1. A doltirakl er a Hebru 12:1, e ngngera kired el meruul er ngii me bo de kats er a klaidesachel el mo nguu a klengar?

 A BIBLIA omekesiu er a klengar er a Rekristiano el mora klaidesachel er a rurt. Tirke el lochedii a teb er a klaidesachel a mo nguu a nguked er a diak a ulebengelel el klengar. (2 Ti. 4:7, 8) Ngkired el meruul aike el rokui el sebeched me dolemolem el remurt, tokubets er chelechang el dekedang er a ulebengelel a rurt. A apostol Paulus el rirekir a klaidesachel er ngii, ouchais er kid aike el mo ngosukid el mo kats er tia el rurt. Ngdilu er kid el “mo mechei a ikel rokui el omekberaod er kid, . . . e bo le meduch a rengud er sel klaidesachel er a rurt el de chelebangel er ngii.”​—Monguiu er a Hebru 12:1.

2. Ngera belkul a bo ‘de bechei a ikel rokui el omekberaod er kid’?

² A Paulus er a loluches el kmo ngkired el “mo mechei a ikel rokui el omekberaod er kid,” e ngbelkul a kmo, a Kristiano diak a berraod el telechull? Ngdiak. A belkul a tekingel a kmo ngkired el chemoit a diak a ultutelel el berraod. Chouaika el berraod a sebechel rullid el mo soro el remurt e mo mesaul. A dolemolem el remurt e ngkired el mereched el mtab chouaika el diak a ultutelel el berraod e medobed el chemoit. Osisiu el taem e ngdiak el soad el mengoit aike el berraod el kired el telechull. A destob el meluchel aika el berraod e ngsebechel mo uchul e kede tuobed er a klaidesachel. (2 Ti. 2:5) Me ngngera el berraod a kired el telechull?

3. (a) A doltirakl er a Galatia 6:5, e ngngera kired el chellungel er ngii? (b) Ngera kede mo mesaod er tia el suobel, e ngerang?

³ Monguiu er a Galatia 6:5. A Paulus ouchais er a tekoi el kired el telechull er ngii. Ngmilluches el kmo, “re bek el chad  a di chemur oberaod el telechellir.” A Paulus a milsaod el kirel aike el ngerecheled er medal a Dios, el tekoi el diak a chad el sebechel remuul el kired. Ngar tia el suobel e kede mo mesaod el kmo ngngera uldimukl er a ‘di . . . telechelled,’ me a rolel e ngsebeched el melemolem el chellungel. Kede dirrek el mo mesaod a diak a belkul el berraod el locha de chellungel er chelechang me a rolel e ngsebeched el medobed el chemoit. Sel bo de chellungel aike el di telechelled e dechoit aike el diak a ultutelel berraod, e ngmo ngosukid el rokir a klaidesachel el mo nguu a klengar.

4. Ngera uchul me ngdiak lemeringel er kid otireklii a telbilel a rengud el mora Jehovah? (Dirrek el momes er a siasing.)

⁴ Telbilel a rengud. Sera detibir a rengud el mora Jehovah, e kede tilbir el mo mengull er ngii e meruul er a soal. Ngkired lotireklii tia el telbiled. Tia oberaod el ngerachel, engdi ngdiak lemeringel er kid a meruul er ngii e le kede ulebeob el mo meruul a soal a Jehovah. (Och. 4:11) Ngmilebid el okesiul e ngar ngii a urunguled el mo medengelii e mesiou er ngii. Me ngsebeched el mo kmeed er ngii e dmeu a  rengud el meruul a soal. (Psa. 40:8) Me a lmuut kung, sel doruul er a soal a Dios e doltirakl er a ngelekel, e kede mo “kebekakl.”​—Mt. 11:28-30.

5. Ngera sebechel ngosukau el otutii a telbilel a rengum? (1 Johanes 5:3)

⁵ Ngmekera omchelngii tia el berraod? Teblo el tekoi a sebechel ngosukid. A kot e molemolem el melisiich er a bltkil a rengum el mora Jehovah. Ngsebechem el meruul er tiang loeak a omolebedebek aike el rokui lungil tekoi el bla leruul el kirem me a klengeltengat el medechel el kirem. Sel di lorael el lmuut el mo mesisiich a bltkil a rengum el mora Dios me ngii a mo beot er kau olengesenges er ngii. (Monguiu er a 1 Johanes 5:3.) Ongerung, e moukerebai er a Jesus. Ngika mle sebechel rullii a soal a Dios e le ngmilluluuch lolengit a ngelsuil a Jehovah e millemolem el melatk er a nguked el bo lolai er ngii. (Heb. 5:7; 12:2) Ngua Jesus, moluluuch lolengit a klisiich er a Jehovah, me a omelatk er a diak a ulebengelel el klengar leblechoel el ngar er a uldesuem. Sel lluut el mo mesisiich a bltkil a rengum el mora Jehovah e moukerebai er a Ngelekel, e ngmo sebechem lotutii a telbilel a rengum.

6. Ngera uchul me ngkired el remuul a ngerecheled er a telungalek? (Dirrek el momes er a siasing.)

⁶ Ngerecheled er a telungalek. Ngar tia el klaidesachel er kid el mo nguu a klengar e ngkirel betik a rengud er a Jehovah me a Jesus el ngaruchei er a rechedad. (Mt. 10:37) Tia diak lebelkul a kmo e ngsebeched el mengoit a ngerecheled er a telungalek. A lsoad el nguu a kengei er a Dios me a Jesus e ngkired el remuul a ngerecheled er a telungalek. (1 Ti. 5:4, 8) Sel doruul el uaisei, e ngmo dmeu a rengud. A Jehovah medengei el kmo a telungalek a mo er ngii a deurreng er ngii sel lsekum a bechiil el sechal me a redil a kaiuecholt er a bltikerreng me a omengull, ruungalek a mo betik a rengrir er a rengelekir e train er tir, me a rengalek olengesenges er a rechad er a blirir.​—Efe. 5:33; 6:1, 4.

7. Ngmekera sebechem lotutii a ngerechelem er a telungalek?

⁷ Ngmekera omchelngii tia el berraod? A ombechiil el sechal, redil, me a lechub e ke ngalek, e moumerang er a llomeserreng er a Biblia er a bai di moltirakl er a rengum, siukang, me a lechub e ngtekingir a rechellimosk. (Osi. 24:3, 4) Mousbech aika el babilenged el mengai er a Biblia. Aika ngar ngii a ulekrael er ngii er a rolel e kede oltaut omellach er a Biblia. El ua tiang a brochure el Ngsebechel el Mo er Ngii a Deurreng er a Telungalek er Kau me a 49 me a 50 el suobel er a Mkiei el Mo Cherechar! el babier a ngar ngii omellach er ngii el sebechel ngosuterir a rebechiil el chad, ruungalek, me a rengeasek. Mrellii er a rengum el mo oltaut aike el lolekoi a Biblia, mo lmuut me a lak loltaut omellach er a Biblia a rechedal a telungalek er kau. Sel moruul el uaisei e ngmo uchul a klungiolel a telungalek er kau, me kau a nguu a kengei er a Jehovah.​—1 Pe. 3:1, 2.

8. Ngera ngrullii el mei er kid omelilt el doruul?

⁸ Ngerecheled er aike el omelilt el deruul. A Jehovah mla meskid a ilmekled el melilt e soal a doldeu er a rengud er aike el klungiaol el dengai sel dungil melilt. Me nguaisei engdi ngika diak lomekerreu er kid er a kngtil a mekngit el omelilt er kid. (Gal. 6:7, 8) Sei a uchul me kede kongei el ngmai a ngii di el ringel el bo dechebangel le kede mle mekngit el melilt, dimlak dolatk a tekoi el dolekoi, me a lechub e ngmlo cheleuid omerelled. A tekoi el derirellii a locha uchul me a ukltked a di mo mengesang er kid. Sel dodengei el kmo ngkired el mukngerachel er a omelilt el derirellii e ngsebechel rullid el mo ouchais a kngtid, sumechokl  a cheleuid el omerelled, e diak deluut el mo meruul. Sel doruul aika el tekoi e ngngosukid el melemolem el remurt er a klaidesachel el mo nguu a klengar.

9. Ngera sebechel ngosukau sel mrellii a mekngit el omelilt? (Dirrek el momes er a siasing.)

⁹ Ngmekera omchelngii tia el berraod? A lsekum e ngdiak el sebechem el ngodechii a mekngit el omelilt, em accept er ngii. Mutebengii el kmo ngdiak el sebechem el ngodechii a ngar er a mong. Me lak em waste a taem me a klisichem el melasem el omeklemalt er kau me a lechub ke blame er kau me a lechub e ngrechad el kirel a mekngit el omelilt el mrirellii. E bai mkengei a cheleuid el mriruul e moruul er sel kot lungil sebechem er chelechang. A lsekum ngoldechelakl er kau a ukltkem el kirel a mekngit el mrirellii, e moluluuch el mora Jehovah, mouchais a kngtim er ngii, e molengit er ngii me lousubes er kau. (Psa. 25:11; 51:3, 4) Molengit a klausubes er tirke el mtilemall a rengrir. E a lsekum e ngkirel, e molengit a ngeso er a remechuodel. (Jak. 5:14, 15) Mngai a klubelem er a cheleuid el mriruul, e molasem el diak mluut el meruul. Sel moruul uaisei e ngsebechel mo ulterekokl a rengum el kmo a Jehovah mo ochotii a klechubechub er kau e mo meskau a support el mousbech er ngii.​—Psa. 103:8-13.

10. Ngera uchul me ngklou el berraod sel dolatk el kmo ngkired el meruul a lmuut el betok? (Galatia 6:4)

¹⁰ Sel domdasu el kmo ngkired el meruul a lmuut el betok. Ngsebeched el di kid lomekberaod er kid sel bo domekesiu er kid er a rebebil. (Monguiu er a Galatia 6:4.) A lsekum kede di compare er kid er a rebebil e ngsebechel el rullid el mo mechechei e mengaiuechit. (Gal. 5:26) Nglocha soad el dirrek el remuul aike el bla leruul a rechad me kede meringel loureor el meruul lengelakl er aike el sebeched. E a lsekum ng “metemall omelatk, e a reng me ng metemall,” me nglmuut el kmal mengitechut sel dolasem el meruul a tekoi el diak el sebeched el remuul! (Osi. 13:12) Tia sebechel rullid el kmal mo mesaul a bedenged e mo soro el remurt er a klaidesachel el mo nguu a klengar.​—Osi. 24:10.

11. Ngera mo ngosukau me ngdiak di lekau el mengerechir er kau a tekoi el diak el sebechem?

¹¹ Ngmekera obedebedii tia el berraod? Lak em expect er kau el mo meruul a lmuut el betok er aike el longerechir a Jehovah. Ngkmal diak longerechir aike el diak er kau. (2 Ko. 8:12) Bo lulterekokl a rengum el kmo a Jehovah kmal diak el compare aike el moruul er aike el loruul a rechad. (Mt. 25:20-23) Ngkmal mengreos er kau el mesiou er ngii loba rengum el rokir, blakerreng er kau, me a ducherreng er kau. Bo lengariou a rengum e mutebengii el kmo a rekim, health er kau, me a blekeradel el omngar ngii a uchul me ngdiak el sebechem el meruul aike el rokui el soam. Ngdi ua Barsilai, lak mkengei a ileakl el techall er omesiou a lsekum a rekim me a lechub e ng health er kau a uchul e ngmo meringel er kau el meruul er tia el ngerachel. (2 Sa. 19:35, 36) E ua Moses, mkengei a ngeso e momekngerachel a ngerachel el mora rebebil a lsekum e ngsebechel. (Exo. 18:21, 22) Tiakid el klengariourreng a mo ngosukau me ngdiak mongerechir er kau el mo meruul a tekoi el rullau el mo mesaul el remurt er a klaidesachel el mo nguu a klengar.

12. Ngkid a uchul a mekngit el omelilt el loruul a rechad? Mosaod.

¹² Sel bo de feel el kmo ngkid a uchul a mekngit el omelilt er a rechad. Ngdiak el sebeched el melilt el kirel a chad, e diak el sebeched el omekerreu er tir er a rsel a mekngit el omelilt er tir. El ua tiang, a ngalek el sechal me a  lechub e ngredil a cherengel a taem e ngmelilt el mo diak losiou er a Jehovah. Tia uchul a klou el kngtil a rengrir a rechad er a blil. Me nguaisei engdi a ruungalek el di tir el blame er tir er a mekngit el omelilt er a ngelekir a mengol er a klou el berraod. Tia diak el berraod el Jehovah melekoi er tir me longol er ngii.​—Rom 14:12.

13. Ngera sebechel a oungalek el meruul el kirel a mekngit el omelilt er a ngelekel?

¹³ Ngmekera obedebedii tia el berraod? Bo modengei el kmo a Jehovah mla mesterir a rokui el chad a ilmeklir el melilt. Ngmecherei a derta el chad me ngdi ngii el melilt. Tia uldimukl er a omelilt el mo mesiou er ngii me a lechub e ngdiak. A Jehovah medengei el kmo kau a diak em perfect, ngdi soal omoruul er sel kot lungil el sebechem. A omelilt loruul er ngii a ngelekem a ngerechelel, ngdiak el ngerechelem. (Osi. 20:11) Me nguaisei engdi ke locha melatk a cheleuid el omriruul er a omomekeroul er tir. A leuaisei e mouchais er a Jehovah aike el ngar er a rengum e molengit a klausubes er ngii. Ngika medengei el kmo ngdiak el sebechem el ngmodech a tekoi el mileketmokl. Ngdi a osisiu el taem a Jehovah diak le expect er kau el mo stob er a ngelekem a meridm a medal omerellel. Engdi lak mobes el kmo a lsekum a ngelekem a melasem el lmuut el mei er a Jehovah, ngkmal kongei el lmuut el nguu el mei.​—Lk. 15:18-20.

14. Ngera uchul ngkired el medebedii el choitii a feeling el di feel guilty?

¹⁴ A lsekum kede di feel guilty er a bek el taem. Sel derebet er a klengit e ngmelemalt a bo douuchel er a rengud el kirel. Me nguaisei engdi tia el feeling el di feel guilty a diak el berraod el Jehovah a soal a de chellungel er ngii. Ngberraod el kired el medebedii el choitii. Kede mekerang e medengei el kmo ngmla mo diak el tabesul tia el di feel guilty er kid? A lsekum kede mla ouchais a kngtid, e obult, e meruul aike el rokui el sebeched el diak deluut el mo meruul er ngii, e ngsebechel mo ulterekokl a rengud el kmo a Jehovah mla ousubes er kid. (Rel. 3:19) Uriul er a deruul aika el tekoi  e a Jehovah diak el soal a di dolemolem el di ouuchel er a rengud. Ngmedengei el kmo sel di de feel el uaisei e ngsebechel mo uchul a telemelled. (Psa. 31:10) A lsekum e kede meieleb er a kngtil a rengud e ngsebeched el give up e mo diak derurt er a klaidesachel mo nguu a klengar.​—2 Ko. 2:7.

15. Ngera sebechel ngosukau sel di bom feel guilty? (1 Johanes 3:19, 20) (Dirrek el momes er a siasing.)

¹⁵ Ngmekera obedebedii tia el berraod? A lsekum ke di melemolem el di feel guilty, e bo lulturk osengem er a “mera el klausubes” el lebeskid a Dios. (Psa. 130:4, NW) Sel lousubes er a chad el mera el mla obult, e ngtibir el kmo: “Dikea bo kulatk a chelebirukel el le riruul.” (Jer. 31:34) Tia belkul a kmo a Jehovah diak lluut el mo melatk aike el kngtim el bla lousubes er kau el kirel. Lak momdasu el kmo aike el ringel omchelebangel le kau el mlora klengit a belkul a kmo ngdirkak lousubes er kau. E lak di lekau lomekcharm er kau el kirel a cheleuid el omriruul luchul me ngdikea el sebechem el meruul a betok er chelechang. A Jehovah diak lolatk a kngtim, me kau me ngdiak el kirem.​—Monguiu er a 1 Johanes 3:19, 20.

16. Kid el chad er a rurt ngngera kired el mo medengei?

¹⁶ Chelecha el derurt er a klaidesachel el mo nguu a klengar, e ngkired el ‘remurt el kirel a mo meloched er a teb.’ (1 Ko. 9:24) Ngsebeched el rullii tiang a lsekum kede mo medengei a klekakerous er aike el berraod el kired el chellungel er aike el berraod el kired el medobed el chemoit. Ngar tia el suobel e kede mla smaod a di bebil er aike el kired el chellungel me aike el kired el mengoit. Engdi ngngar ngii a lmuut el bebil. A Jesus a dilu el kmo ngsebeched el mo “[oberaod] er chomelechemakl, ma cheltelaol ra rrom, ma ulekerreu er tial klengar.” (Lk. 21:34, BT) Aika el bades me a lmuut el bebil a sebechel ngosukid el mo medengei aike el kired el melodech er a klaidesachel er kid el mo nguu a klengar.

17. Ngera uchul me ngsebechel mo ulterekokl a rengud el kmo kede mo lochedii a teb er a klaidesachel el mo nguu a klengar?

¹⁷ Ngsebechel mo ulterekokl a rengud el kmo kede mo lochedii a teb er a klaidesachel el mo nguu a klengar e le Jehovah mo meskid a klisiich el dousbech er ngii. (Isa. 40:29-31) Me lak bom soro el remurt! Moukerebai er a apostol Paulus el mle blak a rengul el remurt el mo melai er a nguked. (Fil. 3:13, 14) Ngdiak a chad el sebechel remurt el kirem, engdi Jehovah mo ngosukau el mo kats er ngii. A Jehovah sebechel ngosukau el chellungel a berredem e mengoit aike el diak a ultutelel el berraod. (Psa. 68:19) Ngoeak a ngelsuil a Jehovah, e ngmo sebechem el rurtii loba ducherreng e mo kats!