1. Ngera el ker a locha bo dolatk sel dolebedebek a blebelel a Jehovah?

SEL dolatk er tia el klou el melidiul el lebilebii a Jehovah e kede locha mo oba uldesuel a David el ngii a milluluuch el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii; ng di chad, e ke kmal omekerreu er ngii?” (Psa. 8:3, 4) Kede locha mo ua David el millatk el kmo, sel kumekesiu er ngak er a melidiul e ngkmal diak ngngerang e a Jehovah a kmal kerekikl el omekerreu er ngak. Nguaisei engdi mutebengii el kmo a Jehovah dimlak di lomekerreu er tirke el kot el obekel, el Adam me a Eva ngdirrek el rirelleterir el mo chedal a telungalek er ngii.

2. Ngera mle moktek er a Jehovah el kirir tirke el kot el ngelekel er tia el chutem?

² A Adam me a Eva tirke el mle kot el ngelekel a Jehovah er tia el chutem. A Jehovah a kmal mle betik a rengul Chedam e milsterir a ngerechelir el chedal a telungalek er ngii. Ngdilu er tir el kmo: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo lorreder er ngii.” (Gen. 1:28) Ngmle kirir el mo oungalek e omekerreu er tia el chutem. Me a Adam me a Eva ble lekiei el oltirakl er a moktek er a Jehovah el kirir, e tir me a rengelekir a mlo chedal a telungalek er ngii el diak a ulebengelel.

3. Ngera uchul me ngsebeched el melekoi el kmo a Adam me a Eva a mla er ngii a chetengakl el basio er tir er a telungalek er a Jehovah?

³ A Adam me a Eva a mla er ngii a chetengakl el basio er tir er a chelsel a telungalek er a Jehovah. Ngar er a Psalm 8:5, NW e a David a milsaod el kirel a blebelel a Jehovah er a rechad el kmo: “Ke rirellii el telkib el ngariou er a rechanghel, ke lilia krone er ngii el klebkall me a chetengakl.” Ngklemerang el kmo kid a rechad a diak dolab a klisichir, llemesir, me a duch er a rechanghel. (Psa. 103:20) Me nguaisei engdi a rechad a di “telkib el ngariou” er a rechanghel. Molatk er tiang! A Jehovah er a lebebeterir a rekot  el demad me a delad e ngmilsterir a kmal ungil klengar.

4. Ngera dilubech el mora Adam me a Eva e le tir el mlo diak lolengesenges, e ngera kede mo mesaod er tia el suobel?

 ⁴ Ngklengiterreng e le Adam me a Eva urridii a basio er tir er a telungalek er a Jehovah. Tia mlo uchul a ringel el mora ruldidellel a rsechir el ua bo dosaod er ngii er a chelsel tia el suobel. Me nguaisei, engdi a moktek er a Jehovah a dirkak el mengodech. Ngsoal a rebekongesenges el chad a lebo el chedal a telungalek er ngii el mo cherechar. Ka me dosaod a rolel e a Jehovah mla rullid el mo chetengakl. Kede dirrek el mo mesaod aike el sebeched el meruul er chelechang el ochotii el kmo, ngsoad el mo chedal a telungalek er a Dios. E a ulebongel e kede mo mesaod a klengeltengat el bo lengai a rengelekel a Jehovah er tia el chutem el mo cherechar.

5. Ngoeak a ngera el rolel e ngsebeched el msa Jehovah a klebkall el mereng a sulel lengii el milebid el okesiul?

⁵ A Jehovah a rirellid el mo chetengakl e le kede ulebeob el okesiul. (Gen. 1:26, 27) Kid el ulebeob el okesiul a Dios a uchul e ngsebeched el omekeroul e olecholt a betok el ungil blekerdelel el ua bltikerreng, klechubechub, blakerreng, me a llemalt. (Psa. 86:15; 145:17) Sel domekeroul aika el blekeradel e kede msa Jehovah a klebkall e dirrek el ochotii el kmo kede oba omereng el saul el kirel aike el bla leruul el kired. (1 Pe. 1:14-16) E sel doruul a tekoi el omotech er a rengul ngika el Demad el ngar er a eanged e ngmo dmeu a rengud. Me a Jehovah er a lebebid el okesiul e ngrirellid el mo sebeched el mo chedal a telungalek er ngii.

6. Ngmilekera Jehovah e rulleterir a rechad el mo chetengakl er a leketmeklii tia el chutem?

⁶ A Jehovah a kiltmeklii a ileakl el delengchekled. A uchei er a lebebii a kot el chad a Jehovah e ngkiltmeklii a chutem el kired a rechad. (Job 38:4-6; Jer. 10:12) Ngkmal millatk er kid e dirrek el kmal bekururau me ngmilskid a betok el ungil tekoi el uchul a deuil a rengud. (Psa. 104:14, 15, 24) Ngulemes a blebelel e milsa el kmo “ngkmal mle ungil.” (Gen. 1:10, 12, 31, NW) Ngdirrek el rirelleterir a rechad el mo chetengakl er a lerelleterir el mo “merreder” a rokui el blebelel er a chutem. (Psa. 8:6) Ngmoktek er ngii el remecherrungel el chad a bo loldeu a rengrir el omekerreu aika el blebelel el diak a ulebengelel. Kau, ke blechoel el mereng a sulel a Jehovah el kirel tia el telbilel?

7. Ngmekera Josua 24:15 e ochotii el kmo a chad a ngar ngii a ilmeklel melilt?

⁷ A Jehovah a mla meskid a ilmekled el melilt. Ngsebeched el melilt er a klengar el soad. (Monguiu er a Josua 24:15.) Ngika el betik a rengul Dios a kmal mo dmeu a rengul sel dengiltii el mo mesiou er ngii. (Psa. 84:11; Osi. 27:11) Ngdirrek el sebeched el ungil ousbech er tia el ilmekled el melilt er a betok el rolel. Molatk er a kerebai el lebilecherei a Jesus.

8. Ngera ta er a rolel e a Jesus a uluusbech er a ilmeklel el melilt?

⁸ Ngsebeched loltirakl er a kerebil a Jesus el ngilai aike el lousbech a rebebil el mo ngaruchei er aike el lousbech. A ta el taem e ngii me a rechapostol er ngii a kmal mlo mesaul a bedengir me te mirrael el mo olengull er a basio el diak a rechad er ngii. Me nguaisei, engdi ngdimlak el sebechir el olengull. A seked a miltik er tir, e kmal mle sorir a Jesus a lolisechakl er tir. A Jesus a dimlak el bo leseselk a rengul ngbai kmal mlo chubteterir. Me ngmilekerang? “Me ng mocha olisechakl er tir a betok el tekoi.” (Mk. 6:30-34) Sel doukerebai er a Jesus el kongei el chemoit a temed me a klisichel a bedenged lolengeseu er a rebebil, e kede msa klebkall a Demad el ngar er a eanged. (Mt. 5:14-16) Kede dirrek el ochotii er a Jehovah el kmo ngsoad el mo chedal a telungalek er ngii.

9. Ngera kirir a ruungalek el blechoel el melatk er ngii?

 ⁹ A Jehovah a mla mesterir a rechad a techellir el mo oungalek, e dirrek el mla mesterir a ngerechelir el mo olisechakl er a rengelekir el mo betik a rengrir er Ngii e mesiou er Ngii. A lsekum koungalek, e kau, ke oba omereng el saul el kirel tia el kmal ileakl el sengk? Alta rechanghel a mukngeltengat er a Jehovah engdi ngdiak loba tia el ileakl el techall el mo oungalek. Me a lsekum e koungalek e mongreos er tia el ileakl el techall el mobang. A ruungalek a mla nguu a ileakl el ngerachel el mo omekeroul er a rengelekir “el oba omellach ma osisechakl er a Rubak.” (Efe. 6:4; Dut. 6:5-7; Psa. 127:3) E a Jehovah a oeak a cheldebechellel e ngmla mesterir a ruungalek a ngeso el uaike el babilenged el mengai er a Biblia, video, ongngak, me aike el suobel el debetik er a website er kid. Me ngbleketakl el kmo a Demad el ngar er a eanged me a Ngelekel a kmal betik a rengrir er a rengalek. (Lk. 18:15-17) A ruungalek sel lultuil er a Jehovah e lebora tkurrebab el sebechir el omekerreu er a rengelekir, e a Jehovah kmal mo dmeu a rengul. Tirka el oungalek a dirrek el mesterir a rengelekir a techellir el mo chedal a telungalek er a Jehovah el mo cherechar!

10-11. Ngera ngmla kutmeklii a Jehovah el oeak olubet?

¹⁰ A Jehovah a tilengetengii a kot el betik er a rengul Ngelekel me bo lsebeched el lmuut el mo chedal a telungalek er Ngii. Ngua dulsaod er ngii er a  parakurab 4, Adam me a Eva urridii a basio er tir er a telungalek er a Jehovah e urridii a basio er a rengelekir el dirrek. (Rom 5:12) Adam me a Eva mle durengrir el mo diak lolengesenges me te rredemelel a mo diak el chedal a telungalek er Ngii. Engdi rengelekir a mekerang? Bltkil a rengul a Jehovah a uchul me ngkiltmeklii a rolel e ngsebechel merodel er tirke el rredemelel a mo chedal a telungalek er ngii. Ngmirruul el uaisei er a letengetengii a di ta el Ngelekel el Jesus Kristus. (Jn. 3:16; Rom 5:19) Tengetengel a Jesus a uchul me a re 144,000 el blak a rengrir el chad er tia el chutem a merodel el mo ngelekel a Dios.​—Rom 8:15-17; Och. 14:1.

¹¹ Me a lmuut kung, te betok el miliol a blak a rengrir el meruul er a soal a Dios e oba omelatk el mo ngelekel a Dios er a uriul er sel ulebongel el omelsemai el mo er ngii er a ulebengelel a ta el telael el rak. (Psa. 25:14; Rom 8:20, 21) Tir loba tia el omelatk a uchul me te omekedong er a Jehovah el ngike el Ulemeob, el “Demmam.” (Mt. 6:9) Ngdirrek el tirke el mo mekiis me ngmo er ngii a techellir el mo mesuub er a soal a Jehovah. Tirke el mekiis el kongei el mo oltirakl er ngii a dirrek el mo chedal a telungalek er ngii.

12. Ngera el ker a bo donger er ngii er chelechang?

¹² Me kede mesa el kmo a Jehovah a mla remuul a betok el tekoi el rulleterir a rechad el mo chetengakl. Ngmla merodel er a rengellitel el mo ngelekel e mla mesterir a rechedal a “kloul seked” a techellir el mo ngelekel er a chelsel a beches el blekeradel. (Och. 7:9) Ngera sebeched el meruul er chelechang el lochotii er a Jehovah el kmo ngsoad el mo chedal a telungalek er ngii el mo cherechar?

13. Ngera sebeched el meruul er ngii me bo dechedal a telungalek er a Dios? (Markus 12:30)

¹³ Mochotii a bltkil a rengum el mora Jehovah loeak sel mosiou er ngii loba rengum el rokir. (Monguiu er a Markus 12:30.) Alta Dios a mla meskid a betok el ungil tekoi engdi techelled el mesiou er ngii a ta er aike el kot lungil tekoi el dobang. Me kede ochotii er a Jehovah el kmo ngbetik a rengud er ngii sel ‘doltirakl a llechul.’ (1 Jn. 5:3) A Jesus a milengedecheduch el kirel a Demal el kmo bo doruul er a redisaiplo e dolecholb er tir. (Mt. 28:19) Ngdirrek el dilu el kmo ngkired el mo kaubltikerreng.  (Jn. 13:35) A Jehovah mo rulleterir tirke el bekongesenges el mo chedal a telungalek er ngii er a beluulechad el rokir.​—Psa. 15:1, 2.

14. Ngmekera dolecholt er a bltikerreng el mora rebebil? (Mateus 9:36-38; Rom 12:10)

¹⁴ Molecholt a bltikerreng el mora rebebil. A bltikerreng a kot el ngarbab el blekerdelel a Jehovah. (1 Jn. 4:8) A Jehovah ulechotii a bltikerreng el mei er kid er a uchei er a bo dodengelii. (1 Jn. 4:9, 10) Kede oukerebai er ngii sel dolecholt a bltikerreng el mora rebebil. (Efe. 5:1) E a ta er a kot el ungil rolel e kede ochotii a bltikerreng el mora rebebil a sel dolengeseu er tir el mo mesuub el kirel a Jehovah er chelecha ledirk ngar ngii a taem. (Monguiu er a Mateus 9:36-38.) Sel doruul uaisei, e kede mesterir a techellir el mo chedal a telungalek er a Dios. E a uriul er a lemetecholb a chad me ngkired el melemolem el olecholt er a bltikerreng me a omengull el mo er ngii. (1 Jn. 4:20, 21) Ngmekera doruul er tiang? A ta er ngii a bo leblechoel lungil a uldesued el kirel. El ua tiang, ngdiak el soad el mo omdasu el kmo ngmekngit a moktek er ngii me a lechub ngmelatk er a di ngii sel loruul a tekoi. Kede bai ochotii omengull el mo er ngii e mo omes er ngii el kuk ngarbab er kid.​—Monguiu er a Rom 12:10; Fil. 2:3, BT.

15. Ngkired el olecholt a klechubechub e meruul a ungil el mora rua techang?

¹⁵ Molecholt a klechubechub e moruul a ungil el mora rokui el chad. A lsekum e ngsoad el mo teloi er tirke el omekedong er a Jehovah el Demerir el diak a ulebengelel, e ngkired el oltirakl er a Tekingel er a klengar er kid. El ua tiang, a Jesus a ulisechakl el kmo ngkired el olecholt a klechubechub e meruul a ungil el mora rokui el chad, el uldimukl er a recherroued. (Lk. 6:32-36) A lebebil e nglocha mo meringel er kid a meruul er tiang. A leuaisei e ngkired el mesuub el mo omdasu e meruul a tekoi el ua Jesus. Sel debora tkurrebab el sebeched el olengesenges er a Jehovah e oukerebai er a Jesus, e kede ochotii er a Demad el ngar er a eanged el kmo ngsoad el mo chedal a telungalek er ngii el mo cherechar.

16. Kede mekera mekerreuii er a chisel a telungalek er a Jehovah?

¹⁶ Momekerreu er a chisel a telungalek er a Jehovah. Chelsel a telungalek e ngblekerdelel a ngalek el sechal el mo mesuub er a obekul. Me a lsekum ngika el klou a oltaut a omellach er a Biblia er a klengar er ngii, e ngmo ungil kerebai el kirel a ochellel. Engdi a lsekum e ngmo meruul a mekngit, e a ochellel a locha mo oltirakl a mekngit el omerellel. Ngdi osisiu er a chelsel a telungalek er a Jehovah. A lsekum a ta er a blak a rengul el Kristiano a mo omtok a mera el osisechakl me a lechub e ngmora deleboes me a lechub e ngmekngit el omeruul, e a rebebil a locha mo sorir el oltirakl er ngii. Tirke el meruul uaisei a tomellii a chisel a telungalek er a Jehovah. (1 Th. 4:3-8) Me ngkired el mengeroid er kid er a remekngit el kerebai e diak debechei a ngii di el tekoi me lecheridid er a betik a rengul Demad el ngar er a eanged.

17. Ngera el uldasu a kired el choridii er a uldesued, e ngera uchul?

¹⁷ Moumera el lulsirs er a Jehovah el diak el klalo er tia el beluulechad. A Jehovah a tibir el kmo ngmo meskid a keled, biled, me a delengchekled sel denguu a Renged el mo kot e bo dekiei el oltirakl a melemalt el llechul. (Psa. 55:22; Mt. 6:33) Sel bo doba tia el uldasu e ngmo diak bo domdasu el kmo a klalo er tia el beluulechad a sebechel meskid a ulekerreu me a deurreng. Kede medengei el kmo a di ta el rolel e ngmera el mo budech a uldesued a sel doruul er a soal a Jehovah. (Fil. 4:6, 7) Mo lmuut me a lsekum e ngsebeched el mechar a betok el tekoi me ngkired el melatk el kmo, kid ngngar ngii a temed me a klisichel a bedenged el ousbech e mengetmokl aikang? Kid, ngmo imuul a rengud er aika el klokled? Lak dobes el kmo a Jehovah a mengerechir er kid el mo meruul  a ngerecheled er a chelsel a telungalek er ngii. Tia belkul a kmo ngdiak el kired el mechei a ngii di el ngerang me bo longesang er kid. Ngkmal diak el soad el mo uai ngike el chad el chilitii a ileakl el techellel el mesiou er a Jehovah e merodel el mo ta er a ngelekel e le ngii el liluul a rengul er a kloklel er tia el chutem.​—Mk. 10:17-22.

18. Ngera el chetengakl el techall me a dirrek el klengeltengat a bo lengai a rebekongesenges el chad?

¹⁸ A rebekongesenges el chad a mo nguu sel kot el chetengakl el tekoi, el ngii a chetengakl el techall el mo betik a rengrir e mesiou er a Jehovah el mo cherechar! Ngdirrek el tirke el oba omelatk el mo kiei er tia el chutem a mo dmeu a rengrir el mengetmokl er tia el chutem el Jehovah milebii el delengcheklir. Ngdi kmedung e tia el beluulechad me a rokui el ngar chelsel a mo mukbeches er cheungel a omengederederel a Rengedel a Dios. A Jesus a mo mult aike el rokui el mekngit el mlukdubech e le Adam me a Eva el chilitii a telungalek er a Jehovah. A Jehovah mo olekiis er a rebetok el miliol e mo mesterir a techellir el mo nguu a diak a ulebengelel el klengar el cherrungel e kiei er tia el chutem el mla mo baradis. (Lk. 23:42, 43) Me sel lorael a rechedal a telungalek er a Jehovah er tia el chutem el mo mecherrungel e te mera el mo mtebengii a “klebkall me a chetengakl” el lulsaod er ngii a David.​—Psa. 8:5, NW.

19. Ngera kired el blechoel el melatk?

¹⁹ A lsekum e ke chedal a “kloul seked” e ke mera el oba ungil omelatk. A Jehovah betik a rengul er kau e soal a obo mchedal a telungalek er ngii. Me moruul aike el rokui el sebechem el mo odeuir a rengul. Bek el sils e mkiei el melatk aika el telbilel a Jehovah. Mongreos er a ileakl el techellem el mesiou er ngika el Demad el ngar er a eanged e mongreos er a ileakl el omelatk el mobang el mo kiei el oldanges er ngii el mo cherechar!