1. Ngera uchul me a Daniel a kmal mle ileakl er a osengir a rechad er a Babilon?

 A PROFET Daniel a mle ngeasek er a lenguu a rechad er a Babilon el mo cheroid er a Jerusalem e mo blebaol er a belurir. Engdi alta ngika dirk mle ngeasek, a rengarbab el chad er a Babilon a miltebengii el kmo ngkmal mle ileakl. Te milsa el kmo a Daniel a kmal mle klebokel “er a ikrel” el “ungil sechal, el diak a telemall er a [bedengel],” e chedal a ngarbab el telungalek. (1 Sa. 16:7) Tia uchul me a rechad er a Babilon a mle train er ngii el mo mesiou er a blil a king.​—Dan. 1:3, 4, 6.

2. Ngmle uangerang a uldesuel a Jehovah el kirel a Daniel? (Esekiel 14:14)

² A Jehovah kmal mle betik a rengul er a Daniel el diak el klebekelel er a ikrel a uchul me a lechub e ngderuchellel er a buai. Ngmle betik a rengul er a Daniel el kirel a chad el lullilt el mo uai ngii. A Jehovah er a lolekoi el kmo a Daniel a di ua Noah me a Job, e ngika locha dirk mle 20 a rekil. A Jehovah ulemes er ngii el melemalt el ua Noah me a Job el chiloit a betok el rak el meruul er a ungil chisir er medal a Dios. (Gen. 5:32; 6:9, 10; Job 42:16, 17; monguiu er a Esekiel 14:14.) A Jehovah millemolem el betik a rengul er a Daniel er a klemengetel a klengar er ngii.​—Dan. 10:11, 19.

3. Ngera kede mo mesaod er tia el suobel?

³ Ngar tia el suobel e kede mo mesaod a eru el blekerdelel a Daniel el rirellii el kmal mo mekreos er osengel a Jehovah. A kot e kede mo mesaod a derta er aika el blekeradel e merriter aike el taem el lullecholt aikang a Daniel. Ongingil e kede mo mesaod el kmo ngngera ngilsuir el mo olecholt aika el blekeradel. E a ulebongel e kede mo mesaod er a rolel e ngsebeched el loukerebai er ngii. Me alta tia el suobel a milluches el kirir a rengeasek, me nguaisei kid el rokui a sebeched el ngmai a klubeled er a kerebil a Daniel.

4. Ngmilekera Daniel e ochotii a blekeu? Mouchais er a ta er a olechotel.

⁴ A rechad loba blekeu alta te mo medakt, engdi ngdiak lebecherei a datk me lerelleterir el mo diak loruul a melemalt el tekoi. A Daniel alta ngkmal mle kekerei el chad engdi nguleba blekeu. Molatk eru el taem el lulechotii a blekeu. Sel kot el taem a locha mle eru el rak er uriul er a letemellii a Jerusalem a rechad er a Babilon. Ngmlo er ngii a mekngit el berrusel a King Nebukadnesar er a Babilon el kirel a klou el bleob. Ngika dilu el kmo ngmo omekoad er a rokui el mellomes a rengrir el chad er a beluu a lsekum te diak louchais el kmo ngngera mle berrusel e ngera belkul. A Daniel a mle uldimukl er tir. (Dan. 2:3-5) Daniel a mle kirel mereched louedikel. A lak e te mo mad a rebetok el chad. Me a Daniel “ullengit er a king me lorkedii a kodellir a re chellimosk el telkib me bo le sebechel el subedii a king er a belkul a berrusel.” (Dan. 2:16) Tia ulechotii el kmo a Daniel uleba blekeu me a klaumerang. Ngdiak a olechotel a kmo a Daniel a mla ta el louchais a belkul a berrous. Ngullengit er a resechelil el ngklir er a Babilon a Sadrak, Mesak, me a Abednego “me loluluuch el mor a Dios el ngar a eanged me bo lochotii a klechubechub er ngii e lesodii sel berotel el mor tir.” (Dan. 2:18) A Jehovah ulenger aika el nglunguchir. Ngoeak a ngelsuil a Dios, e a Daniel a mle sebechel louchais er a belkul a berrusel a Nebukadnesar. Me a Daniel me a resechelil a dimlak bo lokodall.

5. Ngera sel lmuut el ta er a taem el Daniel a mle kirel lochotii a blekeu?

⁵ Telkib el taem er uriul er a louchais er a belkul a berrous el kirel sel klou el bleob, e ngliluut el measem a blekengel a Daniel. Ngliluut el mo er ngii a mekngit el berrusel a Nebukadnesar. Tia el berrous a mle kirel a klou el kerrekar. A Daniel ulechotii a blekeu er a louchais er a belkul a berrous, el mle uldimukl er ngii a king a mo kebelung e mo diak el king el telkib el taem. (Dan. 4:25) A king a mle sebechel lomes aika el tekoi el kmo a Daniel omtok er ngii e mekodir. Engdi Daniel a ulechotii a blekeu e uluuchais er a belkul a berrous.

6. Ngera ngilsuir a Daniel el mo oba blekeu?

⁶ Ngera ngilsuir a Daniel el mo oba blekeu er a klemengetel a klengar er ngii el rokir? Ngkmal sebechel el mo ulterekokl a rengud el kmo a delal me a demal a Daniel a ulechotii a ungil kerebai er a lekekerei. Te ullengesenges a ulekrael el Jehovah milsterir a rechedam me a rechedil er  a Israel, e ullisechakl er a ngelekir er a Llach er a Dios. (Dut. 6:6-9) Daniel a dimlak di lodengei aike el Teruich el Llach, ngdirrek el mle medengei a komakai el omesodel el ua aike el kall el sebechir me a diak el sebechir a rechad er a Israel el mengang. b (Lev. 11:4-8; Dan. 1:8, 11-13) A Daniel a dirrek el mle medengelii a reksi er a rechedal a Dios e mle medengei a dilubech el mo er tir sel lak lekiei el otirakl a llechul a Jehovah. (Dan. 9:10, 11) Aike el tekoi el dilubech er a chelsel a klengar er a Daniel ulterekeklii a rengul el kmo a Jehovah me a remesisiich el anghel er ngii a olengeseu er ngii.​—Dan. 2:19-24; 10:12, 18, 19.

7. Ngera dirrek el ngilsuir a Daniel el mo oba blekeu? (Dirrek el momes er a siasing.)

⁷ A Daniel a milsuub aike el lulluches a reprofet er a Dios, luldimukl er aike el ulochel a Jeremia. Omesubel er aika el ulaoch a uchul me ngmiltebengii el kmo, ngdi kmedung e a Rechijudea mo diak el blebaol er a Babilon. (Dan. 9:2) Sera lomes otutel a ulaoch er a Biblia e ngulterekokl el silsichii a klaumerang er ngii er a Jehovah, me tirke el ngar ngii a mesisiich el klaumerang er tir er a Jehovah oba mesisiich el blekeu. (Momekesiu er a Rom 8:31, 32, 37-39.) Me a lmuut el klou a ultutelel, a Daniel a mle blechoel el meluluuch el mora Demal el ngar er a eanged. (Dan. 6:10) Nguluuchais a kngtil er a Jehovah me aike el mlara rengul. Ngdirrek lullengit a ngeso er ngii. (Dan. 9:4, 5, 19) Ngika mle chad el di uaikid me ngdimlak el mechell loba blekeu. E ngbai siluubii el mo oba tia el blekeradel loeak a omesuub me a nglunguuch me ngii el uluumera lulsirs er a Jehovah.

8. Kede mekera e mo oba blekeu?

⁸ Me ngngera kired el meruul er ngii me bo doba blekeu? A rechad er a blid a locha melisiich er kid el mo oba blekeu, me nguaisei engdi ngdiak el sebechir el pass er a blekeu el mei er kid. A bo doba blekeu a di ua dosuub el mo meruul er a beches el tekoi. A ta er a rolel e ke mo meduch el meruul er ngii, a omomes er a omerellel a sensei em copy aike el loruul. Ngdi osisiu, kede suubii el mo oba blekeu sel dekerekikl el omtab a rolel e a rebebil olecholt er ngii e copy er tir. Me ngngera kede mla suubii er a Daniel? Ngkired el mo uai ngii el lungil medengelii a Tekingel a Dios. Ngkired el mekurulii a kmes el deleuill er kid me a Jehovah loeak sel deblechoel el louchais er ngii aike el ngar er a rengud. E kired el mo oumera el ulsirs er a Jehovah, lulterekokl a rengud el kmo ngobengked. E seikid e sel lemeasem a klaumerang er kid, e kede mo ochotii a blekeu.

9. Ngera el klungiaol a dengai sel bo dolecholt er a blekeu?

⁹ Ngbetok a klungiaol el dengai sel bo dolecholt er a blekeu. Molatk er a experience er a Ben. Ngika mlara skuul er a Germany el rokui el ngar ngii a oumerang er a evolution e omdasu el kmo a cheldecheduch er a Biblia el kirel omebelel a rokui el tekoi a diak el klemerang. A ta er a klebesei, e ngmlo er ngii a techellel a Ben el mo dechor er a medal a class e mesaod er a uchul me ngoumerang el kmo a klengar a ulebeob. Ngika ulechotii a blekeu e uluuchais er a klaumerang er ngii. Ngera dilubech? A Ben a kmo, “A teacher er ngak a mle kerekikl lorrenges e riruul a copy er aike el information el kuluusbech el mesaod er a klaumerang er ngak e mesterir a rokui el classmate er ngak.” Te milekerang a re classmate er a Ben? Ngmelekoi el kmo, “A rebetok er tir ullerrenges e millekoi el kmo te kmal admire er ngak.” Ngua lochotii a experience er a Ben, a rechad lochotii a blekeu a blechoel el nguu a respect er a rechad. Te dirrek el locha mo  ochau a rengrir a rechad el mei er a Jehovah. Me ngkmal ngar ngii a ungil luchul me ngkired el mo oba blekeu.

10. Ngera blakerreng?

¹⁰ A tekoi er a Hebru el lousbech er ngii a Biblia el kirel a “blakerreng” me a lechub e ng “diak lemengodech el bltikerreng” a mesaod er a blekeradel el rullii a chad el mo blak a rengul el mora chad e merekedii er ngii e diak lechitii. E tia blechoel lousbech er ngii el mesaod er a bltkil a rengul a Dios el mora rechedal. A Biblia dirrek lousbech er tia el tekoi el mesaod er a bltikerreng el mocholt er a delongelir a rechedal a Dios. (2 Sa. 9:6, 7) Omerollel a taem e a blakerreng er kid a sebechel lmuut el mo mesisiich. Molatk a rolel e tia mlo uaisei el kirel a Daniel.

11. Ngera millasem er a blakerreng er a Daniel er a lechudelang? (Momes er a siasing er a medal tia el babier.)

¹¹ A blakerreng er a Daniel el mora Jehovah mlo betok el taem el lemeasem. Engdi ta er a kot el meringel el omelsemai el blo lechebengelii, a sera le oketiu me a derengel a rekil. Ngar tiakid el taem e a Babilon a bla lenguu a rechad er a Media me a Persia me a King Darius a mengedereder er ngii. Remengeteklel a king a dimlak el sorir a Daniel e dimlak omengull er tir er a Dios lulsiou er ngii. Me te millib el mo omekoad er a Daniel. Te rirellii a king me ngsaing er a llach el ngii a mo ochotii el kmo a Daniel e ngmo oba blakerreng el mora Dios er ngii me a lechub e ngking. A di mle kirel a Daniel el meruul er ngii el lochotii a blakerreng er ngii el mora king e blend in lobengterir a rokui el chad, a mo stob el meluluuch el mora Jehovah el 30 el klebesei. A Daniel a dimlak el kengei el tomellii a blakerreng er ngii el mora Jehovah. Sei a uchul me a Daniel a ulebidokl er a blil a laion. Engdi Jehovah ulemekngeltengat er a blakerreng er a Daniel e ulsebelii me ngdimlak el meka er a laion. (Dan. 6:12-15, 20-22) Ngmekera sebeched el mo oba blakerreng el mora Jehovah el ua lulebang a Daniel?

12. Ngmilekera Daniel e mle sebechel diak el letemellii a blakerreng er ngii el mora Jehovah?

¹² Ngua dulsaod er a uchei, a blakerreng a mengai er a mesisiich el bltikerreng. A blakerreng er a Daniel el mora Jehovah dimlak el sebechel metemall e le ngkmal mle betik a rengul er a Demal el ngar er a eanged. A Daniel a ulterekokl el  milekurulii chouaitia el bltikerreng loeak a lolatk a blekerdelel a Jehovah e lomtab a rolel e ngullecholt aika el blekerdelel. (Dan. 9:4) Daniel a dirrek el millebedebek aike el rokui el ungil el bla leruul a Jehovah el kirel me a rechedal.​—Dan. 2:20-23; 9:15, 16.

13. (a) A rengeasek te chelebangel er a ngera el omeasem er a blakerreng er tir? Mosaod er a ta er a olechotel. (Dirrek el momes er a siasing.) (b) Ngua desa er a video, ngngera sebechem el meruul er ngii a lsekum te mo oker er kau el kmo, a Resioning er a Jehovah te support er a rechad el sorir a klengar el homosexual?

¹³ Ngdi ua Daniel, a rengeasek er chelecha el taem a iliuekl er a rechad el diak omengull er tir el mora Jehovah me a llechul. Chouaitirka el chad a locha diak el sorir a rechad el betik a rengrir er a Dios. A rebebil er tir a locha mo bully er a rengeasek er kid e melasem el melemall er a blakerreng er tir el mora Jehovah. Molatk a dilubech el mora Graeme el ngeasek el buik er a Australia. Ngika mlo chobengelii a meringel el blekeradel el dilubech er a skuul. A teacher uleker er a rengalek er a skuul el kmo te mo mekerang a lsekum a ta er a sechelirir ouchais er tir el kmo ng homosexual. Ngika el sensei a dilu el kmo, tirke el mo support er a sechelirir el uaisei bo ledechor er a bitang, e tirke el diak bo ledechor er a bitang. A Graeme a kmo, “Rokui el chad a dilechor er a side el mle support er tiang except er ngak me a kuk ta er a Sioning.” A ongingil el tekoi el dilubech a kmal mle test er a blakerreng er a Graeme el mora Jehovah. Ngmelekoi el kmo, “Aike el mlo derengel tia el 1 hour a klemengetel el class, e tirke el bebil er a student mo lmuut er a teacher me ngmillekoi a mekngit el mei er kemam. Ak mlora tkurrebab el sebechek el defend er a klaumerang er ngak el loba chelellakl el reng e ngar er a ungil rolel, engdi te dimlak lorrenges aike el kulekoi.” Ngmlo uangerang a uldesuel a Graeme? Ngkmo, “Ngdimlak el soak el target er aika el kmal mekngit el tekingir, engdi ngkmal mle dmeu a renguk le ngmle sebechek el melemolem loba blakerreng el mora Jehovah e defend er a klaumerang er ngak.” c

14. Ngera ta er a rolel e ngsebechel diak el metemall a blakerreng er kid el mora Jehovah?

¹⁴ Ngsebechel diak el metemall a blakerreng er kid el mora Jehovah a lsekum kede mo ua Daniel el dmolech a bltkil a rengud el mo er ngii. Kede mekurulii chouaitia el bltikerreng sel dosuub el kirel a blekerdelel a Jehovah. El ua tiang, ngsebeched el mesuub a blebelel. (Rom 1:20) A lsoam a lluut el mo dmolech a bltkil a rengum me a omengull er kau el mora Jehovah, e ngsebechem el menguiu aike el mekedeb el suobel me a lechub komes a video el ngar cheungel a series el “Was It Designed?” Ngdirrek el sebechem el omes er a brochure el Was Life Created? me a The Origin of Life​—Five Questions Worth Asking. Molatk a tekingel a Esther el kekerei el odos er a Denmark el kirel aika el brochure: “Ngmera el ungil a suobel er ngii. Aika diak louchais er kid el kmo ngngera kired el oumerang e ngbai di ouchais a klemerang el tekoi e kid a di kid el melilt.” A Ben el dulsaod er ngii er a uchei a kmo: “Aika el suobel a kmal silsichii a klaumerang er ngak. Ngulterekeklii a renguk el kmo a Dios a ulemeob a rokui el tekoi.” Uriul er a omosuub er tia el suobel, e ke locha mo kongei aike el lolekoi a Biblia el kmo: “Rubak el Dios er kemam! Kau a kirem a klebkall, ma odanges, ma klisiich. Ele kau a mileob a rokui el tekoi.”​—Och. 4:11. d

15. Ngera dirrek el ta er a rolel e ngsebeched el mekurulii a kmes el deleuill er kid me a Jehovah?

¹⁵ A dirrek el ta er a rolel e ngmo dmolech a bltkil a rengud el mora Jehovah, a oeak sel  dorriter er a klengar er a Ngelekel el Jesus. Tiakid a lurruul er ngii a Samira el odos el kiei er a Germany. Ngkmo: “Ak liluut el mo ungil medengelii a Jehovah loeak a Jesus.” A Samira er a lekekerei e ngmle meringel er ngii a understand el kmo ngmekera Jehovah e ngar ngii a feelings er ngii. Ngdi ngmle sebechel understand er a Jesus. Ngmelekoi el kmo: “Ngmle soak a Jesus e le ngmle ungil a blekerdelel e soal a rengalek.” Sera lluut el suub a betok el kirel a Jesus, me ngii a mlukeroul a deleuill er ngii me a Jehovah. E ngerang? Ngkmo: “Ngmlo sebechek el mtebengii el kmo a Jesus a cherrungel lochotel a Demal. Ngosisiu a blekerdelir. Ak mlo mtebengii el kmo a ta er a uchul me a Jehovah ulderchii a ngelekel el mei er a chutem, a me bo lsebeched el lmuut el mo ungil medengelii.” (Jn. 14:9) A lsoam a lluut el mo mesisiich a deleuill er kau me a Jehovah, e mongoit a taem el mesuub aike el rokui el sebechem el kirel a Jesus. Omoruul el uaisei, e ngmukeroul a bltkil a rengum me a blakerreng er kau el mora Jehovah.

16. Ngmekera mo uchul a klungioled sel doba blakerreng? (Psalm 18:25; Mika 6:8)

¹⁶ Tirke el loba blakerreng el chad a blechoel el mo er ngii a mesisiich el klausechelei er tir lobengterir a rebebil, el ngii a diak a ulebengelel. (Rut. 1:14-17) Me a lmuut kung, tirke el loba blakerreng el mora Jehovah a ngar ngii a ungil luchul me te melechesuar er a budech. E ngerang? E le Jehovah tibir el kmo ngmo oba blakerreng el mo er tirke el loba blakerreng el mo er ngii. (Monguiu er a Psalm 18:25; Mika 6:8.) Ka di molatk er tiang, ngike el olab a bek el klisiich el Ulemeob a kongei el mo er ngii a mesisiich el deleuill er ngii lobengked! E sel lebo er ngii tia el deleuill er kid me ngii e ngdiak a ringel, ultok, mo lmuut er a kodall me ngdiak el sebechel choridid er ngii. (Dan. 12:13; Lk. 20:37, 38; Rom 8:38, 39) Me ngmera el klou a ultutelel el doukerebai er a Daniel e dolemolem loba blakerreng el mora Jehovah!

17-18. Ngera dirrek el sebeched el suub er a Daniel?

¹⁷ Ngar tia el suobel e kede milerriter a di eru er aike el ungil blekerdelel a Daniel. Engdi ngkmal dirk betok a sebeched el suub er ngii. El ua tiang, a Jehovah milsang a Daniel a ues me a berrous e milsa duch er ngii el mo ouchais a belkul. A betok er aika el ulaoch a mla tmaut. A bebil er ngii ouchais a mo duubech er a ngar medad, el ngar ngii a lebo lerellii el mora rokui el chad el ngar er a chutem.

¹⁸ Ngar er a ongingil suobel e kede mo mesaod a eru el ulaoch el leliluches a Daniel. Sel bo dodengei a belkul aika el ulaoch e ngsebechel ngosukid a remeklou me a remekekerei er chelechang el mo ungil melilt. Aika dirrek el sebechel smisichii a blekenged me a blakerreng er kid el mora Jehovah me bo lsebeched el kltmokl el kirel a omelsemai el kmal di kmedung e ngmei.