Tia el bades a diak lolekoi el uaisei. Ngbai melekoi el kirel a chad el blechoel el osiuekl a mondai me a lechub e ngkerior e lmuut el mekiis el belkul a kmo ngoutekangel.

Ka momtab aike el bades el ngar ruchei me a uriul er a Osisechakl 24:16. “Lak mua dengerenger el chad el melib a mo merechorech ma lechub e ng melai er a blil a melemalt el chad. Lak moruul a mekngit el omeruul el mor a blil. Ele melemalt el chad a mo euid el bo lobiou e mekiis, ngdi kerior a mo okngemedii a dengerenger. A lsekum a cherrouem a obiou, e lak molsiich er a rengum er ngii, me a bo lubuu, e lak bo el deu a rengum.”​—Osi. 24:15-17, NW.

A rebebil a omdasu el kmo a 16 el bades a melutk el kirel a chad el ruebet er a klengit engdi ngobult e lmuut el sumechii a deleongel er ngii me a Dios. A reteru el mengeteklel a klechelid el chad er a England a milluches el kmo a “rullisechakl er a ikelesia er a irechar me chelechang a blechoel lousbech er tia el bades” el ngar tiakid el rolel. Te dilechelii el kmo tia el uldasu a belkul a kmo, “a ungil chad a locha mo betok el rebet er a oberaod el klengit engdi ngdiak loridii a bltkil a rengul el mora Dios e lmuut el mekiis e le ngii el obult er a bek el taem.” A chad el meruul a mekngit a locha mo soal tia el omesaod. Nglocha mo omdasu el kmo alta ngdi blechoel ruebet er a klengit, engdi Dios a blechoel lousubes er ngii.

Engdi tia diak loltirakl er a mera el belkul a bades.

A tekoi er a Hebru el moiuid el “obiou” el ngar er a 16 me a 17 el bades a kakerous a usbechellel. Tia el tekoi a sebechel melutk el kirel a kmung ngerang el ruebet el moriou el ua kerbou el metilech er a rael, chad el ruebet er a chado, me a lechub e ngcheuatel el mongkangk. (Dut. 22:4, 8; Isa. 30:25) Engdi ngdirrek el sebechel el ngar ngii a kuk ta er a belkul el ua tiang: “A RUBAK a choitikikii a tal chad me ng di ungilbesul er sel kirel merael er ngii el rael, e mesebechakl er tirkel odeuir a rengul. A lsekum ng moubuu e ng diak di le merekol blengkangk, ele RUBAK a mo ngosuir el mekiis.”​—Psa. 37:23, 24.

Me nguaisei engdi ka momtab a tekingel a Professor Edward H. Plumptre el kmo: “A tekoi er a Hebru el kirel a [“obiou”] a diak a ta el losaod el kirel a ruebet er a klengit.” Sei a uchul me a ta er a chellimosk a smodii a 16 el kekerei el bades el kmo: “Ngkmal diak a belkul a demeringel lomekcharm er a rechedal a Dios e le te di mo ungilbesrir er a uriul, engdi a remekngit el chad a diak el sebechir!”

Me aika el rokui a olecholt el kmo a Osisechakl 24:16 a diak lolekoi er a derebet er a klengit, e ngbai melekoi er a bo dechelebangel a mondai me a lechub e ngringel, el betok el taem. Ngar tia el mekngit el beluulechad er chelechang, e a melemalt el chad a sebechel mo chemau a secher me a kuk bebil er a mondai. Ngdirrek el sebechel mo chuarm a meringel el odechelakl er a kabelment. Me nguaisei, engdi ngsebechel loumerang el kmo a Dios a mo ngosuir el outekangel e mo mesisiich. Molatk er a ildisel a taem el di blechoel el mo ungil a tekoi el kirir a remesiungel a Dios. E ngera uchul? Ngulterekokl a rengud el kmo a Jehovah “olengeseu er a rokui el ngar a chelebuul; e mengedidai er a rokui el ngariou a rengrir.”​—Psa. 41:1-3; 145:14-19.

Me a “melemalt el chad” a diak el deu a rengul e le rebebil a chelebangel a mondai. Ngbai mechelaod a rengul e le ngmedengei el kmo “ng ungil tirkel meluu er a Dios ele bek el tekoi a di mo ungilbesul.”​—Oli. 8:11-13; Job 31:3-6; Psa. 27:5, 6.