoachel Jordan.​—Jos. 3:14-16.

¹⁴ Ngdirrek el sebechem el ngmai a klubelem er a remesiungel a Jehovah er chelecha el taem el uluumera el ulsirs er ngii e milenglou a omesiungir. El ua tiang a odam el Payton me a bechil er a Diana a kmal dmeu a rengrir el menguiu el kirir a rudam me a rudos el mla menglou er a omesiungir, el uai tirke el donguiu el kirir er a series el “They Offered Themselves Willingly.” * A Payton a kmo: “Sel ki monguiu aika el experience er tir e ngua ki momes er a chad el menga er a kmal ungil kall. Klemengetel a taem el ki momes er ngii, e ngrirellemam el mo somam el di kemam el mo ‘chormii e mesa el kmo ngmera el ungil a Jehovah.’” Cherengel a taem e a Payton me a Diana a mlo mesiou er a beluu el lousbech a ngeso er a ruumerk er a klumech. Ke mla menguiu er tia el series? Ke dirrek el mla mes a video el Witnessing in Isolated Territory​—Australia me a Witnessing in Isolated Territory​—Ireland el ngar er a jw.org? Aika sebechel ngosukau el metik a rolel e ngsebechem el menglou er a omesiungem.

15. Te mekera rungil sechelei e ngosukid?

¹⁵ Molilt er a rungil sechelei. Ngmo soad el melasem er a beches el kall sel sekum e kede meruul er ngii lobengterir tirke el sorir tia el kall. Ngdi osisiu, a deblechoel el obengterir a rechad el tir a nguu a Jehovah el mo kot er a klengar er tir e ngmo soad el osiik a rolel e ngsebeched el menglou er a omesiunged. A obekel el Kent me a Veronica a mlo medengei el kmo tia kmal klemerang el tekoi. A Kent a kmo: “A resechelimam me a telungalek er kemam a millisiich er kemam el mo melasem a beches el rolel a omesiou. Aki mlo mtebengii el kmo, kemam el blechoel lobengterir tirke el nguu a Renged el mo kot, a uchul me ngmlo bekeu a rengmam el melasem a beches el tekoi.” A Kent me a Veronica er chelechang a mesiou el special pioneer er a beluu er a Serbia.

16. El ua desa er a okesiu er a Jesus el ngar er a Lukas 12:16-21, ngera uchul me ngungil dongoit a tekoi el soad el kirel a Jehovah?

¹⁶ Mkengei el chemoit a tekoi el soam el kirel a Jehovah. Tia diak lebelkul a kmo a bo dodeuir a rengul a Jehovah e ngkired el chemoit a rokui el tekoi el soad. (Oli. 5:19, 20) Me nguaisei engdi a lsekum ngdiak el soad el menglou er a omesiunged e le ngchetid el mengoit a soad el tekoi, e ngsebeched el mo rullii a cheleuid el tekoi el lerirellii ngike el chad er a okesiu er a Jesus el mle meringel loureor el mengudel a ungil kloklel engdi ngdimlak lolatk er a Dios. (Monguiu er a Lukas 12:16-21.) A odam el Christian el kiei er a France a melekoi el kmo, “Ngdimlak kumsa Jehovah me a telungalek er ngak sel kot lungil er a temek me a klisichek.” Me ngii me a bechil a mlo pioneer. Me nguaisei, ngmle kirir el chemoit a urerir me bo el sebechir el rullii tia el turrekong er tir. Te milechelii a kekerei el siobai er tir er a omengetmokl me bo lsebechir el mesiou er tir, e silubii el mo ungil a rengrir er aike el ngar ngii er tir. Me te ouuchel a rengrir er a omelodech el lurruul? A Christian a kmo, “Chelechang e ngmera el dmeu a rengmam er  a omesiungam e mera el ungil a rengmam el omes er a re study er kemam me a return visit er kemam el mesuub el kirel a Jehovah.”

17. Ngera uchul me kede locha mo omai er a rengud a melasem a beches el rolel a omesiou?

¹⁷ Molasem a beches el rolel a omesiou. (Rel. 17:16, 17; 20:20, 21) A Shirley el ta er a pioneer er a beluu er a Merikel a mle kirel melodech er a omesiungel er a lebo er ngii a COVID-19 pandemic. A uchelel e ngulemai er a rengul a omerk er a klumech lousbech er a dengua. Me nguaisei engdi sera lenguu a training er a temel a odngelel a odam el oldingel a ongdibel e ngulemuchel el meruul er tia el rolel a omesiou. Ngmelekoi el kmo: “A uchelel ak kora mle medakt engdi chelechang e ngkmal dmeu a renguk el meruul er ngii. Kede mengedecheduch er a relmuut el betok el chad er a doldingel a obliil!”

18. Ngera sebechel ngosukid sel bo dechebangel a omelsemai el rullii el mo meringel er kid a menglou er a omesiunged?

¹⁸ Mrellii a turrekong er kau e molasem el oltaut er ngii. Sel bo dechelebangel a omelsemai e kede meluluuch e kerekikl el melatk a tekoi el bo doruul. (Osi. 3:21) A Sonia el regular pioneer e teloi er a group er a ongdibel er a Europe el melekoi a tekoi er a Romany a kmo: “Ngkmal soak el meluches a turrekong er ngak e nguu tia el babier el loia er a basio el beot er ngak a mesang. Ngar ngii a sunga er a intersection er a traffic er bebul a tebelek. Sel bo lekirek el meruul er a omelilt e ak blechoel el omes er tia el intersection e melatk el kmo, tia el omelilt er ngak ngngoikak el mor.” Ngika melasem el mo ungil a uldesuel er aike el omelsemai el bo lechebangel. Ngmelekoi el kmo, “A derta er aika el omelsemai a sebechel mo ua kboub el merrob er ngak me ngdiak krellii a turrekong er ngak me a lechub e nguai a did el sebechel ngoikak el mo otutii. Tia kmal di ior er a rolel a kumes a tekoi.”

19. Ngsoad el rullii er a rengud el mo mekerang?

¹⁹ A Jehovah omekngeltengat er kid er a betok el rolel. Ngsebeched lochotii a omereng el saul er kid sel debora tkurrebab el sebeched el meruul a tekoi el mo uchul a odengesel. (Heb. 13:15) Nglocha mo sebeched el meruul a beches el rolel e kede menglou er a omesiunged. Tia mo uchul e kede ngmai a lmuut el betok el klengeltengat. Mada bek el sils e dosiik a rolel e ngsebeched el ‘chormii e mesa el kmo ngmera el ungil a Jehovah.’ Seikid e ngsebeched el mo ua Jesus el dilu el kmo: “A kall el kunga er ngii a sel kutireklii a soal ngikel ulderchak e krekir sel ureor el le bilskak.”​—Jn. 4:34.