• “Ak mlo feel el kmo a bechik a mlo betok el taem el lebora laokreng.”

• “Ak mera el mlo merur, e feel el kmo ngdiak klebokel, e diak a ultutelek.”

• “Ngdimlak el sebechek el mengedecheduch er a ngii di el chad el kirel. Ak kmal mle chuarm e diak a chad el medengei.”

• “Ak mlo feel el kmo a Jehovah diak el lomekerreu er ngak.”

Aika el tekingir tirkang ochotii el kmo a bechiil el redil a kmal mo chuarm sel bo lomes a siasing er a remeau a bechil. E a lsekum a bechiil el sechal a mla mo mela buil me a lechub e ngmla mo mela rak lomart er ngii e meruul er ngii, e a bechil a locha mo feel el kmo ngdikea el sebechel loumerang er ngii. Ngua lolekoi a ta el bechiil el redil, “Ak mlo melatk el kmo, ngika ngtecha el chad el ngar bita er ngak? Ngngar ngii a lmuut el bebil er a tekoi el lomart er ngak?”

Tia el suobel a mileketmokl el kirel a bechiil el redil el bechil a omes a siasing er a remeau. a Ngmo mesaod a omellach er a Biblia el mengelaod er ngii e olterekokl er a rengul el kmo a Jehovah betik a rengul er ngii e soal lolengeseu er ngii el mo budech a uldesuel e melemolem el kmeed er ngii. b

Alta ngdiak el sebechem el control a rokui el tekoi el loruul a bechim, engdi ngngar ngii a tekoi el sebechem el meruul me bo lebudech a uldesuem. Molatk aikang.

Lak em blame er kau. A Alice c a mlo feel el kmo ngngar ngii a lolengesonges er ngii. Ngmillatk el kmo, ‘Ngera uchul me a bechik a soal lomes er a rekuk bebil er a redil er a bai lomes er ngak?’ A rebebil bechiil el redil a di tir el blame er tir el kirel omerellel a becherir e omdasu el kmo, ngtir a meruul er a blekeradel el lmuut el mo mekngit. A Danielle a kmo, “Ngkmal mle kesib a renguk er a bechik el meruul er tia el tekoi, me ak mlo feel el kmo ngak a millemall er a chebechiielek le ngngesechel a renguk a uchul.”

A lsekum ke dirrek el feel el uaisei, e bo modengei el kmo a Jehovah kmal diak el blame er kau el kirel a omerellel a bechim. A Jakobus 1:14 a kmo: “Chad a di ngii el mor ongarm sel le mekesuseu e lobedikl er a ikel mekngit el soal a rengul.” (Rom 14:12;  Fil. 2:12) A Jehovah diak el blame er kau, ke bai kmal mekreos er osengel le koba blakerreng el mo er ngii.​—2 Kr. 16:9.

Ngdirrek el sebechel ngosukau sel bo modengei el kmo osengel a bechim er a siasing er a remeau a diak el belkul a kmo ngngar ngii omolengesonges er ngii. A rechellimosk er a omesubel a uchul me a rechad omes a siasing er a remeau a kmo, aika rulleterir a rechad el mo nguibes a deleboes el tekoi el diak el sebechel a ngii di el redil el lotaut.

Lak di el suebek a rengum. A Catherine a melekoi el kmo ngdimlak el stob el melatk el kmo a bechil omes a siasing er a remeau. Me a kuk Frances a kmo: “Ngkmal mo suebek a renguk sel bo lak kudengei el kmo a bechik ngngar ker. Ak di bekikl el ta el sils.” A rekuk bebil el bechiil el redil a kmo, te kmal mo merur sel leteloi er a rudam me a rudos er tir el medengei el kmo a becherir a meruul er tia el tekoi. Me a rebebil a kmal feel el kmo te di tir el tang le te omdasu el kmo ngdiak a chad el understand er a blekeradel el lengar er a chelsel.

Ng normal el tekoi a bom feel el uaisei. Engdi a di molatk el kirel e ngrullii el lmuut el mo klou a sebekreng er kau. Me bai em focus er a deleuill er kau me a Jehovah. Omoruul el uaisei e ngmo smisichii a rengum.​—Psa. 62:2; Efe. 6:10.

Ke locha mo metik el kmo ngkmal ngosukau sel monguiu e molebedebek a cheldecheduch er a Biblia el kirir a redil el kmal mle chuarm a rengrir e miltik a ongelaod er a loluluuch el mora Jehovah. A Jehovah dimlak leblechoel choroid a mondai er tir, engdi ngmilsterir a budech. El ua tiang, a blekeradel el lemla er ngii a Hana a uchul me ng “kmal mle mekngit a rengul.” Me nguaisei, a uriul er a ‘loluluuch el mor a RUBAK el mle kemangel’ el taem, e ngmlo melechesuar a budech alta ngdimlak lodengei el kmo ngmo uangerang a blekeradel.​—1 Sa. 1:10, 12, 18; 2 Ko. 1:3, 4.

Molengit a ngeso er a remechuodel er a ongdibel. Tirka sebechir el mo ua “omerotel er a eolt el ua ikel mengeluolu er kid er a meses el eolt.” (Isa. 32:2) Te locha mo ouchais er kau er a ta er a odos el sebechem el mengedecheduch er ngii el sebechel mengelaod er kau.​—Osi. 17:17.

Kau nglocha sebechem el ngosuir a bechim el mo mesisiich er a osengel a siasing er a remeau? Kele el sebechem. A Biblia melekoi el kmo a dosmechokl er a mondai me a lechub a bo de kats er a mesisiich el cheraro, e a “re terung a kuk ungil er a di tang.” (Oli. 4:9-12) Omesuub ochotii el kmo a obekel sel ledak loureor, e ngike el omes a siasing er a remeau a  sebechel mo mesisiich er tia el tekoi me ngike el tang a lmuut el mo oumerang er ngii.

Me nguaisei, tia di mo ior er a kmo a bechim ngmo kongei el meringel loureor el kirel e mera el soal mo diak lomes a siasing er a remeau. Ngika ngullengit a klisiich er a Jehovah e osiik a ngeso er a remechuodel? (2 Ko. 4:7; Jak. 5:14, 15) Ngika ngmla plan er a rolel e ngsebechel mengeroid er ngii er a osengel a siasing er a remeau? El ua tiang, ngmla oterekokl a limit er ngii er a usbechel a electronic device e mengeroid er ngii er aike el mo mengesuseu er ngii? (Osi. 27:12) Ngkongei er a ngelsuim e kongei el mo honest el kirel a rokui el tekoi lobengkem? A leuaisei, e nglocha sebechem el ngosuir.

Ngmekera mngesuir? Molatk er tiang. A Felicia mlo bechil a Ethan el ngii a mlo addict er a osengel a siasing er a remeau er a ledirk kekerei. A Felicia mla rullii el mo beot er a Ethan a mengedecheduch er ngii sel bo el soal el omes a siasing er a remeau. A Ethan a kmo: “Ak bleketakl sel kungedecheduch er a bechik. Ngoeak a bltikerreng e ngolengeseu er ngak el mengeroid er ngak er aike el mo mengesuseu er ngak e blechoel el oker el kmo ak mla mo uangerang. E ngosukak el limit a access er ngak el mora Internet.” Nguaisei el Felicia mekngit a rengul el Ethan a soal el omes a siasing er a remeau. Engdi Felicia kmo: “A ngesechel a renguk me a kngtil a renguk a diak bo lengesuir el mo melemolem el mesisiich er ngii. Uriul er aki mosaod a omelsemai el lechelebangel e ngmla mo kltmokl el ngosukak er a kngtil a renguk.”

Chouaika el cheldecheduch a diak di bo lengesuir a bechiil el sechal el mo mesisiich er a osengel a siasing er a remeau, ngdirrek el ngosuir a bechil el lmuut el mo oumerang er ngii. E uaisei el sel lsekum a bechiil el sechal ouchais er a bechil sel bo el soal lomes, e louchais er ngii a lebo er ngii me a loruul, e ngmo beot er a bechil oumerang er ngii e le ngdiak a blart.

Kau, omomdasu e ngsebechem el ngosuir a bechim el ngar er a osisiu el rolel? A leuaisei e nglocha sebechiu el dmak el menguiu er tia el suobel. A turrekong er a bechim a mo diak lomes a siasing er a remeau e rullau el lmuut el mo oumerang er ngii. Ngdiak el bo lekesib a rengul er kau el soam el mesaod el kirel, e ngbai melasem el mo understand er a lerellii el mo er kau tia el blekeradel. Me a turrekong er kau a olengeseu er ngii el stob el meruul er ngii e msa techellel el lmuut el nguu a klaumerang er kau. Ngkiriu el terung el mo medengelii a uchul me a rechad a sorir el omes a siasing er a remeau me a rolel e ngsebechel a chad el mo diak loruul er ngii. d

 A lsekum ke bekikl el kmo a bechim a mo el mo diak el loba chelellakl el reng el mengedecheduch, e molengit er a ta er a remechuodel el sebechiu el dmak lobengkel e ngomekrael er kemiu el chadecheduch. Bo modengei el kmo alta bechim a mo stob el omes a siasing er a remeau, me nguaisei nglocha mo chuib a kemanget el taem e ngmo sebechem el lmuut el oumerang er ngii. Engdi lak em give up. Momes aike el mekekerei el tekoi el bla molengeriakl er ngii. Bo moba omelatk el kmo, cherengel a taem e a lsekum kemiu el terung oba kllourreng, e a chebechiieliu a lmuut el mo mesisiich.​—Oli. 7:8; 1 Ko. 13:4.

A lsekum a bechim a relapse e lmuut el omes, e tiang ngbelkul a kmo ngdimlak lobult me ngii a diak el sebechel mo mesisiich er ngii? Ngdiak el uaisei. Tokubets a lsekum e ng addict, e nglocha mo outekangel er tia el tekoi er a klemengetel a klengar er ngii. Ngsebechel el relapse alta ngmla mo melai a rak el diak loruul er ngii. Omstob er tiang me lak el duubech, ngkirel lmuut el limit a temel lousbech a electronic device e mengeroid er ngii er aike el blekeradel el ngii a rullii el mo soal meruul er tia el tekoi, e melemolem el meruul aikang alta ngmla mo diak sel urungulel el mo omes. (Osi. 28:14; Mt. 5:29; 1 Ko. 10:12) Ngkirel a ‘uldesuel . . . el mukbeches’ e suubii el mo “ouketui a mekngit,” luldimukl er ngii a osengel a siasing er a remeau me a ngii di el diak el klikiid el omeruul el ua omengelooch. (Efe. 4:23; Psa. 97:10; Rom 12:9) Ngkongei el mo meruul aika el omelodech? A leuaisei, a cherengel a taem e nglocha sebechel mo mesisiich er ngii. e

Engdi ngmekerang a lsekum e ngsoal el di melemolem el meruul er ngii? Nguaisei el locha mo er ngii aike el taem el mekngit a rengum, kesib a rengum, e feel el kmo a bechim a diak loba blakerreng el mo er kau. Bsa Jehovah a berredem. Tia sebechel meskau a budech. (1 Pe. 5:7) Molemolem lolekeed er kau er a Jehovah loeak a omesuub, nglunguuch, me a omelebedebek. Sel moruul aikang e bo lulterekokl a rengum el kmo ngii me ngdirrek lolekeed er ngii er kau. Ngua lolekoi a Isaia 57:15 (NW), ngkiei el lobengterir tirke el “telemall a rengrir e mechitechut a rengrir,” el soal ngosuterir el lmuut el mo dmeu a rengrir. Molasem el mo ungil Kristiano. Mosiik a ngelsurir a remechuodel. E molemolem loba omelatk el kmo a ngar medad el taem e a bechim a locha mo ngodechii a uldesuel.​—Rom 2:4; 2 Pe. 3:9.