1, 2. Ngrullid el mo soad el mekerang a bades er a Hebru 13:4?

 KID el rokui a soad el oldanges er a Jehovah. E Ngii a rredemelel a nguu tia el odanges, e ngii a dirrek el tibir el kmo ngmo meskid a odanges. (1 Samuel 2:30; Osisechakl 3:9; Ocholt 4:11) Ngdirrek el soal a debesterir a odanges a rebebil, el ua rengarbab el chad er a kabelment. (Rom 12:10; 13:7) Me nguaisei, engdi ngar ngii a lmuut el ta er a tekoi el kmal kired el ochotii a odanges el kirel. E tiang a chebechiil.

² A apostol el Paulus a milluches el kmo: “Mongull a chebechiil el bek el chad, e lak kom mongikiongel a dusall er a chebechiil.” (Hebru 13:4) A Paulus a mle bleketakl a omesodel el kirel a chebechiil. Ngmilsaod el mora Rekristiano el kmo ngkirir el mo oldanges a chebechiil, el belkul a kmo te mo omes er a chebechiil el mekreos. Me kau, nguaisei a osengem el kirel a chebechiil, el ileakl a chebechiielem?

3. Ngera el klou a ultutelel el ulekrael el kirel a chebechiil a ledillii a Jesus? (Momes er a siasing er a uchelel a suobel.)

³ Me a lsekum e ke omes er a chebechiil el mekreos, e ke oltirakl er a kmal ungil tekoi. A Jesus a dirrek el uleldanges er a chebechiil. Sel taem el Refarisi a uleker er ngii el kirel a dertel a chebechiil, e  ngmilsaod a tekingel a Dios el kirel a kot el chebechiil el kmo: “Ma uchul ma sechal a mo cheroid er a demal ma delal e mo kiei el obengkel a bechil; e tir el terung a mo tal chelechad.” A Jesus a dirrek el dilu el kmo: “Ma chad a diak le kirel el merort er sel bla lokur a Dios.”​—Monguiu er a Markus 10:2-12; Genesis 2:24.

4. Ngera mle moktek er a Jehovah el kirel a chebechiil?

⁴ A Jesus a dirrek el kongei el kmo a Dios a ngike el milekur a chebechiil, e ngii el chebechiil a kirel el di melemolem. A Dios er sera lokur a kot el chebechiil, e ngdimlak ledu er a Adam me a Eva el kmo ngsebechir el mo merort er a chebechiielir. A moktek er ngii a bai mle soal “tir el terung” a lolemolem el ngar a kltarreng e lebechiil el diak a ulebengelel.

5. Ngera ngildechii er a chebechiil a kodall?

⁵ Kede ungil medengei el kmo sel taem er a lerebet er a klengit a Adam, e a betok el tekoi a mlengodech. E a ta er ngii, a rechad a ulemuchel el mo chuodel e mad, e tiang a kmal klou a lengildechii er a chebechiil. A apostol el Paulus a milsaod el mora Rekristiano el kmo a kodall a mo ulebengelel a chebechiil me ngsebechel ngike el dirk kiei el buch el lmuut el mo bechiil.​—Rom 7:1-3.

6. Ngmilekerang a Llach er a Moses e meketeklii a osengel a Dios el kirel a chebechiil?

⁶ A Llach el Dios a milsterir a rechad er a Israel a mla er ngii a dmolech lomesodel el kirel a chebechiil. El ua tiang, a chad er a Israel a mle sebechel mo betok a rebechil. E tia el siukang a mla er ngii er a uchei er a lebesterir a Llach a Dios. Me nguaisei, engdi a Llach a ulemekerreu er a redil me a rengalek me lak bo lemekngit a omeruul el bedultir. El ua tiang, a lsekum a chad er a Israel a mo bechil a sibai el redil e a uriul e nglmuut el mo bechil a tang, e ngdirk kirel lomekerreu er ngike el kot el bechil el ua uchelel. A Dios a mengerechir er ngii el mo melemolem el omekerreu e omsang aike el lousbech. (Exodus 21:9, 10) E kid a diak dengar cheungel a Llach er a Moses er chelechang. Engdi tiang a osisecheklid el mo medengelii a uldesuel a Dios el kmo ngomes er a  chebechiil el kmal mekreos. Me tiang a ngosukid el mo oldanges a chebechiil.

7, 8. (a) Ngera omesodel a Llach el kirel a dertel a chebechiil a doltirakl er a Duteronomi 24:1? (b) Ngua ngera osengel a Jehovah el kirel a dertel a chebechiil?

⁷ Ngera omesodel a Llach el kirel a dertel a chebechiil? Alta e a Jehovah a dimlak er a moktek er ngii el kmo a rebechiil a mo merort er a chebechiielir, engdi a Llach a milsang a chad er a Israel a techellel el mo merort er a chebechiielel a lsekum e ngmetik a “diak lungil kirel ngii el redil.” (Monguiu er a Duteronomi 24:1.) Tia el Llach a diak losaod el kmo ngera el tekoi a medebodeb el “diak lungil.” Me nguaisei, engdi nglocha tekoi el uchul a terached, me a lechub e ngkmal oberaod el klengit el diak el kora di kekerei el tekoi. (Duteronomi 23:14) Engdi ngklengiterreng, e le sel taem er a Jesus e a rebetok el chad er a Judea a di mirrort a chebechiielir el di mekekerei el tekoi a “uchul.” (Mateus 19:3) Me ngkmal diak el soad el mo oba chouaitia el osisiu el uldasu.

⁸ Ngar a taem er a profet el Malakai, e a sechal a di mle beot er ngii el dortii a chebechiielel ngii me ngike el kot el bechil, e le ngmelatk el mo bechil a kekerei el redil el diak losiou er a Jehovah. Engdi a Jehovah a mileketeklii a osengel el kirel a dertel a chebechiil. Ngdilu el kmo: “Ng kmal chetik a dertel a chebechiil.” (Malakai 2:14-16) Me sel osengel a Dios el kirel a chebechiil a dirkak lemengodech er a uchelel el mei, er sera ledu el kmo a chad a “mo obengkel a bechil, me bo letal chelechad.” (Genesis 2:24) E a Jesus a ullengeseu el melisiich er a osengel a Demal el kirel a chebechiil er a ledu el kmo: “A chad a diak le kirel el mesaod er sel bla lodekiar a Dios.”​—Mateus 19:6.

9. Ngera belkul a tekingel a Jesus el ngar a Markus 10:11, 12?

⁹ A rebebil a locha mo melatk el kmo, ‘Ngar ngii a uchul me a Kristiano a sebechel dortii a chebechiielel e lmuut el mo bechiil?’ Ka momtab er a tekingel a Jesus er a ledu el kmo: “A sechal el choitii a bechil e mo bechil a tar a redil a mla mor a laokreng el omtok er a di mla bechil. E dirrek el ua isei a lsekum a redil a choitii a bechil e mo bechil a tar a chad e ng mocha er a laokreng.” (Markus 10:11, 12; Lukas 16:18) Me ngbleketakl el kmo a Jesus a uleldanges a chebechiil, e mle soal a rechad a bo loruul el uaisei. Me a lsekum a sechal a dortii a chebechiielel ngii me a blak a rengul el bechil el redil e mo bechil a ta er a redil, e ngmocha er a laokreng. E tiang a di osisiu el omeruul el mora redil el dortii a chebechiielel ngii me a blak a rengul el bechil el sechal. Tiang a uaisei, e le dertel a chebechiil a diak el sebechel torebengii a chebechiielir. A Dios a dirk omes er tir el terung el “tal chelechad.” A Jesus a dirrek el dilu el kmo a lsekum a sechal a dortii a chebechiielel er a dimlak a telemellel el bechil, e ngmo uchul e ngike el bechil el redil a sebechel mo ruebet er a laokreng. El okiu a ngera el rolel? Seikid el taem, e a redil el mechoit a locha mo melatk el kmo ngkirel lmuut el mo bechiil me bo lsebechel a bechil el mesiou er ngii. E a chouaitia el chebechiil a mo ruebet er a laokreng.

10. Ngera di ta el uchul e ngsebechel a Kristiano el dortii a chebechiielel e mocha mimokl el lmuut el mo bechiil?

¹⁰ A Jesus a ullisechakl el kmo ngar ngii a di ta el uchul me a chad a sebechel dortii a chebechiielel. Ngdilu el kmo: “A sechal el mengoit er  a bechil el diak le laokreng a uchul, a mor a laokreng a lsekum ngmo bechil a tar a redil.” (Mateus 19:9) Ngmilsaod er a osisiu el tekoi el ngar sel Cheldecheduch el Ngar er a Rois. (Mateus 5:31, 32) Me ngar aika el eru el taem, e a Jesus a milsaod el kirel a “laokreng.” A laokreng a uldimukl er a rulterau er tir, me a durs er a delongelir a reteru el diak lekaubuch, me a remengolchotaor, me a ousechelei a charm. Me a lsekum a chad el bechiil a mora laokreng e a bechil a sebechel el melilt el kmo ngdortii a chebechiielel me a lechub e ngdiak. Me a lsekum ngdortii a chebechiielel, e a Dios a omes er tir el terung el dikea lebechiil.

11. Ngera me a Kristiano a melilt el diak lorort er a chebechiielel alta e a bechil a mlora laokreng?

¹¹ Ka momtab er tiang, a Jesus a dimlak ledu el kmo a lsekum a bechiil chad a mora laokreng, e ngike el diak a kngtil el buch a kirel dortii a chebechiielir. El ua tiang, a bechiil redil a locha mo kongei el melemolem el bechil ngii el chad alta e ngmlo er a laokreng. E ngera uchul? E le ngii el redil a locha dirk betik a rengul er ngii e dirrek el kongei el ousubes er ngii e melasem loureor lobengkel el meleketek er a chebechiielir el mo ungil. Ngdirrek a lsekum ngdortii a chebechiielir e diak el lluut el mo bechiil, e ngmo chuarm er a bebil el mondai. El ua tiang, ngmo uangera uldesuel sel lebo er ngii a lousbech el kirel a klechad er ngii me a dirrek sel bo loureng a tekoi er a durs er a chebechiil? Ngmo sabisi? E tia el dertel a chebechiielir, ngera ngtomellii er a rengelekir? Ngmo meringel er ngii lomekeroul er tir er a chelsel a klemerang? (1 Korinth 7:14) Ngkmal bleketakl el kmo a lsekum a buch el diak a telemellel a ngiltii el mo merort er a chebechiielir e ngulterekokl el mo chelebangel a meringel el tekoi.

12, 13. (a) Ngera dilubech el mora chebechiielel a Hosea? (b) Ngera me a Hosea a liluut el nguu a Gomer, e ngera sebeched el suubii er tia el chebechiielel?

¹² A tekoi el dilubech el mora profet el Hosea a osisecheklid el mo medengelii a uldesuel a Dios el kirel a chebechiil. A Dios a dilu er ngii me bo el bechil a redil el ngklel a Gomer, el ngii a ‘mo mengoit er ngii’ e mo er ‘ngii a re ngelekel er ngii.’ A Gomer me a Hosea a mlo er ngii a ngelekir el sechal. (Hosea 1:2, 3) E a uriul e a Gomer a mlo er ngii a ngelekel el ta el redil me a ta el sechal, el locha ngelekel er a ta er a chad. Me alta Gomer a mlora laokreng el betok el taem, engdi a Hosea a di millemolem el bechil. Me a cherengel a taem, e ngii el Gomer a chilitii a Hosea e mlo sibai. Me nguaisei, engdi a Hosea a liluut el mo mecherar e nguu el mo remei. (Hosea 3:1, 2) A Jehovah a uluusbech er a Hosea el ochotii sel rolel e Ngmillemolem lousubes er a rechad er a Israel alta e tia el renged a dimlak el lemelemii a blakerreng er tir el mo er Ngii e dirrek el mlo mengull a ngodech el chelid. Me ngera sebeched el suubii er a chebechiielel a Hosea?

¹³ A lsekum a bechil a Kristiano a mora laokreng, e ngike el diak a telemellel el Kristiano a mo kirel el melilt a tekoi el bo loruul. A Jesus a dilu el kmo ngike el diak a kngtil el buch a ngar ngii a ungil luchul e ngsebechel dortii a chebechiil e mla mo mimokl el lmuut el mo bechiil. Me nguaisei, engdi ngdiak a telemellel a lsekum ngike el diak a kngtil a ngiltii el ousubes er a bechil. A Hosea a liluut el mo nguu a Gomer. Me a uriul er a lluut el mong, e a Hosea a dilu er ngii el kmo ngdiak el sebechel el lmuut el mo meruul a tekoi er a durs lobengkel a ngii di el chad. A Hosea a ‘dimlak bo lobengkel’ a Gomer el telkib el taem. (Hosea 3:3) Engdi cherengel a taem e a Hosea a locha liluut el mo obengkel a bechil. Tia el blekeradel a ochotii a rolel e a Dios a kilengei el lmuut el ngoititerir a rechad er a Israel, e dirrek el millemolem er a deleuill er ngii lobengterir. (Hosea 1:11; 3:3-5) Me tiang ngosisecheklid er a ngerang el kirel a chebechiil er chelecha el taem? A lsekum ngike el diak a kngtil el buch a lmuut el mo meruul a tekoi er a durs lobengkel  ngike el mlo mekngit el buch, e tiang a ochotii el kmo ngike el diak a telemellel el buch a mla ousubes er ngike el mlo mekngit. (1 Korinth 7:3, 5) Seikid e ngdikea ungil luchul e lorort er a chebechiil. Me a uriul er isei, e ngmla mo kirel a bechiil sechal me a bechiil redil el dmak el kaingeseu el meklemalt a uldesuir el mo omes er a chebechiielir el ua osengel a Dios.

14. A doltirakl er a 1 Korinth 7:10, 11, e ngera el tekoi a sebechel mo duubech er a chebechiil?

¹⁴ A rokui el Kristiano a kirir el oldanges a chebechiil el ua lurruul a Jehovah me a Jesus. Me nguaisei, engdi a rebebil er a rechad a diak loruul er tia el tekoi, e le kede rokui el diak demecherrungel. (Rom 7:18-23) Me ngdiak lemechas a rengud sel bo dodengei el kmo a rebebil el Kristiano er a irechar a mle chelebangel a meringel el blekeradel er a chelsel a chebechiielir. A Paulus a milluches el kmo “a redil kele longoit ku er a bechil.” Engdi a lebebil er a taem e tia el tekoi a dilubech.​—Monguiu er a 1 Korinth 7:10, 11.

15, 16. (a) Ngera el turrekong a dirk kirir a rubekel el meruul a lsekum ngmo er ngii a mondai er a chebechiielir, e ngera uchul? (b) E tiang mekerang e sebechel motaut a lsekum a bechil a chad a diak losiou er a Jehovah?

¹⁵ A Paulus a dimlak losaod el kmo ngua ngera el blekeradel a rulleterir a rubekel el mo chacheroid. Engdi kid a medengei el kmo ngdiak el mondai el ua tiang, a bechiil sechal a mlora laokreng. E le blo leuaisei, e a bechiil redil a mo er ngii a ungil luchul e ngdortii a chebechiil e sebechel lmuut el mo bechiil. A Paulus a milluches el meketeklii el kmo a bechiil redil el mo cheroid er a bechil a “kirel el melemolem el diak le bechiil, ma lechub e ng mo sumechii a delongelel ngii ma bechil e lmuut er ngii.” Me ngar osengel a Dios e ngdirk omes er tir el bechiil. A Paulus a milsaod el kmo ngar a chelsel a ngii di el mondai me a lechub a ringel el lechelebangel, e a lsekum e ngdimlak a ta er tir el mora laokreng, e ngkirir el rullii a turrekong er tir el lmuut el mo dmak el belkul a kmo te mo sumechokl a mondai er tir e melemolem el dmak el bechiil. Ngsebechir lolengit a ngeso er a remechuodel. E a remechuodel a diak el kirir el mo olab el mora tang, e ngbai sebechir el olengeseu er tir el ousbech er a Biblia.

¹⁶ Me nguaisei, engdi ngmekerang a lsekum a Kristiano a bechil a chad el diak losiou er a Jehovah? A lsekum ngmo er ngii a mondai er a chebechiielir, e ngsebechir el mo chacheroid? Ngdi ua dulsaod er a uchei, a Biblia a smodii el kmo ngdi ta el laokreng a sebechel mo uchul a dertel a chebechiil. Engdi a Biblia a diak losaod aike el uchul me a rubekel a mo chacheroid. A Paulus a milluches el kmo: “Ma lsekum a Kristiano el dil a bechil a chad el diak le Kristiano, e ngii el chad a di ungil ra rengul a kie el obengkel, e kele lorort ku er a chebechielel.” (1 Korinth 7:12, 13) Tia el tekoi a dirk oureor er chelecha el taem.

17, 18. Ngera uchul me a rebebil Kristiano a millemolem el bechiil el mo lmuut er a taem er a ringel?

 ¹⁷ Kuk ngar a bebil el blekeradel e a “chad el diak le Kristiano” a mla obeketakl a omerellel el kmo ngdiak el “ungil ra rengul a kie el obengkel” a bechil el redil. El ua tiang, nglocha kmal mekngit omerellel el bedul a bechil, el mo lmuut er a taem el sebechel el mo uchul a secherel me a lechub e ngkodellel. Nglocha diak lekengei el mesiou er ngii me a telungalek er ngii, me a lechub e ngrullii el kmal mo meringel er ngii el mesiou er a Dios. Ngar a chelsel chouaika el blekeradel, e a Kristiano el bechiil el redil a locha di mo ngii el melilt el kmo, alta ngbetok a tekoi el ledu bechil, engdi a omerellel a ochotii el kmo ngdiak el “ungil ra rengul a kie el obengkel” e seikid e ngmla mo kirel el mo cheroid er ngii. Engdi a rebebil el Kristiano el chelebangel er a osisiu el blekeradel a kilengei el melemolem el kiei lobengterir a rebecherir. Te mla outekangel e dirrek el millasem el loureor el meleketek er a chebechiielir. Me ngera uchul me te melilt el mo uaisei?

¹⁸ A lsekum a rubekel a mo chacheroid el tiaikid el blekeradel a uchul, e te dirk bechiil me te ulterekokl el mo chelebangel a ringel el uaike el dulsaod er a uchei. A apostol el Paulus a dirrek el silodii a ta er a uchul me a rubekel a melemolem el dmak. Ngmilluches el kmo: “Ele ngikel diak le Kristiano el chad a mla mechedaol el okiu a bechil, me ngikel diak le Kristiano el dil me ng mla mechedaol el okiu a bechil. Ele lak, e a re ngelekir a mo diak le ngar a belsachel er a re chedal a Dios, e ngdi mera er ngii e te ngar a belsachel.” (1 Korinth 7:14) Me a rebetok el Kristiano a tilbir el melemolem el dmak tir me a rebecherir el tir a diak losiou er a Jehovah alta e te chilarm er tia el meringel el blekeradel. Me te kmal mlo dmeu a rengrir el mlo sebechir loutekangel me a uriul e a rebecherir a mlo mesiou el ta er a Sioning er a Jehovah.​—Monguiu er a 1 Korinth 7:16; 1 Petrus 3:1, 2.

19. Ngera me ngar ngii a kmal betok lungil chebechiil er a chelsel a ongdibel er a Rekristiano?

¹⁹ A Jesus a silodii a ulekrael el kirel a dertel a chebechiil, e a apostol el Paulus a silodii a uleklatk el kirir a rebechiil el mo chacheroid. Me tirka el terung a mle sorir a remesiungel a Dios a bo loldanges a chebechiil. Meliuekl er a beluulechad er chelecha el taem, e ngkmal betok a ungil chebechiil er a chelsel a ongdibel er a Rekristiano. Nglocha sebechem el metik er a rebetok el dmeu a rengrir lobekel er a chelsel a ongdibel er kau, el tir a blak a rengrir el bechiil sechal el betik a rengrir er a rebecherir, me a dirrek el betik a rengrir el bechiil redil el olecholt a omengull el bedul a rebecherir. Tirka el rokui a ochotii el kmo a chebechiil a kmal sebechel modanges. Me kid me ngdirrek el sebechel mo dmeu a rengud e le rebetok el miliol el bechiil sechal me a redil a meketeklii el kmo a tekingel a Dios a klemerang el kmo: “Tia ia uchul ma chad a mo cheroid er a demal ma delal e mo bereked er a bechil, me tir el terung a mo tal chad.”​—Efesus 5:31, 33.