A DIANA a mla mo 80 me a derengel a rekil e mla chobangel a betok el meringel el tekoi er aika el mla mo merek el rak. A bechil el mle smecher el Alzheimer e kiliei er a nursing home a mlad. E a reteru el ngelekel el sechal me te dirrek el mlad, e ngii a mle smecher el kasinoma a tul. Engdi a rudam me a rudos sel lesa er a miting me a lechub e loldingel, e ngblechoel el dmeu a rengul.

A John a milsiou el odam el oldingel a ongdibel el kuk betok er a 43 el rak. Ngkmal mle soal tia el ngerechelel e dimlak lomdasu er a mo meruul er a kuk ta er a tekoi. Engdi ngmlo kirel el mo diak loruul er tia el ngerechelel e le ngmle kirel el omekerreu er a ta er a chedal el mle smecher. Me a rudam me a rudos el medengelii sel lesang er aike el ta el sils el ongdibel me a lechub e ngklou el ongdibel, e ngdirkak lemengodech e le ngkmal dirk dmeu a rengul.

Ngmekera sebechel a Diana me a John e mo dmeu a rengrir? Ngmekera chad el chuarm e mo dmeu a rengul? E mekera chad e mo dmeu a rengul alta ngkirel el mo diak loruul er a tekoi el kmal soal? A Biblia a onger er tia el ker el kmo: “A melemalt bo loldeu er a rengul er a RUBAK.” (Psalm 64:10) Ngsebeched el mo ungil medengelii tia el klemera el tekoi a lsekum kede mo medengei el kmo ngera el tekoi a meskid a mera el deurreng me a ngera diak.

Ngar ngii a bebil el tekoi el blechoel el mo uchul a deuil a rengud. El ua tiang, ka molatk er a sechal me a redil el mo bechiil. Me a lechub e ngchad el mocha oungalek me a lechub e ngchad el nguu a beches el ngerechelel er a omesiungel el mora Jehovah. Aika el tekoi a mo uchul a deurreng e le ngrokui el sengk el mlara Jehovah, el ngii a milskid a chebechiil, me a klengelakel, me a ureor el doruul el ngar er a cheldebechelel.​—Genesis 2:18, 22; Psalm 127:3; 1 Timothy 3:1.

Engdi a bebil el tekoi a di meskid a tedeb el deurreng. Ngklengiterreng, e le bechil a chad a sebechel mo diak el blak a rengul me a lechub e ngmad. (Esekiel 24:18; Hosea 3:1) E a rengalek a sebechir el mo diak lolengesenges er a redemerir me a rederrir me a dirrek el Dios, e locha mo mesuld a ngklir. El ua tiang, a omesiungir a rengelekel a Samuel a dimlak lekengei er ngii a Jehovah, me a David a mla er ngii a betok el mondai er a telungalek er ngii e le ngmlo er a klengit el obengkel a Bathseba. (1 Samuel 8:1-3; 2 Samuel 12:11) Sel leduubech a chouaika el tekoi, e ngdiak bo  luchul a deuil a rengud, e ngbai uchul a klengiterreng me a klou el ringel.

Me ngdi osisiu, a lebebil er a taem e ngmo diak el sebeched el melemolem el meruul er a ngerachel el kirel a omesiunged el mora Jehovah e le kede mo smecher me a lechub e ngkired el omekerreu er a telungalek er kid, me a lechub e ngmengodech a tekoi er a cheldebechelel a Dios. Me a rebetok el mlo diak loruul a mloterekokl el ngerechelir a blechoel el melekoi el kmo te mera el oureng aike el temir el mle dmeu a rengrir el meruul er tia el ureor.

Me ngsebeched el mesa el kmo chouaika el uchul a deurreng a di tedeb. Me a leuaisei, e ngar ngii a deurreng el di melemolem alta ngmo meringel a klengar? Ngulterekokl el ngar ngii, e le Samuel me a David me a relmuut el bebil a dimlak loridii a deuil a rengrir er sera bo lechelebangel a ringel.

A Jesus a mle medengei el kmo ngera mera el deurreng. A uchei er a lemei er a chutem, e a Biblia a melekoi el kmo ngmle ‘dmeu a rengul el ngar medal’ a Jehovah er a bek el taem. (Osisechakl 8:30) Engdi sera lemei er a chutem, e a lebebil er a taem e ngmlo chelebangel a kmal meringel el tekoi. Me nguaisei, engdi ngmle dmeu a rengul el meruul a soal a Demal. (Johanes 4:34) E kuk mekerang el kirel aike el ulebongel el sikang er ngii el mle mui er a ringel? Kede menguiu el kmo: “Sel deurreng el dirk merael el mei a uchul me ng dimlak a belkul er ngii a rrengel a mo mad er a kerus.” (Hebru 12:2) Me ngbetok a sebeched el suub er aika el eru el tekoi el lulsaod a Jesus el kirel a mera el deurreng.

A ta el taem, e a 70 el disaiplo a liluut el mora Jesus er a uriul er a bo lemerek el omerk er a klumech. Ngmle dmeu a rengrir el kirel aike el rokui el tekoi el lurruul, el mo lmuut er a loldik er a remekngit el chelid. Engdi a Jesus a dilu er tir el kmo: “Lak lungil a rengmiu el kmo a mekngit el chelid olengesenges er kemiu; e bai bo lungil a rengmiu el kmo a ngkliu a llechukl er a eanged.” (Lukas 10:1-9, BT, 17, 20) Nguaisei, a denguu a kengei er a Jehovah a lmuut el klou a ultutelel e mo uchul a klou el deurreng el kuk ngaruchei er a ngii di el ileakl el ngerecheled.

A kuk ta er a taem er a longedecheduch er a seked a Jesus, e a ta el redil er a Judea a kmal mlo mechas a rengul er a osisecheklel me ngdilu el kmo a delal a ulterekokl el kmal dmeu a rengul el mlo er ngii a ngelekel el sechal. Engdi a Jesus a bai ulenger el kmo: “Ngdmeu a rengrir tirke el rongesii a tekingel a Dios  e mo olab!” (Lukas 11:27, 28, NW) Me ngsebechel el mo dmeu a rengud er aike el loruul a rengeleked, engdi sel mo uchul a diak a ulebengelel el deurreng, a sel dolengesenges er a Jehovah e lebo er ngii a ungil deleuill er kid me ngii.

Ngdirrek el mo uchul a klou el deuil a rengud sel dodengei el kmo a Jehovah a dmeu a rengul er kid. E alta ringel a rullid el mo chuarm, engdi ngdiak bo luchul e doridii tia el deurreng er kid. A mera er ngii, sel delemelemii a blakerreng er kid sel dechelebangel a ringel, e ngmera el mo dmeu a rengud. (Rom 5:3-5) A Jehovah a dirrek el mesterir tirke el oumerang er ngii a chedaol reng, e tia el deurreng a tedebechel a rodech er a reng. (Galatia 5:22, BT) Me tia ngosukid el mo medengelii a uchul me a Psalm 64:10 a kmo: “A melemalt bo loldeu er a rengul er a RUBAK.”

Tia dirrek el smodii a uchul me a Diana me a John a sebechir el melemolem el dmeu a rengrir alta te chilebangel a ringel. A Diana a kmo: “Ak mla metik osebechakl el ngar er a Jehovah, el di ua uldesuel a ngalek el mora demal me a delal.” E dirrek el melekoi el kmo: “Ngsebechek el melechesuar el kmo ngmla omekngeltengat er ngak me ngsebechek el melemolem el oldingel el dmeu a renguk.” E ngera ngilsuir a John el lomelemii a deurreng er ngii e mo mechesang er a omesiungel er a uriul er a bo lak loruul er a mla moterekokl el ngerechelel? Ngmelekoi el kmo: “Ngulemuchel er a 1998 er sera bo kulisechakl er a Ministerial Training School, e ngmla mo sebechek el dmolech el mesuub el diak el ua ngar er a mong.” Ngmesaod el kmo a omelodech el mle kirel ngii me a bechil el mo meruul er ngii a mle beot e le te mle blechoel el kongei el mo meruul aike el mloterekokl er tir er a Jehovah. Me ngmelekoi el kmo: “Aki mla remuul aika el tekoi el diak a ta el ki mouuchel a rengmam er ngii.”

A rebetok el mla chormii tia el tekoi a dirrek el melekoi el kmo a tekoi el ngar er a Psalm 64:10 a klemerang. Ka molatk er a ta el obekel el mla mesiou el kuk betok er a 30 el rak el ngar er a Bethel er a beluu er a Merikel. E a uriul e te mlo mesiou el special pioneer. Te dilu el kmo: “Ngulterekokl el mo mekngit a rengum sel bo lak moruul er a kmal soam el tekoi,” engdi te dirrek el dilu el kmo: “Engdi ngdiak di lolemolem el mekngit a rengum.” Sera lenguu tia el beches el ngerechelir, e te mlo omuchel el oldingel el obengkel sel ongdibel el leblo er ngii. Te dilu el kmo: “Aki milluluuch el kirel a bebil el somam el tekoi. Me sera lemonger a nglungucham e ngmlo mesisiich a rengmam e dirrek el mlo dmeu a rengmam. Telkib el taem er uriul er aki bo er tia el ongdibel, e a rebebil a mlo omuchel el pioneer, e ngmlo er ngii a klengeltengat el ki mngiluu el mlo sebecham el mesuub el obengterir a reteru el chad el olengeriakl er a omesubir.”

Nguaisei el diak el blechoel el beot el mo dmeu a rengud e le ngmo er ngii a taem e ngkuk mo mekngit a rengud. Engdi a Jehovah a melisiich er kid el okiu a tekoi el ngar er a Psalm 64:10. Me ngmo lmuut er sel taem el bo lemechitechut a rengud, me kid a sebechel el mo ulterekokl a rengud el kmo a dolemolem el blak a rengud er a chelsel a ngii di el blekeradel, e kede mo ‘oldeu er a rengud er a RUBAK.’ Ngdirrek el sebeched el omes el beduluchei el mo er sel taem el bo lemotaut a telbilel a Jehovah el “beches el beluulchad ma beches el melidiul.” E seikid e a rokui el chad a mo mecherrungel e mo “blekebek” e di ‘blechoel el dmeu a rengrir’ el kirel aike el rokui el tekoi el bo loruul a Jehovah.​—Isaia 65:17, 18.

Ka di molatk el kmo ngera belkul tia el tekoi. Ngmo cherrungel a klisichel a bedenged e mo mekiis er a bek el sils el mesisiich a bedenged. Me a ngii di el tekoi el dilubech el mlo uchul a kngtil a rengud a dikea bo luchul a ringeled. A Jehovah a melisiich er kid el kmo “a ikel dilubech el tekoi er a ngar a mong a kmal di mo diak a melatk.” Kede mo outkeu er tirke el betik er a rengud el mla mad e mo ua uldesuel a demal me a delal ngike el 12 a rekil el ekebil el Jesus a ulekisii el “kmal mlo dmeu a rengrir.” (Markus 5:42, NW) E a cherengel a taem, e a derta el chad er tia el chutem a mo melemalt e mo ‘oldeu er a rengrir er a RUBAK’ el mo cherechar.